របប​ក្រុងភ្នំពេញ​គ្រោង​ចំណាយ​ច្រើន​ជាង​ចំណូល​សម្រាប់​ឆ្នាំ​២០១៩

ដោយ វ៉ែន សុមេធ
2018-10-26
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន ថ្លែង​ក្នុង​កិច្ច​ប្រជុំ​សភា​សម្រេច​លុយ​ចោល​តួនាទី​ប្រធាន​ក្រុម​ភាគ​តិច ភាគ​ច្រើន នៅ​ថ្ងៃ​ទី​៣១ ខែ​មករា ឆ្នាំ​២០១៧។
លោក​នាយករដ្ឋមន្ត្រី ហ៊ុន សែន ថ្លែង​ក្នុង​កិច្ច​ប្រជុំ​សភា​សម្រេច​លុយ​ចោល​តួនាទី​ប្រធាន​ក្រុម​ភាគ​តិច ភាគ​ច្រើន នៅ​ថ្ងៃ​ទី​៣១ ខែ​មករា ឆ្នាំ​២០១៧។
RFA

សង្គម​ស៊ីវិល​សំដែង​ក្តី​កង្វល់​ចំពោះ ចំណាយ​ថវិកាជាតិ គ្មាន​ប្រសិទ្ធភាព និង​តម្លាភាព កម្រិត​របស់​របប​លោក ហ៊ុន សែន ក្រោយពេល​ទីស្ដីការ​គណៈរដ្ឋមន្ត្រី​របប​លោក ហ៊ុន សែន នៅ​ថ្ងៃ​សុក្រ​ទី​២៦ ខែ​តុលា នេះ បាន​អនុម័ត​ថវិកាជាតិ​សម្រាប់​ឆ្នាំ២០១៩ ដែល​កើន​ឡើង​រហូតដល់​ជាង ១១​ភាគរយ​បើ​ធៀប​នឹង​ថវិកាជាតិ​កាលពី​ឆ្នាំ២០១៨ ជាង​៦​ពាន់​លាន​ដុល្លារ។

របប​ក្រុងភ្នំពេញ​អនុម័ត​គម្រោង​ចំណាយ​ថវិកាជាតិ​ឆ្នាំ​២០១៩ ដល់​ទៅ​ជាង​៦.៧​ពាន់​លាន​ដុល្លារ​អាមេរិក កើន​ឡើង ១១,៤ ភាគរយ លើស​ឆ្នាំ​ចាស់ ខណៈ​កម្ពុជា​ជំពាក់​បំណុល​បរទេស​កាន់​តែ​ច្រើន។

របាយការណ៍ ក្រសួង​សេដ្ឋកិច្ច និង​ហិរញ្ញវត្ថុ នៅ​ថ្ងៃ​ទី​២៦ តុលា ឲ្យ​ដឹង​ថា កញ្ចប់​ថវិកា​រដ្ឋ​សម្រាប់​ឆ្នាំ​២០១៩ ត្រូវ​បាន​ក្រសួង​សេដ្ឋកិច្ច និង​ហិរញ្ញវត្ថុ អះអាង​ថា ត្រូវ​ចំណាយ​អាទិភាព​ទៅលើ​តម្រូវ​ការ​ចាំបាច់ និង​តម្រូវការ​អាទិភាព​របស់​ក្រសួង ស្ថាប័ន ដើម្បី​សម្រេច​គោលនយោបាយ​រួម​របស់​របប​ក្រុងភ្នំពេញ ដែល​ផ្ដោត​លើ ការ​អភិវឌ្ឍ​ធនធានមនុស្ស ការ​កសាង​ហេដ្ឋារចនាសម្ព័ន្ធ​រូបវន្ត ការ​បញ្ចុះ​ថ្លៃ​អគ្គិសនី និង​ទឹក​ស្អាត ការជួសជុល និង​ថែទាំ​ហេដ្ឋារចនាសម្ព័ន្ធ​រូបវន្ត ដែល​រង​ផល​ប៉ះពាល់​ដោយសារ​ទឹកជំនន់ ការ​ធ្វើ​ពិពិធ​កម្ម​សេដ្ឋកិច្ច ការ​ពង្រីក​វិសាលភាព និង​ពង្រឹង​គុណភាព​សេវា​សាធារណៈ គ្រប់​ប្រភេទ ពិសេស​សេវា​អប់រំ សុខាភិបាល សេវា​យុត្តិធម៌ សេវា​នៅ​មូលដ្ឋាន​ចាំបាច់​ដទៃ និង​ការ​ពង្រឹង​សមត្ថភាព​ស្ថាប័ន ទាំង​នៅ​ថ្នាក់​ជាតិ និង​ថ្នាក់ក្រោម​ជាតិ ព្រមទាំង​ការអនុវត្ត​របប​គាំពារ​សង្គម ដោយ​ឈរ​លើ​គោលការណ៍​ប្រសិទ្ធភាព ទាំង​ក្នុង​កម្រិត​វិភាជន៍ និង​ទាំង​ក្នុង​កម្រិត​ប្រតិបត្តិការ និង​បច្ចេកទេស។ សេចក្ដី​ព្រាង​ច្បាប់​ថវិកា​បញ្ជាក់​ថា ក្រសួង​ការពារជាតិ​នឹង​ទទួល​បាន ជាង ៦​រយ​លាន​ដុល្លារ វិស័យ​សន្តិសុខ និង​ការពារ​ជាតិ​បាន​ទទួល ជាង ១​ពាន់​លាន​ដុល្លារ របប​សង្គម​ជិត ២ពាន់​លាន​ដុល្លារ និង​ថវិកា សង្គ្រោះ​បន្ទាន់​ជាង ១ពាន់​លាន​ដុល្លារ។

នាយក​ប្រតិបត្តិ​មជ្ឈមណ្ឌល​ប្រជាពលរដ្ឋ​ដើម្បី​ការអភិវឌ្ឍន៍ និង​សន្តិភាព លោក យង់ គិមអេង យល់ថា កន្លងមក​របប​ក្រុងភ្នំពេញ បាន​ចាយវាយ​ថវិកា​រដ្ឋ​ចំ​វិស័យ​អាទិភាព និង​បាន​ល្អ ដោយ​អន្លើៗ និង​មាន​ការ​ចាយវាយ​ខ្លះ នៅ​តែ​មាន​បញ្ហា។ បើ​ទោះ​យ៉ាងណា លោក​យល់​ថា នៅ​ពេល​មាន​បង្កើន​ការ​ចំណាយ​បែបនេះ របប​ក្រុងភ្នំពេញ ត្រូវ​បង្កើន​យន្តការ​រឹត​បន្តឹង​ពី​តម្លាភាព​នៃ​ការចាយវាយ បន្ថែម​ទៀត ដើម្បី​ឲ្យ​ប្រាកដ​ថា ថវិកាជាតិ​មិន​ត្រូវ​បាន ហូរ​ចូល​ហោប៉ៅ របស់​មន្ត្រី ឬ​ហោប៉ៅ​ឯកជន៖ «ក្នុង​នោះ​ដែរ ប្រសិនបើ​កញ្ចប់​ថវិកា​កាន់​តែ​មាន ការ​កើន​ឡើង​ច្រើន ក៏​វា​ត្រូវតែ​ទាក់ទង​រឹត​បន្តឹង​ពី​ប្រព័ន្ធ​តម្លាភាព​កាន់តែ​ខ្លាំង​ឡើង​ផង​ដែរ​បាទ»

លោក យង់ គឹមអេង ផ្ដល់​អនុសាសន៍​ថា ដើម្បី​ឲ្យ​ការចាយវាយ​ថវិកាជាតិ សម្រាប់​ឆ្នាំ​២០១៩ មាន​ប្រសិទ្ធភាព របប​ក្រុងភ្នំពេញ គួរ​ពង្រឹង​ការ​ធ្វើ​សវនកម្ម​ជាតិ ពង្រឹង​ប្រសិទ្ធភាព​អង្គភាព​ប្រឆាំង​អំពើ​ពុករលួយ និង​ពង្រឹង​យន្តការ ដែល​មាន​ស្រាប់ ឲ្យ​ធានា​នូវ​ការចាយវាយ​តាម​ស្ថាប័នរដ្ឋ​មាន​តម្លាភាព និង​ប្រសិទ្ធភាព​ខ្ពស់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល