អ្នកឃ្លាំមើលជំរុញឱ្យរដ្ឋាភិបាលមានវិធានការលើវិបត្តិសេដ្ឋកិច្ច ខណៈឧកញ៉ាមួយចំនួន និងប្រជាពលរដ្ឋរាប់សែននាក់ កំពុងរងផលប៉ះពាល់ដោយផ្ទាល់ ។ ពួកគេលើកឡើងថា បើមិនមានវិធានការទាន់ពេលទេ នោះពលរដ្ឋដែលមានសេដ្ឋកិច្ចទន់ខ្សោយ នឹងរងផលប៉ះពាល់កាន់តែខ្លាំង ដែលអាចឈានដល់កើតមានវិបត្តិសង្គមផ្សេងៗទៀតផង។
អ្នកឃ្លាំមើលការអភិវឌ្ឍសង្គម ដែលមានជំនាញផ្នែកសេដ្ឋកិច្ច និងសង្គមជំរុញឱ្យរដ្ឋាភិបាលដាក់ចេញវិធានការបន្ទាន់មួយ ព្រោះបញ្ហាវិបត្តិសេដ្ឋកិច្ចនិងបំណុលឈានដល់ចំណុចធ្ងន់ធ្ងរហើយ។
បណ្ឌិតសេដ្ឋកិច្ច លោក សុក ហាច លើកឡើងថា កម្ពុជាមានវិបត្តិសេដ្ឋកិច្ចធ្ងន់ធ្ងរ គឺបណ្ដាលមកពីរងផលប៉ះពាល់ពីឥទ្ធិពលជំងឺរាតត្បាតកូវីដ១៩ និងសង្គ្រាមនៅអ៊ុយក្រែន។ លោកបន្តថា ចំណូលចូលក្នុងប្រទេសទាំងវិស័យទេសចរណ៍ ការវិនិយោគ និងការលក់ធនធានធម្មជាតិ ស្ថិតក្នុងស្ថានភាពលំបាក។
ទោះយ៉ាងណា លោកបញ្ជាក់ថា បើទោះជាប្រទេសផ្សេងទៀត ដូចជាវៀតណាម និងថៃ ដែលរងផលប៉ះពាល់ពីជំងឺកូវីដ១៩ និងសង្គ្រាមនៅអ៊ុយក្រែនដែរនោះ ក៏សេដ្ឋកិច្ចរបស់ពួកគេងើបឡើងលឿនជាងកម្ពុជា។
លោក សុក ហាច៖ «ស្ថានភាពសេដ្ឋកិច្ចស្រុកខ្មែរយើងពិបាកគឺពិបាកខ្លាំង។ យើងដឹងហើយគ្រប់គ្នាទទួលផលវិបាកពីកូវីដ១៩ ប៉ុន្តែកូវីដ១៩ ហើយយើងទទួលផលវិបាកជាប់ទាក់ទងជាមួយសង្គ្រាមនៅប្រទេសអ៊ុយក្រែន។ ប្រទេសណាក៏ដូចប្រទេសណាដែរ។ ក្នុងការទទួលហ្នឹងប៉ុន្តែប្រទេសខ្មែរយើងដូចធ្ងន់ធ្ងរជាងគេ ដោយសារសេដ្ឋកិច្ចយើងមិនទាន់រឹងមាំទេ សេដ្ឋកិច្ចយើងនៅខ្សោយ»។
នៅក្នុងរយៈពេល៤ខែដំបូង នៃឆ្នាំ២០២៣នេះ មានឧកញ៉ា ៣រូបដែលជួបបញ្ហាវិបត្តិហិរញ្ញវត្ថុ ឬក្ស័យធនគឺអ្នកស្រី ម៉ន ដានី ម្ចាស់បុរី KP លោក ជា សារ៉ន ប្រធានក្រុមហ៊ុន បុរីនិងផ្ទះល្វែង និងលោក នួន អ៊ក ប្រធានក្រុមហ៊ុនអចលនទ្រព្យមួយ។
ឧកញ៉ាទាំង៣រូបនេះជួបបញ្ហាដែលក្នុង ១ក្រុមហ៊ុនមានពលរដ្ឋពីរាប់ពាន់ទៅរាប់ម៉ឺននាក់បញ្ជាក់ថា ពួកគេខាតបង់ជាមួយក្រុមហ៊ុនទាំងនេះ ហើយកំពុងប្រឈមការបង់ប្រាក់សងទៅធនាគារ។
នៅក្នុងខែមីនា ឆ្នាំ២០២៣ ក្រសួងការងារក៏ប្រកាសពីរោងចក្រជិត១០០ បានបិទទ្វារ ហើយកម្មករជាង ៣ម៉ឺននាក់ជួបបញ្ហាសេដ្ឋកិច្ច ត្រូវការប្រាក់ឧបត្ថម្ភពីរដ្ឋ។
ប្រធានកម្មវិធីប្រឆាំងការជួញដូរមនុស្ស និងទេសន្តរប្រវេសន៍ នៃអង្គការសង់ត្រាល់ លោក ឌីថេ ហូយ៉ា ថ្លែងថា ចំនួនពលរដ្ឋខ្មែរសម្រុកទៅធ្វើការនៅប្រទេសថៃទាំងខុសច្បាប់ និងស្របច្បាប់ហាក់កើនឡើង។ លោកបន្តថា មូលហេតុដែលពលរដ្ឋ ខ្មែរសម្រុកឆ្លងដែនទាំងគ្រោះថ្នាក់នេះ ដោយសារវិស័យសំខាន់ៗដែលពួកគេធ្លាប់ទទួលបានចំណូល ពីមុននោះត្រូវបានបាត់បង់។
លោក ឌីថេ ហូយ៉ា៖ «វិស័យកាត់ដេរនាំចេញសំលៀកបំពាក់ អាហ្នឹងជាវិស័យដែលផ្តល់ការងារដល់ពលរដ្ឋយើងបានច្រើន។ ប៉ុន្តែយើងឃើញមួយរយៈក្រោយហ្នឹងមានការបិទរោងចក្រសហគ្រាសច្រើនដែរ។ មួយទៀតយើងឃើញវិស័យដែលកើនដែរនោះ គឺសំណង់ ប៉ុន្តែយើងបានសាកសួរពលរដ្ឋយើងតាមមូលដ្ឋានហើយគាត់ថា ធ្វើការសំណង់នៅភ្នំពេញចាញ់ទៅថៃ។ អ៊ីចឹងភាគច្រើនគាត់អត់សូវធ្វើចំណាកស្រុកទៅសំណង់នៅភ្នំពេញទេ គឺគាត់ច្រើនតែត្រលប់ទៅថៃវិញ»។
វិទ្យុអាស៊ីសេរីមិនអាចទាក់ទងអ្នកនាំពាក្យរដ្ឋាភិបាលលោក ផៃ ស៊ីផាន និងអ្នកនាំពាក្យក្រសួងសេដ្ឋកិច្ច និងហិរញ្ញវត្ថុលោក មាស សុខសេនសាន ដើម្បីសុំការអត្ថាធិប្បាយ ជុំវិញបញ្ហានេះបានទេ នៅថ្ងៃទី៧ ខែឧសភា។
ចំណែកលោកនាយករដ្ឋមន្ត្រី ហ៊ុន សែន តែងតែលើកឡើងជាញឹកញាប់ថា សេដ្ឋកិច្ចកម្ពុជាមានភាពរឹងមាំទោះឆ្លងកាត់វិបត្តិកូវីដក៏ដោយ។ លោកក៏បានចំណាយថវិកា ជាង២០០លានដុល្លារក្នុងការរៀបចំការប្រកួតកីឡាស៊ីហ្គេម ហើយមិនយកថ្លៃស្នាក់នៅ និងអាហារពីគណៈប្រតិភូបរទេសទៀតផង។
ជុំវិញបញ្ហាវិបត្តិសេដ្ឋកិច្ចនេះ អ្នកសេដ្ឋកិច្ច លោក សុក ហាច និងជាអនុប្រធានគណបក្សភ្លើងទៀនផងនោះ ថ្លែងថា រដ្ឋាភិបាល គួរមានវិធានការទប់ទល់ដើម្បីកុំឱ្យបញ្ហាសេដ្ឋកិច្ចកាន់តែធ្លាក់ធ្ងន់ធ្ងរថែមទៀត។
លោក សុក ហាច៖ «អ្នកទាំងអស់គ្នាជាពិសេសអ្នកនយោបាយដែលកំពុងកាន់អំណាចសព្វថ្ងៃនិងអ្នកនយោបាយដែលរំពឹងថា នឹងកាន់អំណាចនៅពេលក្រោយហ្នឹងត្រូវមានផែនការឱ្យបានច្បាស់លាស់ក្នុងការដោះស្រាយបញ្ហាឱ្យពលរដ្ឋហ្នឹង គឺគាត់បាត់បង់ការងារ អត់មានការងារថ្មីនៅក្នុងស្រុកយើងឬក៏មានហើយហ្នឹងក៏បាត់បង់ទៀត»។
អ្នកសិក្សាផ្នែកសង្គម និងនយោបាយ លោក ប៉ោ មករា លើកឡើងថា វិបត្តិពលរដ្ឋធ្វើចំណាកស្រុក និងការរឹបអូសទ្រព្យសម្បត្តិអាចកើនឡើងច្រើន បើមិនមានការទប់ស្កាត់ឱ្យទាន់ពេល ព្រោះបញ្ហាវិបត្តិសេដ្ឋកិច្ច កំពុងកើតមានទាំងចំពោះអ្នកមាន និងអ្នកក្រ។
លោក ប៉ោ មករា៖ «មានបញ្ហាសេដ្ឋកិច្ចហើយគឺប៉ះពាល់ទាំងអស់គ្នា។ អ៊ីចឹងពេលដែលឃើញឧកញ៉ាមហាសេដ្ឋីមួយចំនួនធំៗនៅស្រុកខ្មែរ យើងមួយចំនួនដែលមានបញ្ហាយើងថា ជាបញ្ហារបស់អ្នកមានមិនមែនជាបញ្ហា របស់អ្នកក្រ។ ប៉ុន្តែវានឹងរាលដាលដល់អ្នកក្រ ហើយបញ្ហាអ្នកក្រនិងរាលដាលដល់អ្នកមានដែរ។ អ៊ីចឹងអ្នកណាៗក៏ពឹងអាស្រ័យគ្នា ដូច្នេះរដ្ឋាភិបាលត្រូវមានវិធានការ គឺវិធានការបន្ធូរបន្ថយនៃការសងត្រលប់ទៅវិញទៅធនាគារ»។
បើទោះជារដ្ឋាភិបាលនៅតែបញ្ជាក់ពីសេដ្ឋកិច្ចកម្ពុជាបន្តរីកចម្រើនក៏ដោយ ក៏សន្ទុះពលរដ្ឋសម្រុកឆ្លងដែនទាំងខុសច្បាប់ទៅរកការងារធ្វើនៅប្រទេសថៃមិនថយចុះទេ។ នៅចុងខែមេសាកន្លងទៅនេះ ពលករខ្មែរជិត ១ពាន់នាក់ត្រូវសមត្ថកិច្ចថៃចាប់ឃុំខ្លួនពីបទមិនមានឯកសារស្របច្បាប់ ដែលក្នុងនោះមានទាំងការដាក់ច្រវាក់ចងជាក្រុមៗទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។