សកម្មជន​បរិស្ថាន​ចាត់​ទុក​សំណើ​បូម​ខ្សាច់​នៅ​ទន្លេ​មេគង្គ​របស់ លោក ទ្រី ភាព ជា​ករណី​មិន​ប្រក្រតី

ដោយ ទីន ហ្សាការីយ៉ា
2019-05-11
អ៊ីម៉ែល
មតិ
Share
បោះពុម្ព
លោក​ឧកញ៉ា ទ្រី ភាព។
លោក​ឧកញ៉ា ទ្រី ភាព។
Photo/Global Witness

សកម្មជន​បរិស្ថាន​បង្ហាញ​ក្ដី​បារម្ភ ពី​គម្រោង​សិក្សា​ស្រាវជ្រាវ បូម​ខ្សាច់​តាម​បណ្ដោយ​ទន្លេ​មេគង្គ ទ្រង់ទ្រាយ​ធំ ដោយ​ក្រុមហ៊ុន ទ្រី ភាព។ ការ​បារម្ភ​នេះ ដោយសារតែ​ពួកគេ​ទទួល​បាន​លិខិត​មួយ​ច្បាប់​របស់​ទីស្ដីការ​គណៈរដ្ឋមន្ត្រី ដែល​ស្នើសុំ​គោលការណ៍​ទៅ​ក្រសួង​ធនធាន​ទឹក អនុញ្ញាត​ឱ្យ​ក្រុមហ៊ុន ទ្រី ភាព សិក្សា បូម​ស្ដារ និង​ធ្វើ​ច្រាំងទន្លេ​មេគង្គ ដែល​មាន​ប្រវែង​ជាង ៣០០​រយ​គីឡូម៉ែត្រ។

សកម្មជន​បរិស្ថាន​ផ្ដល់​ទស្សនៈ​ថា ប្រសិនបើ​របប​ក្រុងភ្នំពេញ អនុញ្ញាត​ឱ្យ​ក្រុមហ៊ុន ទ្រី ភាព ជា​ក្រុម​កាប់​ឈើ​ធំ​មួយ​នៅ​កម្ពុជា ធ្វើ​អាជីវកម្ម​បូម​ខ្សាច់ និង​ធ្វើ​ច្រាំងទន្លេ​មេគង្គ គឺ​ចៀស​មិន​ផុត​នឹង​ប៉ះពាល់​បរិស្ថាន​ទន្លេ ជីវចម្រុះ និង​បាក់​ច្រាំងទន្លេ​ជាដើម។ ពួកគេ​ស្នើ​ឱ្យ​របប​ក្រុងភ្នំពេញ គួរ​ប្រុងប្រយ័ត្ន និង​ផ្ដល់​លទ្ធភាព​ឱ្យ​សហគមន៍​មូលដ្ឋាន សកម្មជន​បរិស្ថាន​ចូលរួម​តាមដាន និង​ពិភាក្សា​បញ្ហា​នេះ​ឱ្យ​បាន​ទូលំទូលាយ។

សកម្មជន​បរិស្ថាន លោក ថុន រដ្ឋា ឱ្យ​ដឹង​នៅ​ថ្ងៃ​ទី៩ ឧសភា​ថា ពួកគេ​នឹង​តាមដាន​ដោយ​យកចិត្តទុកដាក់ ពី​គម្រោង​សិក្សា​ស្រាវជ្រាវ​ខ្នាត​ធំ​នេះ ប្រសិនបើ​បំពាន​ច្បាប់ និង​ប៉ះពាល់ ពលរដ្ឋ​មូលដ្ឋាន ពួកគេ​នឹង​តវ៉ា​ដាក់​ញត្តិ និង​ផលិត​វីដេអូ ផ្សព្វផ្សាយ​ពី​ផល​ប៉ះពាល់​នេះ​។ លោក​ចំណាំ​ថា បទ​ពិសោធន៍​កន្លង​ទៅ មាន​ក្រុមហ៊ុន​បូម​ខ្សាច់​ភាគច្រើន មិន​គោរព​ច្បាប់ និង​បាន​បង្ហូរ​កាកសំណល់​ចូល​ទន្លេ ប៉ះពាល់​ជីវចម្រុះ និង​បរិស្ថាន៖ «គ្រាន់តែ​ឃើញ​លិខិត​នេះ​ភ្លាម គឺ​ខ្ញុំ​ព្រួយបារម្ភ​លើស​ពី ព្រួយបារម្ភ ជាក់ស្ដែង​កន្លងមក​បទពិសោធន៍​ការ​បូម​ខ្សាច់​កន្លែង​ណា គឺ​បាក់​ច្រាំងទន្លេ​កន្លែង​ហ្នឹង​ទី​១ និង​ទី​២ យើង​ឃើញ​ថា ទឹក និង​បរិស្ថាន​នៅ​តំបន់​បូម​ខ្សាច់​ហ្នឹង​មានការ​បង្ហៀរ​ប្រេង វា​ប៉ះពាល់​កាន់​ជីវចម្រុះ​ក្រោម​ទឹក ហើយ​ប៉ះពាល់​ពលរដ្ឋ​រស់នៅ​តាម​ដង​ទន្លេ​មេគង្គ គាត់​ប្រកប​របរ​នេសាទ ហើយ​គាត់​ទាញ​យក​ទឹក​សម្រាប់​ប្រើប្រាស់​ប្រចាំថ្ងៃ»

កាលពី​ថ្ងៃ​ទី៧ ឧសភា ទីស្ដីការ​គណៈរដ្ឋមន្ត្រី​បាន​សរសេរ​លិខិត ស្នើសុំ​គោលការណ៍​ទៅ​ក្រសួង​ធនធាន​ទឹក បំណង​អនុញ្ញាត​ឱ្យ​ក្រុមហ៊ុន ទ្រី ភាព អេនជីនារីង និង​ខលស្ត្រាក់ សិន ចុះ​សិក្សា​បូម​ស្ដារ និង​ធ្វើ​ច្រាំងទន្លេ​មេគង្គ ចាប់ពី​ចំណុច​ច្រក​ព្រំដែន​កម្ពុជា​-​វៀតណាម រហូតដល់​ភូមិសាស្ត្រ​ព្រំប្រទល់​ទន្លេ​មេគង្គ ខេត្ត​កំពង់ចាម ខេត្ត​ក្រចេះ និង​ទន្លេបាសាក់ ដោយ​ផ្អែក​តាម​យុទ្ធសាស្ត្រ​ទន្លេ​ចិញ្ចឹម​ទន្លេ។

អាស៊ីសេរី​បាន​ទាក់ទង​អ្នកនាំពាក្យ​ទីស្តីការ​គណៈរដ្ឋមន្ត្រី លោក ផៃ ស៊ីផាន ដើម្បី​សុំ​ការ​បំភ្លឺ​រឿង​នេះ តែ​ទូរស័ព្ទ​ហៅ​ចូល​ច្រើនដង​គ្មាន​អ្នកទទួល​នៅ​ថ្ងៃទី៩ ឧសភា។ ចំណែក​អគ្គលេខាធិការ​គណៈកម្មការ​ទន្លេ​មេគង្គ​កម្ពុជា លោក តែ ណាវុធ បដិសេធ​មិន​អធិប្បាយ​រឿង​នេះ។

រីឯ​អ្នកនាំពាក្យ​ក្រសួង​រ៉ែ និង​ថាមពល លោក យស មុនីរ៉ាត់ ក៏​បដិសេធ​អធិប្បាយ​រឿង​នេះ​ដែរ ដោយ​លោក​ថា កំពុង​ជាប់រវល់ និង​គ្មាន​ពេល​បកស្រាយ​រឿង​នេះ​ទេ​៖ «ខ្ញុំ​អត់​មាន​ពេល​ឆ្លើយ​គ្រប់​សារព័ត៌មាន​ទេ ព្រោះ​ខ្ញុំ​មាន​ការងារ មិញ​នេះ ខ្ញុំ​ឆ្លើយ​ជាមួយ​ខ្មែរ​ថែមស៍ ហើយ​។ លោក​ចាំ​មើល និង​ស្រង់​ព័ត៌មាន​ហ្នឹង​បន្ត​ទៀត​ទៅ»

ក្រសួង​រ៉ែ និង​ថាមពល​ចេញ​សេចក្ដី​ប្រកាស​កាលពី​ឆ្នាំ២០១៥ និង​២០១៦ ថា ជា​ឆ្នាំ​យុទ្ធនាការ​ធំ ក្នុង​ការ​រឹត​បន្តឹង​លើ​អាជីវកម្ម​ទាញ​យក​រ៉ែ​ធម្មជាតិ​ដោយ​ខុសច្បាប់ និង​ត្រួត​ពិនិត្យ​ពី​ចំណូល​អាជីវកម្ម​រ៉ែ​ឡើងវិញ​។ មន្ត្រី​ជាន់ខ្ពស់​នៃ​ក្រសួង​រ៉ែ និង​ថាមពល បង្ហាញ​ថា ការ​រឹត​បន្តឹង​លើ​ការ​ផ្តល់​អាជ្ញាប័ណ្ណ​បូម​ខ្សាច់ និង​អាជីវកម្ម​រ៉ែ​ផ្សេងទៀត ព្រមទាំង​មាន​វិធានការ​ទប់ស្កាត់ ភាព​អនាធិបតេយ្យ នៃ​អាជីវកម្ម​នេះ គឺជា​បញ្ហា​ប្រឈម​ធ្ងន់ធ្ងរ​មួយ​។

ទោះយ៉ាងណា សកម្មជន​បរិស្ថាន​ដែល​តែង​ចុះ​ឃ្លាំមើល​ការ​អភិវឌ្ឍ​តាម​ដង​ទន្លេ​មេគង្គ លោក ជុំ ហួរ ប្រឆាំង​ដាច់ខាត មិន​ចង់​ឱ្យ​មាន​វត្តមាន​ក្រុមហ៊ុន ទ្រី ភាព វិនិយោគ​នៅ​តាម​ដង​ទន្លេ​មេគង្គ​នោះ​ទេ ដោយ​លោក​សង្ស័យ​ថា ក្រុមហ៊ុន​នេះ នឹង​យក​លេស ធ្វើ​អាជីវកម្ម​ខ្សាច់ និង​អាជីវកម្ម​ព្រៃឈើ​៖ «ខ្ញុំ​គិត​មិន​ថា យុវជន​ពលរដ្ឋ​ទេ យើង​គួរតែ​សម្លឹង​ទៅ​មើល ការសម្រេចចិត្ត​របស់​រដ្ឋាភិបាល និង​ក្រុមហ៊ុន​ដែល​មាន​អំណាច​ហ្នឹង គឺ​យើង​គួរតែ​ក្រោក​ខ្លួនឯង​។ បើ​យើង​គិត​ថា ក្នុង​ន័យ​ហ្នឹង​មិន​ទទួល​ប្រយោជន៍​សម្រាប់​ពលរដ្ឋ​ទូទៅ​ទេ យើង​ក្រោក​ឈរ​ឡើង គឺ​ប្រឆាំង។ ប្រឆាំង​ហ្នឹង​មិនមែន​មែន​ដុត​ផ្ទះ​គាត់​ទេ គឺ​ប្រឆាំង មិន​គាំទ្រ​ឱ្យ​គាត់​អភិវឌ្ឍ​នៅ​តំបន់​ទន្លេ​មេគង្គ មិន​គាំទ្រ​ទេ»

សកម្មជន​បរិស្ថាន សង្កេត​ឃើញ​ថា កន្លង​ទៅ​រដ្ឋាភិបាល​បាន​ផ្តល់​អាជ្ញាប័ណ្ណ​ឱ្យ​ក្រុមហ៊ុន ទ្រី ភាព ធ្វើ​អាជីវកម្ម​ព្រៃឈើ​ស្ទើរ​គ្រប់​តំបន់ ធ្វើ​ឱ្យ​ទំហំ​ព្រៃឈើ​នៅ​កម្ពុជា​បាត់បង់​ធំធេង។ ហេតុនេះ ប្រសិនបើ​រដ្ឋាភិបាល​អនុញ្ញាត​ឱ្យ​ក្រុមហ៊ុន​នេះ វិនិយោគ​បូម​ខ្សាច់​ជា​ថ្មី​ទៀត មានន័យថា របប​ក្រុងភ្នំពេញ ក៏​ចូល​ដៃជើង​ជាមួយ​ក្រុមហ៊ុន ទ្រី ភាព បំផ្លាញ​ធនធានធម្មជាតិ​ដែល​កេរ​ដូនតា និង​សម្បត្តិ​ជាតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល