សហជីព​បារម្ភ​ពី​បញ្ហា​សុខភាព​របស់​កម្មករ​រោងចក្រ ដោយសារ​ទទួល​ទាន​របប​អាហារ​មិន​ត្រឹមត្រូវ

ដោយ សេក​ បណ្ឌិត
2023.10.22
សហជីព​បារម្ភ​ពី​បញ្ហា​សុខភាព​របស់​កម្មករ​រោងចក្រ ដោយសារ​ទទួល​ទាន​របប​អាហារ​មិន​ត្រឹមត្រូវ កម្មករកម្មការិនី​រោងចក្រមួយកន្លែង​នៅរាជធានីភ្នំពេញ ចេញ​ពី​ធ្វើការ នាពេលកន្លងទៅ។
AP

សហជីព​បារម្ភ​ពី​សុខភាព​របស់​កម្មករ​រោងចក្រ ដែល​បណ្ដាល​មក​ពី​ការ​ទទួល​ទាន​មិន​បាន​គ្រប់គ្រាន់ និង​មាន​ជាតិគីមី ដែល​បណ្ដាល​ឱ្យ​ពួកគាត់​ធ្លាក់ខ្លួន​ឈឺ ស្រប​ពេល​ដែល​ជីវភាព​កំពុង​មាន​ភាព​យ៉ាប់យ៉ឺន។ ពួកគាត់​ស្នើ​ឱ្យ​រដ្ឋាភិបាល​លើក​កម្ពស់​ជីវភាព​កម្មករ​តាមរយៈ​ការ​ដំឡើង​ប្រាក់​ខែ​គោល និង​ផ្សព្វផ្សាយ​ការ​យល់​ដឹង​ឱ្យ​ពួកគាត់​យកចិត្តទុកដាក់​លើ​ការ​រៀបចំ​របប​អាហារ។

សហជីព​បារម្ភ​ថា ដោយសារ​កម្រៃ​ប្រាក់​ឈ្នួល​តិច និង​ជាប់​កាតព្វកិច្ច​សងបំណុល​ធនាគារ កម្មករ​រោងចក្រ​កាត់ដេរ​មួយ​ចំនួន ហាក់​មិនសូវ​ខ្វល់ខ្វាយ​ពី​បញ្ហា​របប​អាហារ សុខភាព​នោះ​ទេ។

ប្រធាន​សហជីព​ស្មារតី​កម្មករ​នៃ​រោងចក្រ​សិនតៃ ហ្គាមែន ខេមបូឌា (Zhen Tai Garment Cambodia) លោក គឹម សុភេន ប្រាប់​វិទ្យុ​អាស៊ីសេរី កាលពី​ថ្ងៃទី២១ តុលា ថា ការ​ទទួល​ទាន​អាហារ​របស់​កម្មករ​រោងចក្រ​កាត់ដេរ ភាគច្រើន​គឺ​ដើម្បី​តែ​បំពេញ​ក្រពះ និង​ការ​ស្រេកឃ្លាន​ប៉ុណ្ណោះ ដោយ​ពួកគាត់​មិន​បាន​គិតគូរ​ពី​ផល​ប៉ះពាល់​សុខភាព ឬ​សារធាតុចិញ្ចឹម​ឡើយ​។ លោក​បន្ត​ថា ដោយសារតែ​ការ​បរិភោគ​អាហារ​មិន​សមរម្យ កម្មករ​ភាគច្រើន​បាន​ផឹក​ភេសជ្ជៈ​កំប៉ុង ដើម្បី​បំពេញ​ថាមពល និង​កាត់បន្ថយ​ការ​ងងុយ​ដេក ដែល​ធ្វើ​ឱ្យ​កម្មករ​មួយ​ចំនួន មាន​ជំងឺ​រលាក​ក្រពះ និង​លើស​ជាតិ​ស្ករ​ជាដើម​។ លោក​បញ្ជាក់​ថា ជា​មធ្យម កម្មករ​ខ្លះ ផឹក​ភេសជ្ជៈ​ប៉ូវ​កម្លាំង​១ កំប៉ុង​ក្នុង​មួយ​ថ្ងៃ ខ្លះ ២​កំប៉ុង និង​ខ្លះ​ទៀត​រហូត​ដល់ ៣​កំប៉ុង​ក្នុង​មួយថ្ងៃ។

លោក គឹម សុភេន៖ «សម្រាប់​ម្ហូបអាហារ​ដឹង​ស្រាប់​ហើយ នៅ​តាម​រោងចក្រ​មិនជា​ល្អ​អ្វី​ប៉ុន្មាន​ទេ​។ បើ​ធៀប​នឹង​ការ​ចំណាយ​របស់​គាត់ ម៉េច​គាត់​ហ៊ាន​ហូប​របស់​ល្អៗ​ច្រើន​អ្វី​ដែល​ឆ្ងាញ់ៗ​ទៅ​។ គាត់​ចំណាយ​បាន​ត្រឹមតែ​ម្ហូប​ណា​ដែល​ទប់ៗ​ត្រឹមតែ​ចំណូល​របស់​គាត់​សល់​ខ្លះ ហើយ​គាត់​បាន​ហូប​ខ្លះ​ទេ។ រឿង​ហូប​ឱ្យ​បាន​បរិបូរណ៍​គ្រប់គ្រាន់ គឺ​មិនអាច​ទេ​។ យើង​បាន​របស់​ល្អៗ​ណា​ហូប​កើត​? របស់​ល្អៗ​វា​ថ្លៃ»

នៅមុខ​រោងចក្រ​នានា​ក្នុង​រាជធានី​ភ្នំពេញ និង​នៅ​តាម​បណ្ដា​ខេត្ត​មួយ​ចំនួន គេ​តែង​ឃើញ​មាន​អាជីវករ​លក់​ចំណី​អាហារ ដូចជា​ម្ជូរ លៀស​ហាល ជ្រក់ ប្រហិត​ចៀន ផ្លែឈើ បាយ​ម្ហូប​ស្រាប់ និង​ភេសជ្ជៈ​កំប៉ុង នៅ​ម៉ោង​ដែល​កម្មករ​សម្រាក​ពេល​ថ្ងៃត្រង់ និង​ពេល​ល្ងាច​។ ប៉ុន្តែ​តូប​លក់ដូរ​ចំណីអាហារ​មួយចំនួន​មិន​សូវ​មាន​ការរៀបចំ​ទុកដាក់​ប្រកបដោយ​អនាម័យ​នោះ​ទេ ដោយ​ពួកគាត់​ដាក់​លក់​នៅ​លើ​ចិញ្ចើម​ផ្លូវ មាន​ដី​ហុយ ផ្សែង​ឡាន​ម៉ូតូ និង​មាន​រុយ​រោម​ទៀត​ផង​។ លើស​ពី​នេះ អាជីវករ​ខ្លះ​យក​តែ​របស់​មាន​តម្លៃថោក មិន​សូវ​មាន​គុណភាព ឬ​មាន​ជាតិគីមី​ខ្លាំង លក់​ឱ្យ​កម្មករ​ដែល​មាន​លុយកាក់​តិចតួច​សម្រាប់​ទិញ​អាហារ​បរិភោគ។

កម្មករ​នៅ​រោងចក្រ​ស្តារឡៃថ៏ (STARLIGHT APPAREL MANUFACTURING CO., LTD.) លោក រិន បូរ៉ា ឱ្យ​ដឹង​ថា លោក​បន្ត​ថា ក្រុម​កម្មករ​រោងចក្រ មិន​មាន​លទ្ធភាព​ដើម្បី​ផ្លាស់ប្ដូរ​លក្ខខណ្ឌ​របប​អាហារ​ប្រចាំថ្ងៃ​បាន​ឡើយ ព្រោះ​លោក និង​កម្មករ​ឯទៀត ត្រូវ​កំណត់​ការ​ចំណាយ​ទៅ​លើ​ម្ហូបអាហារ ឱ្យ​តិចតួច​បំផុត តាម​ដែល​អាច​ធ្វើ​ទៅ​បាន ដើម្បី​សន្សំសំចៃ​ប្រាក់​សម្រាប់​ចំណាយ​លើ​បន្ទប់​ជួល ទឹក​ភ្លើង ការ​ធ្វើ​ដំណើរ សង​ធនាគារ និង​ផ្ញើ​ទៅ​ស្រុក​កំណើត។ លោក​ប្រាប់​ថា ជា​មធ្យម​កម្មករ​ចំណាយ​លើ​បាយ និង​ម្ហូប ចំនួន ៣​ពាន់​រៀល ទៅ ៤​ពាន់​រៀល​ប៉ុណ្ណោះ​ក្នុង​មួយថ្ងៃ ដែល​សម្ល​មួយ​ថង់ មាន​តម្លៃ ១​ពាន់ ទៅ​១​ពាន់ ៥​រយ​រៀល​ប៉ុណ្ណោះ។

លោក រិន បូរ៉ា៖ «ពិបាក​និយាយ​ណាស់​បង បើ​សម្រាប់​ពួកគាត់ៗ ហូប​ឱ្យ​តែ​ឆ្អែតៗ​ហ្នឹង។ សម្ល​មួយ​ថង់​១​ពាន់ វា​អត់​មាន​រសជាតិ​អី​ដូច​សម្ល​ដែល​យើង​ធ្វើ​ហូប​ខ្លួនឯង​នោះ​ទេ​។ គាត់​ហូប​ឱ្យ​តែ​រួច​មួយ​ពេលៗ​ហ្នឹង»

ទោះជា​យ៉ាងណា តំណាង​សហជីព និង​ក្រុម​កម្មករ​លើកឡើង​ថា កន្លងមក​មន្ត្រី​ក្រសួង​ការងារ មិន​ធ្លាប់​ចុះ​មក​អង្កេត​នៅពេល​កម្មករ​អង្គុយ​បរិភោគ​អាហារ​ច្រក​ថង់ និង​ប្រអប់​ជុំគ្នា​នៅ​លើ​ទីធ្លា​នោះ​ទេ ជា​ពិសេស​រដ្ឋមន្ត្រីក្រសួង​ការងារ លោក ហេង សួរ និង​មន្ត្រី​របស់​លោក ដែល​បរិភោគ​អាហារ​ថ្លៃៗ​ពាសពេញ​តុ​នោះ បាន​ត្រឹមតែ​ទទួលទាន​អាហារ​ជាមួយ​តំណាង​សហជីព និង​ថ្នាក់​ដឹកនាំ​របស់​រោងចក្រ​មួយ​ចំនួន​ប៉ុណ្ណោះ។

វិទ្យុ​អាស៊ីសេរី មិនអាច​ទាក់ទង​អ្នកនាំពាក្យ​ក្រសួង​ការងារ លោក កត្តា អ៊ន ដើម្បី​បកស្រាយ​ជុំវិញ​បញ្ហា​នេះ​បានទេ នៅ​ថ្ងៃទី២១ តុលា ដោយ​ទូរស័ព្ទ​ហៅ​ចូល​ជាច្រើន​ដង តែ​ពុំ​មាន​អ្នកទទួល​។​

ទាក់ទិន​រឿង​នេះ ប្រធាន​សហភាព​ការងារ​កម្ពុជា លោក អាត់ ធន់ សង្កេត​ឃើញ​ថា ការ​យល់ដឹង​របស់​កម្មករ​លើ​របប​អាហារ​ប្រចាំថ្ងៃ​នៅ​មាន​កម្រិត ដោយ​កម្មករ​មួយចំនួន​ជ្រើសរើស​បរិភោគ​អាហារ​ទិញ​ស្រាប់ ដែល​មិនសូវមាន​អនាម័យ និង​ជីវជាតិ​គ្រប់គ្រាន់ ខណៈ​មួយចំនួន​ត្រូវធ្វើ​ការ​ថែម​ម៉ោង ប៉ះពាល់​ដល់​ការ​សម្រាក បណ្ដាល​ឱ្យ​សុខភាព​កាន់តែ​ចុះ​ទ្រុឌទ្រោម​។ លោក​បន្ត​ថា បញ្ហា​ទាំងនេះ សុទ្ធ​សឹង​បណ្ដាលមកពី​កត្តា​ជីវភាព​ខ្វះខាត ដែល​តម្រូវ​ឱ្យ​រដ្ឋាភិបាល និង​រោងចក្រ ដំឡើង​ប្រាក់​ឈ្នួល​សមរម្យ​ដល់​ពួកគាត់ ព្រមទាំង​បញ្ចុះតម្លៃ​ទំនិញ​លើ​ទីផ្សារ ដើម្បី​លើកកម្ពស់​ជីវភាព និង​សុខភាព​របស់​កម្មករ។

លោក អាត់ ធន់៖ «ដោយសារ​ពួកគាត់​ចង់​ថែម​ម៉ោង​។ ប្រសិនបើ​មិនបាន​ថែម​ម៉ោង​ទេ គឺ​គាត់​អត់​ចង់​ធ្វើការ​នៅ​ក្រុមហ៊ុន​ហ្នឹង​ទេ គឺ​ដោយសារតែ​គាត់​បាន​លុយ​តិច​ពេក​។ ហើយ​តាមច្បាប់​គឺ​អនុញ្ញាត​ឱ្យ​គាត់​ធ្វើ​តែ ៨​ម៉ោង​ទេ បើសិនជា​ថែម​ម៉ោង គឺ​បាន​ត្រឹមតែ ២​ម៉ោង​ប៉ុណ្ណោះ​ក្នុង​មួយថ្ងៃ ហើយ​ទាល់តែ​មានការ​ឯកភាព​ទៀត ហើយ​ទាល់តែ​សុខភាព​គាត់​ល្អ​ទៀត​។ ប៉ុន្តែ​ជាក់ស្ដែង គាត់​បង្ខំចិត្ត​ថែម​គឺ​មិនមែន​គាត់​ចង់​ធ្វើការ​ទេ គឺ​គាត់​ចង់បាន​លុយ​ដើម្បី​បង្គ្រប់​ការ​លំបាក​របស់​គាត់​ប៉ុណ្ណឹង​ឯង»

ទន្ទឹម​គ្នា​នេះ លោក អាត់ ធន់ បារម្ភ​ថា ការ​បរិភោគ​អាហារ​គ្មាន​ជីវជាតិ ឬ​មាន​ជាតិគីមី​ជា​រៀងរាល់​ថ្ងៃនេះ នឹង​ធ្វើ​ឱ្យ​កម្មករ​មួយ​ចំនួន​ធ្លាក់ខ្លួន​ឈឺ ដោយសារ​ជំងឺ​លើសឈាម ទឹក​នោម​ផ្អែម ខូច​ក្រលៀន ទៅ​ថ្ងៃ​មុខ ខណៈ​មួយ​ចំនួន​ខ្យល់​គរ​សន្លប់ ឬ​ស្លាប់​តែម្នាក់ឯង​នៅក្នុង​បន្ទប់​ជួល​ក៏​មាន។

កាលពី​ថ្ងៃទី​២៨ កញ្ញា រាជរដ្ឋាភិបាល​កម្ពុជា បានសម្រេច​ដំឡើង​ប្រាក់​ឈ្នួល​អប្បបរមា​កម្មករ​កាត់​ដេរ​ចំនួន ៤​ដុល្លារ​បន្ថែម ដែល​សរុប​ប្រាក់​ឈ្នួល​អប្បបរមា​ប្រចាំខែ​គឺ​មាន​ចំនួន ២០៤​ដុល្លារ​សម្រាប់​ឆ្នាំ​២០២៤ ស្រប​ពេល​ដែល​កម្មករ និង​សហជីព​ឯករាជ្យ មិនទាន់​ពេញចិត្ត​នឹង​តួលេខ​នេះ​នោះ​ទេ។

របាយការណ៍​របស់​អង្គការ​សង់ត្រាល់ (CENTRAL) រក​ឃើញ​ថា រោងចក្រ​មួយចំនួន​បាន​កាត់បន្ថយ​បុគ្គលិក​កម្មករ​ជា​មធ្យម​ពី ២០​ទៅ ៣០​ភាគរយ នៅ​ឆ្នាំ​២០២៣ នេះ ហើយ​កម្មករនិយោជិត​មួយ​ចំនួន​ធំ​បាត់បង់​ប្រាក់​ចំណូល ចន្លោះ​ពី​២៥ ទៅ ៣០​ភាគរយ បើ​ប្រៀបធៀប​ក្នុង​ឆ្នាំ​២០២២ ដែល​ធ្វើ​ឱ្យ​កម្មករ​ត្រូវតែ​បង្ខំចិត្ត​កាត់បន្ថយ​រប​ប​អាហារ​ហូបចុក​ប្រចាំថ្ងៃ និង​រង​សម្ពាធ​វិបត្តិ​ផ្លូវចិត្ត។

សហជីព និង​មន្ត្រី​សង្គម​ស៊ីវិល​ស្នើ​ឱ្យ​រដ្ឋាភិបាល​ដំឡើង​ប្រាក់​ឈ្នួល​គោល​ដល់​កម្មករ​បន្ថែម ដើម្បី​លើកកម្ពស់ សុខភាព និង​សុខុមាលភាព នៃ​ការរស់នៅ​របស់​កម្មករ ដើម្បី​ផ្ដល់​ឱ្យ​ពួកគាត់​នូវ​គុណ​តម្លៃ​នៃ​ការ​រស់នៅ​សមស្រប​មួយ​ក្នុង​សង្គម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។