សហគមន៍​នេសាទ​នៅ​បឹង​ទន្លេសាប​ព្យាករណ៍​ថា នឹង​គ្មាន​ត្រី​នេសាទ​ឡើយ​ឆ្នាំនេះ ដោយ​បញ្ហា​ខ្វះ​ទឹក

ដោយ សេក បណ្ឌិត
2020-07-23
អ៊ីម៉ែល
មតិ
Share
បោះពុម្ព
ទិដ្ឋភាព​ទន្លេសាបថត​លើអាកាស នៅ​ខែ​កក្កដា ឆ្នាំ​២០២០។
ទិដ្ឋភាព​ទន្លេសាបថត​លើអាកាស នៅ​ខែ​កក្កដា ឆ្នាំ​២០២០។
រូប​ហ្វេសប៊ុក​អាជ្ញាធរ​ទន្លេសាប

ស្ថានភាព​រីង​រាក់ ឬ​គ្មាន​ទឹក​ជន់​ជោរ ចូល​តំបន់​បឹង​ទន្លេសាប​នៅ​ឆ្នាំ​២០២០​នេះ នឹង​ធ្វើ​ឱ្យ​ទិន្នផល​ត្រី​ធម្មជាតិ​ធ្លាក់​ចុះ​យ៉ាង​គំហុក ដែល​មិន​ធ្លាប់​មាន​កន្លង​មក។ ក្រុម​ប្រជា​នេសាទ​បារម្ភ​ថា ជីវភាព​របស់​ពួកគាត់​ដែល​រស់​អាស្រ័យ​លើ​ផល​នេសាទ ក៏​នឹង​ជួប​គ្រោះ​ទុរភិក្ស​ធ្ងន់ធ្ងរ​ដោយ​សារ​វិបត្តិ​នេះ។

សហគមន៍​នេសាទ​មួយ​ចំនួន​នៅ​តំបន់​បឹង​ទន្លេសាប​ត្អូញត្អែរ​ថា ផល​ត្រី​ប្រចាំ​ឆ្នាំ គឺជា​ឆ្នាំងបាយ​របស់​ពួកគាត់ បើ​គ្មាន​ត្រី​ក៏​គ្មាន​អង្ករ​ច្រក​ឆ្នាំង​ដែរ។

ពួកគាត់​អះអាង​ថា ការ​ខ្វះខាត​ទឹក ឬ​ស្ថានភាព​រីង​រាក់​នៅ​បឹង​ទន្លេសាប​ឆ្នាំនេះ​ធ្ងន់ធ្ងរ​ជាង​ឆ្នាំ​ណាៗ​ទាំងអស់ ហើយ​បញ្ហា​នេះ​បណ្ដាល​ឱ្យ​ប៉ះពាល់​យ៉ាង​ខ្លាំង​ដល់​ផល​នេសាទ​នៅ​ឆ្នាំនេះ។

អនុប្រធាន​សហគមន៍​នេសាទ​ស្តីក្រោមមហាសួង ឃុំ​ព្រែក​ហ្លួង ស្រុក​ឯកភ្នំ ខេត្ត​បាត់ដំបង លោក ហោ សំអាត មាន​ប្រសាសន៍​ថា ការ​ខ្វះ​ទឹក​នៅ​បឹង​ទន្លេសាប មិន​ត្រឹមតែ​ធ្វើ​ឱ្យ​ថយ​ចុះ​ផល​នេសាទ​ប៉ុណ្ណោះ​ទេ គឺ​ថែមទាំង​ធ្វើ​ឱ្យ​ដាច់​ពូជ​ត្រី​កម្រ​មួយ​ចំនួន ដែល​បាន​ប្រឈម​នឹង​ផុត​ពូជ​ពី​ឆ្នាំ​មុនៗ​មក​នោះ​ស្រាប់។

លោក​ថា​ពេលនេះ ជា​រដូវ​កាល​ត្រី​ពង​កូន​ក្នុង​អន្លង់​អភិរក្ស​មួយ​ចំនួន ហើយ​នឹង​ចេញ​ទៅ​រក​ជម្រក​តាម​ព្រៃរនាម និង​តំបន់​ផ្សេងទៀត​ដើម្បី​រក​ចំណី​ធម្មជាតិ​សម្រាប់​ភាព​ធំធាត់​របស់​ពួកគេ ប៉ុន្តែ​បើ​គ្មាន​ទឹក​ហូរ​ចូល​អន្លង់ និង​វាលទំនាប​ដូច​សព្វដង​នោះ ត្រី​មិន​អាច​ចេញពី​អន្លង់​នោះ​បាន បណ្ដាល​ខ្វះ​ចំណី​ដើម្បី​បន្ត​ជីវិត​បាន ម្យ៉ាងទៀត​មានពូជ​ត្រី​មួយ​ចំនួន​ដូចជា​ត្រី​ឆ្ដោ​ជាដើម ពេល​ខ្វះ​ចំណី ហើយ​ចេញ​ទៅ​ណា​មិន​រួច​ដូចគ្នា​ដែរ​នោះ វា​ក៏​ស៊ី​កូន​ត្រី​ជា​អាហារ​តែម្ដង៖ «ឆ្នាំនេះ​គោក​អ៊ីចឹង ធ្វើ​ឱ្យ​ត្រី​ជួប​ផល​លំបាក រឿង​លំបាក​មួយទៀត គឺ​ឧបករណ៍​ខុសច្បាប់​ក្នុង​បឹង​ទន្លេសាប​មាន​ច្រើន ពេល​ទឹក​តិច​អ៊ីចឹង​កូន​ត្រី​ញាស់​មក​ហើយ ក៏​អត់​មាន​កន្លែង​គេច​ចេញ​ក៏​ធ្លាក់​ចូល​ក្នុង​អន្ទាក់​ស្បៃ​មុង ឧបករណ៍​នេសាទ​ខុសច្បាប់ ចាប់​យក​អស់​....»

លោក​បន្ត​ថា ផល​លំបាក​សម្រាប់​ត្រី​មួយ​ផ្នែក​ទៀត​នោះ គឺ​ការបាត់បង់​ព្រៃរនាម​ជា​បន្តបន្ទាប់​ដែល​ជា​ជម្រក​ត្រី​ដ៏​សំខាន់​នៅ​រដូវវស្សា ឬ​រដូវ​ត្រី​ពង​កូន​ចាប់ពី​អំឡុង​ខែ មិថុនា ដល់​ខែកញ្ញា ឬ​ត្រី​ខ្លះ​អាច​ដល់​ខែ​តុលា។

ចំណែក អ្នកនេសាទ​មួយ​ចំនួន​ទៀត ក៏បាន​កត់សម្គាល់​ឱ្យ​ដឹង​ដែរ​ថា ជា​ទម្លាប់​រាល់​ឆ្នាំ នៅ​ខែ​ឧសភា ទឹកទន្លេ​មេគង្គ ចាប់ផ្ដើម​ឡើង​ចូល​ព្រែក លិច​វាល​ព្រៃរនាម ហើយ​បន្ត​ហូរ​ចូល​មក​បឹង​ទន្លេសាប​បាន​សម​ល្មម​សម្រាប់​ត្រី​រស់នៅ​បន្ត​ពូជ ប៉ុន្តែ​ឆ្នាំនេះ​យឺត​យាវ​ជាង​សព្វដង គឺ​យឺត​ជាង​២​ខែ​មក​ហើយ ហើយ​ពួកគាត់​ក៏​មិន​ដឹង​ថា​ពេលណា​ទឹកនឹង​មកដល់​បឹង​ទន្លេសាប​នេះ​ទេ។

ចំណែក ប្រធាន​សម្ព័ន្ធ​ប្រជា​នេសាទ​កម្ពុជា លោក ឡុង សូចែត ដែល​តែងតែ​ចូលរួម​អភិរក្ស​ពូជ​ត្រី​នៅ​តំបន់​បឹង​ទន្លេសាប ជាច្រើន​ឆ្នាំ​មក​ហើយ​នោះ ក៏​មាន​ក្តី​ព្រួយបារម្ភ​ចំពោះ​ផល​ប៉ះពាល់​ពូជ​ត្រី និង​ជីវភាព​ប្រជាពលរដ្ឋ​ដែល​រស់​បាន​ដោយ​អាស្រ័យ​លើ​ការ​នេសាទ​នៅ​បឹង​ទន្លេសាប​តាំងពី​ដូនតា​ពួកគាត់​ជាច្រើន​ឆ្នាំ​មក​ហើយ​នោះ៖ «ត្រី​នៅ​ទន្លេសាប​ឥឡូវ គឺ​អស់​ហើយ ដោយសារ​ទឹក​វា​ចង់​គោក នៅ​ភូមិ​បណ្ដែត​ទឹក ឥឡូវ​គោក​អស់​រកតែ​ម្ដង​ទឹក​ប្រើ​ក៏​មិន​បាន កន្លែង​ខ្លះ​ជីក​អណ្តូងខ្មែរ​ហើយ​អត់​ចេញ​ទឹក​ទៀត»

លោក​បន្ត​ថា ដោយសារ​បញ្ហា​ទឹក​ឆ្នាំនេះ មិន​អាច​មាន​ត្រី​នេសាទ​នោះ ហើយ​ស្ថានភាព​បែបនេះ គឺ​មាន​២​ឆ្នាំ​ជាប់​គ្នា​មក​ហើយ​។ នៅ​ឆ្នាំ​២០១៩ ក៏​មាន​បញ្ហា​ស្រដៀង​គ្នា​នេះ​ដែរ ចំណែក​ឆ្នាំ​២០២០​នេះ អាច​ធ្ងន់ធ្ងរ​ជាង​ឆ្នាំ​២០១៩​ទៅ​ទៀត​។ លោក​ព្យាករណ៍​ថា ស្ថានភាព​នេះ​អាច​អូស​បន្លាយពេល​ជាង​មួយ​ខែ​ទៅ​មុខ​ទៀត គឺ​អាច​ចូល​ដល់​ខែ​សីហា ទើប​អាច​មាន​ទឹក​ពី​ទន្លេ​មេគង្គ​ចូល​មកដល់​ទន្លេសាប​នេះ។

លោក​សង្កេត​ឃើញ​ថា បញ្ហា​នេះ​អាច​បណ្តាល​មក​ពី​ការប្រែប្រួល​អាកាសធាតុ និង​ខ្វះ​ការថែទាំ ដូចជា​ការ​ស្តារ​កន្លែង​គោក រាក់ ធ្វើ​ឱ្យ​ស្ទះ​ផ្លូវ​ទឹក ប៉ះពាល់​ដល់​បរិស្ថាន​ផ្ទៃ​បឹង​ទាំងមូល។

លោក​ឱ្យ​ដឹង​ទៀត​ថា នៅ​កន្លែង​ខ្លះ​មាន​ស្មៅ និង​កក់​ដុះ​លយ​ចូល​ទៅ​ក្នុង​ទន្លេ​រហូតដល់​ជិត​២​គីឡូម៉ែត្រ ធ្វើ​ឱ្យ​ទន្លេ​កាន់តែ​គោក​រាក់​ថែម​ទៀត។

លោក​បន្ត​ថា កត្តា​ទាំងនេះ​ធ្វើ​ឱ្យ​អ្នក​ទន្លេសាប​ជួប​ញ្ហា​ប្រឈម​យ៉ាង​ខ្លាំង​ដល់​ជីវភាព​រស់នៅ ទាំង​ពេល​បច្ចុប្បន្ន និង​ទៅ​អនាគត​។ ចំណែក​ទិដ្ឋភាព​ផ្ទៃ​បឹង​ទាំងមូល ក៏​កាន់តែ​រួម​តូច និង​បាត់បង់​សម្រស់​ជា​បន្តបន្ទាប់​ក្នុង​រយៈពេល​ប៉ុន្មាន​ឆ្នាំ​ចុងក្រោយ៖ «ឥឡូវ​យ៉ាប់​ណាស់​បើ​និយាយ​ពី​ធនធាន​ត្រី​នៅ​ទន្លេ​អស់​អា​លីង​ហើយ គំរាម​ដល់​ការ​រស់នៅ​របស់​មនុស្ស មច្ឆា​ជាតិ ទន្លេសាប​ឥឡូវ​ខុស​ពីមុន​ឆ្ងាយ​ណាស់»

របាយការណ៍​របស់​រដ្ឋបាល​ជលផល​បង្ហាញ​ថា ផល​នេសាទ​ទឹកសាប​កាលពី​ឆ្នាំ​២០១៩ មាន​ចំនួន ជាង​៤៧​ម៉ឺន​តោន​។ ចំនួន​នេះ ធ្លាក់​ចុះ​ជាង​ឆ្នាំ​២០១៨ ចំនួន​ជាង​៥​ម៉ឺន​តោន​។ នៅ​ឆ្នាំ​២០១៨ ទិន្នផល​ត្រី​ទឹកសាប​ប្រមូល​បាន​ជាង​៥៣​ម៉ឺន​តោន​។ ស្ថាប័ន​ជំនាញ​ដដែល​បញ្ជាក់​ថា ការ​ថយ​ចុះ​នេះ​បណ្ដាល​មក​ពី​ការប្រែប្រួល​អាកាសធាតុ។

អាស៊ីសេរី ពុំ​ទាន់​អាច​ទាក់ទង​មន្ត្រី​រដ្ឋបាល​ជលផល នៃ​ក្រសួងកសិកម្ម ដើម្បី​សុំ​ការ​ពន្យល់ អំពី​ហានិភ័យ នៃ​ការ​ខ្វះខាត​ទឹក​នៅ​ទឹក​តំបន់​បឹង​ទន្លេសាប ដែល​នាំ​ឱ្យ​ប៉ះពាល់​ដល់​ការ​បន្ត​ពូជ​ត្រី​នៅ​ទីនោះ និង​ការ​ធ្លាក់ចុះ​នូវ​ទិន្នផល​ត្រី​ជា​បន្ត​បន្ទាប់មក​នោះ​ទេ រហូត​មក​ដល់​ម៉ោង​ផ្សាយ​នេះ​។​

ក៏ប៉ុន្តែ​លោកនាយក​រដ្ឋមន្ត្រី ហ៊ុន សែន ថ្លែង​នៅ​មជ្ឈមណ្ឌល ស្រាវជ្រាវ និង​អភិវឌ្ឍ​ពូជ​ត្រី នៅ​ស្រុក​ពាម​រក៍ ខេត្ត​ព្រៃវែង កាលពី​ថ្ងៃ​ទី​១៤ កក្កដា ដោយ​លោក​ទទួល​ស្គាល់​ថា ទិន្នផល​ត្រី​បាន​ថយ​ចុះ​ជា​បន្តបន្ទាប់​។ លោក​អះអាង​ថា បញ្ហា​នេះ​ពាក់ព័ន្ធ​នឹង​កត្តា​មនុស្ស និង​បរិស្ថាន​ទឹក មាន​ការ​ប្រែប្រួល​ផង​ដែរ តែ​លោក​មិនបាន​លើកឡើង​ពី​បញ្ហា​បទល្មើស​នេសាទ​ដែល​សហគមន៍​នេសាទ​ភ័យ​បារម្ភ និង​ទាមទារ​ឱ្យ​អាជ្ញាធរ រដ្ឋាភិបាល​ជួយ​ទប់ស្កាត់​ជាប្រចាំ​នោះ​ទេ៖ «ជំនាន់​ខ្ញុំ​នៅ​ពី​ក្មេង​ត្រី​នៅ​ច្រើន​ណាស់ ពេលនោះ​ទឹក​ជ្រៅ ឥឡូវនេះ​ទឹក​រាក់​ត្រី​តិច​ប្រជាជន​ច្រើន​វា​ផ្ទុយគ្នា​អ៊ីចឹងៗទេ បានជា​ម្ខាង​ខិតខំ​អភិរក្ស​តាមរយៈ​ប្រលែង​កូន​ត្រី មេ​ពូជ​ត្រី និង​ម្ខាង​ទៀត​ខំ​ជំរុញ​ការ​ចិញ្ចឹម​ត្រី​ដើម្បី​ផ្គត់ផ្គង់​តម្រូវ​ការ»

ប្រជា​សហគមន៍​នេសាទ​នៅ​តំបន់​បឹង​ទន្លេសាប​បាន​ត្អូញត្អែរ​ថា ពួកគាត់​ភាគច្រើន​មិន​មាន​ជំនាញ​អ្វី​ក្រៅពី​ជំនាញ​នេសាទ​ប្រចាំ​ត្រកូល​ពី​ដូនតា​មក​នោះ​ទេ ម្យ៉ាងទៀត​ពួក​គ្មាន​ដីធ្លី​សម្រាប់​បង្ក​បង្កើន​ផល ធ្វើស្រែ ចម្ការ និង​ក៏​មិន​មាន​ដើមទុន​ឯណា​ទៅ​ជួញដូរ ឬ​ប្រកប​របរ អាជីវកម្ម​ផ្សេងទៀត ក្រៅពី​ការងារ​នេសាទ​នោះ​ទេ​។ ពួកគាត់​នៅតែ​អំពាវនាវ​ម្ដង​ហើយ​ម្ដង​ទៀត ទៅ​រដ្ឋាភិបាល ឱ្យ​ជួយ​ស្ដារ​ស្ថានភាព​នៅ​បឹង​ទន្លេសាប​ឱ្យ​ល្អ​ប្រសើរ​ឡើងវិញ ដូចជា​ដោះស្រាយ​ផល​ប៉ះពាល់​បរិស្ថាន ការពារ​បទល្មើស​នេសាទ​ឱ្យ​មាន​ប្រសិទ្ធភាព ដើម្បី​ឱ្យ​ផល​ត្រី​សម្បូរណ៍​ឡើងវិញ អាច​ឱ្យ​ពួកគាត់​អាស្រ័យ​ផល​លើ​របរ​នេសាទ​ជា​លក្ខណៈ​គ្រួសារ​បាន​ដូច​ធម្មតា​ឡើងវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល