អាជ្ញាធរអប្សរារងការរិះគន់ថា យកលេសបង្ការហានិភ័យកាប់ឈើក្នុងតំបន់អង្គរ
2024.07.30
ទិដ្ឋភាពអាជ្ញាធរជាតិអប្សរាកាប់ដើមឈើ ក្នុងតំបន់រមណីយដ្ឋានអង្គរ កាលពីថ្ងៃទី ២៧ កក្កដា ២០២៤។
រូប៖ ហ្វេសប៊ុកអាជ្ញាធរអប្បរា
ក្រោយពីដើមឈើប្រហោងក្នុងមួយដើមនៅចំណុចក្លោងទ្វារទន្លេអុំ នៃប្រាសាទបាយ័ន បាក់រលំក្នុងពេលមេឃកំពុងភ្លៀង និងមានខ្យល់ខ្លាំង ប៉ះពាល់ដល់រូបសំណាកបុរាណ និងបង្កគ្រោះថ្នាក់ដល់អ្នកដំណើរនៅលើស្ពានអាជ្ញាធរជាតិអប្សរា បានបើកយុទ្ធនាការកាប់ដើមឈើធំៗនៅតំបន់ផ្សេងទៀត ដើម្បីបង្ការគ្រោះថ្នាក់។
ក៏ប៉ុន្តែពលរដ្ឋខេត្តសៀមរាបរិះគន់ អាជ្ញាធរអប្សរាថា បានយកលេសសុវត្ថិភាពភ្ញៀវទេសចរ ដើម្បីកាប់រំលំដើមឈើធំៗ ដោយមិនប្រាប់ពីមូលហេតុច្បាស់លាស់ថា តើដើមឈើទាំងនោះ បន្ទាប់ពីកាប់រួច នឹងយកទៅធ្វើអ្វីនោះទេ?
សកម្មភាពកាប់រំលំដើមឈើធំៗមានអាយុកាលរាប់រយឆ្នាំ ក្នុងតំបន់រមណីយដ្ឋានអង្គរ គឺជាមធ្យោបាយមួយ របស់អាជ្ញាធរជាតិអប្សរា ដើម្បីដោះស្រាយបញ្ហាបង្ការហានិភ័យ ប៉ះពាល់ដល់ភ្ញៀវទេសចរជាច្រើនឆ្នាំមកហើយ។
ចំណែកមគ្គុទ្ទេសក៍ទេសចរអង្គរ និងពលរដ្ឋខេត្តសៀមរាបមិនទុកចិត្តអាជ្ញាធរអប្សរា ក្នុងការដោះស្រាយបញ្ហានេះនោះទេ ដោយពួកគាត់ស្នើឱ្យអាជ្ញាធរ គួរតែរកមធ្យោបាយផ្សេងក្រៅពីកាប់បំផ្លាញដើមឈើធំៗ ផ្តល់សម្រស់ធម្មជាតិ ដែលភ្ញៀវទេសចរចូលចិត្តទស្សនា និងថតរូបភាព ផ្សាភ្ជាប់នឹងវប្បធម៌ខ្មែរ។
ពលរដ្ឋរស់នៅខេត្តសៀមរាប លោក ហាប់ ហាន់ ប្រាប់វិទ្យុអាស៊ីសេរីនៅថ្ងៃទី២៩ កក្កដា ថា អាជ្ញាធរជាតិអប្សរាបានយកលេស ការពារសុវត្ថិភាពភ្ញៀវទេសចរ ដើម្បីកាប់បំផ្លាញដើមឈើធំៗជាច្រើនដើមបន្ថែមទៀតក្នុងតំបន់អង្គរ។
លោកសង្កេតឃើញថា កន្លងទៅដើមឈើធំៗ ឋិតក្នុងតំបន់រមណីយដ្ឋានអង្គរ នៅឆ្ងាយពីតំបន់ប្រាសាទ ក៏អាជ្ញាធរអប្សរាកាប់បំផ្លាញអស់ជាច្រើនដែរ ដោយមិនបានបង្ហាញពីមូលហេតុជាក់លាក់ ថាតើដើមឈើដែលកាប់ទាំងនោះ នឹងយកទៅធ្វើអីនោះឡើយ?
លោក ហាប់ ហាន់៖ «នៅបាយ័នក៏ឃើញដែរ ដើមឈើធំៗដើមយាងពីរបីឱបបានជុំ កាប់ស្រួលស្តាយ យល់ល្អកាប់តែកន្លែងមែកណាដែលមានបញ្ហាមែកណាដែលនៅជាប់មាំល្អយើងទុកវាទៅ។ កាលណាតែយើងកាប់ទាំងមូលៗអ៊ីចឹងទៅ ធ្វើឱ្យប៉ះពាល់ដល់ប្រាសាទជាច្រើន ខ្ញុំស្ដាយដែលអត់មានសមត្ថភាពនិយាយ អត់មានសមត្ថភាពអីថា»។
ប្រតិកម្មរបស់ពលរដ្ឋបែបនេះធ្វើឡើង ក្រោយពីអាជ្ញាធរជាតិអប្សរា បន្តកាប់ដើមឈើធំៗមួយចំនួនទៀត បង្កហានិភ័យក្នុងតំបន់រមណីយដ្ឋានអង្គរ ហើយកាលពីកំឡុងខែមិថុនា អាជ្ញាធរបានកាប់រំលំដើមឈើទាលធំៗ ចំនួន ៣ ដើម បន្ថែមទៀត ក្នុងតំបន់ប្រាសាទបាយ័ន។
វិទ្យុអាស៊ីសេរីមិនទាន់អាចទាក់ទង សុំការបំភ្លឺរឿងនេះ ពីអ្នកនាំពាក្យអាជ្ញាធរជាតិអប្សរា លោក ឡុង កុសល បាននៅឡើយទេ នៅថ្ងៃទី២៩ មិថុនា ដោយទូរស័ព្ទហៅចូលតែគ្មានអ្នកលើក។
ជុំវិញរឿងនេះ ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី សោកស្តាយដើមឈើធំៗ មានសោភ័ណភាពស្រស់ស្អាត អាជ្ញាធរអប្សរាគួរតែមានជម្រើសច្រើន ដើម្បីការពារសុវត្ថិភាព ដោយគ្រាន់តែលះមែកពុកផុយ និងធ្វើចម្រឹងដែកចន្ទល់ មិនគួរកាប់បំផ្លាញទាំងមូលដូច្នេះទេ។
លោកយល់ថា អាជ្ញាធរគួរតែមានប្រព័ន្ធត្រួតពិនិត្យសុខភាពដើមឈើឱ្យច្បាស់លាស់ ចៀសវាងអាររំលំដើមឈើធំៗល្អៗ ដោយគ្មានការសិក្សាជាក់លាក់ជាមុន។
លោក ខៀវ ធី៖ «និយាយដោយស្មោះត្រង់ពួកមគ្គុទ្ទេសក៍យើងអត់សប្បាយចិត្តដែលអាជ្ញាធរអប្សរា ដែលអាជ្ញាធរកាត់ដើមឈឺគ្រប់ទម្រង់នៅក្នុងតំបន់អង្គរ ទាំងដើមឈើដុះលើប្រាសាទ បរិវេណប្រាសាទគឺមិនចង់ឱ្យកាប់ គិតឱ្យកាប់តែមែក មិនចង់ឱ្យកាប់ដើមឯណា កន្លងមកពួកយើងតែងតែជំទាស់។
កាលពីឆ្នាំ២០២៣ អាជ្ញាធរបានកាប់រំលំដើមឈើទាលធំៗអស់ ៦ដើម ក្នុងតំបន់ប្រាសាទបាយ័ន និងបន្តកាប់អស់ជាច្រើនដើមទៀត ឋិតនៅតំបន់ប្រាសាទព្រះខ័ន ប្រាសាទតាព្រហ្ម ប្រាសាទតាសោម ប្រាសាទបន្ទាយក្ដីជាដើម។
ពលរដ្ឋរស់នៅខេត្តសៀមរាបស្នើឱ្យអាជ្ញាធរអប្សរា ត្រូវយកដើមឈើ ដែលកាប់រួចរាល់ ទៅតម្កល់ទុក នៅទីតាំងដើម ដែលកាប់នោះដើម្បីទុកជាភស្តុតាងប្រវត្តិសាស្ត្រសម្រាប់ជាតិ ចៀសវាងយកដើមឈើដែលកាប់នោះ យកទៅប្រើប្រាស់ជាផលប្រយោជន៍បុគ្គលដោយលាក់លៀម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»