ពលរដ្ឋ​ខេត្ត​ក្រចេះ ព្រួយ​ពី​ការ​កាប់​បំផ្លាញ​ដើម​ឈើ​ផលិត​ជ័រ​ទឹក ស្រប​ពេល​ដែល​ក្រុមហ៊ុន​ស៊ី​បាយ​អូ​ថេក ផ្តើម​ដំណើរ​ការ​ឡើង​វិញ

ដោយ វ៉ែន សុមេធ
2018-10-30
អ៊ីម៉ែល
មតិ
Share
បោះពុម្ព
ពលរដ្ឋ​រស់​នៅ​ឃុំ​កំពង់ចាម ស្រុក​សំបូរ ខេត្ត​ក្រចេះ ដង​ជ័រ​ទឹក​ក្នុង​តំបន់​ព្រៃឡង់ កាល​ពី​ក្នុង​ខែ​តុលា ឆ្នាំ ២០១៨។
ពលរដ្ឋ​រស់​នៅ​ឃុំ​កំពង់ចាម ស្រុក​សំបូរ ខេត្ត​ក្រចេះ ដង​ជ័រ​ទឹក​ក្នុង​តំបន់​ព្រៃឡង់ កាល​ពី​ក្នុង​ខែ​តុលា ឆ្នាំ ២០១៨។
រូបថត៖ ពលរដ្ឋ

សហគមន៍​ព្រៃ​ឡង់ ​និង​ពលរដ្ឋ​រស់នៅ​ឃុំ​បឹង​ចារ ​ស្រុក​សំបូរ ​ខេត្ត​ក្រចេះ​បារម្ភ​ជា​ថ្មី​ទៀត​ ​ពី​មុខ​របរ​ដង​ជ័រ​ទឹក​ ដែល​ជា​ប្រភព​ចំណូល​សេដ្ឋកិច្ច​ប្រពៃណី​របស់​ពលរដ្ឋ​ច្រើន​ជំនាន់​មក​ហើយ​នោះ​ ​កំពុង​ប្រឈម​ការ​បាត់បង់​ជា​បន្ត​បន្ទាប់។ ​អ្នកភូមិ​អះអាង​ថា ក្រុមហ៊ុន​ស៊ី​បាយ​អូថេក (Ci-Biotech Co., Ltd.) ដែល​ល្បី​ខាង​កាប់​រំលំ​ដើមឈើ​ផលិត​ជ័រ​ទឹក​របស់​អ្នក​ស្រុក​ធ្វើ​អាជីវកម្ម​អស់​រាប់​លាន​ដើម​កន្លងទៅ​ ​បាន​ដំណើរការ​អាជីវកម្ម​របស់​ខ្លួន​ឡើងវិញ​ហើយ​ថ្មី​ៗ​នេះ​ ​និង​មាន​ ​អ្នក​មាន​អំណាច​មួយចំនួន​ ​ជ្រក​ក្រោម​រូបភាព​ក្រុមហ៊ុន​នេះ​ ធ្វើ​អាជីវកម្ម​ឈើ​នៅ​តំបន់​ព្រៃ​ឡង់​។

ពលរដ្ឋ​រស់នៅ​ជាប់​តំបន់​ព្រៃ​ឡង់ ​ខេត្ត​ក្រចេះ និង​សហគមន៍​ការពារ​ព្រៃ​ឡង់ ឲ្យ​ដឹង​នៅ​ថ្ងៃ​ទី​២៩ តុលា​ថា ក្រុមហ៊ុន​ស៊ី​បាយ​អូរ​ថេក ​ឬ​ហៅ​ថា​ ស្ថានីយ​ស្ដារ​ព្រៃឈើ​ឡើងវិញ កំពុង​ដំណើរ​ការ​អាជីវកម្ម​កាប់​ឈើ​ជា​ថ្មី​ទៀត ក្នុង​តំបន់​អូរ​ជាំ ​ដែល​ជា​កន្លែង​សំបូរ​ដោយ​ដើមឈើ​ផលិត​ជ័រ​ទឹក​របស់​អ្នកស្រុក​ជាច្រើន​គ្រួសារ។ ពួក​គេ​បារម្ភ​ថា​ ​អ្នកភូមិ​ជា​ម្ចាស់​ដើម​ច្បោះ​គ្មាន​សមត្ថភាព​ថែរក្សា​ដើម​ឈើ​ផលិត​ជ័រ​ទឹក​របស់​ខ្លួន​បាន​នោះ​ទេ ​ខណៈ​ដែល​ផែនទី​វិនិយោគ​របស់​ក្រុមហ៊ុន​នេះ​បាន​គ្របដណ្តប់​ក្នុង​តំបន់​ព្រៃ​ស្រោង និង​តំបន់​ព្រៃ​សំបូរ​ដោយ​ដើមឈើ​ផលិត​ជ័រ​ទឹក។

ក្រុម​ស្នូល​ព្រៃ​ឡង់ ​ខេត្ត​ក្រចេះ ថ្លែង​សុំ​មិន​បញ្ចេញ​ឈ្មោះ ឲ្យ​ដឹង​នៅ​ថ្ងៃ​ទី២៩ ​តុលា​ថា អ្នក​ភូមិ​មាន​ដើម​ឈើ​ផលិត​ជ័រ​ទឹក​ ក្នុង​ទីតាំង​ក្រុមហ៊ុន​វិនិយោគ​មិន​អាច​ចូល​អាស្រ័យ​ផល​ដើម​ឈើ​របស់​ខ្លួន​បាន​នោះ​ទេ ព្រោះ​ក្រុមហ៊ុន​ស៊ី​បាយ​អូ​ថេក កំពុង​ដំណើរ​ការ​អាជីវកម្ម​របស់​ខ្លួន​ឡើងវិញ ក្នុង​តំបន់​ព្រៃ​ស្រោង ដែល​សំបូរ​ដោយ​ដើម​ឈើ​ផលិត​ជ័រ​ទឹក​របស់​អ្នកស្រុក។ លោក​ថា កន្លងទៅ​ក្រុមហ៊ុន​នេះ​ ​មិន​បាន​កាត់​ឆ្វៀល​ផល​ប៉ះពាល់​ចេញ​នោះ​ទេ ហើយ​បាន​កាប់​បំផ្លាញ​ដើមឈើ​ផលិត​ជ័រ​ទឹក​របស់​ពលរដ្ឋ​អស់​រាប់​ម៉ឺន​ដើម​ធ្វើ​អាជីវកម្ម៖ «ការ​សម្បទាន​ហ្នឹង​កន្លែង​ហ្នឹង សុទ្ធតែ​ព្រៃ​ក្រាស់ និង​ដើម​ច្បោះ។ ក្រុមហ៊ុន​ស៊ី​បាយអូថេក ដំណើរ​ការ​វិញ មិន​ដឹង​ថា ដើម​ច្បោះ​គេ​ឆ្វៀល​ចេញ ឬ​យ៉ាង​ណា? តែ​កន្លង​មក​ក្រុមហ៊ុន​មិន​ទុក​ទេ កាប់​អស់»

