អ្នកស្រី រ៉ូណា ស្មីត លើកឡើង​ពី​បញ្ហា​ប្រឈម​នៃ​បរិស្ថាន​និង​ដីធ្លី​ជាមួយ​លោក សាយ សំអាល់

ដោយ មាន ឫទ្ធិ
2018-11-07
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​បរិស្ថាន លោក សាយ សំអាល់ ផ្ដល់​បទសម្ភាសន៍​បន្ទាប់​ពី​ចូល​បំភ្លឺ​នៅ​រដ្ឋសភា ថ្ងៃ​ទី​៤ ខែ​មករា ឆ្នាំ​២០១៧។
រដ្ឋមន្ត្រី​ក្រសួង​បរិស្ថាន លោក សាយ សំអាល់ ផ្ដល់​បទសម្ភាសន៍​បន្ទាប់​ពី​ចូល​បំភ្លឺ​នៅ​រដ្ឋសភា ថ្ងៃ​ទី​៤ ខែ​មករា ឆ្នាំ​២០១៧។
RFA

អ្នករាយការណ៍​ពិសេស​អង្គការសហប្រជាជាតិ​ទទួលបន្ទុក​សិទ្ធិមនុស្ស​នៅ​កម្ពុជា អ្នកស្រី រ៉ូណា ស្មីត (Rhona Smith) ពិភាក្សា​បញ្ហា​ក្រម​បរិស្ថាន សិទ្ធិ​ដីធ្លី និង​បញ្ហា​ប្រឈម​នៃ​ការ​អភិវឌ្ឍ​ប្រកប​ដោយ​តុល្យភាព ចំពោះ​ការ​អភិរក្ស និង​សិទ្ធិ​របស់​សហគមន៍​ដែល​ទទួល​ផល​ប៉ះពាល់ ក្នុង​ជំនួប​ការងារ​ជាមួយ​រដ្ឋមន្ត្រី​ក្រសួង​បរិស្ថាន លោក សាយ សំអាល់។

អ្នកស្រី រ៉ូណា ស្មីត នៅ​ថ្ងៃទី៧ វិច្ឆិកា នេះ បាន​ជួប​ពិភាក្សា​ការងារ​ដាច់ដោយឡែក​ជាមួយ​នឹង​មន្ត្រី​របប​ក្រុង​ភ្នំពេញ ក្នុង​នោះ​មាន​រដ្ឋមន្ត្រី​ក្រសួងបរិស្ថាន​លោក សាយ សំអាល់ រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធមុនីរ័ត្ន និង​រដ្ឋលេខាធិការ​ក្រសួង​ការបរទេស និង​សហប្រតិបត្តិការ​អន្តរជាតិ អ្នកស្រី អៀត សុភា។

ក្នុង​ជំនួប​ជាមួយ​លោក សាយ សំអាល់ រដ្ឋមន្ត្រី​ក្រសួងបរិស្ថាន អ្នកស្រី រ៉ូណា ស្មីត បាន​ស្នើ​សុំ​ឲ្យ​រដ្ឋមន្ត្រី​រូប​នេះ ធ្វើ​បច្ចុប្បន្នភាព​បន្ថែម​អំពី​ដំណើរការ​នៃ​ដំណោះស្រាយ​បញ្ហា​ដីធ្លី នៅ​ខេត្ត​កោះកុង ដែល​អ្នកស្រី​ទទួល​បាន​ញត្តិ​ពី​ពលរដ្ឋ​ដែល​មាន​ជម្លោះដីធ្លី​នៅ​ទីនោះ។

អ្នកនាំពាក្យ​ក្រសួង​បរិស្ថាន​លោក នេត្រ ភ័ក្ត្រា ប្រាប់​អាស៊ីសេរី​ថា ក្រសួងបរិស្ថាន​បាន​រៀបចំ​ក្រុម​ការងារ​ដោះស្រាយ​បញ្ហា​ដីធ្លី និង​បាន​កំណត់​អត្តសញ្ញាណ​ជនរងគ្រោះ និង​អ្នក​ប៉ះពាល់​រួចរាល់​ហើយ៖ «លោក​រដ្ឋមន្ត្រី បាន​ជម្រាប​ជូន​អំពី​ការ​វិវត្ត​ថ្មីៗ​ជុំវិញ​ដំណោះស្រាយ​នេះ គឺ​ក្រុមការងារ​ដោះស្រាយ​បញ្ហា​ដីធ្លី បាន​កំណត់​នូវ​អត្តសញ្ញាណ​របស់​ជន​រងគ្រោះ អ្នក​ដែល​ប៉ះពាល់​ដោយ​ផ្ទាល់​ទៅលើ​បញ្ហា​ហ្នឹង គឺ​ធ្វើ​ម៉េច​ឲ្យ​មានការ​ដោះស្រាយ​បាន​សម​ស្រប។ ចំពោះ​កិច្ច​ការងារ​នេះ គឺ​ក្រសួង​បរិស្ថាន​បាន​ជម្រាប​ជូន​ថា យើង​បាន​ធ្វើការ​ដោះស្រាយ​ហើយ ហើយ​យើង​នឹង​ឈាន​ទៅ​រក​ការ​បិទ​បញ្ចប់​នា​ពេល​ខាងមុខ ទៅលើ​កិច្ច​ការងារ​ទាំងអស់​នេះ»

លោក នេត្រ ភក្ត្រា ឲ្យ​ដឹង​ដែរ​ថា នៅ​ក្នុង​ជំនួប​នោះ អ្នកស្រី រ៉ូណា ស្មីត បាន​ប្រាប់​ទៅ​លោក សាយ សំអាល់ អំពី​កង្វល់ និង​បញ្ហា​នានា​របស់​ពលរដ្ឋ​ដែល​មាន​ទំនាស់​ដីធ្លី តាមរយៈ​ញត្តិ​ដែល​អ្នកស្រី​ទទួល​បាន​ពី​ក្រុម​ពលរដ្ឋ ហើយ​អ្នកស្រី​នឹង​រៀបចំ​បញ្ជូន​ញត្តិ​របស់​ពលរដ្ឋ​ទាំងនោះ​ទៅ​ក្រសួង​ឲ្យ​ជួយ​ពិនិត្យ​ដោះស្រាយ​បញ្ហា​នេះ។

លោក នេត្រ ភក្ត្រា គូស​បញ្ជាក់​ថា ខាង​ក្រសួងបរិស្ថាន​បាន​ដោះស្រាយ​ទំនាស់​ដីធ្លី​ដែល​ពាក់ព័ន្ធ​នឹង​សម្បទាន​ដី​សេដ្ឋកិច្ច​នា​ពេល​កន្លងទៅ ដោយ​បាន​ដកហូត​មកវិញ​នូវ​គម្រោង​វិនិយោគ​ទាំងឡាយ​ណា របស់​ក្រុមហ៊ុន​មួយ​ចំនួន​ដែល​មិន​បាន​អនុវត្ត​ទៅតាម​ផែនការ​សកម្មភាព និង​កិច្ចសន្យា ឬ​បង្ក​ឲ្យ​មានការ​ប៉ះពាល់។ លោក​ថា ក្រសួង​ក៏បាន​ធ្វើការ​ពិនិត្យ​ឡើងវិញ​ទៅលើ​ថេរវេលា​នៃ​ការ​វិនិយោគ លើ​ដី​សម្បទាន​សេដ្ឋកិច្ច ដោយ​បាន​កាត់​បន្ថយ​ពី ៩៩ ឬ ៧០ ឆ្នាំ មក​នៅ​ត្រឹម ៥០ ឆ្នាំ​វិញ៖ «សម្បទាន​ដី​សេដ្ឋកិច្ច​ដែល​យើង​បាន​ធ្វើការ​ពិនិត្យមើល​ឡើងវិញ គឺ​យើង​បាន​ប្រគល់​ទៅ​ឲ្យ​ក្រសួង​កសិកម្ម តាម​ការ​ធ្វើ​កំណែ​ទម្រង់​ស៊ីជម្រៅ​រវាង​ស្ថាប័ន​អភិរក្ស និង​ស្ថាប័ន​អភិវឌ្ឍន៍ រវាង​ការបែងចែក​តួនាទី​ភារកិច្ច​រវាង​ក្រសួង​កសិកម្ម និង​ក្រសួង​បរិស្ថាន។ ចំពោះ​ការពិនិត្យ​ឡើងវិញ​លើ​សម្បទាន​ដី​សេដ្ឋកិច្ច​នេះ គឺ​បាន​ជួយ​ឲ្យ​យើង ដោះស្រាយ​នូវ​បញ្ហា​ដីធ្លី និង​ជម្លោះ​មួយ​ចំនួន​។ យើង​ឃើញ​ថា សម្រាប់​ការគ្រប់គ្រង​របស់​ក្រសួង​បរិស្ថាន​នេះ បញ្ហា​ទាំងអស់​គឺ ស្ទើរ​តែ​ដោះស្រាយ​បាន​ចំពោះ​បញ្ហា​ជម្លោះដីធ្លី ។ យើង​នៅសល់​បញ្ហា​តិចតួច​បំផុត​ដែល​យើង​បន្ត​ដោះស្រាយ បន្ត​ទៅ​ទៀត​ទៅលើ​ការងារ​ទាំងអស់​ហ្នឹង»

ក្រៅពី​បញ្ហា​ដីធ្លី ភាគី​ទាំងពីរ​ក៏បាន លើកឡើង​ពាក់ព័ន្ធ​នឹង​បញ្ហា​សំខាន់ៗ​មួយ​ចំនួន ដូចជា​ករណី​កំណែទម្រង់​នៅ​ក្នុង​ក្រសួងបរិស្ថាន ការងារ​អភិរក្ស ការងារ​ការពារ​ធនធាន​ធម្មជាតិ ការគ្រប់គ្រង​ទៅ​លើ​សំណល់​រឹង និង​រាវ សំរាម ក្នុង​ក្របខ័ណ្ឌ​នៃ​ក្រសួងបរិស្ថាន។

នៅ​ថ្ងៃទី៧ វិច្ឆិកា នេះ​ដែរ អ្នកស្រី រ៉ូ ណាស្មីត ក៏​មាន​ជំនួប​ដាច់ដោយឡែក​ជាមួយ​រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធមុនីរ័ត្ន ដោយ​បាន​ពិភាក្សា​អំពី​វឌ្ឍនភាព​នៃ​ថវិកាជាតិ និង​ការ​ធ្វើ​កំណែទម្រង់​ការគ្រប់គ្រង​ហិរញ្ញវត្ថុ​សាធារណៈ​នៅ​កម្ពុជា។ ហ្វេសប៊ុក​​របស់​ឧត្ដមស្នងការ​អង្គការ​សហប្រជាជាតិ​ទទួលបន្ទុក​សិទ្ធិមនុស្ស​នៅ​កម្ពុជា ឲ្យ​ដឹង​ថា ក្នុង​ជំនួប​នោះ លោក អូន ព័ន្ធមុនីរ័ត្ន បាន​ធ្វើ​បច្ចុប្បន្នភាព​ដល់​អ្នករាយការណ៍​ពិសេស​ស​ស្ដីពី​សេចក្ដី​សង្ខេប​ថវិកា និង​ផែនការ សម្រាប់​វិមជ្ឈការ​ហិរញ្ញវត្ថុ និង​ការធានា​គណនេយ្យភាព និង​តម្លាភាព​នៅ​ថ្នាក់​ជាតិ និង​នៅ​ថ្នាក់ក្រោម​ជាតិ។

នៅ​ថ្ងៃ​ដដែល​នេះ អ្នកស្រី រ៉ូណា ស្មីត ក៏បាន​ជួបពិភាក្សា​ជាមួយ​រដ្ឋលេខាធិការ​ក្រសួងការបរទេស និង​សហប្រតិបត្តិការ​អន្តរជាតិ អ្នកស្រី អៀត សុភា ដោយ​អ្នកស្រី​បាន​លើកឡើង​អំពី​របកគំហើញ​បឋម​នៃ​ដំណើរ​បេសកកម្ម​របស់​អ្នកស្រី​នៅ​កម្ពុជា​ចុងក្រោយ​នេះ។ ហ្វេសប៊ុក​របស់​ការិយាល័យ​ឧត្តម​ស្នងការ​អង្គការសហប្រជាជាតិ​ទទួលបន្ទុក​សិទ្ធិមនុស្ស​នៅ​កម្ពុជា ឲ្យ​ដឹង​ថា ក្រសួង​ការបរទេស បាន​ទទួល​ស្គាល់​ថា មាន​កិច្ចការ​បន្ថែម​ទៀត​ត្រូវ​ធ្វើ ដើម្បី​ពង្រឹង​ការ​ការពារ និង​ការ​លើកស្ទួយ​សិទ្ធិមនុស្ស​នៅ​ក្នុង​ប្រទេស​កម្ពុជា។

អ្នករាយការណ៍​ពិសេស​អង្គការសហប្រជាជាតិ​ទទួលបន្ទុក​សិទ្ធិមនុស្ស​នៅ​កម្ពុជា នឹង​បិទ​បញ្ចប់​ដំណើរ​ទស្សន​កិច្ច​ការងារ​រយៈពេល ១១​ថ្ងៃ របស់​អ្នកស្រី​មក​កម្ពុជា នៅ​ថ្ងៃស្អែក ដោយ​អ្នកស្រី​នឹង​ធ្វើ​សន្និសីទ​កាសែត​មួយ ស្ដីពី​លទ្ធផល​នៃ​ដំណើរ​ទស្សនកិច្ច​របស់​អ្នកស្រី​នេះ។ អ្នកស្រី​នឹង​ធ្វើ​របាយការណ៍​ពី​ស្ថានភាព​សិទ្ធិមនុស្ស​កម្ពុជា​ទៅ​អង្គការសហប្រជាជាតិ នៅ​ខែ​កញ្ញា ឆ្នាំ​២០១៩ ខាងមុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល