កសិករមួយចំនួននៅខេត្តសៀមរាបបានបង្ខំចិត្តបោះបង់មុខរបរដាំដំឡូងមីដោយសារតែតម្លៃដំឡូងដែលទើបតែប្រមូលផល ធ្លាក់ថ្លៃខ្លាំង ធ្វើឱ្យពួកគាត់ខាតបង់ច្រើន និងប្រឈមបញ្ហាបំណុល។ពួកគាត់ស្នើឱ្យរដ្ឋាភិបាលអនុវត្តពាក្យសន្យា កាលពីមុនបោះឆ្នោតជាតិអាណត្តិទី០៧ ដែលគណបក្សកាន់អំណាចដើរឃោសនាបោះឆ្នោត ប្រាប់ប្រជាជនថា នឹងលើកកម្ពស់តម្លៃកសិផល ក៏ប៉ុន្តែគ្មានប្រសិទ្ធភាពនៅឡើយទេ។
កសិករជាច្រើនគ្រួសាររស់នៅ ស្រុកស្រីស្នំ ខេត្តសៀមរាបកំពុងបាក់ទឹកចិត្ត និងអស់ជំនឿលើគោលនយោបាយរបស់គណបក្សប្រជាជនកម្ពុជា ក្នុងការលើកកម្ពស់តម្លៃកសិផលដោយសារតែតម្លៃដំឡូងមី ដែលពួកគាត់ទើបតែប្រមូលផល ធ្លាក់ថ្លៃយ៉ាងគំហុកធ្វើឱ្យពួកគាត់ខាតបង់ច្រើន មិនអាចទូទាត់ លើការចំណាយថ្លៃដើម។
កសិកររស់នៅភូមិធ្លកត្រាំកង់ ឃុំស្លែងស្ពាន ស្រុកស្រីស្នំ លោកស្រី វ៉ ស្រួន ប្រាប់វិទ្យុអាស៊ីសេរីនៅថ្ងៃទី២៧ មិថុនាថា គ្រួសារលោកស្រីដាំដំឡូងមីចំនួន ៣ហិកតារ ពេលប្រមូលផលអាចលក់បានក្នុងតម្លៃ១៥០រៀលប៉ុណ្ណោះមួយគីឡូក្រាម ខណៈតម្លៃដំឡូងស្រស់អាចចំណេញបាន លុះណាតែមានតម្លៃ ចាប់ពី៤០០ រៀល ឡើងទៅក្នុងមួយគីឡូក្រាម។
លោកស្រីបញ្ជាក់ថា បើទោះបីជាតម្លៃដំឡូងមីធ្លាក់ថ្លៃក្តី ក៏ពួកគាត់ត្រូវបង្ខំចិត្តលក់ដែរ ដោយសារត្រូវការលុយបន្ទាន់ ដើម្បីសង់ម្ចាស់បំណុល សង់ថ្លៃចំណាយកម្លាំងកម្មករ និងបង់ថ្លៃចំណាយផ្សេងៗ។ រីឯអ្នកភូមិខ្លះទៀតបានបង្ខំចិត្ត ចាកចោលផ្ទះសម្បែង ទៅធ្វើការនៅក្រៅប្រទេសជាបន្តបន្ទាប់ ដើម្បីរកប្រាក់សងបំណុលគេ។
លោកស្រី វ៉ ស្រួន៖ «ដំឡូងធ្វើបានផលហើយ ជំពាក់អាត្រាក់គេហើយ ទៅថៃ គេមិនចង់ទិញទៀត គេថា ឱ្យយើងចេះចុះ។ អើយលំបាកណាស់កសិករ»។
កសិករបន្ថែមថា ពួកគាត់ជួបបញ្ហាច្រើន ទម្រាំបានផលដំឡូងមី ត្រូវចំណាយកម្លាំងពលកម្ម ចំណាយថ្លៃភ្ជួររាស់ ចំណាយថ្លៃពូជ ជី ថ្នាំសម្លាប់សត្វល្អិត និង ថ្នាំបាញ់ស្មៅ ជាដើម។ រីឯបញ្ហាប្រែប្រួលអាកាសធាតុ ក៏ជាឧបសគ្គ ធ្វើឱ្យដំឡូង របស់កសិករមួយចំនួនរលួយមើមដោយសារតែរលកកម្តៅកើនឡើងខ្លាំង។
របាយការណ៍ក្រសួងកសិកម្មបង្ហាញថា រយៈពេល៥ខែនៅក្នុងឆ្នាំ២០២៤ កម្ពុជានាំចេញដំឡូងមីជាង ១លាន ៥សែនតោន(១.៥៩៩.១៦០ តោន) កើនឡើងជាង ២សែនតោន (២៥៦.១១០) បើធៀបរយៈពេលដូចគ្នាកាលពីឆ្នាំមុន។ រីឯទីផ្សារនាំចេញដំឡូងមី មាន ៣ប្រទេស រួមមាន ថៃ វៀតណាម និងចិន។ ជាមួយគ្នានេះ កម្ពុជាមានផ្ទៃដីអំណោយផលអាចដាំដំឡូងមីបានជាង ១លានហិកតារ នៅក្នុងខេត្តគោលដៅចំនួន១៧
ទោះជាយ៉ាងណាកសិករម្នាក់ទៀតរស់នៅស្រុកស្រីស្នំ ខេត្តសៀមរាប លោក ពួក ខៀន សង្កេតឃើញថា ពេលដំឡូងមីធ្លាក់ថ្លៃ ធ្វើឱ្យកសិករលែងចង់ពង្រីកផ្ទៃដីកសិកម្មបន្ថែមទៀត ដែលជាហេតុបណ្តាលឱ្យផ្ទៃដីកសិកម្ម ក្នុងស្រុកស្រីស្នំ ជាច្រើនពាន់ហិកតារ ត្រូវទុកទំនេរចោល។
លោកថា គណបក្សកាន់អំណាចតែងតែសន្យានៅមុនពេលបោះឆ្នោត ជាច្រើនអាណត្តិមកហើយថា នឹងលើកកម្ពស់កសិកម្ម ក៏ប៉ុន្តែការពិតជាក់ស្តែងពុំដូច្នេះទេ បញ្ហាតម្លៃកសិផលធ្លាក់ថ្លៃ បន្តកើតមានជាច្រើនឆ្នាំមកហើយ គ្មានច្រកចេញនៅឡើយទេ។
លោក ពួន ខៀន៖ «ដំឡូងចុះថោក វាជួបលំបាកនឹងថ្លៃជី សងគេមិនរួច។ អ្នកភូមិទៅថៃច្រើនហើយ ទៅឡើងស្ងាត់ពីផ្ទះ ខ្លះទៅបានការងារធ្វើ និងខ្លះក៏អត់ការងារធ្វើ»។
វិទ្យុអាស៊ីសេរីមិនទាន់អាចទាក់ទង សុំការបំភ្លឺរឿងនេះ ពីប្រធានមន្ទីរកសិកម្ម ខេត្តសៀមរាប លោកទា គឹមសុទ្ធ បាននៅឡើយទេ នៅថ្ងៃទី២៧ មិថុនា។ រីឯអ្នកនាំពាក្យសាលាខេត្តសៀមរាប លោក លី វណ្ណៈ ក៏មិនទាន់អាចសុំការអធិប្បាយបានដែរ នៅថ្ងៃដដែលនេះដោយទូរស័ព្ទហៅចូល តែគ្មានអ្នកលើក។
ក៏ប៉ុន្តែអ្នកនាំពាក្យគណបក្សកាន់អំណាច លោក សុខ ឥសាន បានចាត់ទុកបញ្ហានេះជារឿងធម្មតា និងជាក្រឹត្យក្រមធម្មជាតិនៃសេដ្ឋកិច្ចក្នុងប្រទេស និងក្រៅប្រទេស មិនជាប់ទាក់ទងរឿងនយោបាយទេ។
លោក សុខ ឥសាន៖ «ទំនិញកសិផលឡើងថ្លៃ ឬមិនឡើងថ្លៃ វាមិនអាស្រ័យលើការសន្យារឿងនយោបាយទេ។ វាអាស្រ័យលើតុល្យភាពនៅលើទីផ្សារ ទាំងក្នុងប្រទេស និងក្រៅប្រទេស»។
ជុំវិញរឿងនេះ ក្រុមប្រឹក្សាភិបាលរបស់អង្គការសាមគ្គីភាពកសិករកម្ពុជា លោក ឌី គន្ធា ផ្តល់ទស្សនៈថា រដ្ឋាភិបាលគួរតែបង្កើតយន្តការសម្របសម្រួលធ្វើកិច្ចសន្យារវាងកសិករដាំដំឡូងមីជាក្រុមហ៊ុនឯកជន និងក្រុមឈ្មួញ ដើម្បីកំណត់តម្លៃឱ្យជាក់លាក់មួយ ក្នុងការលើកកម្ពស់តម្លៃកសិផល។
លោកបន្ថែមថា រដ្ឋាភិបាលគួរមានកញ្ចប់ថវិកាជាតិគ្រប់គ្រាន់ ដើម្បីគាំទ្រលើគោលនយោបាយជាតិស្ដីពីការលើកកម្ពស់កសិកម្មកម្ពុជាឱ្យមានប្រសិទ្ធភាព។
លោក ឌី គន្ធា៖ «មានន័យថា គោលនយោបាយជាតិ ត្រូវឆ្លុះបញ្ចាំងថា ពិតជាបានឆ្លើយតប ទៅនឹងអ្វីដែលជាកង្វល់ជំងឺរបស់កសិករហើយនៅ?អ៊ីចឹងគោលនយោបាយអាចឈានដល់រកកាត់បន្ថយ បំណុលវ័ណ្ឌកទេ ជួយឱ្យកសិករមានសន្តិសុខស្បៀងទេ?ជួយឱ្យសមាជិកគ្រួសារកសិករឈប់ចំណាកស្រុកទេ?តើគោលនយោបាយបង្កើតមក ជាក្រដាសស្នាម ឬក៏ចង់បង្កើតចង់បង្ហាញពីចក្ខុវិស័យវែងឆ្ងាយមួយ ចង់ឃើញផលិតផលកសិកម្មកម្ពុជា មានសមត្ថភាពពិតប្រកួតប្រជែងជាមួយប្រទេសជិតខាងបាន»។
មិនត្រឹមតែនៅខេត្តសៀមរាបប៉ុណ្ណោះទេ កសិករនៅខេត្តបន្ទាយមានជ័យ ខេត្តព្រះវិហារ ឧត្តរមានជ័យ ខេត្តបាត់ដំបង និងខេត្តប៉ៃលិន ជាដើម ក៏កំពុងជួបការលំបាកផ្នែកជីវភាព និងបញ្ហាបំណុល ដោយសារតម្លៃដំឡូងធ្លាក់ថ្លៃដែរ។
កសិករបន្ថែមថា តម្លៃដំឡូងមីរបស់ពួកគេ ឋិតលើការកំណត់របស់ឈ្មួញកណ្តាលដែលទិញនាំចេញទៅលក់នៅប្រទេសថៃ និងប្រទេសវៀតណាម ហើយក្រុមឈ្មួញទាំងនោះតែងបន្ទោសបង្អាប់ កសិផលរបស់កសិករដើម្បីបន្ទាបតម្លៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។