សហជីពកម្មករទាមទារឱ្យដំឡើងប្រាក់ឈ្នួលកម្មករឱ្យបានចំនួន ២១៨ដុល្លារសម្រាប់ឆ្នាំ២០២៥
2024.08.30
កម្មកររោងចក្រមួយកន្លែងនៅរាជធានីភ្នំពេញ ចេញសម្រាកម៉ោងបាយថ្ងៃត្រង់ កាលពីថ្ងៃទី១ កញ្ញា ២០២៣។
រូប៖ ពលរដ្ឋផ្ដល់ឱ្យ
ក្រុមសហជីពកម្មករព្រមព្រៀងគ្នាជារួមថានឹងដាក់តួលេខចំនួន ២១៨ដុល្លារ សម្រាប់ការទាមទារប្រាក់ឈ្នួលគោលឱ្យកម្មករនិយោជិតក្នុងវិស័យកាត់ដេរ វាយនភណ្ឌ និងផលិតស្បែកជើង សម្រាប់ឆ្នាំ២០២៥។
ការកំណត់តួលេខចំនួន ២១៨ដុល្លារ នេះធ្វើឡើងក្រោយសហជីពតំណាងភាគីកម្មករចំនួន១៧ បានជួបប្រជុំគ្នាកំណត់តួលេខប្រាក់ឈ្នួលគោល ដើម្បីត្រៀមខ្លួនចូលចរចាជាមួយភាគីតំណាងនិយោជក និងភាគីរដ្ឋាភិបាល នៅថ្ងៃទី២៩ ខែសីហា។
ក្រុមសហជីពកម្មកររំពឹងថា កិច្ចប្រជុំត្រីភាគី ដែលនឹងធ្វើជាបន្តបន្ទាប់នៅក្នុងខែកញ្ញាខាងមុខនឹងព្រមព្រៀងផ្ដល់ប្រាក់ឈ្នួលគោលសម្រាប់កម្មករនៅក្នុងឆ្នាំ២០២៥ខាងមុខឱ្យបាន២១៨ដុល្លារទៅតាមការទាមទាររបស់ក្រុមសហជីព។
តាមគម្រោងកិច្ចប្រជុំត្រីភាគីចរចាប្រាក់ឈ្នួលនឹងធ្វើជាលើកទី២ នៅថ្ងៃទី២៩ ខែសីហា ស្អែកនេះ ហើយការចរចានឹងបញ្ចប់នៅចុងខែកញ្ញា ដើម្បីកំណត់ប្រាក់ឈ្នួលកម្មករក្នុងវិស័យកាត់ដេរ វាយនភណ្ឌ និងផលិតស្បែកជើងសម្រាប់ឆ្នាំ២០២៥។
ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា ប្រាប់វិទ្យុអាស៊ីសេរីថា តួលេខ ២១៨ ដែលសហជីពទាមទារនេះ ទទួលបានការព្រមព្រៀងគ្នាជាឯកច្ឆន្ទក្នុងចំណោមតំណាងសហជីពកម្មករចំនួន១៧ ដែលជាអ្នកត្រូវចូលរួមចរចាត្រីភាគី។ លោក ស៊ីណា បន្តថា ភាគីសហជីពបានផ្អែកលើកត្តាសំខាន់ៗចំនួនរួមទាំងលក្ខខណ្ឌជីវភាពកម្មករផង ដើម្បីសម្រេចដាក់តួលេខថ្មីនេះ។
លោក ប៉ាវ ស៊ីណា៖ «រួមទាំងយើងក៏មានយើងក៏មានរបាយការណ៍មួយចំនួន ដែលជារបាយការណ៍របស់ភាគីសហជីព ដែលយើងមើលឃើញថា ការរកឃើញវាមិនខុសគ្នាប៉ុន្មានឡើយគឺលម្អៀងគ្នាបន្តិចបន្តួច។ ដូច្នេះសហជីពយើងរំពឹងទុកថា តួលេខសម្រាប់ចរចាឆ្នាំ២០២៥នេះអាចមានលទ្ធភាពអាចមានលទ្ធភាពល្អប្រសើរជាងឆ្នាំ២០២៤នេះ»។
ក្នុងឆ្នាំ ២០២៤នេះ ប្រាក់ឈ្នួលគោល ឬប្រាក់ឈ្នួលអប្បបរមារបស់កម្មករមានចំនួន ២០៤ ដុល្លារ បើប្រៀបធៀបនឹងតួលេខថ្មី ២១៨ នេះមានន័យថា ប្រាក់ឈ្នួលគោលកម្មករអាចឡើងបាន១៤ ដុល្លារប្រសិនបើមានការព្រមព្រៀងគ្នា។
សហជីពអះអាងថា ដើម្បីកំណត់តួលេខថ្មីនេះ ពួកគេបានពិនិត្យមើលលើលក្ខណវិនិច្ឆ័យចំនួន៧ ដែលរួមមាន៖ កត្តាសង្គម ដែលសំដៅទៅលើចំនួនសមាជិកគ្រួសារដែលកម្មករត្រូវរ៉ាប់រង អតិផរណា និងការចំណាយលើការរស់នៅ កត្តាសេដ្ឋកិច្ច ផលិតភាព ភាពប្រកួតប្រជែង ទីផ្សារការងារ និងប្រាក់ចំណេញខាងវិស័យ។ ក្នុងផ្នែកអតិផរណាគ្រប់ភាគីបានរកឃើញថា នឹងមានចំនួន ២,៧% ក្នុងឆ្នាំ២០២៥ ផ្នែកផលិតភាពគឺមាន ២,៣% និងប្រាក់ចំណេញខាងវិស័យ ខាងសហជីពទាមទារឱ្យផ្ដល់ឱ្យកម្មករចំនួន២% ដែរ។
វិទ្យុអាស៊ីសេរីនៅមិនទាន់អាចទាក់ទងតំណាងភាគីនិយោជក និងតំណាងភាគីរដ្ឋាភិបាល ដើម្បីសុំការឆ្លើយតបនឹងការទាមទាររបស់ក្រុមសហជីពនេះបាននៅឡើយទេនៅថ្ងៃទី២៨ ខែសីហា។
បើទោះជាយ៉ាងណាតួលេខ២១៨នេះនៅមិនទាន់អាចចាត់ទុកថា ជាប្រាក់ឈ្នួលសមរម្យសម្រាប់កម្មករនិយោជិតនៅឡើយទេ។
អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខៅឌូ CCAWDU លោក អាត់ ធន់ លើកឡើងថា ការសិក្សារបស់សហជីពបានរកឃើញថា ប្រាក់ឈ្នួលសមរម្យសម្រាប់កម្មករក្នុងឆ្នាំ២០២៥ គឺគួរបន្ថែមចំនួន២៥ ដុល្លារទៅលើប្រាក់ឈ្នួលក្នុងឆ្នាំ២០២៤ ដែលមានស្រាប់ចំនួន ២០៤ ដុល្លារ។
«សម្រាប់កម្មករយើងពេលបច្ចុប្បន្ននេះ បើមិនមានប្រាក់ឈ្នួល២៣០ ឬក៏២៥០ ដុល្លារទេគឺចាយមិនគ្រាន់ទេ។ អ្វីដែលគាត់មានក្នុងពេលបច្ចុប្បន្ននេះ គឺគាត់ធ្វើការបន្ថែមម៉ោង ឬក៏គាត់ធ្វើការស៊ីបុង ឬក៏គាត់ថែមវេន ដើម្បីយកលុយបង្គ្រប់ ដែលមិនមែនគាត់ចង់ធ្វើការថែមម៉ោងទេ ប៉ុន្តែគឺគាត់ចង់បានលុយបន្ថែមហ្នឹងឯង»។
ជាញឹកញយក្រុមកម្មករត្អូញត្អែរថា ពួកគាត់ខិតខំធ្វើការថែមម៉ោងច្រើនទើបអាចបានប្រាក់កម្រៃបន្ថែមតិចតួចផ្គត់ផ្គង់គ្រួសារ។ ពួកគាត់អះអាងទៀតថា ប្រាក់ឈ្នួលគោលបើអាចដំឡើងបាន ២៥០ ដុល្លារក្នុងមួយខែទើបអាចឱ្យពួកគាត់រស់បានសមរម្យស្របតាមតម្លៃទំនិញតាមទីផ្សារ។ គិតត្រឹមចុងឆ្នាំ២០២៣ មានកម្មកររោងចក្រកាត់ដេរសំលៀកបំពាក់ និងស្បែកជើងជាង៧សែននាក់ដែលភាគច្រើនជាស្ត្រី។ ប្រាក់ចំណូលរបស់កម្មករក្នុងវិស័យនេះបានរងផលប៉ះពាល់ នៅក្រោយសហភាពអឺរ៉ុបបានដកប្រព័ន្ធអនុគ្រោះពន្ធ (EBA) ចំនួន ២០ភាគរយក្នុងឆ្នាំ២០២០ ហើយក្នុងឆ្នាំដដែលនោះសហរដ្ឋអាមេរិកបានផ្អាកប្រព័ន្ធអនុគ្រោះពន្ធ (GSP) ដែលធ្វើឱ្យប៉ះពាល់ដល់អ្នកវិនិយោគទុនក្នុងវិស័យនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
អត្ថបទពេញនិយម
សេដ្ឋកិច្ច
