កម្ពុជានៅតែបរាជ័យមិនអាចរួចខ្លួនចេញពី «បញ្ជីប្រផេះ» នៃក្រុមប្រទេសមានហានិភ័យខាងអំពើលាងលុយកខ្វក់ ដែលតម្រូវឱ្យពិភពលោកបង្កើនការតាមដានក្នុងឆ្នាំ២០២២នេះ។ អង្គការឃ្លាំមើលអំពើលាងលុយកខ្វក់នៅលើពិភពលោក ឈ្មោះក្រុមការងារហិរញ្ញវត្ថុ (FATF) ដែលមានមូលដ្ឋាននៅទីក្រុងប៉ារីស (Paris) ប្រទេសបារាំង (France) កាលពីថ្ងៃទី៤ ខែមីនា បានសម្រេចបន្តដាក់កម្ពុជាស្ថិតក្នុង «បញ្ជីប្រផេះ» នៃក្រុមប្រទេសមានហានិភ័យខាងអំពើលាងលុយកខ្វក់ ដែលពិភពលោកត្រូវបង្កើនការតាមដាន។
អង្គការនេះ ជាថ្មីម្តងទៀត បានសម្តែងកង្វល់ជាខ្លាំងដែលកម្ពុជាខកខានមិនអាចបំពេញបានតាមផែនការសកម្មភាពដូចដែលបានដាក់ចេញកាលពីខែមករា ឆ្នាំ២០២១ ហើយដែលកម្ពុជាត្រូវកែប្រែជាបន្ទាន់ដើម្បីរួចខ្លួនចេញពី «បញ្ជីប្រផេះ» នេះ។ អង្គការឃ្លាំមើលអំពើលាងលុយកខ្វក់ដ៏មានឥទ្ធិពលនេះ ជំរុញយ៉ាងខ្លាំងក្លាដល់កម្ពុជាឱ្យបង្ហាញឱ្យអន្តរជាតិឃើញពីការវិវឌ្ឍន៍សំខាន់ៗយ៉ាងឆាប់រហ័សក្នុងការបំពេញតាមផែនការសកម្មភាពដែលកម្ពុជាត្រូវកែលម្អ ឱ្យបានត្រឹមខែមិថុនា ឆ្នាំ២០២២ ខាងមុខ។ អង្គការក្រុមការងារហិរញ្ញវត្ថុ FATF ព្រមានថា បើពុំដូច្នោះទេ ខ្លួននឹងពិចារណានូវជំហ៊ានបន្ទាប់មកលើកម្ពុជាពាក់ព័ន្ធនឹងបញ្ហានៃអំពើលាងលុយកខ្វក់នេះ។ បើតាមអង្គការនេះ ជំហ៊ានបន្ទាប់នេះ គឺសំដៅដល់ការអំពាវនាវដល់ប្រទេសសមាជិក និងយុត្តាធិការទាំងអស់នៅទូទាំងពិភពលោក ឱ្យបង្កើនការតាមដានត្រួតពិនិត្យលើរាល់ទំនាក់ទំនង និងប្រតិបត្តិការអាជីវកម្មទាំងអស់ជាមួយកម្ពុជា។
អស់រយៈពេលជាង ៣ឆ្នាំហើយ គិតចាប់តាំងពីខែកុម្ភៈ ឆ្នាំ២០១៩ ដែលកម្ពុជាបន្តជាប់ឈ្មោះក្នុង «បញ្ជីប្រផេះ» នៃក្រុមប្រទេសដែលពិភពលោកត្រូវបង្កើនការតាមដានខ្លាំងខាងអំពើលាងលុយកខ្វក់។ មន្ត្រីជាន់ខ្ពស់រដ្ឋាភិបាល ជាពិសេសរដ្ឋមន្ត្រីក្រសួងមហាផ្ទៃលោក ស ខេង ធ្លាប់ទទួលស្គាល់ថា កម្ពុជានឹង «ចប់» បើអង្គការពិភពលោកមួយនេះសម្រេចដាក់ចូលក្នុង «បញ្ជីខ្មៅ» នៃអំពើលាងលុយកខ្វក់។
កម្ពុជាជាប្រទេសមួយដែលល្បីថាជា «ឋានសួគ៌» នៃកន្លែងលាងលុយកខ្វក់នៅលើពិភពលោក ហើយដែលក្រុមអ្នកមានលុយមានអំណាចខ្មែរឃុបឃិតគ្នាប្រមូលលុយដែលបានមកពីអំពើពុករលួយ និងអំពើឧក្រិដ្ឋនានាបង្វិលយកទៅលាក់ទុកនៅក្រៅប្រទេស។ វិស័យដែលរងហានិភ័យខ្ពស់ខាងអំពើលាងលុយកខ្វក់នៅកម្ពុជា រួមមាន វិស័យធនាគារ ហិរញ្ញវត្ថុ វិស័យសំណង់ អចលនទ្រព្យ និងវិស័យកាស៊ីណូ។
សម្រាប់ឆ្នាំ២០២២នេះ នៅតំបន់អាស៊ីអាគ្នេយ៍ ក្រៅពីកម្ពុជា ប្រទេសមីយ៉ាន់ម៉ា (Myanmar) ឬភូមា (Burmar) និងប្រទេសហ្វីលីពីន (Philippines) ក៏ជាប់ឈ្មោះក្នុង «បញ្ជីប្រផេះ» នៃក្រុមប្រទេសដែលពិភពលោកត្រូវបង្កើនការឃ្លាំមើលខាងអំពើលាងលុយកខ្វក់នេះ។ មានប្រទេសសរុប ២៣ប្រទេស កំពុងជាប់ឈ្មោះក្នុង «បញ្ជីប្រផេះ» នេះ ខណៈប្រទេសកូរ៉េខាងជើង (Democratic People's Republic of Korea) និងប្រទេសអ៊ីរ៉ង់ (Iran) ជាប្រទេសពីរនៅលើពិភពលោកដែលជាប់ឈ្មោះក្នុង «បញ្ជីខ្មៅ» នៃក្រុមប្រទេសមានហានិភ័យខ្ពស់ខាងអំពើលាងលុយកខ្វក់ ដែលពិភពលោកមិនរាប់រក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។