សកម្មជនព្រៃឡង់ស្នើរដ្ឋាភិបាលឲ្យសហការទប់ស្កាត់ការបំផ្លាញព្រៃឈើ
2015.12.15
សកម្មជនព្រៃឡង់ ស្នើរដ្ឋាភិបាលឲ្យសហការជាមួយបណ្ដាញសហគមន៍ព្រៃឈើ ដើម្បីនាំគ្នាទប់ស្កាត់ការកាប់បំផ្លាញព្រៃឈើដោយខុសច្បាប់នៅកម្ពុជា។ ការស្នើនេះ ធ្វើឡើងនៅក្នុងសន្និសីទសារព័ត៌មាន ដែលរៀបចំដោយតំណាងសហគមន៍ព្រៃឡង់នារាជធានីភ្នំពេញ នៅថ្ងៃទី១៥ ខែធ្នូ។
នៅក្នុងសន្និសីទសារព័ត៌មាន តំណាងសហគមន៍ព្រៃឡង់លើកឡើងថា ការងារល្បាតព្រៃ និងការទប់ស្កាត់បទល្មើសព្រៃឈើរបស់ពួកគេ នៅតែជួបឧបសគ្គ និងការរារាំងពីអាជ្ញាធរ។
តំណាងសហគមន៍ព្រៃឡង់ លោក ហឿន សុភាព ដែលបានឡើងទទួលពានរង្វាន់ពិភពលោក សម្រាប់កិច្ចការងារថែរក្សាបរិស្ថាន នៅក្នុងសន្និសីទពិភពលោកនាប្រទេសបារាំង ស្ដីពីបម្រែបម្រួលអាកាសធាតុ បានថ្លែងនៅក្នុងសន្និសីទសារព័ត៌មាននេះថា សកម្មជនព្រៃឈើធ្លាប់ទទួលរងនូវការគំរាមកំហែង ការបំភិតបំភ័យ និងការកោះហៅទៅសាកសួរពីអាជ្ញាធរ បន្ទាប់ពីសកម្មជនបរិស្ថានចុះបង្ក្រាបបទល្មើសព្រៃឈើ៖ «មិនមានប្រាក់ខែ មិនមានលុយជាធំធេងទេ តែនេះជាទឹកចិត្តដ៏ថ្លៃថ្លាដែលយើងបានចូលរួម ទាក់ទងនឹងការការពារធនធានធម្មជាតិ ហើយការងារមួយចំនួននេះ គឺយើងបានធ្វើឲ្យកាត់បន្ថយការប្រែប្រួលអាកាសធាតុផងដែរ»។
អ្នកប្រឹក្សាគោលនយោបាយជាន់ខ្ពស់របស់កម្មវិធីអភិវឌ្ឍន៍នៃអង្គការសហប្រជាជាតិ (UNDP) ប្រចាំប្រទេសកម្ពុជា លោក ណាប៉ូឡេអុង ណាវ៉ារ៍រ៉ូ (Napoleon Navarro) មានប្រសាសន៍ថា រដ្ឋាភិបាលគួរបង្កើននូវកិច្ចសហការគ្រប់គ្រងព្រៃឈើជាមួយសហគមន៍មូលដ្ឋានបន្ថែមទៀត ពិសេសគួរមានយន្តការការពារសកម្មជនបរិស្ថានពីការគំរាមកំហែង និងការបាញ់សម្លាប់៖ «ការគ្រប់គ្រងរួមគ្នាលើការការពារព្រៃឈើ។ នៅកម្ពុជា មិនទាន់មានការចែងពីការគ្រប់គ្រងព្រៃរួមនោះទេ។ តែដែលគាត់ធ្វើការពិភាក្សាជាមួយរដ្ឋាភិបាល ពិនិត្យឡើងវិញពីសំណើនៃការការពារធនធានធម្មជាតិនៅកម្ពុជា»។
វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងបរិស្ថាន លោក សៅ សុភាព ដើម្បីឆ្លើយតបទៅនឹងការស្នើនេះបានឡើយ នៅថ្ងៃទី១៥ ខែធ្នូ។
ទម្រាំទទួលបានពានរង្វាន់ពិភពលោកផ្នែកបរិស្ថាននេះ បណ្ដាញសហគមន៍ព្រៃឡង់ បានយាមល្បាតព្រៃអស់រយៈពេល ១៥ឆ្នាំមកហើយ។
ជុំវិញការទទួលបានពានរង្វាន់លំដាប់ពិភពលោក ដែលផ្តល់តម្លៃចំពោះការខិតខំប្រឹងប្រែងរបស់បណ្ដាញសហគមន៍ព្រៃឡង់នេះ លោក ណាប៉ូឡេអុង ណាវ៉ារ៍រ៉ូ វាយតម្លៃថា ថ្វីត្បិតថាការងារដែលសហគមន៍នេះធ្វើនៅក្នុងប្រទេសកម្ពុជា ក៏ពិតមែន តែការងារនេះផ្ដល់នូវផលវិជ្ជមានសម្រាប់បរិស្ថានភពផែនដីទាំងមូល។
យ៉ាងណាក៏ដោយ សកម្មជនការពារព្រៃឈើដែលទទួលពានរង្វាន់ពិភពលោក សម្រាប់កិច្ចការងារថែរក្សាបរិស្ថាន សោកស្ដាយដែលសន្ដានចិត្តនៃការខំប្រឹងប្រែងការពារព្រៃឈើសម្រាប់ប្រទេសកម្ពុជា មិនត្រូវបានលើកទឹកចិត្តពីរដ្ឋាភិបាលកម្ពុជា តែបែរជាទទួលបានពានពីប្រទេសដទៃទៅវិញ៖ «ប្រទេសកម្ពុជា អត់ទាន់មានសមត្ថភាព ឬអត់ទាន់មានការរៀបចំការផ្ដល់ពានរង្វាន់ដល់សកម្មជនព្រៃ ឬការពារផលប្រយោជន៍នៅក្នុងប្រទេសកម្ពុជា ដោយសារទីមួយ ជាចំណុចរបស់មន្ត្រីដែលពាក់ព័ន្ធ ដែលក្នុងនោះ តាមការមើលឃើញរបស់យើងឃើញថា អ្នកបំផ្លាញព្រៃឈើមួយចំនួនចេញមកពីអ្នកមានអំណាច មានតួនាទីនៅក្នុងស្ថាប័នរដ្ឋាភិបាលតែម្តង»។
កាលពីខែមេសា ឆ្នាំ២០១២ សកម្មជនការពារព្រៃឈើ លោក ឈុត វុទ្ធី ត្រូវបានខ្មាន់កាំភ្លើងបាញ់សម្លាប់អំឡុងពេលលោកនាំអ្នកកាសែតចុះពិនិត្យមើលបទល្មើសព្រៃឈើ នៅក្នុងខេត្តកោះកុង។ មកទល់ពេលនេះ យុត្តិធម៌សម្រាប់សកម្មជនរូបនេះ មិនទាន់មានតម្រុយនៅឡើយ៕