នៅព្រឹកថ្ងៃទី៣ មេសា ចៅក្រមសាលាដំបូងខេត្តកោះកុង បានសាកសួរ តំណាងសហគមន៍ជនជាតិជង នៅតំបន់អារ៉ែង លោក វ៉ែន វ៉ន ជុំវិញបណ្ដឹងរបស់រដ្ឋបាលព្រៃឈើខេត្ត។
បន្ទាប់ពីការសាកសួររបស់តុលាការ លោក វ៉ែន វ៉ន បានថ្លែងប្រាប់វិទ្យុអាស៊ីសេរី តាមទូរស័ព្ទថា តុលាការបានសាកសួរលោក ពីលិខិតអនុញ្ញាតទិញឈើ សម្រាប់សាងសង់ផ្ទះសហគមន៍នៅតំបន់អារ៉ែង ដែលរដ្ឋបាលព្រៃឈើចោទលោកថា បានទិញឈើខុសច្បាប់ និងលិខិតទទួលស្គាល់សហគមន៍ជនជាតិជងនៅតំបន់នេះ ពីអាជ្ញាធរមានសមត្ថកិច្ច។
នៅខាងក្រៅរបងតុលាការមានពលរដ្ឋជនជាតិជងប្រមាណ១០០នាក់ ដែលបារម្ភពីសុវត្ថិភាពលោក វ៉ែន វ៉ន បានទៅឃ្លាំមើលក្រែងមានការចាប់ខ្លួនតំណាងពួកគេ។
ខុសប្លែកពីពលរដ្ឋតំបន់អារ៉ែង លោក វ៉ែន វ៉ន មានប្រសាសន៍ថា លោកមិនបានបារម្ភពីសុវត្ថិភាពរបស់លោកឡើយ តែលោកស្នើឲ្យតុលាការចាត់ការឲ្យមានតម្លាភាព៖ «សូមឲ្យស្ថាប័នដែលពាក់ព័ន្ធតំបន់នោះ ( តំបន់អារ៉ែង ) ជួយជំរុញបង្កើតទៅជាតំបន់អេកូទេសចរណ៍ ឲ្យប្រជាពលរដ្ឋបានដើរទៅដោយរលូន ទីពីរទាក់ទងព្រៃឈើ សូមឲ្យរដ្ឋបាលព្រៃឈើ ចាត់ការឲ្យស្មើភាព និងយុត្តិធម៌ បើថាបទល្មើសទេ ឲ្យទៅជាបទល្មើសទាំងអស់គ្នា តែកុំឲ្យយើង ( សហគមន៍អារ៉ែង ) យកមកសាងសង់ បែរទៅជាបទល្មើស តែគេដឹកជញ្ជូនចេញ បែរមិនមែនជាបទល្មើស»។
យ៉ាងណាក៏ដោយ លោក វ៉ែន វ៉ន បន្តថា ចៅក្រមបញ្ជាក់ថា គេនៅមិនទាន់សម្រេចយ៉ាងណាចំពោះសំណុំរឿងនេះទេ ដោយសំអាងថាគេត្រូវការពេលវេលាស៊ើបសួរបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។