ពលរដ្ឋ​ដែល​ជា​ម្ចាស់​ច្បោះ​រស់នៅ​ភូមិ​អាជេន ឃុំ​បឹង​ចារ ​ថ្លែង​សុំ​លាក់​ឈ្មោះ បង្ហើប​ថា​ រយៈពេល​ ៣ខែ​ចុង​ក្រោយ​នេះ ដើម​ឈើ​ផលិត​ជ័រ​ទឹក​ជាង​ ១ពាន់​ដើម​នៅ​ចំណុច​អូរ​ជាំ ​ក្នុង​តំបន់​ព្រៃ​ឡង់ ​ត្រូវ​គេ​កាប់​រំលំ​ធ្វើ​អាជីវកម្ម។ សកម្មភាព​កាប់​រំលំ​នោះ កើត​មាន​ជាច្រើន​ប្រភព​ ទាំង​ពលរដ្ឋ​នៅ​តំបន់​ផ្សេង​មក​ស៊ី​ឈ្នួល​កាប់​ឈើ​លក់​ឲ្យ​ថៅ​កែ ​និង​ក្រុមហ៊ុន​ស៊ី​បាយ​អូថេក​ ដែល​ចាំ​ទទួល​ទិញ​នៅ​មូលដ្ឋាន៖ «វា​បាត់​ច្រើន​ដែរ ឥឡូវ​នេះ​អត់​ធានា​សុវត្ថិភាព​ទេ ដើម​ច្បោះ​ជ័រ។ មិន​ដឹង​ថា ពី​ណា​ជួយ​ពី​ណា​បាន​ទេ អត់​មាន​ច្បាប់​គ្រប់គ្រង​ផង។ ដើម​ច្បោះ​ជា​របស់​រដ្ឋ​យើង​ត្រឹម​ពលរដ្ឋ​អាស្រ័យ​ផល តែ​បើ​រដ្ឋ​វិនិយោគ​ឲ្យ​ក្រុមហ៊ុន​ហើយ យើង​តវ៉ា​មិន​បាន។ អត់​ទាន់​មាន​ច្បាប់​គ្រប់គ្រង​ច្បោះ​ហ្នឹង​ឲ្យ​នៅ​ផង»


សហគមន៍​ព្រៃ​ឡង់​អង្កេត​ឃើញ​ថា កន្លង​ទៅ​ព្រៃ​ស្រោង​ក្នុង​តំបន់​អូរ​ជាំ ដែល​ជា​ប្រភព​ដើម​ឈើ​ផលិត​ជ័រ​ទឹក​រាប់​លាន​ដើម ត្រូវ​គេ​កាប់​អស់​ស្ទើរ​ទាំងស្រុង និង​មាន​ផ្នែក​ខ្លះ ត្រូវ​ក្រុមហ៊ុន​ឈូស​ឆាយ​យក​អារ​រំលំ​ឈើ​មួល​ធំៗ ធ្វើ​អាជីវកម្ម។ ពួកគេ​ថា ក្រុមហ៊ុន​នេះ បាន​ប្រើ​លេស​ស្ថានីយ​ស្តារ​ព្រៃ​ឈើ​ឡើងវិញ ដាំ​ដើម​អាកាស្យា ​តែ​ធាតុ​ពិត​ គឺ​ធ្វើ​អាជីវកម្ម​ឈើ​ទ្រង់ទ្រាយ​ធំ ​ដោយ​មាន​ដេប៉ូ​អារ​ច្រៀក​ឈើ​ជាប់​ព្រៃ​ឡង់ និង​សន្តិសុខ​យាម​តឹងតែង។ លើស​ពី​នេះ​ព្រៃ​ស្រោង​នៅ​តំបន់​ព្រៃ​ឡង់​ជា​ច្រើន​កន្លែង​ ត្រូវ​ក្រុមហ៊ុន​កាប់​យក​ឈើ​ធំ​ៗ​លក់​យ៉ាង​ពេញ​ទំហឹង​ បណ្ដាល​ឲ្យ​ព្រៃ​អភិរក្ស​មួយ​នេះ​បាត់​បង់​ឈើ​មូល​ធំៗ អស់​ស្ទើរ​ទាំង​ស្រុង។

ក្រុមហ៊ុន​ ស៊ី​បាយ​អូ​ថេច ​វិនិយោគ​ដំណាំ​ឧស្សាហកម្ម ​អាកាស្យា ​ឬ​ស្ថានីយ​ស្ដារ​ព្រៃឈើ​ឡើងវិញ ដែល​វិនិយោគ​លើ​ផ្ទៃដី​ចំនួន​ជាង​ ៣ម៉ឺន​ហិកតារ (៣៤.០០៧) កាល​ពី​ខែ​មិថុនា ​ឆ្នាំ ២០១២ ឋិត​នៅ​ក្នុង​ស្រុក​សំបូរ ​ខេត្ត​ក្រចេះ​ ​និង​មួយ​ផ្នែក​ចូល​ដី​ស្រុក​សៀម​បូក ​ខេត្ត​ស្ទឹងត្រែង​។ ​ក៏ប៉ុន្តែ​ពលរដ្ឋ​ ​និង​ សហគមន៍​ព្រៃ​ឡង់ ​ចោទ​ថា​ ​ក្រុមហ៊ុន​នេះ​ ធ្វើ​អាជីវកម្ម​ឈើ​ទ្រង់ទ្រាយ​ធំ​នៅ​ដែន​ជម្រក​សត្វ​ព្រៃ​ឡង់​ខុស​ច្បាប់​ ​និង​មាន​ដេប៉ូ​អារ​ច្រៀក​ឈើ​ដឹក​ទៅ​ប្រទេស​វៀតណាម​ផង។

អាស៊ី​ស៊ី​សេរី​មិនអាចរក​ប្រភព​ទាក់ទង​តំណាង​ក្រុមហ៊ុន​ ស៊ី​បាយ​អូថេក ​ដើម្បី​សុំ​ការ​បំភ្លឺ​រឿង​នេះ​បាន​នៅឡើយទេ ​នៅ​ថ្ងៃ​ទី​ ២៩ ​តុលា។

ចំណែក​មេឃុំ​បឹង​ចារ ​លោក​ ហុល ​សឿង​ ទទួលស្គាល់​ថា​ ​ដើមឈើ​ផលិត​ជ័រ​ទឹក​របស់​អ្នកស្រុក​កំពុង​ទទួលរង​ការ​កាប់​បំផ្លាញ​ខ្លាំងក្លា ​ហើយ​កន្លងទៅ​លោក​រាយការណ៍​ជូន​ថ្នាក់​លើ​ដែរ​ បន្ទាប់ពី​ទទួល​ ​បណ្តឹង​ពី​ពលរដ្ឋ​ជា​ម្ចាស់​ច្បោះ។ លោក​ថា ក្រុមហ៊ុន​ស៊ី​បាយ​អូថេក​បាន​ដំណើរការ​ឡើងវិញ​ហើយ​ រីឯ​អាជ្ញាធរ​ឃុំ​នៅ​ពុំ​ទាន់​ដឹង​ថា​ ​ក្រុមហ៊ុន​នេះ​ធ្វើ​សកម្មភាព​បែប​ណា​នៅឡើយ​ទេ​។ ​លោក​បន្ថែម​ថា​ ​អាជ្ញាធរ​ឃុំ ​គាំទ្រ​ពេញ​ទំហឹង​ ក្នុង​ការ​អភិរក្ស​ដើមឈើ​ផលិត​ជ័រ​ទឹក​ ​ក៏ប៉ុន្តែ​ក្រោយពេល​ដែរ ​ឈ្មួញ​សម្រុក​ចុះ​ទៅ​ទិញ​ឈើ​ដល់​មូលដ្ឋាន​ ​ធ្វើឲ្យ​ពលរដ្ឋ​ខ្លះ​បែក​គំនិត​លួច​កាប់​ឈើ​លក់​បន្តិច​ម្តងៗ៖ «ច្បោះ​ជ័រ​ទឹក​ចង់​រលាយ​អស់​ហើយ វា​ដឹង​រហូត​ដល់​ណាណី​ហើយ។ តែ​ឥឡូវ​ខ្ញុំ​អត់​បាន​ទៅ​ក្នុង​មួយ​រយៈ​នេះ តែ​គ្រាន់​ថា ​គេ​ឲ្យ​ដំណើរ​ការ​ឡើង​វិញ​ហើយ ក្រុមហ៊ុន​នេះ»

កន្លងទៅ​ពលរដ្ឋ​រស់នៅ​ឃុំ​បឹង​ចារ ​និង​ឃុំ​កំពង់ចាម​ ធ្លាប់​ដាក់ពាក្យ​ប្ដឹង​ក្រុមហ៊ុន​នេះ​ ​ច្រើន​សា​ពី​បទ​កាប់​បំផ្លាញ​ដើមឈើ​ផលិត​ជ័រ​ទឹក​អស់​ច្រើន​ពាន់​ដើម​ តែ​រហូត​មក​ទល់​ពេលនេះ​មាន​ពលរដ្ឋ​មិន​ដល់ ១០ គ្រួសារ​ទេ ​ដែរ​ទទួល​បាន​សំណង​តិចតួច​ ​ជំនួស​ពី​ការបាត់បង់​ដើម​ច្បោះ​ជ័រ​របស់​ខ្លួន ដែល​ធ្លាប់​ទទួល​ផល​ពី​ការ​ដុត​យក​ជ័រ​ទឹក​ លក់​ក្នុង​មួយ​ខែ​ៗ​ច្រើន​លាន​រៀល។
មន្ត្រី​ពង្រឹង​សិទ្ធិ​អំណាច​សហគមន៍​ នៃ​សមាគម​អាដហុក ​លោក​ ​ប៉ែន ​ប៊ុណ្ណារ៍​ យល់​ថា​ ​តួនាទី​ ​និង​ភារកិច្ច​ក្នុង​ការ​ដោះស្រាយ​បញ្ហា​នានា ​ជូន​ពលរដ្ឋ​ ​គឺជា​កាតព្វកិច្ច​របស់​អាជ្ញាធរ​ពាក់ព័ន្ធ​ ​និង​ក្រសួង​បរិស្ថាន មិន​ត្រូវ​មើល​រំលង​ការ​បាត់បង់​ប្រភព​ចំណូល​របស់​សហគមន៍​នោះ​ទេ។ លោក​ថា ពលរដ្ឋ​អាច​រួមគ្នា​ដាក់​បណ្តឹង​បរិហារ​រឿង​នេះ​ ​ដើម្បីឲ្យ​មាន​ដំណោះស្រាយ​ផ្លូវ​ច្បាប់​តាម​ប្រព័ន្ធ​យុត្តិធម៌​ឬ​តុលាការ៖ «ក្រសួង​បរិស្ថាន ត្រូវ​ទទួល​ខុស​ត្រូវ​ការ​បាត់​បង់​ដើម​ជ័រ។ បើ​គាត់​ការពារ​មិន​បាន​គាត់​គួរ​តែ​ស្នើសុំ​កម្លាំង​ពី​អាជ្ញាធរ​ខេត្ត​ក្រចេះ ដើម្បី​ការពារ»

សកម្មជន​ការពារ​ព្រៃ​ឡង់ ​ខេត្ត​ក្រចេះ បារម្ភ​ថា បើ​ក្រសួង​បរិស្ថាន​ ​និង​អាជ្ញាធរ​ខេត្ត​ក្រចេះ នៅ​តែ​បិទ​ភ្នែក​មិន​ចាត់វិធានការ​ដក​អាជ្ញាប័ណ្ណ​ក្រុមហ៊ុន​នេះ​ទេ​ ដើមឈើ​ផលិត​ជ័រ​ទឹក​ដែល​នៅ​សេសសល់​ចុងក្រោយ​របស់​ពលរដ្ឋ​នឹង​រលាយ​នៅពេល​ឆាប់​ៗ​នេះ​បង្ក​បាត់​បង់​ប្រាក់​ចំណូល​ ​និង​ជីវភាព​របស់​ពលរដ្ឋ​។ ​ពួកគេ​អង្កេត​ឃើញ​ថា​ ​ពលរដ្ឋ​ភាគ​ច្រើន​ ​បាន​ខ្ចី​ប្រាក់​ពី​ធនាគារ​ដែល​រំពឹង​ថា​ ​ដង​ជ័រ​ទឹក​លក់​អាច​បង្វិល​ប្រាក់​សង​ម្ចាស់​បំណុល​វិញ​ តែ​ផ្ទុយទៅវិញ​ ​បើ​ដើមឈើ​ផលិត​ជ័រ​ទឹក​ត្រូវ​បាត់បង់​ ​ពួកគេ​គ្មាន​ប្រភព​ចំណូល​សង់​ត្រឡប់​ជូន​ម្ចាស់​បំណុល​វិញ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល