លោក ហ៊ុន ម៉ាណែត ថា វាល​យន្តហោះ​ ថ្មី នៅ​ខេត្ត​កណ្ដាល ជា​ចក្ខុវិស័យ​របស់​លោក ហ៊ុន សែន តែ​មិន​បាន​បង្ហាញ​ចក្ខុវិស័យ​ដោះស្រាយ​ដីធ្លី​ជូន​ប្រជាពលរដ្ឋ

ដោយ ខាន់ លក្ខិណា
2024.03.12
លោក ហ៊ុន ម៉ាណែត ថា វាល​យន្តហោះ​ ថ្មី នៅ​ខេត្ត​កណ្ដាល ជា​ចក្ខុវិស័យ​របស់​លោក ហ៊ុន សែន តែ​មិន​បាន​បង្ហាញ​ចក្ខុវិស័យ​ដោះស្រាយ​ដីធ្លី​ជូន​ប្រជាពលរដ្ឋ វាលយន្តហោះ​អន្តរជាតិ​តេជោ ជា​វាល​យន្តហោះ​ថ្មី ដែលរដ្ឋាភិបាល​កំពុងកសាង​នៅក្នុងទឹកដីខេត្ត​កណ្ដាល ថត​ថ្ងៃ​ទី១២ ខែមីនា ឆ្នាំ២០២៤។
រូប៖ ហ្វេសប៊ុកលោក​ ហ៊ុន ម៉ាណែត

លោក ហ៊ុន ម៉ាណែត ថា ព្រះលាន​យន្តហោះ​អន្តរជាតិ​តេជោខេត្ត​កណ្ដាល នឹង​ផ្ដល់​ផល​ប្រយោជន៍​ដល់​ប្រជាពលរដ្ឋ​នៅ​ក្នុង​ខេត្ត​នេះ និង​ខេត្ត​ផ្សេង​ទៀត។ ប៉ុន្តែ​ប្រជាពលរដ្ឋ​រង​ផល​ប៉ះពាល់ ដោយសារ​គម្រោង​សាង​សង់​ព្រះលាន​យន្តហោះ​អន្តរជាតិ​តេជោ ស្នើ​ឱ្យ​លោក ហ៊ុន ម៉ាណែត ជួយ​ដោះស្រាយ​បញ្ហា​ដីធ្លី​ជូន​ពួកគាត់​ ដើម្បី​បង្ហាញ​ថា រដ្ឋាភិបាល​ពិត​ជា​មាន​ឆន្ទៈ ជួយ​លើក​កម្ពស់​ជីវភាព​រស់នៅ​របស់​ប្រជាពលរដ្ឋ​ដូច​ការ​លើក​ឡើង​នេះ​មែន។

ក្នុង​ពិធី​ពិនិត្យ​ការដ្ឋាន​សាង​សង់​ព្រះលាន​យន្តហោះ​អន្តរជាតិ​តេជោ នៅ​ស្រុកកណ្ដាលស្ទឹង ខេត្ត​កណ្ដាល នៅ​ថ្ងៃ​ទី១២ មីនា លោក​នាយករដ្ឋមន្ត្រី ហ៊ុន ម៉ាណែត ថ្លែង​ថា ព្រះលាន​យន្តហោះ​អន្តរជាតិ​តេជោ​នៅ​ខេត្ត​កណ្ដាល​នេះ មាន​សក្ដានុពល​សម្រាប់​ការ​អភិវឌ្ឍន៍​ទិស​នីរតី ដោយ​មាន​ការ​ភ្ជាប់​ទាំង​ផ្លូវទឹក និង​ផ្លូវ ​គោក។

លោក​បាន​អួត​អំពី​ព្រះលាន​យន្តហោះ​នេះ​ថា ជា​សមិទ្ធ​ផល​ដំបូង ដែល​បាន​បង្ហាញ​រូប​រាង​ជាក់ស្ដែង​នៅ​កម្ពុជា ហើយ​ជា​និមិត្ត​រូប​នៃ​ការ​រីក​ចម្រើន​របស់​កម្ពុជា​ផង​ដែរ។

លោក ហ៊ុន ម៉ាណែត៖ «ព្រះលាន​យន្តហោះ​ធ្វើ​ថ្មី​នេះ ទី១ ដោយសារ នៅ​លើ​ទឹក​ដី​ដែល​មាន​សុខ​សន្តិភាព បើ​ប្រទេស​គ្មាន​សន្តិភាព​យើង​មិន​ចាំបាច់​ធ្វើ​ព្រះលាន​យន្តហោះ ១៥០០ លាន​ដុល្លារ​ទេ សូម្បី​តែ​ក្រុមហ៊ុន​ក៏​ហ៊ាន​ដាក់​ទុន​ផង កុំ​អ្នក​វិនិយោគ​ទិញ​ត ទុក​លុយ​នៅ​តៃវ៉ាន់។ ឯកឧត្ដម​គាត់​មក​ពី​ ទុក​លុយ​នៅ​កូរ៉េ ទុក​លុយ​នៅ​ចិន ទុក​លុយ​នៅ​អង់គ្លេស​ទុក​នៅ​ប្រទេស​ណា​ជា​ជាង​យក​មក​ដាក់។ ប៉ុន្តែ​ហ៊ាន​យក​មក​វិនិយោគ​ហេដ្ឋារចនាសម្ព័ន្ធ​មួយ ដោយ​មើល​គិត​វែង​ឆ្ងាយ​ទៅ​ថ្ងៃ​អនាគត​ថា កម្ពុជា​ជា​ប្រទេស​ដែល​មាន​សន្តិភាព និង​ស្ថិរភាព »

លោក ហ៊ុន ម៉ាណែត ថា លោក​រំភើប​រហូត​ដល់​ព្រឺរោម ពេល​បាន​ឃើញ​ផ្ទាល់​ព្រះលាន​យន្តហោះ​អន្តរជាតិ​តេជោ​នេះ ។ ប៉ុន្តែ​លោក​នាយករដ្ឋមន្ត្រី ហ៊ុន ម៉ាណែត មិន​បាន​បង្ហាញ​ថា ត្រូវ​ដោះស្រាយ​ជូន​ប្រជាពលរដ្ឋ​ដែល​រង​គ្រោះ​ពី​ការ​រំលោភ​យក​ដីធ្លី សម្រាប់​ការ​សាងសង់​ព្រះលាន​យន្តហោះ​នេះ​ទេ។

គម្រោង​អភិវឌ្ឍន៍​ព្រះលាន​យន្តហោះ​ថ្មី លើ​ផ្ទៃដី​ជិត​បី​ពាន់​ហិកតារ (.៦០០) នេះ មាន​ភាព​ចម្រូងចម្រាស​តាំង​ពី​ដើម​មក ដោយសារ​អាជ្ញាធរ​បាន​កំណត់​តម្លៃ​ដី ក្នុង មួយ​ម៉ែត្រការ៉េ​ចន្លោះ​ពី ៣ដុល្លារ ដល់ ៨ដុល្លារ។

គម្រោង​នេះ លាតសន្ធឹង​លើ​ឃុំ៤ គឺ​ឃុំ​បឹងខ្យាង ឃុំ​អំពៅព្រៃ ឃុំ​ព្រែកស្លែង ក្នុង​ស្រុក​កណ្ដាលស្ទឹង ខេត្ត​កណ្ដាល និង​ឃុំ​ពត់សរ នៃ​ស្រុកបាទី ខេត្ត​តាកែវ។

ប្រជាពលរដ្ឋ​រស់នៅ​ឃុំ​បឹងខ្យាង​ដែល​រង​ផល​ប៉ះពាល់ ដោយសារ គម្រោង​សាង​ សង់​ព្រះលាន​យន្តហោះ​អន្តរជាតិ​តេជោ លោក ទួន វណ្ណៈ ប្រាប់​វិទ្យុ​អាស៊ី​សេរី​នៅ​ថ្ងៃ​ទី១២ មីនា ថា ពួកគាត់​ចំនួន ៦៤ គ្រួសារ​ទទួល​យក​ការ​ដោះដូរ​ដី​ភូមិ​ទាំង​បង្ខំ ​ដើម្បី​ទៅ​រស់នៅ​ទីកន្លែង​ផ្សេង ប៉ុន្តែ​សម្រាប់​សំណង​ដី​ស្រែ​តម្លៃ ៨ ដុល្លារ ក្នុង​មួយ​ម៉ែត្រការ៉េ ពួកគាត់​មិន​ទាន់​ទទួល​យក​ឡើយ។

លោក​ស្នើ​ទៅ​រដ្ឋាភិបាល​ដោះស្រាយ​វិវាទ​ដីធ្លី ទៅ​តាម​តម្លៃ​ទី​ផ្សារ​ដល់​ពួក​គាត់ ពី​ព្រោះ ​តម្លៃ​ដី​ស្រែ ៨ដុល្លារ ក្នុង​មួយ​ម៉ែត្រ​ការ៉េ មិន​អាច​យក​ទៅ​ទិញ​ដី ដើម្បី​ប្រកប​មុខ​របរ ឬ​យក​ទៅ​ទិញ​ដី​ស្រែ​វិញ​បាន​ឡើយ។

លោក ទួន វណ្ណៈ៖ «ការ​អភិវឌ្ឍ​នៅ​តំបន់​ខ្ញុំ បើ​និយាយ​ពី​ភាព​អយុត្តិធម៌​សម្រាប់​ប្រជាពលរដ្ឋ​នៅ​ភូមិ​ខ្ញុំ គឺ​អយុត្តិធម៌​ខ្លាំង ដោយ​សារ មាន​ការ​លំបាក​ជីវភាព​ពី​មាន​មក​ក្រ។ កាល​ពី​មុន​ខ្ញុំ​មាន​ស្រែ មាន​ចម្ការ​ធ្វើ តែ​មក​ឥឡូវ​អត់​មាន​ការងារ​ធ្វើ ហើយ​អត់​មាន​ស្រែ ចម្ការ ដើម្បី​ប្រកប​មុខរបរ​ទៀត»

លោក ទួន វណ្ណៈ ថា ពួកគាត់​រស់នៅ​មិន​មាន​សន្តិភាព និង​ស្ថិរភាព​នោះ​ទេ ពីព្រោះ​ពេល​ចេញ​ទាមទារ​ដំណោះស្រាយ​រឿង​ដីធ្លី​ពួកគាត់ តែង​រង​ការ​រឹត​ត្បិត​សិទ្ធិ​សេរីភាព។

លោក ទួន វណ្ណៈ៖ «ប្រជាពលរដ្ឋ​នៅ​លំបាក ហើយ​ការ​តវ៉ា​រឹតត្បិត​ទៀត។ សួរ​ថា តើ​សន្តិភាព ស្ថិរភាព​យ៉ាង​ម៉េច? អ៊ីចឹង​បើ​គាត់​គិត​ថា ជា​សន្តិភាព ស្ថិរភាព សូម​ប្រគល់​សិទ្ធិ និង​សេរីភាព​ជូន​ប្រជាពលរដ្ឋ ដោះស្រាយ​ទុក្ខ​លំបាក​ប្រជាពលរដ្ឋ​ជា​គឺ​ទុក្ខ​លំបាក​របស់​រដ្ឋាភិបាល អា​ហ្នឹង​បាន​ថា សន្តិភាព និង​ស្ថិរភាព»

ក្នុង​លិខិត​ចំហ​មួយ​របស់​ប្រជាពលរដ្ឋ កាល​ពី​ខែកក្កដា ឆ្នាំ២០២១ បាន​អះអាង​ថា គម្រោង​អភិវឌ្ឍន៍​ព្រះលាន​យន្តហោះ​អន្តរជាតិ​ភ្នំពេញ​ថ្មី​នេះ បាន​ធ្វើ​ឱ្យ​ប៉ះពាល់​ប្រជាពលរដ្ឋ ៣៣០គ្រួសារ និង​ដី​ទំហំ​ជាង ១លាន​ម៉ែត្រការ៉េ ដែល​ភាគ​ច្រើន​ ជា​ដី​មាន​បណ្ណ​កម្មសិទ្ធិ​ស្រប​ច្បាប់ ។

ប្រធាន​អង្គការ​សម្ព័ន្ធភាព​ការពារ​សិទ្ធិមនុស្ស​កម្ពុជា​ហៅ​កាត់​ថា ច្រាក់ (CHRAC) លោក រស់ សុដ្ឋា ស្នើ​ទៅ​រដ្ឋាភិបាល​ដោះស្រាយ​សំណង​សមរម្យ​ជូន​ប្រជាពលរដ្ឋ​ ដើម្បី​អាច​ដោះស្រាយ​បញ្ហា​ជីវភាព និង​ជា​ការ​ជួសជុល​ផ្លូវ​ចិត្ត​របស់​ប្រជាពលរដ្ឋ​ផង។

លោក​ថា៖ «ខ្ញុំ​ជឿជាក់​១រយភាគ​រដ្ឋាភិបាល​ក្ដី​ក្រុមហ៊ុន​ក្ដី​មាន​សមត្ថភាព​ក្នុង​ការ​ដោះស្រាយ​បញ្ហា​ហ្នឹង។ ដូច្នេះ ខ្ញុំ​លើក​ទឹក​ចិត្ត​យ៉ាង​ទទូច ឱ្យ​រាជរដ្ឋាភិបាល​លោក​យក​ចិត្ត​ទុក​ដាក់​ដោះស្រាយ​បញ្ហា​ហ្នឹង មិន​មែន​ជា​តូច​ប៉ុន្មាន​ទេ ឱ្យ​បាន​សមស្រប​ផង អា​ហ្នឹង​ប្រជាពលរដ្ឋ​របស់​រដ្ឋាភិបាល​ដែរ ជន​រង​គ្រោះ​ក្នុង​តំបន់​នោះ»

ក្រុមហ៊ុន​សាជីវកម្ម​វិនិយោគ​ក្រៅ​ប្រទេស​កម្ពុជា ហៅ​កាត់​ថា អូ.ស៊ី.អាយ.ស៊ី (OCIC) របស់​លោក ពុង ឃាវសែ ដែល​ជា​អ្នក​ជំនួញ​ស្និទ្ធ​នឹង​អតីត​នាយករដ្ឋមន្ត្រី​លោក ហ៊ុន សែន ទទួល​បាន​សិទ្ធិ​សាង​សង់​ព្រះលាន​យន្តហោះ​ខ្នាត​អន្តរជាតិ​មួយ​នេះ។ ព្រះលាន​យន្តហោះ​ថ្មី​នេះ វិនិយោគ​ក្នុង​ទឹក​ប្រាក់​ប្រមាណ ១.៥០០លាន​ដុល្លារ។

ព្រះលាន​ថ្មី​នេះ ជា​ប្រភេទ​ព្រះលាន​សម្រាប់​ចុះ​ចត​យន្តហោះ​ធំៗ ដែល​អាច​ហោះហើរ​ ឆ្លង​ទ្វីប ដូចជា ប្រភេទ​យន្តហោះ​ធុន​យក្ស អ៊ែរ.បើស (Airbus A380-800) និង ប៊ូអ៊ីង (Boeing 747-800) ជាដើម។ ប៉ុន្តែ គម្រោង​អភិវឌ្ឍន៍​ខ្នាត​យក្ស​នេះ បាន​ បង្កប់​នូវ​ទឹក​ភ្នែក​របស់​កសិករ​ជា​ច្រើន​គ្រួសារ។

លោក រស់ សុដ្ឋា ទទូច​ឱ្យ​រដ្ឋាភិបាល​ជួយ​ធានា​កុំ​ឱ្យ​មាន​ការ​រំលោភ​សិទ្ធិ​មនុស្ស​ ក្នុង​គម្រោង​វិនិយោគ​ខ្នាត​យក្ស​មួយ​នេះ ដែល​ធ្វើ​ឱ្យ​រារាំង​ដល់​កិច្ច​សហប្រតិបត្តិការ​ពេញ​លេញ​របស់​អ្នក​វិនិយោគ​ល្អៗ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។