ពលរដ្ឋ​ និង​ក្រុម​យុវ​ជន​រិះគន់​អាជ្ញាធរ​ថា មិន​អើពើ​ទប់ស្កាត់​ជនល្មើស​ធ្វើ​អាជីវកម្ម​ថ្ម​ភ្នំ​នៅ​តំបន់​គ្រាម​ខេត្ត​បាត់ដំបង

2022.01.12
Share on WhatsApp
Share on WhatsApp
រូបភាព​ពី​ផ្កាយ​រណប បង្ហាញ​អំពីភ្នំតាគ្រាម ឃុំតាគ្រាម ស្រុក​បាណន់ ខេត្តបាត់ដំបង ដែល​ផ្លាស់ប្ដូរ​ទ្រង់ទ្រាយ និង​រូបភាព​ជា​បន្តបន្ទាប់ ក្នុងឆ្នាំ២០១៤ ២០១៧ ២០១៩ ២០២០ និង​ឆ្នាំ២០២១។
រូប៖ World Imagery Wayback

ប្រជា​ពលរដ្ឋ​ និង​សកម្មជន​ការពារ​បរិស្ថាន​ រិះគន់​រដ្ឋាភិបាល​លោក ហ៊ុន សែន​ ថា​ អសមត្ថភាព​ក្នុង​ការពារ​ភោគ​ទ្រព្យ​ធនធាន​ធម្មជាតិ​ភ្នំ​ប្រវត្តិសាស្ត្រ​នៅ​តំបន់​ភ្នំ​តាគ្រាម​ដោយ​សារ​តែ​ក្រុមហ៊ុន​ចិន​ និង​វៀតណាម​ធ្វើ​អាជីវកម្ម​កាយ​ថ្ម​ភ្នំ​តាម​ទំនើង​ចិត្ត​។ អ្នក​ស្រុក​បាណន់​ថា​ ប្រសិន​បើ​រដ្ឋាភិបាល​ និង​ក្រសួង​ព័ន្ធ​នៅ​តែ​ព្រងើយ​កន្តើយ​គ្មាន​វិធាន​ការ​ចុះ​ទប់​ស្កាត់​ ក្រុម​ឈ្មួញ​កំពុង​ធ្វើ​អាជីវកម្ម​ថ្ម​ភ្នំ​ទាំង​នោះ​ ធនធាន​ធម្មជាតិ​ ភ្នំ​ប្រវត្តិសាស្ត្រ​នឹង​វាលរាប​ដល់​ដី​ក្នុង​រយៈ​ពេល​ដ៏​ខ្លី​ខាង​មុខ។

ប្រជាពលរដ្ឋ​ និង​សកម្មជន​ការពារ​បរិស្ថាន​ សោកស្ដាយ​ចំពោះ​រដ្ឋាភិបាល​ និង​អាជ្ញាធរ​ ដែល​ព្រងើយ​កន្តើយ​បណ្ដែត​បណ្ដោយ​ឱ្យ​ក្រុមហ៊ុន​ចិន​ និង​វៀតណាម​ធ្វើ​អាជីវកម្ម​កាយ​ថ្ម​ភ្នំ​ប្រវត្តិ​សាស្ត្រ​នៅ​តំបន់​ភ្នំ​តាគ្រាម​ស្ទើរ​តែ​បាត់​រូបរាង​ដើម​ទាំង​ស្រុង​ដោយ​គ្មាន​ការ​ចុះ​បង្ក្រាប​។ អ្នកភូមិ​ យល់​ថា​ក្រុម​ឈ្មួញ ដែល​បាន​ឈរ​ជើង​ធ្វើ​អាជីវកម្ម​ ជាង ២០​ឆ្នាំ​កន្លង​មក​នេះ​ គឺ​មាន​ការ​បើក​ភ្លើង​ខៀវ​ពី​រដ្ឋាភិបាល​លោក ហ៊ុន សែន និង​មាន​ឧកញ៉ា​ មន្ត្រី​គ្រាក់ៗ ក្នុង​ជួរ​រដ្ឋាភិបាល​ឈរ​កាង​ក្រុមហ៊ុន​បរទេស​ក្នុង​ដំណើរ​ការ​ធ្វើ​អាជីវកម្ម​ថ្ម​ភ្នំ​ទៅ​តាម​ទំនើង​ចិត្ត។

អ្នក​ស្រុក​បាណន់​ ថា​ពួកគេ​តែងតែ​ដាក់​ញាតិ​ទៅ​អាជ្ញាធរ​មូលដ្ឋាន​ជា​បន្ត​បន្ទាប់ ទាមទារ​ឱ្យ​ក្រុមហ៊ុន​បញ្ឈប់​សកម្មភាព​កាយ​ថ្ម​ភ្នំ​ដែល​កំពុង​ប្រឈម​បាត់​រូបរាង ដើម្បី​អភិរក្ស​ធនធាន​ភ្នំ​ធម្មជាតិ​បន្សល់​ទុក​មួយ​ចំណែក​តូច​ឱ្យ​ចៅ​ជំនាន់​ក្រោយ​បាន​ស្គាល់​ និង​បញ្ចៀស​ពី​ផល​ប៉ះពាល់​សុខភាព​ពលរដ្ឋ​ដែល​ប្រឈម​កើត​ជំងឺ​រលាក​ផ្លូវ​ដង្ហើម​ដោយ​សារ​ធូរ​លី​ដី​ហ៊ុយ​ខ្លាំង​តាម​រយៈ​រថយន្ត​ធំៗ រាប់​ពាន់​គ្រឿង​ដឹក​ថ្ម​ឆ្លង​កាត់​ភូមិ​ពួក​គេ​ទាំង​យប់​ទាំង​ថ្ងៃ។

ពលរដ្ឋ​ម្នាក់​រស់​នៅ​ភូមិ​ប៉ោយស្វាយ ឃុំតាគ្រាម ស្រុក​បាណន់ ប្រាប់​វិទ្យុ​អាស៊ី​សេរី​នៅ​ថ្ងៃ​ទី១១ មករា​ថា ប្រជា​ពលរដ្ឋ​ទាំង​អស់​សោកស្ដាយ​យ៉ាង​ខ្លាំង​ចំពោះ​ទង្វើ​របស់​ក្រុមហ៊ុន​ដែល​ធ្វើ​អាជីវ​កម្ម​ថ្ម​ភ្នំ​កន្លង​មក​នេះ ព្រោះ​លោក​ថា ភ្នំ​ធម្មជាតិ​ដែល​ក្រុមហ៊ុន​ធ្វើ​អាជីវកម្ម​បច្ចុប្បន្ន​នេះ កន្លង​មក​ជា​កន្លែង​ពលរដ្ឋ​អាស្រ័យ​ផល មាន​ធម្មជាតិ​ជា​ម្លប់​បៃតង​សម្រាប់​ជម្រក​សត្វ​ព្រៃ​ ហើយ​អ្នក​ភូមិ​ចាត់​ទុក​ភ្នំ​ទាំង​នោះ​ជា​អត្តសញ្ញាណ​ភូមិ​កំណើត​របស់​ពួកគេ​កំពុង​ឈាន​ទៅ​រក​ការ​បាត់​បង់។

លោក​បន្ត​ថា​ កាល​ពី​ខែធ្នូ​ឆ្នាំ២០២១​ កន្លង​ទៅ​ ពលរដ្ឋ​បាន​ចេញ​ស្រែក​តវ៉ា​បិទ​ផ្លូវ​មិន​ឱ្យ​រថយន្ត​ក្រុមហ៊ុន​ឆ្លង​កាត់​ភូមិ​ពួកគេ​យ៉ាង​តិច ១០ដង​ និង​ស្នើ​ដល់​អាជ្ញាធរ​មូលដ្ឋាន​បញ្ឈប់​សកម្មភាព​ក្រុមហ៊ុន​ជា​បន្ទាន់។ លោក​បញ្ជាក់​ថា ទន្ទឹម​នឹង​ការ​បាត់​ធនធាន​ធម្មជាតិ​ អាជ្ញាធរ​បែរ​ជា​ចោទ​ប្រកាន់​អ្នក​ភូមិ​ថា​ជា​ការ​ញុះញង់ នៅ​ពេល​ដែល​ពួកគេ​ងើប​តវ៉ា​ឱ្យ​អាជ្ញាធរ​​បញ្ឈប់​ការ​ធ្វើ​អាជីវកម្ម​ថ្ម​ភ្នំ​នេះ។ លោក​ចាត់​ទុក​ទង្វើ​របស់​អាជ្ញាធរ​ថា​កំពុង​កាង​ក្រុមហ៊ុន​ ឱ្យ​បំផ្លិច​បំផ្លាញ​ភោគ​ទ្រព្យ​ជាតិ​ដែល​កំពុង​ប្រឈម​បាត់​រូបរាង​ក្នុង​រយៈ​ពេល​ដ៏​ខ្លី​ខាង​មុខ៖ «បើ​ថា​ស្ដាយ មិន​ឱ្យ​និយាយ​ថា​ស្ដាយ​យ៉ាង​ណា? ពី​ដើម​ពលរដ្ឋ​រស់​នៅ​ហ្នឹង​ចង់​ហូប​អី​មាន ដូច​ជា ស្លឹក​ព្រិច មាន​ផ្សិត ឥឡូវ​ក្លាយ​ជា​ទី​វាល​ធំធេង ហើយ​បើ​អាជ្ញាធរ​នៅ​តែ​ព្រងើយ​កន្តើយ​ភ្នំ​ត្រូវ​តែ​អស់»

លោក​បន្ថែម​ទៀត​ថា ក្រៅ​ពី​ធនធាន​ភ្នំ​មួយ​ចំនួន​ស្ទើរ​តែ​បាត់​រូបរាង​ទាំង​ស្រុង ផ្លូវ​ជាតិ​ចាប់​ពី​ចំណុច​ភូមិ​តាគ្រាម ឆ្ពោះ​ទៅ​កាន់​ស្រុក​សំពៅ​លូន​ដែល​មាន​ប្រវែង​ជិត ១០គីឡូ បាន​រង​ការ​បំផ្លិច​បំផ្លាញ​យ៉ាង​ធ្ងន់ធ្ងរ​ ដោយ​សារ​តែ​រថយន្ត​ខ្នាត​ធំ​របស់​ក្រុមហ៊ុន​រាប់ពាន់​គ្រឿង​ដឹក​ជញ្ជូន​ថ្ម​ម៉ាប និង​ថ្មកែវ​យ៉ាង​គគ្រឹក​គគ្រេង​ទាំង​ថ្ងៃ​ទាំង​យប់​ចេញ​ពី​តំបន់​ភ្នំ​តាគ្រាម​ជា​រៀង​រាល់​ថ្ងៃ។

ប្រជាពលរដ្ឋ​ឱ្យ​ដឹង​ទៀត​ថា​ ក្រុមហ៊ុន​ដែល​ធ្វើ​អាជីវកម្ម​ជាង ១០ឆ្នាំ​កន្លង រួម​មាន ក្រុមហ៊ុន ហេង ឆាត ខនស្រ្តាក់សិន (Heng Chat Construction Co., Ltd) ក្រុមហ៊ុន លឹម ម៉េង គ្រុប ​(NIM MENG GROUP Co,Ltd) ក្រុមហ៊ុន តាំង ថៃឡុង (Tang Thailong Co,Ltd) និង​ក្រុមហ៊ុន ធី ឡុង (Thy Long) កំពុង​ធ្វើ​អាជីវកម្ម​វាយ​កម្ទេច​ថ្ម​ស្ទើរ​តែ​រលាយ​ភ្នំ​តាគ្រាម​ទាំងមូល​ដោយ​គ្មាន​ការ​ទប់ស្កាត់​ពី​អាជ្ញាធរ​ឡើយ​។ ប្រជាពលរដ្ឋ​ក្នុង​មូលដ្ឋាន​សង្ស័យ​ថា​ក្រុមហ៊ុន​ទាំង​នេះ​មិន​មាន​អាជ្ញាប័ណ្ណ​ស្រប​ច្បាប់​ឡើយ​ ដោយ​ពួកគេ​សម្អាង​ថា​ការ​ធ្វើ​អាជីវកម្ម​កន្លង​មកនេះ​ អាជ្ញាធរ​មូលដ្ឋាន​ និង​ក្រុមហ៊ុន​ព្យាយាម​លាក់បាំង​ព័ត៌មាន​ និង​មិន​បាន​គិតគូរ​ពី​សុខុមាលភាព​ប្រជាពលរដ្ឋ​នោះ​ទេ។

ពលរដ្ឋ​ និង​សកម្មជន​បរិស្ថាន​ រិះគន់​ថា​ប្រសិន​បើ​រដ្ឋាភិបាល​នៅ​តែ​ព្រងើយ​កន្តើយ​ គ្មាន​វិធាន​ចុះ​បង្ក្រាប​ក្រុម​ឈ្មួញ​ដែល​កំពុង​ធ្វើ​អាជីវ​កម្ម​ថ្ម​ភ្នំ​ទាំង​នេះ នៅ​ថ្ងៃ​អនាគត​ធនធាន​ភ្នំ​ប្រវត្តិ​សាស្ត្រ​បាន​បំផ្លិច​បំផ្លាញ​ដោយសារ​តែ​ក្រុមហ៊ុន​ចិន និង​វៀតណាម​ធ្វើ​អាជីវ​កម្ម ពួក​គេ​ថា រដ្ឋាភិបាល​លោក ហ៊ុន សែន​ ជា​អ្នក​ទទួល​ខុសត្រូវ​ដោយ​ផ្ទាល់​ចំពោះ​ភោគ​ទ្រព្យ​ជាតិ​ដែល​បាន​បាត់បង់។

សកម្មជន​ការពារ​បរិស្ថាន កញ្ញា ភួន កែវរស្មី យល់​ថា ធនធាន​ជាតិ​ភ្នំ​ប្រវត្តិ​សាស្ត្រ​ក្នុង​ស្រុក​បាណន់​គួរ​តែ​មាន​កិច្ច​គាំ​ពារ​ពី​រដ្ឋាភិបាល សម្រាប់​អភិរក្ស​បន្ត​ឱ្យ​មនុស្ស​ជំនាន់​ក្រោយ​បាន​ស្គាល់។ កញ្ញា​ សង្កេត​ឃើញ​ថា ក្នុង​ដំណើរ​ការ​ក្រុមហ៊ុន​ឈរ​ជើង​ធ្វើ​អាជីវ​កម្ម​ថ្ម​ភ្នំ​ជាង ២ទសវត្សរ៍​កន្លង​មក​នេះ​ គ្មាន​តម្លាភាព​មិន​បាន​ផ្សព្វផ្សាយ​ពី​គម្រោង​អភិវឌ្ឍ​សិក្សា​ពី​ផល​ប៉ះពាល់​បរិស្ថាន (EIA) ហើយ​ក្រសួង​ពាក់ព័ន្ធ​ក៍​មិន​បាន​បញ្ចេញ​របាយការណ៍​ឱ្យ​ពលរដ្ឋ​បាន​ដឹង​ និង​ធ្វើ​វេទិកា​សាធារណៈ​ស្ដីពី​ចំណូល​ថវិកា​ជាតិ​ដែល​រដ្ឋ​ទទួល​បាន​ពី​ក្រុមហ៊ុន​ទាំង​នោះ​ដែរ៖ «យើង​បាន​ខ្វាយ​ខ្វល់​ហើយ តែ​នៅ​មាន​កម្រិត​នៅ​ឡើយ។ អ្នក​ដែល​ទទួល​ខុស​ត្រូវ​ខ្លាំង​ជាង​គេ​នោះ​ គឺ​រដ្ឋាភិបាល​ក្នុង​ជំនាន់​នេះ ព្រោះ​យើង​បាន​មើល​ឃើញ​ថា​អាជ្ញាធរ​តាំង​ពី​ថ្នាក់​ក្រោម​រហូត​ដល់​ថ្នាក់​ជាតិ អាច​ថា​គាំទ្រ​អាជីវកម្ម​ឯកជន​ ឬ​គ្នីគ្នា​ពួកគាត់​មក​រំលោភ​លើ​ធនធាន​ធម្មជាតិ​ច្រើន​កន្លែង​មែន​ទែន។ យើង​ក៏​សង្ឃឹម​ថា ពួកគាត់​ល្មម​ភ្ញាក់​រម្លឹក​ខ្លះ​ទៅ​ មក​ស្រឡាញ់​ធនធាន​ធម្មជាតិ»

វិទ្យុ​អាស៊ី​សេរី​បាន​ព្យាយាម​ទាក់ទង​សុំ​ការ​បក​ស្រាយ​ជុំវិញ​រឿង​នេះ​ពី​អ្នក​នាំពាក្យ​ក្រសួង​បរិស្ថាន​លោក នេត្រ ភក្ត្រា នៅ​ថ្ងៃ​ទី១០ និង​ទី១១ មករា ដោយ​ទូរស័ព្ទ​ហៅ​ចូល​តែ​លោក​ចុក​ផ្ដាច់​ប្រព័ន្ធ​ទូរស័ព្ទ។ ចំណែក​ឯ​អ្នកនាំ​ពាក្យ​ក្រសួង​រ៉ែ និង​ថាមពល លោក យស មុនីរ៉ាត់ បដិសេធ​មិន​អធិប្បាយ​ដោយ​លោក​ប្រាប់​ថា​ខ្លួន​បាន​ចូល​និវត្តន៍​ហើយ។

ចំណែក​ឯ ប្រធាន​ផ្នែក​ស្រាវជ្រាវ និង​តស៊ូ​មតិ​នៃ​សមាគម​បណ្ដាញ​យុវជន​កម្ពុជា (CYN) លោក​ ​ហេង គឹមហុង ថ្លែង​ថា រដ្ឋាភិបាល​ គួរ​តែ​ចាត់​វិធានការ​ឱ្យ​បាន​ម៉ឺងម៉ាត់​ដល់​ក្រុម​ឈ្មួញ ល​កំពុង​ធ្វើ​អាជីវកម្ម​ដើម្បី​ធានា​ដល់​ធនធាន​ធម្មជាតិ​មិន​ទទួល​រង​ប៉ះពាល់​បន្ថែម​ទៀត។ លោក​បន្ត​ថា​ ផល​ប៉ះពាល់​ដល់​ពលរដ្ឋ​ដែល​តែងតែ​លើក​ឡើង​ជា​បន្ត​បន្ទាប់​នោះ​ អាជ្ញាធរ​ចាំ​បាច់​ត្រូវ​តែ​ឆ្លើយតប​ និង​ដោះស្រាយ​ទុក្ខ​កង្វល់​ជូន​ប្រជាជន​ ចៀស​វាង​គេចវេះ និង​ព្រងើយ​កន្តើយ​បណ្ដែត​បណ្ដោយ​ឱ្យ​ក្រុមហ៊ុន​នៅ​តែ​បន្ត​អាជីវកម្ម​ដែល​ធ្វើ​ឱ្យ​ធនធាន​ភ្នំ​នៅ​តំបន់​នោះ​រង​ការ​បំផ្លិច​បំផ្លាញ​បាត់​រូប​រាង​នា​ពេល​អនាគត៖ «កាយ​ភ្នំ​ជីក​រ៉ែ​ទាំង​អស់​ហ្នឹង បាន​ចំណូល​ប៉ុន្មាន​ចូល​ជាតិ និង​ពលរដ្ឋ​មូលដ្ឋាន?ដើម្បី​ធានា​តម្លាភាព​ ប្រជា​ពលរដ្ឋ​ជា​អ្នក​រង​ផល​ប៉ះពាល់​ផង​ រស់​នៅ​ហ្នឹង​ផ្ទាល់​ផង។ មែនទែន​ទៅ​នៅ​តំបន់​ភ្នំ​បេតិកភណ្ឌ​សុទ្ធ​សឹង​តែ​មាន​ដិតដាម​ជីវភាព​ជា​មួយ​ជីវភាព​ប្រជាពលរដ្ឋ​ប្រចាំ​ថ្ងៃ ហើយ​មាន​ការ​ជីក​ឈូស​កាយ​ភ្នំ​ប្រាកដ​ណាស់​ពលរដ្ឋ​មិន​សប្បាយ​ចិត្ត​ដោយ​សារ​តែ​បាត់បង់​អត្តសញ្ញាណ​ភូមិ​កំណើត​ពួក​គាត់ ឬ​បេតិកភណ្ឌ​ភ្នំ​នៅ​តំបន់​នោះ»

ឆ្លើយ​តប​នឹង​បញ្ហា​នេះ ​អ្នក​នាំ​ពាក្យ​សាលាខេត្ត​បាត់ដំបង​ លោក សឿម ប៊ុនរិទ្ធិ មាន​ប្រសាសន៍​ប្រាប់​វិទ្យុ​អាស៊ី​សេរី​កន្លង​ទៅ​ថា ក្រុមហ៊ុន​ដែល​ធ្វើ​អាជីវកម្ម​នៅ​តំបន់​ភ្នំ​តាគ្រាម​ មាន​អាជ្ញាប័ណ្ណ​ត្រឹមត្រូវ​ និង​បាន​ធ្វើ​ការ​វាយ​តម្លៃ​ផល​ប៉ះពាល់​ច្បាស់​លាស់។ លោក​បន្ត​ថា ការ​ធ្វើ​អាជីវកម្ម​កាយ​ថ្ម​ភ្នំ​កន្លង​មក​នេះ​មាន​ការ​រួមចំណែក​ក្នុង​កសាង​ហេដ្ឋារចនាសម្ពន្ធ​ជា​ច្រើន​ក្នុង​ខេត្ត​បាត់ដំបង ដូចជា កសាង​ផ្លូវ​ហៃវ៉េ​ស្ថិត​នៅ​ជាយក្រុង និង​ផ្លូវជាតិ​មួយ​ខ្សែ​ចាប់​ពី​ក្រុង​ប៉ោយប៉ែត​ទៅ​កាន់​រាជធានី​ភ្នំ។

Takream_Mountain_destruction_in_Battambang.JPG
ទិដ្ឋភាពការដ្ឋានក្រុមហ៊ុនកិន​ថ្ម ស្ថិតនៅក្បែរជើងភ្នំតាគ្រាម និងភ្នំពពូល ឃុំតាគ្រាម ស្រុក​បាណន់ ខេត្តបាត់ដំបង ថត​កាល​ពី​ថ្ងៃ​ទី២០ ខែមេសា ឆ្នាំ២០២១។

លោក​ទទួលស្គាល់​ថា ការ​ធ្វើ​អាជីវកម្ម​ថ្ម​ភ្នំ​កន្លង​មក​នេះ​បាន​បង្ក​ផល​ប៉ះពាល់​បរិស្ថាន និង​ការ​រស់​របស់​ប្រជា​ពលរដ្ឋ តែ​លោក​អះអាង​ថា​ អាជ្ញាធរ​មូលដ្ឋាន​មិន​បាន​ព្រងើយ​កន្តើយ​ចំពោះ​ក្ដី​កង្វល់​របស់​ប្រជាពលរដ្ឋ​ឡើយ។ ចំណែក​ផល​ប៉ះពាល់​បរិស្ថាន​ និង​សង្គម​ អ្នកនាំ​ពាក្យ​រូប​នេះ​ថា ក្រុមហ៊ុន​នឹង​ស្ដារ​ធនធាន​ធម្មជាតិ​ និង​បរិស្ថាន​ឡើង​វិញ៖ «កន្លង​មក​ធ្លាប់​មាន​អាជ្ញាធរ​ចុះ​សិក្សា​បញ្ហា​ប្រជាពលរដ្ឋ​ត្អូញត្អែរ​ហ្នឹង​ដែរ ហើយ​យើង​ក៏​បាន​ខិតខំ​ណែនាំ​ដល់​អ្នក​ធ្វើ​អាជីវកម្ម ដែល​មាន​ការ​អនុញ្ញាត។ ការ​អភិវឌ្ឍ​អ្វី​មួយ​តែងតែ​ធ្វើ​ឱ្យ​ប៉ះពាល់​នៅ​តំបន់​មូលដ្ឋាន​នោះ តែ​សំខាន់​ក្រុមហ៊ុន​ត្រូវ​តែ​សិក្សា ដើម្បី​ការពារ​បរិស្ថាន ការពារ​ការ​រស់​នៅ​របស់​ប្រជាពលរដ្ឋ ទើប​ការ​ធ្វើ​អាជីវកម្ម​របស់​ខ្លួន​មាន​និរន្តរភាព»

ជុំវិញ​រឿង​នេះ អ្នក​នាំ​ពាក្យ​សមាគម​ការពារ​សិទ្ធិមនុស្ស អាដហុក លោក ស៊ឹង សែន​ករុណា ជំរុញ​ដល់​អាជ្ញាធរ​ថ្នាក់​ជាតិ​បើក​ការ​ស៊ើប និង​ចុះ​ត្រួត​ពិនិត្យ​តំបន់​ភ្នំ​តាគ្រាម​បន្ថែម​ទៀត និង​ចាត់​វិធានការ​លើ​ក្រុមហ៊ុន​ដែល​កំពុង​ធ្វើ​អាជីវកម្ម​ដោយ​គ្មាន​ច្បាប់​អនុញ្ញាត​។ លោក​សង្កត់​ធ្ងន់​ថា ធនធាន​ធម្មជាតិ​ដែល​រង​ការ​បំផ្លាញ​នៅ​កម្ពុជា​ ដោយ​សារ​តែ​ខ្វះ​ការ​យក​ចិត្ត​ទុក​ពី​សំណាក់​អាជ្ញាធរ និង​បាន​ឃុបឃិត​ជា​មួយ​ជន​ខិលខូច​ធ្វើ​អាជីវកម្ម​លក្ខណៈ​ប្រយោជន៍​បុគ្គល​ទៅ​តាម​ទំនើង​ចិត្ត៖ «អ៊ីចឹង យើង​ទទូច​ឱ្យ​អាជ្ញាធរ​ពិចារណា​ឡើង​វិញ​ក្នុង​រឿង​នេះ។ ពី​ព្រោះ​បញ្ហា​ទាំង​អស់​នេះ​មិន​ចាំ​បាច់​ឱ្យ​ពលរដ្ឋ​មាន​ការ​លំបាក​អ្វី​ទេ។ ក្នុង​តួនាទី​ការ​ថែ​រក្សា​ការពារ​ធនធាន​ធម្មជាតិ​ ព្រៃឈើ​អី​ជា​ដើម​ហ្នឹង​ទៅ​លើ​អាជ្ញាធរ​ហ្នឹងឯង»

រមណីយដ្ឋាន​តំបន់​ភ្នំ​ប្រវត្តិសាស្ត្រ​ក្នុងស្រុក​បាណន់​មាន​ភ្នំ​ចំនួន៣១ ជា​តំបន់​មាន​ទេសចរណ៍​ប្រវត្តិ​សាស្ត្រ ប្រាសាទ​បុរាណ​ និង​ធន​ធាន​ធម្ម​ជាតិ​ដ៏​សម្បូរ​បែប។ ប៉ុន្តែ​តំបន់​ភ្នំ​ទេសចរណ៍​ប្រវត្តិ​សាស្ត្រ​មួយ​ចំនួន​ដូច​ជា ភ្នំ​គល់​ ត្រូវ​បាន​រលាយ​ស្ទើរ​តែ​បាត់​រូបរាង​ ដោយ​សារ​តែ​ក្រុមហ៊ុន​ចិន​ធ្វើ​អា​ជីវកម្ម​យក​ថ្ម​ម៉ាប​កាល​ពី​ឆ្នាំ២០១៣។ អ្នក​ភូមិ​សោក​ស្ដាយ​យ៉ាង​ខ្លាំង ប្រសិន​បើ​បាត់​បង់​ភ្នំ​ទាំង​នេះ​ពួក​គាត់​គ្មាន​លទ្ធភាព​ការពារ​សម្បត្តិ​ធនធាន​ធម្មជាតិ​ទាំង​នេះ​បាន​ទេ ស្រប​ពេល​ដែល​ម្ចាស់​ក្រុមហ៊ុន​សុទ្ធ​តែ​មាន​ឥទ្ធិពល។

លើស​ពី​នេះ ភ្នំ​ដែល​គេ​កំពុង​ជីក​គាស់​កាយ​ស្ទើរ​តែ​បាត់​រូប​រាង រួម​មាន មាន​ភ្នំ​តា​គ្រាម ភ្នំ​ថ្ម​ក្រហម ភ្នំ​អន្សែ ភ្នំ​ប៉ើយ​ស្វាយ ភ្នំ​ពពូល ភ្នំ​តា​ត្រងោល និង​ភ្នំ​គល់​ជា​ដើម។ ភ្នំ​ធម្មជាតិ​ទាំង​នេះ ធ្លាប់​ផ្តល់​ម្លប់​បៃតង​ស្រស់​ស្អាត ទាក់​ទាញ​ភ្ញៀវ​ទេសចរ។ ប៉ុន្តែ​បច្ចុប្បន្ន​បាន​ក្លាយ​ជា​ការដ្ឋាន ជីក​កោះ​កាយ និង​កិន​ថ្ម ដោយ​មាន​គ្រឿង​ចក្រ​រាប់​សិប​គ្រឿង ដឹក​ជញ្ជូន​ថ្ម​ធ្វើ​អាជីវ​កម្ម​យ៉ាង​គគ្រឹកគគ្រេង​ស្ទើរ​ជា​រៀង​រាល់ថ្ងៃ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។