ពលរដ្ឋរស់នៅខ្សែទឹកខាងក្រោមទំនប់វារីអគ្គិសនីសេសានព្រួយខ្លាចទឹកជំនន់លិចផ្ទះ
ទំនប់វារីអគ្គិសនីសេសានក្រោម២ ស្ថិតក្នុងស្រុកសេសាន ខេត្តស្ទឹងត្រែង។ រូបថតថ្ងៃទី១៤ កក្កដា ឆ្នាំ២០១៧។
RFA/Rann Samnang
នៅគ្រាដែលក្រុមហ៊ុនទំនប់វារីអគ្គិសនីសេសានក្រោមពីរនៅខែត្រស្ទឹងត្រែង កំពុងបិទទ្វារទឹកសាកល្បង ដើម្បីផ្គត់ផ្គង់ទឹកក្នុងផ្ទៃអាងដើម្បីផលិតថាមពលអគ្គិសនី អ្នកភូមិដែលរស់នៅខ្សែទឹកខាងក្រោមទំនប់ កំពុងព្រួយបារម្ភខ្លាចក្រុមហ៊ុនបើកទ្វារទឹក រួមផ្សំទឹកភ្លៀងផង នាំឲ្យមានទឹកជំនន់កើតឡើងលិចលង់លំនៅឋាន និងដីស្រែពួកគាត់។
ពលរដ្ឋរស់នៅខ្សែទឹកខាងក្រោមនៃទំនប់វារីអគ្គិសនីសេសានក្រោមពីរ នៃស្រុកសេសាន ឲ្យដឹងនៅថ្ងៃទី២៧ កក្កដា ថា ស្ថានភាពទឹកទន្លេសេសានកើនឡើងជិត ២ម៉ែត្រនៅឆ្នាំនេះ ប្រៀបធៀបកម្ពស់ទឹកទន្លេកាលពីឆ្នាំ២០១៦។ អ្នកភូមិថា កម្ពស់ទឹកកើនឡើងនេះបណ្ដាលឲ្យលិចស្រូវពលរដ្ឋមួយចំនួន និងលិចផ្លូវមួយចំនួនដែរ។
ពលរដ្ឋរស់នៅដងទន្លេសេសាននៃឃុំភ្លុក ស្រុកសេសាន លោក ឃៀន ប៊ុនហេង ឲ្យដឹងថា អ្នកភូមិរស់នៅក្រោមទំនប់ ភ័យព្រួយខ្លាំងពីហានិភ័យនានាដែលអាចកើតមានជាយថាហេតុ បើក្រុមហ៊ុនបើកទ្វារទឹក អាចបង្កឲ្យលិចលង់ផ្ទះសម្បែងពួកគាត់ នៅគ្រាដែលទឹកទន្លេមេគង្គ និងទន្លេសេសាន កំពុងកើនឡើងខ្លាំង។ លោករំឭកថា កន្លងទៅនៅពេលទំនប់វារីអគ្គិសនីនៅប្រទេសវៀតណាម គឺទំនប់យ៉ាលី និងទំនប់សេសាន ៤អេ នៅដងទន្លេសេសាន ធ្លាប់បើកទ្វារទឹក បណ្ដាលឲ្យលិចលំនៅឋានពលរដ្ឋនៅខែត្រស្ទឹងត្រែង និងខែត្ររតនគិរី៖ «ពលរដ្ឋនៅឃុំភ្លុក ទាំងអស់ព្រួយបារម្ភគ្រប់គ្នា ហើយខ្លាចទឹកហៀរមកលិចស្រូវ ចម្ការ ផ្ទះសម្បែង សំខាន់ក្រុមហ៊ុនហ្នឹងហើយ»។
អាស៊ីសេរី មិនអាចទាក់ទងតំណាងក្រុមហ៊ុនវារីអគ្គិសនីសេសានក្រោមពីរ លោក អ៊ុំ រ៉េត ដើម្បីសុំការអធិប្បាយជុំវិញក្តីបារម្ភនេះបានទេនៅថ្ងៃទី២៧ កក្កដា ព្រោះទូរស័ព្ទហៅចូលច្រើនដង តែពុំមានអ្នកទទួល។ ប៉ុន្តែលោកប្រាប់អាស៊ីសេរី កាលពីថ្ងៃទី២៦ កក្កដា ថា ក្រុមហ៊ុនកំពុងប្រតិបត្តិការបិទទ្វារទឹកសាកល្បងបាន ៨ទ្វារទឹកហើយ ហើយមន្ត្រីបច្ចេកទេសកំពុងរង់ចាំមើលអាកាសធាតុ ព្រោះបច្ចុប្បន្នទឹកជំនន់កំពុងកើនឡើងពីខ្សែទឹកខាងលើ។
អ្នកនាំពាក្យសាលាខែត្រស្ទឹងត្រែង លោក ម៉ែន គុង មានប្រសាសន៍ថា ជុំវិញការបារម្ភរបស់ពលរដ្ឋ អាជ្ញាធរខែត្រធ្លាប់បានណែនាំទៅក្រុមហ៊ុន ឲ្យប្រុងប្រយ័ត្នគ្រប់ពេលទាក់ទិនដំណើរការបិទទ្វារទឹកសាកល្បង។ លោកថា អាជ្ញាធរខែត្រជំរុញឲ្យក្រុមហ៊ុនបង្កើតស្ថានីយជូនដំណឹង ព្រមទាំងបង្កើតប្រព័ន្ធសុវត្ថិភាពផង ក្នុងបំណងអន្តរាគមន៍ឲ្យបានទាន់ពេលវេលា។ លោកបញ្ជាក់ថា មកទល់ពេលនេះ អាជ្ញាធរខែត្របានបញ្ជូនកម្លាំងត្រៀមជួយអន្តរាគមន៍សង្គ្រោះពលរដ្ឋនៅខ្សែទឹកខាងលើជាអាទិភាព៖ «សុំជម្រាបជូនពុកម៉ែបងប្អូនឲ្យបានជ្រាបថា អាជ្ញាធរមូលដ្ឋាន ឃុំ ស្រុក និងខែត្រ បានគិតគូរមុននេះហើយកិច្ចការងារនេះ ហើយបានណែនាំទៅក្រុមហ៊ុនធ្វើការប្រុងប្រយ័ត្ន និងមានស្ថានីយជូនដំណឹងមួយច្បាស់លាស់»។
មន្ត្រីសង្គមស៊ីវិលឲ្យដឹងថា ទំនប់វារីអគ្គិសនីដែលត្រូវបានសាងសង់នៅតាមដងទន្លេសេសាន មានចំនួន៧ ក្នុងនោះទំនប់ចំនួន៦ ឋិតនៅក្នុងប្រទេសវៀតណាម គឺទំនប់វារីអគ្គិសនីយ៉ាលី ទំនប់វារីអគ្គិសនីផ្លេក្រុង ទំនប់វារីអគ្គិសនីសេសាន៣ ទំនប់វារីអគ្គិសនីសេសាន ៣អា ទំនប់វារីអគ្គិសនីសេសាន៤ ទំនប់វារីអគ្គិសនីសេសាន ៤អា និងទំនប់វារីអគ្គិសនីសេសានក្រោមពីរនៅក្នុងខែត្រស្ទឹងត្រែង។ ក្នុងចំណោមទំនប់ទាំងនោះ មានទំនប់វារីអគ្គិសនីសេសាន ៤អា ឬហៅថាទំនប់ទប់ទឹកជំនន់មិនឲ្យលិចនៅប្រទេសវៀតណាម ដែលមន្ត្រីសង្គមស៊ីវិលចោទថា ធ្លាប់បើកទ្វារទឹកបង្កឲ្យលិចលង់លំនៅឋានពលរដ្ឋច្រើនគ្រួសារនៅខែត្ររតនគិរី និងខែត្រស្ទឹងត្រែង។
ទីប្រឹក្សាស្រាវជ្រាវឯករាជ្យ លោក ភូ ប៊ុនថាន់ ឲ្យដឹងថា បទពិសោធន៍ការបង្ហូរទឹកនៃវារីអគ្គិសនីរបស់ប្រទេសវៀតណាម បង្កឲ្យមានទឹកជំនន់ ជាសញ្ញាដែលនាំឲ្យពលរដ្ឋភ័យព្រួយ។ ហេតុនេះ ក្រុមហ៊ុនវារីអគ្គិសនីសេសានក្រោមពីរ ត្រូវបង្កើនល្បឿនប្រុងប្រយ័ត្នខ្ពស់ដោយត្រូវបង្កើតប្រព័ន្ធជូនដំណឹងឲ្យទូលំទូលាយស្ដីពីការបិទ និងបើកទ្វារទឹក និងត្រូវរៀបចំប្រព័ន្ធប្រកាសអាសន្ននៅភូមិនីមួយៗ ដើម្បីផ្តល់ដំណឹងមុនពេលបើកទ្វារទឹក៖ «ខ្ញុំគិតថា ក្រុមហ៊ុនត្រូវតាមដានឲ្យបានល្អិតល្អន់ទាក់ទិនគ្រប់គ្រងទឹកក្នុងអាង ទាក់ទិនទំនប់សេសានក្រោមពីរ ហើយចាត់វិធានការឲ្យបានទាន់ពេលវេលា ក្នុងការជូនដំណឹង ឬប្រកាសអាសន្នអាជ្ញាធរ និងពលរដ្ឋនៅផ្នែកខាងក្រោម»។
ពលរដ្ឋរស់នៅខ្សែទឹកខាងក្រោមត្អូញថា អ្នកភូមិរស់នៅតាមដងទន្លេប្រឈមការធ្លាក់ចុះប្រាក់ចំណូល ព្រោះមិនអាចចាប់ត្រីបរិភោគបានដូចឆ្នាំមុនៗ ហើយស្ថានភាពទឹកទន្លេនឹងស្រកខ្លាំងនៅរដូវប្រាំង ដែលនាំឲ្យទឹកនៅតំបន់ខ្លះត្រូវរីងរាក់ និងប៉ះពាល់វិស័យទេសចរណ៍ក្នុងតំបន់មួយចំនួននៅខ្សែទឹកខាងក្រោម នៅពេលទំនប់វារីអគ្គិសនីសេសានក្រោមពីរដាក់ឲ្យដំណើរការ។
ដោយឡែកស្ថានភាពទឹកទន្លេរបស់ពលរដ្ឋនៅខ្សែទឹកខាងលើនៅឃុំស្រែគរ កំពុងកើនឡើងលិចផ្លូវ និងផ្ទះពលរដ្ឋនៅភូមិចាស់មួយចំនួន។
មេឃុំស្រែគរ លោក សៀក មេគង្គ ឲ្យដឹងថា កម្ពស់ទឹកបានកើនឡើង ១ម៉ែត្រពីរតឹក ប្រៀបធៀបកម្ពស់ទឹកកាលពីថ្ងៃទី២៦ កក្កដា។ លោកថា ទឹកទន្លេកំពុងជន់ឡើងលិចផ្លូវ និងផ្ទះពលរដ្ឋនៅចុងភូមិស្រែគរចាស់នៅរសៀលថ្ងៃទី២៧ កក្កដា ហើយពលរដ្ឋកំពុងជញ្ជូនសម្ភារៈ និងសត្វចិញ្ចឹមទៅទីទួលសុវត្ថិភាព៖ «ទាក់ទងសម្ភារៈគាត់ដែលសំខាន់ៗ ក្រោមផ្ទះគាត់រៀបឡើងលើផ្ទះទាំងអស់ និងឲ្យគាត់ប្រយ័ត្នប្រយែងយប់ព្រលប់អីណា»។
លោក សៀក មេគង្គ បន្ថែមថា អាជ្ញាធរ និងក្រុមហ៊ុន កំពុងត្រៀមកម្លាំងសង្គ្រោះពលរដ្ឋនៅតំបន់នោះ ដោយបានត្រៀមទូកជញ្ជូនសម្ភារៈ និងកុមារទៅកាន់ទីទួលសុវត្ថិភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
- ស្ដាប់ផ្ទាល់ (ព្រឹក ៥:៣០-៦:៣០ ល្ងាច ៧:៣០-៨:៣០)
- សំឡេង
- ពលរដ្ឋរិះគន់រដ្ឋាភិបាលលោក ហ៊ុន សែន ដែលយកលុយជាតិទៅផលិតភាពយន្តស្ដីពីការតស៊ូរបស់លោក ហ៊ុន សែន
- តើលោក ហ៊ុន សែន និងគណបក្សប្រជាជនកម្ពុជាកំពុងជួបវិបត្តិផ្ទៃក្នុងបែបណា?
- “ការរំលាយបក្សប្រឆាំងធ្វើឱ្យកម្ពុជាលំបាករាប់ឆ្នាំទៅមុខទៀត បើគ្មានដំណោះស្រាយផ្ទៃក្នុង”
- ពលករម្នាក់បានស្លាប់ក្នុងអំឡុងពេលធ្វើចត្តាឡីស័ករយៈពេល១៤ ថ្ងៃ នៅខេត្តត្បូងឃ្មុំ
- បុរសខ្មែរម្នាក់លះបង់ពេលផ្ទាល់ខ្លួនជួយការពារសិទ្ធិពលករខ្មែរនៅថៃដោយមិនគិតប្រាក់កម្រៃ
