"កម្ពុជា​ទំនង​មិន​អាច​រួចខ្លួន​ចេញ​ពី​«បញ្ជី​ប្រផេះ​»នៃ​ក្រុម​ប្រទេស​មាន​ហានិភ័យ​ខ្ពស់​ខាង​អំពើ​លាងលុយកខ្វក់"

ដោយ មាន ឫទ្ធិ
2022.02.04
Share on WhatsApp
Share on WhatsApp
"កម្ពុជា​ទំនង​មិន​អាច​រួចខ្លួន​ចេញ​ពី​«បញ្ជី​ប្រផេះ​»នៃ​ក្រុម​ប្រទេស​មាន​ហានិភ័យ​ខ្ពស់​ខាង​អំពើ​លាងលុយកខ្វក់" លោក​នាយករដ្ឋមន្ត្រី ហ៊ុន ​សែន។
រូប​ហ្វេសប៊ុក​លោក ហ៊ុន សែន

ក្រុម​អ្នកឃ្លាំមើល​នៅ​មិនទាន់​មាន​ទំនុកចិត្ត​ទាំងស្រុង​ថា កម្ពុជា​អាច​ត្រូវ​អង្គការ​​ពិភពលោក​ឃ្លាំមើល​អំពើ​លាងលុយកខ្វក់ ដក​ឈ្មោះ​ចេញ​ពី «​បញ្ជី​ប្រផេះ​» នៃ​ក្រុម​ប្រទេស​មាន​ហានិភ័យ​ខ្ពស់​ខាង​អំពើ​លាងលុយកខ្វក់​នោះ​ទេ​។ ពួកគេ​លើកទឹកចិត្ត​ដល់​កម្ពុជា​ឱ្យ​បន្ត​ចាត់វិធានការ​ពិតប្រាកដ​ប្រឆាំង​នឹង​អំពើ​លាងលុយកខ្វក់ ដោយ​ត្រួតពិនិត្យ​ឱ្យ​បាន​ច្បាស់លាស់​ពី​ប្រភព​នៃ​លំហូរ​ទុន​វិនិយោគ​របស់​បរទេស ជាពិសេស​ពី​ប្រទេស​កុម្មុយនិស្ត​ចិន។

អស់​រយៈពេល​ជាង​បី​()​ឆ្នាំ​ហើយ​ដែល​កម្ពុជា​បន្ត​ជាប់​ឈ្មោះ​ក្នុង​ចំណាត់ថ្នាក់​ជា​ក្រុម​ប្រទេស​មាន​ហានិភ័យ «​ខ្ពស់​» ខាង​អំពើ​លាងលុយកខ្វក់​ដែល​ពិភពលោក​ត្រូវ​បង្កើន​ការ​ឃ្លាំមើល​កាន់តែ​ខ្លាំង​។ ការ​ដាក់​ចំណាត់ថ្នាក់​នេះ ធ្វើឡើង​ដោយ​ក្រុម​ការងារ​ហិរញ្ញវត្ថុ (Financial Action Taskforce, FATF) ដែល​ជា​ស្ថាប័ន​ដ៏​មាន​ឥទ្ធិពល​ខាង​ឃ្លាំមើល​អំពើ​លាងលុយកខ្វក់​នៅ​ទូទាំង​ពិភពលោក។

ក្រោយ​ជាប់​ឈ្មោះ​រើខ្លួន​មិន​រួច​ចេញពី​បញ្ជី​ប្រផេះ​របស់​ពិភពលោក មន្ត្រីជាន់ខ្ពស់​មួយ​ចំនួន​នៃ​រដ្ឋាភិបាល​កម្ពុជា​បាន​បង្ហាញ​ក្តី​ព្រួយបារម្ភ និង​ភ័យខ្លាច​ថា បើ​កម្ពុជា​មិន​ព្រម​កែខ្លួន​នោះ​ទេ នោះ​អង្គការ​ឃ្លាំមើល​អំពើ​លាងលុយកខ្វក់​របស់​ពិភពលោក​នេះ អាច​នឹង​ទម្លាក់​កម្ពុជា​ចូលក្នុង «​បញ្ជីខ្មៅ​» នៃ​ប្រទេស​លាងលុយកខ្វក់​។ មន្ត្រី​ជាន់ខ្ពស់​ទាំងនោះ មាន​រាប់​ចាប់តាំងពី​រដ្ឋមន្ត្រី​មហាផ្ទៃ លោក ស ខេង ដល់​រដ្ឋមន្ត្រី​យុត្តិធម៌ លោក កើត រិទ្ធ ជាដើម​។ ជា​លទ្ធផល កម្ពុជា​បាន​ខ្នះខ្នែង​អនុវត្ត​តាម​ផែនការ​សកម្មភាព​មួយចំនួន​ដែល​ខ្លួន​សន្យា​ធ្វើតាម​ដើម្បី​ចូលរួម​ប្រយុទ្ធ​ប្រឆាំង​នឹង​អំពើ​លាងលុយកខ្វក់​ជាមួយ​អង្គការ​ពិភពលោក​នេះ ។ ក្នុង​នោះ មាន​ដូចជា​ការ​សើរើ​ធ្វើ​ច្បាប់​ប្រឆាំង​នឹង​ការ​សម្អាត​ប្រាក់​ឡើងវិញ និង​ការ​អនុម័ត​ច្បាប់​ស្ដីពី​ការ​ប្រឆាំង​ហិរញ្ញប្បទាន​ដល់​ការ​រីក​សាយភាយ​អាវុធ​មហា​ប្រល័យ និង​ច្បាប់​មួយ​ចំនួន​ទៀត កាល​ពី​ឆ្នាំ​២០២០ ជាដើម។

ក៏ប៉ុន្តែ ទន្ទឹម​នឹង​ការ​ប្តេជ្ញា​ចិត្ត​ទាំងនេះ ក្រុម​អ្នកឃ្លាំមើល​ហាក់​នៅ​មិន​ទាន់​ប្រាកដ និង​ជឿជាក់​នៅ​ឡើយ​ទេ ការណ៍​នេះ​អាច​នឹង​ធ្វើ​ឱ្យ​កម្ពុជា​រួច​ផុត​ពី​ចំណាត់ថ្នាក់​ក្នុង «​បញ្ជី​ប្រផេះ​» នៃ​ក្រុម​ប្រទេស​មាន​ហានិភ័យ​ខ្ពស់​ខាង​អំពើ​លាងលុយកខ្វក់។

នាយក​ប្រតិបត្តិ​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ មើលឃើញ​ថា ចាប់តាំងពី​មានការ​ដាក់បញ្ចូល​កម្ពុជា​ក្នុង «​បញ្ជី​ប្រផេះ​» នៃ​ក្រុម​ប្រទេស​លាងលុយកខ្វក់​របស់​ពិភពលោក​នេះ​មក ចំណាត់ថ្នាក់​នេះ​កំពុងតែ​ធ្វើ​ឱ្យ​ប៉ះពាល់​ដល់​ការ​វិនិយោគ​របស់​បរទេស​នៅ​កម្ពុជា និង​កេរ្តិ៍ឈ្មោះ​របស់​ប្រទេស​នេះ។ លោក​សង្កេត​ឃើញ​ថា មាន​ការ​ត្រួតពិនិត្យ និង​សួរនាំ​តឹងរ៉ឹង​ជាង​មុន​នៅ​តាម​ស្ថាប័ន​ធនាគារ ពាក់ព័ន្ធ​នឹង​ប្រភព​សាច់ប្រាក់​របស់​អតិថិជន ឬ​អ្នក​ប្រកប​អាជីវកម្ម​មួយចំនួន​។ លោក​បន្ត​ថា នេះ​ជា​ការ​វិវត្តន៍​មួយ​ដែល​មិន​ធ្លាប់​មាន​ពី​មុន​មក ក៏ប៉ុន្តែ លោក​ចង់​ឃើញ​រដ្ឋាភិបាល​ដាក់ចេញ​វិធានការ​ត្រួតពិនិត្យ​ប្រភព​សាច់ប្រាក់​របស់​អ្នក​វិនិយោគ​បរទេស​ឱ្យ​បាន​កាន់តែ​សកម្ម និង​ច្បាស់លាស់​ជាង​នេះ៖ «​សម្រាប់​ខ្ញុំៗ​នៅ​មាន​សុទិដ្ឋិនិយម​ថា កម្ពុជា​អាច​នឹង​ស្ថិត​នៅ​ក្នុង​ស្ថានភាព​មួយ​ដែល​អាច​ថា​ប្រសើរ​ជាង​មុន ប៉ុន្តែ​ក្រែងលោ ការ​ភ្លាត់ស្នៀត ឬ​ការវាយតម្លៃ​ណាមួយ​ដែល​ស្ថាប័ន​អន្តរជាតិ​គេ​រក​ឃើញ​ប្រភព​នៃ​ការ​ហូរ​ចូល​ដែល​មានការ​មន្ទិល នោះ​វា​ជា​រឿង​មួយ​ផ្សេងទៀត​។ ពីព្រោះ​យើង​ដឹង​ហើយ​ថា ការ​វិនិយោគ​មួយចំនួន​ដែល​ពាក់ព័ន្ធ​ជាមួយនឹង​ការ​លាង​លុយ​នេះ គេ​សំដៅ​ទៅលើ​អ្នក​វិនិយោគ​មួយ​ដែល​មិន​ត្រឹមត្រូវ ហើយ​នឹង​មាន​ចម្ងល់​ច្រើន​អំពី​ការ​ធ្វើ​ឱ្យ​មាន​លំហូរ​សាច់ប្រាក់​ចូល​មក​កម្ពុជា»

ក្តីបារម្ភ​ពី​កម្សោយ​នៃ​ការ​ត្រួតពិនិត្យ​លំហូរ​សាច់ប្រាក់​វិនិយោគ​របស់​បរទេស​ចូល​មក​កម្ពុជា​នេះ ក៏​ត្រូវ​អ្នកឃ្លាំមើល​មួយ​រូប​ទៀត​យល់​ឃើញ​ថា រដ្ឋាភិបាល​នៅតែ​មិន​ទាន់​ធ្វើ​បាន​នៅ​ឡើយ។ សកម្មជន​បរិស្ថាន និង​ជា​ស្ថាបនិក​អង្គការ​មាតា​ធម្មជាតិ លោក អេឡិចហាន់ដ្រូ ហ្គន់សាឡេស ដេវិដសុន (Alejandro Gonzalez-Davidson) ហៅ អាឡិច នៅតែ​យល់​ថា ចំណាត់ការ​កន្លងមក​របស់​រដ្ឋាភិបាល​ប្រឆាំង​នឹង​អំពើ​លាងលុយកខ្វក់ អាច​គ្រាន់តែ​ជា «​ឆាកល្ខោន​» ដែល​រដ្ឋាភិបាល​ធ្វើ​ឡើង​ដើម្បី​យក​ចិត្ត​ស្ថាប័ន​អន្តរជាតិ​ឱ្យ​ដក​កម្ពុជា​ចេញ​ពី «​បញ្ជី​ប្រផេះ​» នេះ​។ ក៏ប៉ុន្តែ លោក​ថា ធាតុ​ពិត​ជាក់ស្តែង រដ្ឋាភិបាល​នៅតែ​បណ្តែតបណ្តោយ​ឱ្យ​មាន​អំពើ​លាងលុយកខ្វក់​នេះ ព្រោះ​ជា​ផ្នែក​មួយ​នៃ​ផល​ប្រយោជន៍​របស់​ខ្លួន​ដែល​បាន​មក​ពី​អំពើពុករលួយ​៖ «ក្តី​បារម្ភ​របស់ខ្ញុំ គឺ​វា​គ្រាន់តែ​ជា​រឿងល្ខោន​ដែល​គេ​ធ្វើ​ដើម្បី​ជៀសវាង ឬ​ដើម្បី​កាត់បន្ថយ​ហានិភ័យ​ដែល FATF នឹង​ដាក់​កម្ពុជា​នៅក្នុង​បញ្ជីខ្មៅ ឬក៏​ដាក់​នៅក្នុង​បញ្ជី​ប្រផេះ​ដដែល ពីព្រោះ​នេះ​គឺជា​ហានិភ័យ​មួយ​។ ដូច្នេះ គេ​គ្រាន់តែ​ធ្វើ​រឿងល្ខោន​តិចតួច​ទៅ ដូចជា​ចាប់​ត្រី​តូច​នៅ​ប៉ុន្មាន​ឆ្នាំមុន ដូចជា​ពីរ​ឆ្នាំ​មុនគេ​ចាប់​នៅ​ព្រលាន​យន្តហោះ​ពីរ​នាក់ ឬ​បី​នាក់​ជា​ដើម​ទៅ ចេញ​ច្បាប់​អី​ដើម្បី​បន្លំ​ភ្នែក​របស់​អង្គភាព​អន្តរជាតិ ឬ​ជា​រដ្ឋាភិបាល​បរទេស»

មន្ត្រី​ព័ត៌មាន​នៃ​ក្រុម​ការងារ​ហិរញ្ញវត្ថុ (FATF) ដែល​ជា​អង្គការ​ឃ្លាំមើល​អំពើ​លាងលុយកខ្វក់​នៅ​ទូទាំង​ពិភពលោក មាន​មូលដ្ឋាន​នៅ​ក្រុងប៉ារីស (Paris) ប្រទេស​បារាំង (France) ប្រាប់​វិទ្យុ​អាស៊ីសេរី តាម​សារ​អេឡិចត្រូនិក​កាលពី​ថ្ងៃទី​០៣ ខែ​កុម្ភៈ ថា អង្គការ​នេះ​នឹង​ធ្វើ​សន្និបាត​ប្រចាំឆ្នាំ​របស់​ខ្លួន​ចាប់​ពី​ថ្ងៃទី​២២ ខែ​កុម្ភៈ ដល់​ថ្ងៃទី​៤ ខែមីនា ដើម្បី​ពិនិត្យ​វាយតម្លៃ​លើ​ផែនការ​សកម្មភាព និង​ការអនុវត្ត​របស់​ប្រទេស​ពាក់ព័ន្ធ ជុំវិញ​ការ​ប្រយុទ្ធ​ប្រឆាំង​នឹង​អំពើ​លាងលុយកខ្វក់​។ នៅ​ពេល​នោះ​ហើយ នឹង​មាន​ការសម្រេចចិត្ត​អំពី​ការ​ដាក់​ចំណាត់ថ្នាក់​ប្រទេស​ណាមួយ​នៅក្នុង​បញ្ជី​ប្រផេះ ឬ​បញ្ជីខ្មៅ។

ការ​វាយតម្លៃ​ចុងក្រោយ​កាល​ពី​ខែ​តុលា ឆ្នាំ​២០២១ របស់​ក្រុមការងារ​ហិរញ្ញវត្ថុ FATF ជុំវិញ​ស្ថានភាព​ប្រឆាំង​នឹង​អំពើ​លាងលុយកខ្វក់​នៅ​កម្ពុជា​ឱ្យដឹង​ថា ចាប់​តាំង​ពី​ឆ្នាំ​២០១៩​មក កម្ពុជា​បាន​ប្ដេជ្ញា​ខ្ពស់​ក្នុង​កម្រិត​នយោបាយ​ថា នឹង​ធ្វើ​ការ​ជាមួយ​ក្រុមការងារ​ហិរញ្ញវត្ថុ FATF និង ក្រុម​ប្រទេស​អាស៊ី​ប៉ាស៊ីហ្វិក (APG) ដើម្បី​ពង្រឹង​ប្រសិទ្ធភាព​នៃ​របប​ប្រយុទ្ធ​ប្រឆាំង​នឹង​អំពើ​លាងលុយកខ្វក់ និង​ហិរញ្ញប្បទាន​ភេរវកម្ម​។ ក៏ប៉ុន្តែ អង្គការ​នេះ​ព្រមាន​ថា កម្ពុជា​ត្រូវ​ចាត់​វិធានការ​បន្ទាន់​ផ្សេងៗ​ទៀត​ដែល​នៅ​សេ​សល់​ឱ្យ​បាន​ពេញលេញ​ដូចដែល​មាន​ចែង​ក្នុង​ផែនការ​សកម្មភាព ព្រោះ​ថា កម្ពុជា​បាន​ខកខាន​មិន​បាន​ធ្វើ​តាម​ទាន់​ពេល​វេលា​កំណត់​នោះ​ទេ។ កង្វះខាត​ទាំងនោះ​មាន​ដូចជា ការ​កែ​លម្អ​ការ​ចែក​រំលែក​ព័ត៌មាន​សម្ងាត់​ហិរញ្ញវត្ថុ​ទៅ​ដល់​អាជ្ញាធរ​អនុវត្ត​ច្បាប់ ការ​បង្កើន​ការ​ស៊ើបអង្កេត និង​ផ្ដន្ទាទោស​ក្នុង​អំពើ​លាងលុយកខ្វក់ និង​ការ​បង្កើន​សកម្មភាព​រឹប​អូស និង​បង្កក​ទ្រព្យ​របស់​ឧក្រិដ្ឋជន​ជាដើម។

កាលនោះ ក្រុម​ការងារ​ហិរញ្ញវត្ថុ FATF សម្ដែង​កង្វល់​របស់​ខ្លួន​ដែល​កម្ពុជា​បាន​ខកខាន​មិន​អាច​បំពេញ​បាន​តាម​ផែនការ​សកម្មភាព​ដែល​បាន​ដាក់​ចេញ និង​បាន​ផុតកំណត់​ទាំងស្រុង​កាលពី​ខែ​មករា ឆ្នាំ​២០២១​។ អង្គការ​នេះ​ជំរុញ​ឱ្យ​កម្ពុជា​ចាត់វិធានការ​ឱ្យ​បាន​ឆាប់រហ័ស​ដើម្បី​បំពេញ​តាម​ផែនការ​សកម្មភាព​ឱ្យ​បាន​នៅមុន​ខែកុម្ភៈ ឆ្នាំ​២០២២​នេះ ពីព្រោះ​ថាបើ​មិន​ដូច្នោះ​ទេ ក្រុមការងារ​ហិរញ្ញវត្ថុ FATF នឹង​សម្រេចចិត្ត​បន្ទាប់​មក​ទៀត​ជុំវិញ​ចំណាត់ថ្នាក់​របស់​កម្ពុជា​នេះ។

កាលពី​ចុងខែ​មករា រដ្ឋមន្ត្រី​ក្រសួង​យុត្តិធម៌ លោក កើត រិទ្ធ បាន​ដឹកនាំ​កិច្ចប្រជុំ​ក្រុម​ការងារ​នៃ​អនុ​គណៈកម្មការ​ចំពោះ​កិច្ច​អនុវត្ត​ផែនការ​សកម្មភាព​ជុំវិញ​បញ្ហា​ប្រយុទ្ធ​ប្រឆាំង​នឹង​អំពើ​លាងលុយកខ្វក់​នេះ​។ កិច្ចប្រជុំ​នេះ ធ្វើឡើង​ដើម្បី​ពន្លឿន​ការងារ​ប្រឆាំង​នឹង​អំពើ​លាងលុយកខ្វក់ ឬ​សម្អាត​ប្រាក់​ដើម្បី​ឱ្យ​កម្ពុជា​ទទួល​បាន​ការវាយតម្លៃ​ល្អ​ពី​អង្គការ​ឃ្លាំមើល​អំពើ​លាង​លុយ​កក​ខ្វក់​នៅ​ទូទាំង​ពិភពលោក។

លោក អាឡិច យល់​ថា ប្រសិនបើ​រដ្ឋាភិបាល​ពិតជា​មិន​ចង់ឱ្យ​កម្ពុជា​ធ្លាក់​ចូលក្នុង​«​បញ្ជីខ្មៅ​» នៃ​ក្រុម​ប្រទេស​លាងលុយកខ្វក់​មែន​នោះ នោះ​កម្ពុជា​ត្រូវ​ចាត់​វិធានការ​កាត់បន្ថយ​ទំនាក់ទំនង​មិន​ល្អ​ជាមួយ​ក្រុម​អ្នក​វិនិយោគ​ដែល​មាន​ប្រភព​មិន​ច្បាស់លាស់​ពី​ប្រទេស​ចិន។ លោក​យល់​ថា ការ​កើនឡើង​នៃ​ទំហំ​វិនិយោគ​បរទេស​របស់​ប្រទេស​ចិន​មក​ក្នុង​ប្រទេស​កម្ពុជានា​រយៈ​ពេល​ចុងក្រោយ​នេះ ជាពិសេស​ក្នុង​វិស័យ​អចលនទ្រព្យ អាច​ជាប់​ពាក់ព័ន្ធ​នឹង​អំពើ​លាងលុយកខ្វក់​៖ «​ប្រាកដ​ជា​ពាក់ព័ន្ធ​លុយ​មក​ពី​ចិន ដែល​មួយ​ចំនួន​ធំ​ឆ្លងតាម​រដ្ឋាភិបាល​ចិន។ មានន័យថា​ឆ្លងតាម​គណបក្ស​កុម្មុយនិស្ត​ចិន​ដែល​ជា​គណបក្ស​ប្រព្រឹត្តិ​អំពើពុករលួយ​ជា​ប្រព័ន្ធ តាម​បក្ខពួក មិន​ប្រជាធិបតេយ្យ ផ្ដាច់ការ ជា​បក្ស​នយោបាយ​ឃោរឃៅ​។ ក្នុង​ពេល​ដែល​លុយ​លក្ខណៈ​រាប់ពាន់​លាន​ដុល្លារ​ក្នុង​មួយឆ្នាំៗ​មកដល់​ប្រទេស​កម្ពុជា គឺ​មិនមែន​ត្រឹមតែ​រឿង​ការរំលោភ​សិទ្ធិមនុស្ស និង​រឿង​បំផ្លិចបំផ្លាញ​បរិស្ថាន និង​រឿង​ប្រព្រឹត្ត​អំពើពុករលួយ​ប៉ុណ្ណេះ​ទេ គឺ​អាច​មាន​មួយ​ផ្នែក​គឺជា​ការ​លាង​លុយកខ្វក់​នៅ​ចិន មក​វិនិយោគ មក​សម្អាត​នៅ​ប្រទេស​កម្ពុជា​ជាពិសេស​តាមរយៈ​អចលនទ្រព្យ»

ក្រោយ​កម្ពុជា​ជាប់​ឈ្មោះ​ក្នុង «​បញ្ជី​ប្រផេះ​» នៃ​ក្រុម​ប្រទេស​លាង​លុយ​កខ្វក់ ទាំង​សហភាព​អឺរ៉ុប​ក្តី និង​ទាំង​ស្ថាប័ន​ពង្រឹង​ការអនុវត្ត​ច្បាប់​ប្រឆាំង​ឧក្រិដ្ឋកម្ម​ហិរញ្ញវត្ថុ ឬ​ហៅ​កាត់​ថា FinCEN របស់​សហរដ្ឋអាមេរិក​ក្តី សុទ្ធតែ​បាន​ដាក់​បញ្ចូល​កម្ពុជា​ទៅ​ក្នុង​បញ្ជី​ឃ្លាំមើល​របស់​ខ្លួន​ដែល​តម្រូវ​ឱ្យ​ស្ថាប័ន​ពាក់ព័ន្ធ​ត្រូវតែ​បង្កើន​ការ​ឃ្លាំមើល​ចំពោះ​ប្រភព​លុយ​ចេញចូល​ប្រទេស​កម្ពុជា​។ លើស​ពី​នេះ​ទៀត កាល​ពី​ចុងឆ្នាំ​២០២១ សហរដ្ឋអាមេរិក​ក៏បាន​ណែនាំ​ដល់​ក្រុមហ៊ុន និង​វិនិយោគិន​ជនជាតិ​អាមេរិកាំង​ទាំងអស់​ឱ្យ​ប្រុងប្រយ័ត្ន​មុននឹង​មក​វិនិយោគ​លើ​វិស័យ​ហានិភ័យ​មួយចំនួន​នៅ​កម្ពុជា ជាពិសេស​វិស័យ​ហិរញ្ញវត្ថុ អចលនទ្រព្យ កាស៊ីណូ និង​ហេដ្ឋារចនាសម្ព័ន្ធ ព្រមទាំង​វិស័យ​កម្មន្តសាល និង​ឈើ​ហ៊ុប ជាដើម ព្រោះថា​វិស័យ​ទាំងនោះ​អាច​ជាប់​ពាក់ព័ន្ធ​នឹង​អំពើ​រំលោភ​សិទ្ធិមនុស្ស សកម្មភាព​ឧក្រិដ្ឋ ឬ​អំពើ​ពុករលួយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល