ចិន​ចុះហត្ថលេខា​ចែក​រំលែក​ព័ត៌មាន​ទឹក​ពេញ​១​ឆ្នាំ​ជាមួយ​គណៈកម្មការ​ទន្លេ​មេគង្គ MRC

ដោយ មាន ឫទ្ធិ
2020-10-22
អ៊ីម៉ែល
មតិ
Share
បោះពុម្ព
មេដឹកនាំ​មកពី​ប្រទេស​ចំនួន​៦ នៃ​តំបន់​ទន្លេ​មេគង្គ រួមមាន កម្ពុជា វៀតណាម ឡាវ ថៃ មីយ៉ាន់ម៉ា ឬ​ភូមា និង​ចិន បាន​បិទ​បញ្ចប់​កិច្ចប្រជុំ​កំពូល​កិច្ច​សហប្រតិបត្តិការ​មេគង្គ​-​ឡាន​ឆាង លើក​ទី​២ នៅ ក្រុង​ភ្នំពេញ កាលពី​ថ្ងៃ​ទី​១០ ខែ​មករា ឆ្នាំ​២០១៨។
មេដឹកនាំ​មកពី​ប្រទេស​ចំនួន​៦ នៃ​តំបន់​ទន្លេ​មេគង្គ រួមមាន កម្ពុជា វៀតណាម ឡាវ ថៃ មីយ៉ាន់ម៉ា ឬ​ភូមា និង​ចិន បាន​បិទ​បញ្ចប់​កិច្ចប្រជុំ​កំពូល​កិច្ច​សហប្រតិបត្តិការ​មេគង្គ​-​ឡាន​ឆាង លើក​ទី​២ នៅ ក្រុង​ភ្នំពេញ កាលពី​ថ្ងៃ​ទី​១០ ខែ​មករា ឆ្នាំ​២០១៨។
Photo of SPM Page

ប្រទេស​ចិន​ចុះហត្ថលេខា​ចែក​រំលែក​ព័ត៌មាន​ទឹក ក្នុង​រយៈពេល​ពេញ ១​ឆ្នាំ ជាមួយ​គណៈកម្មការ​ទន្លេ​មេគង្គ​។ ការ​ចុះ​ហត្ថលេខា​នេះ កើត​មានឡើង​ក្រោយ​ប្រទេស​ចិន​បាន​សន្យា​ចែក​រំលែក​ព័ត៌មាន​ទឹក ដល់​បណ្ដា​ប្រទេស​ក្នុង​តំបន់​ទន្លេ​មេគង្គ​ខ្សែទឹក​ខាងក្រោម ក្នុងអំឡុងពេល​កិច្ចប្រជុំ​មេគង្គ​-​ឡាន​ឆាង លើក​ទី​៣ និង​ក្រោយ​ពេល​ដែល​សហរដ្ឋអាមេរិក​បាន​រិះគន់​ជា​ចំហ​រថា ចិន​បាន​រាំង​ខ្ទប់​ទឹក​នៅ​ខ្សែទឹក​ខាងលើ​នៃ​អាង​ទន្លេ​មេគង្គ តាមរយៈ​ទំនប់​វារីអគ្គិសនី​ដ៏​សម្បើម​របស់​ខ្លួន។

ភាគី​ចិន​សន្យា​ថា ខ្លួន​នឹង​ចែក​រំលែក​ព័ត៌មាន​ជលសាស្ត្រ ឬ​ពាក់ព័ន្ធ​នឹង​ទឹកទន្លេ​មេគង្គ ក្នុង​​រយៈពេល​ពេញ​១​ឆ្នាំ ២០២១ ដល់​បណ្ដា​ប្រទេស​នៅ​តំបន់​ខ្សែទឹក​ខាងក្រោម​ទន្លេ​មេគង្គ​។ ការ​ចែក​រំលែក​ព័ត៌មាន​នេះ ធ្វើឡើង​តាមរយៈ​យន្តការ​គណៈកម្មការ​ទន្លេ​មេគង្គ MRC ពោល​គឺ​មិនមែន​តាមរយៈ​យន្តការ​មេគង្គ​-​ឡាន​ឆាង​ដែល​ចិន​ជា​អ្នកបង្កើត​នោះ​ទេ​។ នេះ​បើ​តាម តាមរយៈ​កិច្ចព្រមព្រៀង​ដែល​ចិន​ទើបនឹង​ចុះហត្ថលេខា​នៅ​ថ្ងៃ​ទី​២២ តុលា ជាមួយ​គណៈកម្មការ​ទន្លេ​មេគង្គ។

ពិធី​ចុះហត្ថលេខា​នេះ ធ្វើឡើង​នៅ​ក្នុង​កិច្ចប្រជុំ​ប្រចាំ​ឆ្នាំ​មួយ​តាម​វីដេអូ ខនហ្វឺរេន (Video Conference) អំពី​ភាពជា​ដៃគូ​កិច្ច​សន្ទនា​របស់​គណៈកម្មការ​ទន្លេ​មេគង្គ រវាង​ក្រសួង​ធនធាន​ទឹក​របស់​ចិន ជាមួយ​នឹង គណៈកម្មការ​ទន្លេ​មេគង្គ។

លេខាធិការ​គណៈកម្មការ​ទន្លេ​មេគង្គ បណ្ឌិត អាន ពេជ្រហត្ថដា ហៅ​ការ​ចុះហត្ថលេខា​លើ​កិច្ចព្រមព្រៀង​ចែក​រម្លែក​ព័ត៌មាន​ទឹក​នេះ​ថា គឺជា​ព្រឹត្តិការណ៍​ដ៏​សំខាន់​មួយ​នៅ​ក្នុង​ប្រវត្តិសាស្ត្រ​នៃ​កិច្ច​សហប្រតិបត្តិការ​រ​វាង​ប្រទេស​ចិន និង​គណៈកម្មការ​ទន្លេ​មេគង្គ​។ លោក​បន្ថែម​ថា ការប្រតិបត្តិ​ហេដ្ឋារចនាសម្ព័ន្ធ​នានា​នៅ​លើ​ផ្ទៃ​អាង និង​ដៃទន្លេ​មេគង្គ បាន​នាំ​ឲ្យ​មាន​ភាព​ប្រែប្រួល​ដល់​លំហូរ​ទឹក​ទន្លេ និង​កម្រិត​ហក់​ឡើង​ចុះ​នៃ​ទឹកទន្លេ ដែល​អាច​បង្ក​ផល​ប៉ះពាល់​ដល់​សហគមន៍​នៅ​តាម​ដង​ទន្លេ​នេះ ដូច្នេះ​ហើយ ការ​ចម្លែក​ទិន្នន័យ​ប្រតិបត្តិការ​នៃ​ហេដ្ឋារចនាសម្ព័ន្ធ​នៅ​លើ​ទន្លេ​មេគង្គ​ឲ្យ​បាន​កាន់តែ​ច្រើន នឹង​ចូលរួម​ចំណែក​ផ្ដល់​សារសំខាន់​ដល់​ការគ្រប់គ្រង​ទន្លេ​មេគង្គ។

អាស៊ីសេរី បាន​ព្យាយាម​ទាក់ទង​មន្ត្រី​ផ្នែក​ទំនាក់ទំនង​នៃ​គណៈកម្មការ​ទន្លេ​មេគង្គ​ដែល​មាន​មូលដ្ឋាន​នៅ​ប្រទេស​ឡាវ លោក មាស សុភ័ក្រ ដើម្បី​សុំ​ពន្យល់​បន្ថែម​អំពី​ខ្លឹមសារ​នៃ​កិច្ចព្រមព្រៀង​ជាមួយ​ភាគី​ចិន​នេះ និង​ថា​តើ​បន្ទាប់ពី​ផុត​សុពលភាព​នៃ​កិច្ចព្រមព្រៀង​នេះ​ទៅ ចិន​នឹង​នៅតែ​បន្ត​ចែក​រំលែក​ព័ត៌មាន​ទឹក​ដដែល​នេះ ដល់​គណៈកម្មការ​ទន្លេ​មេគង្គ ដែរ​យ៉ាងណា ក៏ប៉ុន្តែ​លោក​ពុំ​លើក​ទូរស័ព្ទ​កាលពី​ថ្ងៃ​ទី​២២ តុលា​។ យ៉ាងណា សេចក្ដី​ប្រកាស​ព័ត៌មាន​របស់​គណៈកម្មការ​ទន្លេ​មេគង្គ​ឲ្យ​ដឹង​ថា តាមរយៈ​កិច្ចព្រមព្រៀង​នេះ ចិន​ចែកចាយ​ព័ត៌មាន​ជលសាស្ត្រ បាន​មក​តែ​ពី​ស្ថានីយ​ចំនួន​២ នៃ​វារីអគ្គិសនី​នៅ​ខ្សែទឹក​ខាងលើ​របស់​ខ្លួន​តែប៉ុណ្ណោះ ខណៈ​ចិន​មាន​វា​រី​អគ្គិសនី​កំពុង​ប្រតិបត្តិ​នៅ​លើ​ខ្សែទឹក​ខាងលើ​នៃ​ទន្លេ​មេគង្គ​នេះ រហូតដល់​ទៅ​១១ និង​គ្រោង​សាងសង់​ទំនប់​វារីអគ្គិសនី​ជាច្រើន​បន្ថែម​ទៀត​នៅ​លើ​ផ្ទៃ​ទន្លេ​នេះ។

ការ​ចែក​រំលែក​នេះ ធ្វើឡើង​ពីរ​ដង​ក្នុង​មួយថ្ងៃ ដែល​ក្នុង​នោះ រួមមាន ទិន្នន័យ​អំពី​កម្រិត​ភ្លៀង​ធ្លាក់ និង​ទិន្នន័យ​អំពី​កម្រិត​ទឹកទន្លេ​។ ទន្ទឹម​នឹង​នេះ ប្រទេស​ចិន ក៏​យល់ព្រម​ចែក​រម្លែក​ព័ត៌មាន​បន្ទាន់​ពាក់ព័ន្ធ​នឹង​កា​រកើន​ឡើង ឬ​ធ្លាក់​ចុះ​កម្រិត​ទឹក​ខុស​ពី​ប្រក្រតី និង​ការ​បង្ហូរទឹក ព្រមទាំង​ព័ត៌មាន​ពាក់ព័ន្ធ​ដទៃ​ទៀត អំពី​កត្តា​នានា​ដែល​អាច​បណ្ដាល​ឲ្យ​កើតមាន​គ្រោះ​ទឹកជំនន់​ភ្លាមៗ​ទៅដល់​តំបន់​ខ្សែទឹក​ខាងក្រោម​នៃ​ទន្លេ​មេគង្គ។

ក្នុង​រយៈពេល ១៨​ឆ្នាំ​កន្លងទៅ ចិន​ធ្លាប់​បាន​ចែកចាយ​ព័ត៌មាន​អំពី​កម្រិត​ទឹក និង​ទិន្នន័យ​ភ្លៀង​ធ្លាក់ តែ​ក្នុង​អំឡុង​ខែ​មិថុនា ដល់​ខែ​តុលា នៃ​រដូវ​ទឹកជំនន់​តែប៉ុណ្ណោះ ហើយ​ព័ត៌មាន​នេះ បាន​មក​ពី​ស្ថានីយ​ចំនួន​២ នៃ​វារីអគ្គិសនី​នៅ​ខ្សែទឹក​ខាងលើ​របស់​ខ្លួន​តែប៉ុណ្ណោះ​។​

ការ​ចុះ​ហត្ថលេខា​លើ​កិច្ចព្រមព្រៀង​ចែក​រំលែក​ព័ត៌មាន​ទឹកជា​មួយ​គណៈ​កម្ម​ការ​ទន្លេ​មេគង្គ​​នា​ពេល​នេះ កើតឡើង​ក្នុង​រយៈពេល​មិន​ដល់​២​ខែ​ផង ក្រោយ​កិច្ចប្រជុំ​កំពូល​មេគង្គ​-​ឡាន​ឆាង​លើក​ទី​៣ បាន​បិទ​បញ្ចប់​ទៅ​ដោយ​គ្មាន​ដំណោះស្រាយ​ជាក់លាក់​លើ​បញ្ហា​វិបត្តិ​ទឹក ឬ​សន្តិសុខ​ទឹក​នៅ​តំបន់​ទន្លេ​មេគង្គ​។ យន្តការ​មេគង្គ​-​ឡាន​ឆាង​ដែល​ចិន​ជា​អ្នកគ្រប់គ្រង​នេះ ត្រូវ​អ្នក​ជំនាញ​រិះគន់​ថា គ្មាន​ប្រសិទ្ធភាព ពោល​គឺ​មិន​ខុស​អ្វី​ពី​ឲ្យ «​កញ្ជ្រោង​ចាំ​យាម​ទ្រុង​មាន់​» នោះ​ទេ ព្រោះ​ចិន​ជា​អ្នកគ្រប់គ្រង​វារីអគ្គិសនី​ដ៏​សម្បើម​នៅ​ខ្សែទឹក​ខាងលើ​ស្រាប់។

ឆ្លើយតប​នឹង​ឥទ្ធិពល​របស់​ចិន​នៅ​តំបន់​ទន្លេ​មេគង្គ​នេះ សហរដ្ឋអាមេរិក បាន​បង្កើន​ភាព​ពាក់ព័ន្ធ​របស់​ខ្លួន​នៅ​ក្នុង​តំបន់​មេគង្គ​តាមរយៈ​ការ​បង្កើត​យន្តការ​នៃ​ភាពជា​ដៃគូ​រវាង​តំបន់​មេគង្គ និង​សហរដ្ឋអាមេរិក ជា​លើកដំបូង ហើយ​បាន​ទម្លាក់​ថវិកា​ជាង ១៥០​លាន​ដុល្លារ​ដល់​ប្រទេស​ក្នុង​តំបន់​ខ្សែទឹក​ខាងក្រោម​នៃ​ទន្លេ​មេគង្គ​។ សហរដ្ឋអាមេរិក បាន​ចោទប្រកាន់​ជា​ចំហ​រថា បក្ស​កុម្មុយនិស្ត​ចិន​បាន​សម្រេច​ជា​ឯកតោភាគី​រាំង​ខ្ទប់​ទឹក​នៅ​ខ្សែទឹក​ខាងលើ​ទន្លេ​មេគង្គ​បង្ក​ឲ្យ​មាន​គ្រោះ​រីងស្ងួត​ខ្លាំង​មិន​ធ្លាប់​មាន​ក្នុង​ប្រវត្តិសាស្ត្រ​នៃ​ប្រទេស​តំបន់​មេគង្គ​។ សហរដ្ឋអាមេរិក​បាន​ជំរុញ​ឲ្យ​ប្រទេស​នានា​ក្នុង​តំបន់​មេគង្គ ទាមទារ​ឲ្យ​បក្ស​​​​​​​​​​​​​​​​​​​​​​​​​​​​​​​​​​​​កុម្មុយនិស្ត​ចិន​គោរព​ការសន្យា​របស់​ខ្លួន​ក្នុង​ការ​ចែករំលែក​ព័ត៌មាន​អំពី​ទឹកជា​សាធារណៈ​រយៈពេល​ពេញ​មួយ​​​​​​​​​​​​​​​​​​​​​​​​​​​ឆ្នាំ រួម​ទាំង​ទិន្នន័យ​ពាក់ព័ន្ធ​នឹង​ការសាងសង់ និង​ប្រតិបត្តិការ​ទំនប់​វារីអគ្គិសនី​ផង​ដែរ តាមរយៈ​ការប្រើប្រាស់​យន្តការ​គណៈ​កម្មការ​ទន្លេ​មេគង្គ​MRC

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល