វៀតណាមនិងកម្ពុជា ពិភាក្សាអំពីប្រសិទ្ធភាពនៃជំនួញឈើស្របច្បាប់
2018.10.23
អគ្គនាយករងនៃក្រសួងរុក្ខាប្រមាញ់វៀតណាម លោក ផាំ វ៉ាន ឌៀន (Pham Van Dien) ត្រូវបានទីភ្នាក់ងារពត៌មានវៀតណាម ញូវ (Vietnam News) ផ្សាយកាលពីថ្ងៃទី ២៣ ខែតុលាដឹងថា កម្ពុជា គឺជាប្រទេសមួយក្នុងចំណោមប្រទេសមួយចំនួន ដែលបានផ្គត់ផ្គង់ឈើសំរាប់រោងចក្រនៅប្រទេសវៀតណាម។ លោកថា ដើម្បីទប់ស្កាត់ ការជួញដូរឈើ និងដឹកឈើខុសច្បាប់នៅតាមបណ្តាខេត្តជាប់ព្រំដែន ភាគីកម្ពុជា និងវៀតណាម បានពង្រឹងស្ថាប័នផ្លូវច្បាប់របស់ខ្លួនក្នុងប៉ុន្មានឆ្នាំកន្លងមកនេះ ប៉ុន្តែ វិធានការទប់ស្កាត់ជំនួញឈើខុសច្បាប់នេះ នៅមានបញ្ហាលំបាកនៅឡើយ។ លោកថ្លែងដូចនេះ ក្នុងកិច្ចពិភាក្សាមួយរវាងមន្ត្រីក្រសួងកសិកម្មខ្មែរ និងវៀតណាម និងនាយកប្រតិបត្តិនៃក្រុមហ៊ុនជំនួញឈើនៅទីក្រុងហូជីមិញ កាលពីថ្ងៃទី២២ តុលា។
ចំណែកអគ្គនាយករងនៃក្រសួងកសិកម្ម រុក្ខានិងប្រមាញ់ខ្មែរ លោក ច័ន្ទ ប៉ូនីកា ដែលបានចូលរួមក្នុងកិច្ចប្រជុំដែរនេះឲ្យដឹងថា កិច្ចពិភាក្សានេះមានសារសំខាន់ណាស់ ដើម្បីអភិវឌ្ឍន៍វិស័យព្រៃឈើ លើកកម្ពស់ពាណិជ្ជកម្មនិងផលិតផលឈើ ចេញពីប្រភពស្របច្បាប់ សម្រាប់ប្រទេសទាំងពីរ។ លោកបន្តថា កម្ពុជា ទទួលបាននូវបទពិសោធន៍ និងរៀនសូត្រជាច្រើន ជុំវិញវិធានការនានា ដើម្បីបង្ក្រាបការជួញដូរ និងដឹកឈើខុសច្បាប់ឆ្លងដែន។
កាលពីពេលថ្មីៗ នេះ អង្គការសង្គមស៊ីវិលជាតិ និងអន្តរជាតិ ២០ស្ថាប័ន បានដាក់ញត្តិរួមគ្នាស្នើសុំឲ្យសហគមន៍អឺរ៉ុប EU បញ្ឈប់ការនាំឈើចេញពីកម្ពុជា ដែលពួកគេរកឃើញថា ប្រទេសវៀតណាមសម្រួលឲ្យមានសង្វាក់ផលិតកម្ម ផ្តត់ផ្គង់ឈើចូលប្រទេសរបស់ខ្លួន ដែលភាគច្រើនជាឈើខុសច្បាប់នាំចេញពីកម្ពុជា។ ក្រុមអង្គការទាំងនោះរកឃើញថា អាជ្ញាធរវៀតណាមនៅតែគាំទ្រឲ្យមានឧក្រិដ្ឋកម្មព្រៃឈើខុសច្បាប់ទ្រង់ទ្រាយធំដោយមានការឃុបឃិតជាប្រព័ន្ធរវាងអាជ្ញាធរកម្ពុជា និងវៀតណាម។ ក្រុមអង្គការទាំងនេះ រកឃើញថា ក្នុងរយៈពេល ៦ខែ អំឡុង ឆ្នាំ ២០១៧ ឈើហោចណាស់ ៣សែនម៉ែត្រគូប (300.000) ត្រូវបានលួចពីខេត្តភាគខាងកើតនៃកម្ពុជា នាំចូលទៅវៀតណាម។
ឧស្សាហកម្មរបស់វៀតណាម មានការកើនឡើងយ៉ាងឆាប់រហ័យក្នុងប៉ុន្មានឆ្នាំនេះ ដោយបានក្លាយជាប្រទេសលំដាប់លេខ៥ នាំឈើយកទៅលក់ក្នុងសកលលោក និងស្ថិតក្នុងលំដាប់លេខ២ នៃនាំឈើចេញនៅទ្វីបអាស៊ី។
កាលពីឆ្នាំ២០១៧ វៀតណាម បាននាំឈើចេញទៅលក់នៅក្រៅប្រទេស នូវទឹកប្រាក់ចំនួន ៨ពាន់លានដុល្លារ (8 Billion)។ វៀតណាមក៏បានចំណាយប្រាក់ ចំនួនជិត ២ពាន់ ២រយលាន ក្នុងការនាំឈើចូល កាលពីឆ្នាំ២០១៧៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។