សហគមន៍​ប្រជានេសាទ​ទន្លេសាប ស្នើ​រដ្ឋាភិបាល​និយាយ​ប្រាប់​ចិន ឲ្យ​បើកទឹក​តាម​ទំនប់​វារីអគ្គិសនី​នៅ​ខ្សែទឹក​ខាងលើ​ទន្លេមេគង្គ

ដោយ មាន ឫទ្ធិ
2020-08-19
អ៊ីម៉ែល
មតិ
Share
បោះពុម្ព
ទូក និង​កាណូត​របស់​ប្រជា​នេសាទ​ទុក​ចោល​រដូករណែល​នៅ​លើ​ដី​រីងស្ងួត​នៃ​ដៃ​ទន្លេសាប​ នៅ​ភូមិកំពង់ឃ្លាំង ខេត្តសៀមរាប កាលពី​ថ្ងៃទី០៦ ខែកក្កដា ឆ្នាំ២០២០។
ទូក និង​កាណូត​របស់​ប្រជា​នេសាទ​ទុក​ចោល​រដូករណែល​នៅ​លើ​ដី​រីងស្ងួត​នៃ​ដៃ​ទន្លេសាប​ នៅ​ភូមិកំពង់ឃ្លាំង ខេត្តសៀមរាប កាលពី​ថ្ងៃទី០៦ ខែកក្កដា ឆ្នាំ២០២០។
REUTERS/Prak Chan Thul

សហគមន៍​ប្រជានេសាទ​នៅ​តំបន់​បឹងទន្លេសាប ស្នើ​ឲ្យ​រដ្ឋាភិបាល​និយាយ​ប្រាប់​ទៅ​ប្រទេសចិន ឲ្យ​បើកទឹក​តាម​ទំនប់​វារីអគ្គិសនី​នៅ​ខ្សែទឹក​ខាងលើ​ទន្លេមេគង្គ ដើម្បី​ជួយ​សម្រាល​ផលប៉ះពាល់​ដល់​ជីវភាព​ពួកគាត់។ ការលើកឡើង​នេះ ស្របពេល​ដែល​កម្រិត​ទឹក​នៅ​បឹងទន្លេសាប​នៅមាន​តិចតួច​នៅឡើយ បើ​ប្រៀបធៀប​ទៅនឹង​បណ្តា​ឆ្នាំមុនៗ ហើយ​ពួកគាត់​បន្ត​ជួប​ប្រទះ​នូវ​ការខ្វះខាត​ដោយសារ​តែ​រកត្រី​មិនបាន។ ប្រជានេសាទ​ម្នាក់​នៅ​តំបន់​បឹងទន្លេសាប រស់នៅ​ភូមិចារុះ ឃុំរាំងទិល ស្រុកកណ្តៀង ខេត្តពោធិសាត់ លោក ភួង ហ៊ីង ប្រាប់​អាស៊ីសេរី​កាលពីល្ងាច​ថ្ងៃទី១៩ សីហា ថា ទឹកបឹង​ទន្លេសាប នៅ​តំបន់​ដែល​លោក​រស់នៅ ទើបតែ​នឹង​ហក់ឡើង​បាន​ប្រមាណ ៧ តឹក ប៉ុណ្ណោះ ក្រោយ​រង​ការរីងរាក់​អស់​ជាច្រើនខែ​មកហើយ។ លោក​សង្កេតឃើញ​ថា កម្រិតទឹក​នៅ​បឹងទន្លេសាប​ដែល​ចាប់​ផ្តើម​ហក់​ឡើង​បន្តិច​នេះ កើត​មាន​ចាប់តាំង​ពី​ថ្ងៃទី០៦ ខែសីហា។ លោកថា កំណើន​ទឹក​នេះ គឺ​មិនមែន​ដោយសារ​ការហូរចូល​ពី​ទន្លេមេគង្គ​ទេ តែ​ដោយសារ​ជំនន់​ទឹកភ្លៀង៖«យ៉ាប់​... ឆ្នាំទៅម៉ិញ​វា​ខុសគ្នា។ ឆ្នាំទៅម៉ិញ​ វាឡើង​ថ្ងៃទី៣ មែន ប៉ុន្តែ​ទឹក​វានៅ​កល់​ច្រើន​ជាង ៤តឹក។ ឆ្នាំនេះ វារីង​ខ្លាំង​តែម្តង។ រីង​គោកខ្លាំង ហើយ... ដល់ពេល​ឆ្នាំ​ទៅម៉ិញ ទឹក​តូច​ល្មមហើយ ដល់​ពេល​វា​រីងៗ​យូរ​ទៅ អញ្ចឹង ត្រី​ដែល​ចេញ​ផុត​ពី​មាត់​ព្រៃ​ទៅ​កណ្តាល​ទន្លេ ពួក​ខាង​វៀតណាម គេ​រក​អស់ទៅ។»

ប្រជានេសាទ​វ័យ៥៩ឆ្នាំ​រូបនេះ រអ៊ូ​រទាំ​ថា កម្រិត​ទឹក​រីង​រាក់​យូរ​នៅ​បឹងទន្លេសាប​ក្នុង​ឆ្នាំនេះ ធ្វើ​ឲ្យ​ពួកគាត់​មិន​អាច​រក​ត្រី​បាន ខុស​ប្លែក​ខ្លាំង​ពី​ជាង​ពីរឆ្នាំ​មុន។ លោកថា ក្នុង​អំឡុង​ពេល​ដែល​ប្រជាសហគមន៍​នេសាទ​នៅ​តំបន់​បឹងទន្លេសាប​កំពុង​ជួបប្រទះ​នូវ​ការលំបាក​បែបនេះ កម្រ​ឃើញ​មាន​អាជ្ញាធរ​រដ្ឋាភិបាល​ណាមួយ​ចុះ​ជួយ​ដល់​ពលរដ្ឋ​នៅ​តាម​សហគមន៍​នេសាទ​របស់​លោក​ណាស់។

រីឯ​ប្រធាន​សម្ព័ន្ធ​ប្រជានេសាទ​ទន្លេសាប លោក ឡុង សូចែត្រ សង្កេត​ឃើញ​ថា កំណើន​ទឹក​នៅ​បឹង​ទន្លេសាប​ឆ្នាំនេះ​នៅ​មាន​ភាពយឺត​នៅឡើយ ហើយ​ទំនង​ដូចជា មិនសូវ​មាន​កំសួល​ខ្លាំង​ពី​ផ្ទៃ​អាង​ទន្លេមេគង្គ​មកទេ៖ «ទឹក​ហ្នុង​វា​មាន​ឡើង​ជាង​មុន អាច​មួយ​ម៉ែត្រ ឬ​មួយ​ម៉ែត្រ​លើស​អី​ហើយ។ ប៉ុន្តែ វា​អត់​មាន​កំសួល។ វាឡើង តាម​មើល​ទៅ​ភាគច្រើន ឡើង​ដោយសារ​ទឹកភ្លៀង​នៅ​តាម​ស្ទឹង​ជុំវិញ​ទឹកទន្លេសាប ប៉ុន្តែ ទឹកទន្លេមេគង្គ វាអត់​ទាន់​មាន​បុក​ខ្លាំង​មកទន្លេសាប​ទេ។ អ៊ីចឹង បើ​នៅ​ជុំវិញ​បឹងទន្លេសាប អន់​ភ្លៀង ទឹក​ទន្លេសាប​ក៏​រាង​អន់អែល​ ដូច​អត់​មាន​ឡើង​មកទៀត។»

ទិដ្ឋភាព​ទន្លេសាបថត​លើអាកាស នៅ​ខែ​កក្កដា ឆ្នាំ​២០២០។
ទិដ្ឋភាព​ទន្លេសាបថត​លើអាកាស នៅ​ខែ​កក្កដា ឆ្នាំ​២០២០។ រូប​ហ្វេសប៊ុក​អាជ្ញាធរ​ទន្លេសាប

ជាធម្មតា នៅ​រដូវវស្សា​ ទឹក​ទន្លេមេគង្គ​ចាប់ផ្តើម​ហូរ​មកចាក់​ផ្ទៃបឹងទន្លសាប​នៅដើម ឬ​ពាក់កណ្តាល​ខែមិថុនា រហូតដល់​ខែតុលា ហើយ​នៅរដូវ​ប្រាំង ទឹក​ចាប់ផ្តើម​ហូរ​បញ្ច្រាស​ពី​បឹងទន្លេសាប​ចូល​ទៅ​ទន្លេមេគង្គ​វិញ​ចាប់ពី​ខែវិច្ឆិកា រហូតដល់​ខែឧសភា។ ក៏ប៉ុន្តែ ផ្ទៃបឹងទន្លេសាប បាន​ទទួល​រង​នូវ​ភាពរីងរាក់​ខុសប្រក្រតី និង​ការបន្ត​អូស​បន្លាយ​រដូវ​ប្រាំង​ក្នុង​រដូវវស្សា មិន​ធ្លាប់​មាន​ពីមុនមក​ជាង​ពីរឆ្នាំ​ជាប់ៗគ្នា​មកហើយ។

អាស៊ីសេរី មិន​អាច​ទាក់ទង​អគ្គលេខាធិការរង​អាជ្ញាធរ​ទន្លេសាប លោក ម៉ៅ ហាក់ និង​អ្នកនាំពាក្យ​ក្រសួង​ធនធានទឹក និង​ឧតុនិយម លោក ចាន់ យុត្ថា បាន​នៅឡើយ​ទេ​ដើម្បី​សុំ​ព័ត៌មាន​ចុងក្រោយ​ពី​ស្ថានភាព​ផ្ទៃទឹក​នៅ​តំបន់​បឹងទន្លេសាប និង​ទន្លេមេគង្គ ដោយសារតែ​ពួកលោក​មិន​លើក​ទូរស័ព្ទ កាលពីល្ងាច​ថ្ងៃទី១៩ សីហា។ យ៉ាងណា ទំព័រ​ហ្វេសប៊ុក​របស់​អាជ្ញាធរ​ទន្លេសាប ឲ្យ​ដឹងថា​នៅថ្ងៃទី១៩ សីហា នៅ​តំបន់​ព្រែកក្តាម មាន​កម្ពស់​ជាង ៣ម៉ែត្រកន្លះ គឺ​ទាប​ជាង​ឆ្នាំទៅមុន​ជិត​កន្លះ​ម៉ែត្រ ហើយ​ទឹក​នៅ​តំបន់​កំពង់លួង មានជាង ១ម៉ែត្រកន្លះ។

ប្រជានេសាទ លោក ភួង ហ៊ីង ថា​នៅពេល​ដែល​ទឹក​រីង​យូរ​ដូច្នេះ ធ្វើ​ឲ្យ​ខ្សត់ត្រី រឹតតែ​បង្ក​ឲ្យ​ជីវភាព​របស់​ប្រជានេសាទ​នៅ​តាម​បឹងទន្លេសាប​ជួប​ប្រទះ​នូវ​ការលំបាក​ខ្លាំង។ លោក​សំណូមពរ​ឲ្យ​រដ្ឋាភិបាល​ជួយ​និយាយ​ជាមួយ​ប្រទេស​នៅ​តាម​ខ្សែទឹក​ខាងលើ​ទន្លេមេគង្គ ឲ្យ​បើក និង​​ចែក​រម្លែក​ទឹក​ដល់​ប្រទេស​នៅ​តាម​ខ្សែទឹក​ខាងក្រោម៖ «សំណូមពរ​ទេ ឲ្យ​ខាង​លើៗហ្នុង កុំ​ឲ្យ​ស្តុកទឹក​ពេក បង្ហូរ​ទឹក​មក​ឲ្យ​អ្នក​ខាង​ក្រោម​ផង ឲ្យ​អាច​ប្រើប្រាស់​ទឹក​បាន​ផង។ មាន​ទឹក​គឺ​វា​មាន​ត្រី ដល់​អត់ទឹក​ ក៏​អត់ត្រី​ដែរ​ហ្នុង។»

ទន្ទឹម​នឹងនោះ លោក​ក៏​ចង់​ឃើញ​អាជ្ញាធរ​រដ្ឋាភិបាល​ ជាពិសេស​ខាង​វិស័យ​ជលផល ជួយ​ផ្តល់​ការបណ្តុះបណ្តាល​ដល់​ប្រជានេសាទ​ដូចជា​ពួកគាត់ ឲ្យ​មាន​ជម្រើស​ច្រើន​ក្នុង​ការប្រកប​មុខរបរ​ចិញ្ចឹមជីវិត​នៅ​ពេល​ជួបប្រទះ​នឹង​វិបត្តិ​ទឹក​នេះ៖ «សព្វថ្ងៃនេះ វា​ពិបាក​ត្រង់អញ្ចេះ អ្នក​ទន្លេ​ដូចជា​អត់ជម្រើស។ គ្នា​ដែល​ចង់​ប្រែ​មុខរបរ​ថ្មី ខ្លះ​ចង់​នៅ​លើ​គោក​ជីកស្រះ​ចិញ្ចឹមត្រី​ដូច ពិសេស​នៅ វៀតណាម ខ្ញុំសរសើរ​វៀតណាម ត្រង់ថា គេ​អត់​មាន​ទន្លេសាប​ទេ ប៉ុន្តែ​ផលត្រី​របស់​គេៗ​យក​ចូល​ស្រុកខ្មែរ រាប់​រយ​តោន​ក្នុង​មួយថ្ងៃ... ត្រីរស់ចិញ្ចឹម ហើយ​គេ​អត់​មាន​ទន្លេសាប​ដូច​យើង​ទេ...។ ចំពោះ​យើង​ដែល​បឹងទន្លេសាប​ទាំងមូល យើង​អត់​មាន​ស្អី​នាំចេញ​ទៅ​គេ​បាន​ផងហ្នុង គឺ​ចាំ​យកត្រី​ហូប​ពីគេ​មកហ្នុង

គណៈកម្មការ​ទន្លេមេគង្គ កាលពី​ថ្ងៃទី០៧ សីហា បាន​ជំរុញ​ឲ្យ​ប្រទេស​តាម​ដង​ទន្លេមេគង្គ រួមមាន​កម្ពុជា វៀតណាម ឡាវ និង​ថៃ ពិចារណា​សំណូមពរ​ឲ្យ​ប្រទេសចិន បង្ហូរ​ទឹក​បន្ថែម​ដើម្បី​ជួយ​សម្រាល​ស្ថានភាព​ក្នុង​អាង​ទន្លេមេគង្គក្រោម និង បង្កើន​ការចែក​រំលែក​ទិន្នន័យ និង​ព័ត៌មាន​អំពី​ប្រតិបត្តិការ​ទំនប់ និង​ហេដ្ឋារចនាសម្ព័ន្ធ​ទឹក​របស់​ប្រទេស​នីមួយៗ ឲ្យបាន​រហ័ស និង​ប្រកបដោយ​តម្លាភាព។ គណៈកម្មការ​ទន្លេមេគង្គ រកឃើញ​ថា អាង​ទន្លេមេគង្គក្រោម ប្រឈមនឹង​រំហូរ​ទឹក​ទាប​បំផុត​ក្នុង​រយៈពេល ២ឆ្នាំ​ជាប់ៗ​គ្នា បង្ក​ឲ្យ​បឹងទន្លេសាប​របស់​ប្រទេស​កម្ពុជា​ជួបប្រទះ​នូវ​ស្ថានភាព​រាំងស្ងួត​ខ្លាំង​បំផុត​មិនធ្លាប់​មាន​គិតចាប់​ពីឆ្នាំ១៩៩៧មក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល