កសិករ​ដាំ​បន្លែ​​មួយ​ចំនួន​នៅ​ខេត្ត​កណ្ដាល​​ទុក​​កសិផល​ចោល​ពេញ​ដី​ដោយសារ​​គ្មាន​អ្នក​ទិញ​​ក្រោយ​ពេល​បិទ​ខ្ទប់​ភ្នំពេញ

ដោយ ម៉ៅ សុធានី
2021.04.22
Share on WhatsApp
Share on WhatsApp
កសិករ​ដាំ​បន្លែ​​មួយ​ចំនួន​នៅ​ខេត្ត​កណ្ដាល​​ទុក​​កសិផល​ចោល​ពេញ​ដី​ដោយសារ​​គ្មាន​អ្នក​ទិញ​​ក្រោយ​ពេល​បិទ​ខ្ទប់​ភ្នំពេញ បន្លែសាលាដស្រស់ៗ នៅ​ម្ដុំផ្សារ​នាគមាស និង​ដើមគ រាជធានី​ភ្នំពេញ ដែល​ជា​មជ្ឈមណ្ឌល​ទទួល និង​ចែកចាយ​បន្លែ​ទូទាំង​ប្រទេស ថត​កាល​ពី​ថ្ងៃ​ទី២ ខែមេសា មុនពេល​បិទខ្ទប់​បង្ការ​ជំងឺ​កូវីដ។
រូប៖ ពលរដ្ឋផ្ដល់ឱ្យ

កសិករ​​​ដាំ​បន្លែ​ជា​ច្រើន​គ្រួសារ​នៅ​ស្រុក​ស្អាង ខេត្ត​កណ្ដាល​ នាំ​គ្នា​ទុក​កសិផល​ចោល​ពេញ​ចម្ការ ដោយសារ​គ្មាន​ឈ្មួញ​ចូល​ទៅ​ទិញ ក្រោយ​ពេល​រដ្ឋាភិបាល​បិទ​ខ្ទប់​រាជធានី​ភ្នំពេញ និង​ក្រុង​តាខ្មៅ។ ស្ថានភាព​បែប​នេះ​ធ្វើ​ឱ្យ​ក្រុម​កសិករ​ព្រួយបារម្ភ​គ្មាន​ប្រាក់​ទិញ​ស្បៀង​ហូប​ចុក​នៅ​ពេល​ខាង​មុខ។ អ្នក​ជំនាញ​កសិកម្ម​ យល់​ថា រដ្ឋាភិបាល​ត្រូវ​តែ​ប្រញាប់​ដោះស្រាយ​បញ្ហា​នេះ​ជា​បន្ទាន់ ដើម្បី​សម្រួល​ដល់​ជីវភាព​រស់​នៅ​របស់​ប្រជាពលរដ្ឋ​ឱ្យ​បាន​ទាន់​ពេល​វេលា។

ក្រុម​ប្រជាកសិករ​នៅ​ស្រុក​ស្អាង​​លើក​ឡើង​ថា ផល​ដំណាំ​របស់​ពួកគាត់​ចាប់​ផ្ដើម​ស្រពោន​ស្វិត​ និង​ខូច​គុណភាព​បណ្ដើរៗ ហើយ​ដោយសារ​ដល់​អាយុ​ប្រមូល​ផល ប៉ុន្តែ​គ្មាន​អ្នក​បញ្ជា​ទិញ។

ប្រជាពលរដ្ឋ​រស់​នៅ​ភូមិ​ស្វាយ​តានី ឃុំ​ព្រែក​គយ ស្រុក​ស្អាង លោក ប៉េង សុខ​ឡាយ ​ប្រាប់​អាស៊ី​សេរី​នៅ​ព្រឹក​ថ្ងៃ​ទី២២ មេសា​ថា ដំណាំ​សាឡាត់ ស្ពៃ​ជ្រក់ និង​ខាត់ណា​ឈើ​របស់​លោក​ប្រហែល ២ហិកតារ កំពុង​ក្រៀម​ស្វិត​ពេញ​ចម្ការ ​ហើយ​អាច​នឹង​រលួយ​ខូច​អស់​នៅ ២សប្ដាហ៍​ខាង​មុខ ប្រសិន​បើ​នៅ​តែ​ពុំ​មាន​ឈ្មួញ​ចូល​ទៅ​ទិញ​នោះ។ កសិករ​វ័យ ៦០ឆ្នាំ​រូប​នេះ​ព្រួយបារម្ភ​ថា បើ​វិបត្តិ​ជំងឺ​កូវីដ​បន្ត​អូស​បន្លាយ​ពេល​ទៅ​មុខ​ទៀត នោះ​នឹង​ប៉ះពាល់​ដល់​ជីវភាព​រស់​នៅ​របស់​គ្រួសារ​លោក​ ជា​ពិសេស​គ្មាន​ប្រាក់​សង​ធនាគារ ដែល​លោក​បាន​ខ្ចី​គេ​ធ្វើ​ដើម​ទុន​ដាំ​ដុះ​កន្លង​មក៖ «ឥឡូវ​ស្ងាត់​ឈឹង​ហ្មង​ បើ​និយាយ​ទៅ​សាឡាត់​រាប់​រយ​តោន​ បន្លែ​និយាយ​ទៅ​គ្រប់មុខ​ទាំង​អស់ ព្រោះ​ដាំ​បន្ត​គ្នា ដូច​ថា​ឥឡូវ​ខ្ញុំ​ដាំ​ហើយ​គេ​ដាំ​ក្រោយ​ខ្ញុំ​អីចឹង​ ខ្ញុំ​លក់​បាន​មុន​អីចឹង​បន្តៗ អីចឹង​ទៅ។ តែ​ឥឡូវ​លក់​អត់​ចេញ​ខ្ញុំ​ក៏​បន្ថយ​អីចឹង​មក​ អា​ក្រោយ​ក៏​បន្ថយ​គាំ​ទាំង​អស់​គ្នា​ ចប់​តែ​ម្ដង​ អ្នក​ខ្លះ​ចង​ការ​ប្រាក់​គេ​ឥឡូវ​កុន​ហើយ។ គ្មាន​ពី​ណា​មក​អើត​​ពួក​ខ្ញុំ​ទេ​ ហើយ​បើ​សិន​ណា​រៀប​ចំ​ផ្សារ​រយៈ​ពេល​ខ្លី​ហ្នឹង​ឱ្យ​មាន​បន្លែ​ទៅ​ដល់​យើង​ទៅ​ដាក់​លក់​ហ្មង អា​ហ្នឹង​យើង​អាច​បាន​ខ្លះ​ បើ​សិន​ជា​អត់​អីចឹង​ទេ​ត្រូវ​អត់​ទាំង​អស់​ហើយ​ លក់​អត់​ចេញ​ហ្មង»

ដូច​គ្នា​នេះ​ដែរ ​កសិករ​នៅ​ភូមិ​ស្វាយ​តានី​ម្នាក់​ទៀត​ លោក រិន អ៊ុន ថ្លែង​ថា ​កសិករ​ដាំ​បន្លែ​​នៅ​តំបន់​​ពួក​លោក​ឆ្នាំ​នេះ​ឡុងចុង​ខ្លាំង​មិន​ធ្លាប់​ជួប​ប្រទះ​ទេ។ កសិករ​វ័យ ៥២ឆ្នាំ​រូប​នេះ ឱ្យ​ដឹង​ថា លោក​ដាំ​សាឡាត់ និង​ខាត់ណា​ឈើ នៅ​លើ​ផ្ទៃដី ២ហិកតារ ដោយ​ចំណាយ​អស់​ដើម​ទុន ១០លាន​រៀល ​(.០០០.០០០) ឬ​ប្រមាណ ២ពាន់ ៥រយ​ដុល្លារ ក្នុង​នោះ​ប្រាក់​ជាង ១ពាន់​ដុល្លារ​លោក​ខ្ចី​ពី​ធនាគារ​ ដោយ​សន្យា​នឹង​សង​គេ​វិញ​នៅ​ពេល​ប្រមូល​ផល​រួច​។ លោក​បន្ត​ថា ​ជីវភាព​គ្រួសារ​របស់​លោក​អាច​នឹង​ដុនដាប​កាន់​តែ​ខ្លាំង​ ប្រសិន​បើ​​នៅ​តែ​គ្មាន​ឈ្មួញ​ចូល​ទិញ​បន្លែ​របស់​គាត់​ទៀត​នោះ៖ «ខ្លាំង​ដល់​តែ​មែនទែន​ រក​អី​ប្រៀប​អត់​បាន​ទេ​ ព្រោះ​អត់​បាន​ចំណូល​ ចំណូល​ទាល់​តែ​យើង​ធ្វើ​បន្លែ​ហ្នឹង​បាន​យើង​មាន​ចំណូល​ខ្លះ​ ហើយ​ដល់​អត់​ទាំង​ស្រុង​ហើយ​វា​ខាត​ទាំង​ស្រុង​ហើយ។ ណា​មួយ​យើង​អត់​មាន​រក​អី​ក្រៅ​ពី​ហ្នឹង​វា​ត្រូវ​អត់​មាន​ស្បៀង​ហ្មង​ មិន​ដឹង​និយាយ​ថា​ម៉េច​វា​គាំង​ហ្មង​ឱ្យ​តែ​ដំណាំ​ចេញ​ទៅ​យើង​ចេះ​តែ​ដោះស្រាយ​បាន​ហើយ​ព្រោះ​ដំណាំ​យើង​ច្រើន​។​អ្នក​ដឹក​ទៅ​ភ្នំពេញ​យក​មក​ចោល​ចម្ការ​វិញ​ហ្នឹង​ចូល​អត់​ចុះ​គេ​អត់​ឱ្យ​លក់​ យក​មក​ចែក​គ្នា​ហូប​ទៅ»

ក្រុម​កសិករ​ទាំង​នេះ​អំពាវនាវ​សុំ​ឱ្យ​រដ្ឋាភិបាល​ជួយ​ទិញ​បន្លែ​របស់​ពួកគាត់​យក​ទៅ​លក់​បន្ត​នៅ​តំបន់​រាតត្បាត​ជំងឺ​កូវីដ១៩ នៅ​រាជធានី​ភ្នំពេញ ដើម្បី​ជួយ​សម្រួល​ដល់​ជីវភាព​រស់​នៅ​របស់​ពួក​គាត់។

ទាក់ទង​នឹង​បញ្ហា​នេះ​ អភិបាល​ខេត្ត​កណ្ដាល​លោក គង់ សោភ័ណ្ឌ ប្រាប់​អាស៊ី​សេរី​ថា អំឡុង​ពេល​នេះ​អាជ្ញាធរ​មិន​អាច​ជួយ​ដោះស្រាយ​អ្វី ឬ​ទិញ​បន្លែ​ពី​កសិករ​ទាំង​នោះ​យក​ទៅ​លក់​បន្ត​បាន​នោះ​ទេ ដោយសារ​ជំងឺ​កូវីដ១៩ កំពុង​តែ​ផ្ទុះ​ខ្លាំង​នៅ​ក្រុង​តាខ្មៅ និង​រាជធានី​ភ្នំពេញ។ ​លោក​បញ្ជាក់​ថា​ ស្ថានការណ៍​បែប​នេះ ប្រជាពលរដ្ឋ​អាច​យក​បន្លែ​របស់​ពួក​គាត់​ទៅ​ដាក់​លក់​នៅ​ទី​ផ្សារ​ដែល​អាជ្ញាធរ​ទើប​បង្កើត​នៅ​ក្រុង​តាខ្មៅ​បាន៖ «កន្លង​មក​ប៉ុន្មាន​ថ្ងៃ​មុន​គឺ​គាត់​យក​មក​លក់​នៅ​តាខ្មៅ​មួយ​ចំនួន ឥឡូវ​ខ្ញុំ​រៀបចំ​កន្លែង​មួយ​នៅ​ទល់​មុខ​ស្នាក់​ការ​ដែល​កំពុង​រៀប​ចំ​ធ្វើ​ថ្មី​ផ្លូវ​ជាតិ​លេខ ២១ហ្នឹង នៅ​ក្នុង​ដី ឡូត៍​ធំ​មួយ ដែល​ខ្ញុំ​ខ្ចី​គេ​ ហើយ​ខ្ញុំ​រៀបចំ​លក់​សម្រាប់​បោះ​ដុំ។ បងប្អូន​មក​ស្អាង​យក​មក​លក់​ហ្នឹង​បាន​ ហើយ​បាន​អ្នក​នៅ​ក្រុង​តាខ្មៅ​ហ្នឹង​គាត់​ចាប់​ផ្ដើម​ទៅ​ទិញ​ពី​ហ្នឹង​ហើយ​យក​ទៅ​លក់​ឱ្យ​ប្រជាពលរដ្ឋ​បោះ​រាយ​បន្ត​ទៅ​ទៀត»

កាល​ពី​ថ្ងៃ​ទី១៥ មេសា រដ្ឋាភិបាល​បាន​ដាក់​ចេញ​បម្រាម​យ៉ាង​តឹងរ៉ឹង​ មិន​ឱ្យ​ប្រជាពលរដ្ឋ​ធ្វើ​ដំណើរ​ឆ្លងកាត់​ខេត្ត​និង​ពី​តំបន់​មួយ​ទៅ​តំបន់​មួយ​ទៀត​នោះ​ទេ ដើម្បី​ទប់​ស្កាត់​ការ​ឆ្លង​រីក​រាល​ដាល​ជំងឺ​កូវីដ ១៩ ចូល​ទៅ​ក្នុង​សហគមន៍។ អាជ្ញាធរ​បាន​បិទ​ខ្ទប់​រាជធានី​ភ្នំពេញ និង​ក្រុង​តាខ្មៅ​ទាំង​ស្រុង ខណៈ​តំបន់​មួយ​ចំនួន​ក្នុង​រាជធានី​ភ្នំពេញ ត្រូវ​បាន​ចាត់​ទុក​ជា​តំបន់​ក្រហម ដែល​មិន​អនុញ្ញាត​ឱ្យ​ពលរដ្ឋ​ចេញ​ក្រៅ​ផ្ទះ​ជា​ដាច់​ខាត​ បើ​គ្មាន​ភាព​ចាំបាច់​បន្ទាន់​ទេ​នោះ។

ជាង​នេះ​ទៅ​ទៀត អាជ្ញាធរ​ក្រុង​ភ្នំពេញ​បាន​បិទ​ផ្សារ​សំខាន់ៗ មួយ​ចំនួន​ជា​បណ្ដោះ​អាសន្ន​សិន​ ដូចជា​ ផ្សារ​ដើម​គ ផ្សារ​អូរឫស្សី ផ្សារ​អូឡាំពិក ផ្សារ​កណ្ដាល និង​ផ្សារ​ទួល​សង្កែ​ជា​ដើម បន្ទាប់​ពី​រក​ឃើញ​អាជីវករ និង​អ្នក​ដើរ​ផ្សារ​មួយ​ចំនួន​បាន​ឆ្លង​ជំងឺ​កូវីដ-១៩។ ការ​បិទ​ផ្សារ​ធំៗ ទាំង​នេះ​ធ្វើ​ឱ្យ​អ្នក​លក់​បន្លែ​មួយ​ចំនួន​ ពិបាក​ក្នុង​ការ​ដឹក​បន្លែ​ដើម្បី​ចែក​ចាយ និង​លក់​បន្ត​ទៅ​ដល់​ប្រជាពលរដ្ឋ​ ហើយ​ពលរដ្ឋ​មួយ​ចំនួន​នៅ​រាជធានី​ភ្នំពេញ​ក៏​ពិបាក​រក​ទិញ​បន្លែ​ស្រស់ ដែល​មាន​តម្លៃ​សមរម្យ​យក​មក​បរិភោគ​ដែរ។

Deumkor_Vegetable_Market_041421_Pokpok21.jpg
ផ្សារបន្លែ​នៅ​ផ្សារ​ដើម​គ រាជធានី​ភ្នំពេញ កាល​ពី​ថ្ងៃ​ទី១៤ ខែមេសា ឆ្នាំ២០២១។ រូប៖ ពលរដ្ឋផ្ដល់ឱ្យ

ជុំវិញ​រឿង​នេះ អ្នក​ជំនាញ​កសិកម្ម​ និង​ជា​ស្ថាបនិក​គណបក្ស​ប្រជាធិបតេយ្យ​មូលដ្ឋាន​ បណ្ឌិត​ យ៉ង សាំង​កុមារ យល់​ថា ការ​ដែល​កសិករ​លក់​បន្លែ​មិន​ចេញ​នេះ​ បណ្ដាល​មក​ពី​អាជ្ញាធរ​បិទ​ខ្ទប់​តំបន់​មួយ​ចំនួន​នៅ​រាជធានី​ភ្នំពេញ ​ធ្វើ​ឱ្យ​ឈ្មួញ​កណ្ដាល​មិន​អាច​​ធ្វើ​ដំណើរ​ទៅ​ដឹក​បន្លែ​យក​ទៅ​លក់​នៅ​ទីផ្សារ​បាន។ បន្ថែម​ពី​នេះ លោក​ថា អាជ្ញាធរ​ពាក់ព័ន្ធ​​គ្មាន​ផែនការ​ច្បាស់លាស់ ដើម្បី​ដោះ​ស្រាយ​ផល​ប៉ះពាល់​របស់​ប្រជាពលរដ្ឋ​ អំឡុង​ពេល​នេះ​ទេ​។​លោក​បញ្ជាក់​ទៀត​​ថា ដើម្បី​ដោះស្រាយ​បញ្ហា​នេះ​ រដ្ឋាភិបាល​​ត្រូវ​​បង្កើត​​ផ្សារ​លក់​បន្លែ​ថ្មី​មួយ​ជា​បន្ទាន់ ​នៅ​​ក្បែរ​តំបន់​ដែល​បិទ​ខ្ទប់ ហើយ​ត្រូវ​​ជួយ​សម្រួល​ឱ្យ​ក្រុម​ឈ្មួញ​​​ អាច​ដឹក​បន្លែ​ឆ្លង​កាត់​រាជធានី​ភ្នំពេញ​ឱ្យ​បាន​​ងាយ​ស្រួល​និង​លឿន​ជាង​មុន៖ «ចេញ​សំបុត្រ​ចេញ​អី​វាយ​ត្រា​ឱ្យ​គាត់​ទៅ​ ហើយ​អន្តរាគមន៍​សម្របសម្រួល​តាម​ព្រំដែន​នៃ​ខេត្ត​របស់​ហ្នឹង​ដើម្បី​ឱ្យ​គាត់​ចេញ​ចូល​បាន​ស្រួល​ទៅ។ ដូច​គ្នា​ដែរ​ ហើយ​អ្នក​ត្រួតពិនិត្យ​ហ្នឹង​គឺ​យើង​មើល​ទៅ​ជាក់​ស្ដែង​គឺ​អីចឹង​មែន​ គាត់​មិន​មែន​ចង់​មក​ចូល​ភ្នំពេញ​ទេ ព្រោះ​ម្នាក់ៗ ខ្លាច​ហើយ​ឮ​ថា​ភ្នំពេញ​ឆ្លង​ខ្លាំង​។​ប៉ុន្តែ​វា​យើង​ត្រូវ​សរសើរ​លើក​ទឹក​ចិត្ត​គាត់​ឱ្យ​គាត់​ដឹក​ចូល​មក​អីចឹង​ទៅ។ ទី២ យើង​ត្រូវ​រៀប​ចំឡើង​វិញ​ឱ្យ​បាន​ត្រឹមត្រូវ​អី​ស្រួល​បួល​ព្រោះ យើង​បិទ​ទៅ​ភ្នំពេញ​ក៏​ស្ងាត់​ដែរ ជា​កន្លែង​ដែល​ងាយ​ស្រួល​ក្នុង​ការ​រៀបចំ​ប្រមូល​ផ្ដុំ​ បែង​បែក​បន្លែ»

បណ្ឌិត យ៉ង សាំងកុមារ និយាយ​ថា ប្រសិន​បើ​ស្ថានការណ៍​រាតត្បាត​ជំងឺ​កូវីដ​បន្ត​អូស​បន្លាយ​យូរ​ ហើយ​រដ្ឋាភិបាល​មិន​ប្រញាប់​ដោះ​ស្រាយ​រឿង​នេះ​ទេ ​នោះ​នឹង​ធ្វើ​ឱ្យ​ប៉ះពាល់​ធ្ងន់ធ្ងរ​ដល់​ជីវភាព​រស់​នៅ​របស់​កសិករ​ជា​មិន​ខាន។ លោក​ជឿ​ថា ក្រុម​កសិករ​ភាគ​ច្រើន​ខ្ចី​ប្រាក់​ពី​ធនាគារ​យក​មក​ធ្វើ​ដើម​ទុន​ដាំដុះ​ ដើម្បី​យក​ប្រាក់​ដោះ​ស្រាយ​ជីវភាព​គ្រួសារ ហើយ​រំពឹង​ថា នឹង​សង​គេ​វិញ​នៅ​ពេល​ប្រមូល​ផល​រួច។ ដូច្នេះ ពួក​គាត់​ប្រឈម​នឹង​ជំពាក់​បំណុល​វ័ណ្ឌ​ក​នៅ​ពេល​ខាង​មុខ បើ​ការ​ដាំ​បន្លែ​របស់​ពួក​គាត់​ខាត​ឡុងចុង​បែប​នេះ។

កន្លង​ទៅ​ លោកនាយក​រដ្ឋមន្ត្រី ហ៊ុន សែន បាន​ប្រកាស​ម្ដង​ហើយ​ម្ដង​ទៀត​ឱ្យ​ប្រជាពលរដ្ឋ​​បង្កើន​ការ​ដាំដុះ និង​ចិញ្ចឹម​សត្វ​ឱ្យ​បាន​ច្រើន​ ដើម្បី​បម្រើ​ទីផ្សារ​ក្នុង​ស្រុក​ឱ្យ​បាន​គ្រប់គ្រាន់ នៅ​អំឡុង​វិបត្តិ​ជំងឺ​កូវីដ-១៩។ លោក​ ហ៊ុន សែន​ ថែម​ទាំង​ប្រាប់​ទៀត​ថា ការ​រាតត្បាត​ជំងឺ​កូវីដ​នេះ គឺ​ជា​ឱកាស​មួយ ​ដល់​កសិករ​ខ្មែរ​ដាំដុះ​កសិកម្ម​លក់​បាន​ប្រាក់​ចូល​ច្រើន​។ ​ប៉ុន្តែ​នៅ​ពេល​ដែល​ប្រជាពលរដ្ឋ ខំ​ប្រឹង​ដាំ​បាន​ផល​ហើយ ស្រាប់តែ​គ្មាន​ទីផ្សារ​លក់ កសិផល​ ក្នុង​តម្លៃ​សមរម្យ​ទៅ​វិញ៕


កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល