សាលារាជធានីភ្នំពេញ ចេញបញ្ជាបឋមឲ្យក្រុមសណ្ដាប់ធ្នាប់ខណ្ឌនានា មន្ត្រីរដ្ឋាករគ្រប់គ្រងសំណល់ ប្រមូលកើបសំរាម ក្នុងនោះក៏មានកម្មករស៊ីនទ្រី (CINTRI) ខ្លះ ជួយប្រមូលខ្លះដែរ នៅថ្ងៃទី១៧ ខែធ្នូ។ ក្រោយពីមានការដោះស្រាយវិវាទការងារនៅក្រសួងការងារ មក កម្មករក្រុមហ៊ុនស៊ីនទ្រី ព្រមចូលធ្វើការវិញ។
កម្មករក្រុមហ៊ុនស៊ីនទ្រី បានព្រមចូលធ្វើការវិញ នៅល្ងាចថ្ងៃទី១៧ ខែធ្នូ បន្ទាប់ពីក្រុមហ៊ុនព្រមដំឡើងប្រាក់បន្ថែមជូនកម្មករបោសផ្លូវ ១៥ដុល្លារ កម្មករដើរតាមឡាន ២០ដុល្លារ និងកម្មករបើកបររថយន្ត ៥០ដុល្លារក្នុង១ខែ។
តំណាងកម្មករក្រុមហ៊ុនស៊ីនទ្រី លោក ម៉ៃ ផាន ឲ្យដឹងថា តាមការទាមទារ អ្នកបើកបរសុំ ៣០០ដុល្លារក្នុងមួយខែ អ្នកដើរតាមឡានសុំ ២០០ដុល្លារក្នុងមួយខែ ប៉ុន្តែក្រុមហ៊ុនដំឡើងឲ្យមិនតាមការតវ៉ាទេ៖ «កម្មករបើកបរគាត់ចង់ទាមទារឲ្យលើសហ្នឹងទៀត ប៉ុន្តែដោយសារក្រុមហ៊ុនមានកំណត់ថវិកា គាត់ក៏សម្រេចចិត្តទទួលយកប៉ុណ្ណឹង»។
នៅប៉ុន្មានម៉ោងមុនកម្មករព្រមទទួលយកការដោះស្រាយរបស់ក្រុមហ៊ុននោះ មានមន្ត្រីរាជការ និងមន្ត្រីសណ្ដាប់ធ្នាប់សាលាខណ្ឌនានា បានជួយកើបសំរាមជំនួសក្រុមហ៊ុនស៊ីនទ្រី។
«សំឡេងកើបសំរាម»
មន្ត្រីសណ្ដាប់ធ្នាប់ខណ្ឌ៧មករា កំពុងកើបសំរាមនៅតាមផ្លូវព្រះមុនីរ៉េត លោក ពាក្យ ឆាម ថ្លែងថា សាលារាជធានីភ្នំពេញ បានបញ្ជាឲ្យមន្ត្រីសណ្ដាប់ធ្នាប់គ្រប់ខណ្ឌ ជួយយកសំរាមចេញទម្រាំក្រុមហ៊ុនស៊ីនទ្រីដោះស្រាយការទាមទារសុំដំឡើងប្រាក់ខែរបស់កម្មករបាន៖ «បើថ្ងៃនេះក្រុមហ៊ុនស៊ីនទ្រីគាត់អត់បានចុះមក ដោយសារគាត់តវ៉ាដំឡើងប្រាក់ខែ។ ឥឡូវនេះខាងខ្ញុំធ្វើទៅតាមមូលដ្ឋានរបស់ខ្លួន តាមសាលាខណ្ឌនីមួយៗ គឺក្រុមសណ្ដាប់ធ្នាប់ធ្វើបណ្ដោះអាសន្ន សម្អាតសោភណភាពទីក្រុងកុំឲ្យមានសំរាមនៅកកស្អុយនៅជាប់អ៊ីចឹង»។
សកម្មភាពមន្ត្រីរាជការប្រមូលសំរាមជំនួសកម្មករក្រុមហ៊ុនស៊ីនទ្រីនេះ ធ្វើឡើងនៅថ្ងៃទី១៧ ខែធ្នូ ក្រោយពីកម្មករក្រុមហ៊ុនស៊ីនទ្រី បានផ្អាកការប្រមូលសំរាមចាប់ពីថ្ងៃអាទិត្យ ទី១៤ ខែធ្នូ មក ហើយនាំគ្នាធ្វើកូដកម្មតវ៉ាដើម្បីសុំដំឡើងប្រាក់ខែបន្ថែម ៦០ដុល្លារ និងសុំធ្វើការមួយថ្ងៃត្រឹម ៨ម៉ោង។ ដោយសារតែគ្មានអ្នកប្រមូលសំរាមចេញពីផ្លូវ ទើបមន្ត្រីរាជការចុះប្រមូលសំរាម ក្នុងនោះក៏មានមន្ត្រីរដ្ឋាករគ្រប់គ្រងសំណល់រាជធានីភ្នំពេញ ៣នាក់ ពាក់អាវពណ៌លឿង កើបសំរាមនៅក្បែរសណ្ឋាគារអាំងទែរកុងទីណង់តាល់ (InterContinental)។
លោក រ៉ែន មន្ត្រីរដ្ឋាករគ្រប់គ្រងសំណល់រាជធានីភ្នំពេញ ឲ្យដឹងថា គាត់ទើបមកកើបសំរាមនៅថ្ងៃពុធ ទី១៧ ធ្នូ ដោយប្រមូលយកតែក្នុងខណ្ឌទួលគោក ព្រោះសំរាមគរទុកចោលច្រើនពេកតាមផ្លូវ។ លោកមិនទាន់ដឹងថា តើអាចកើបអស់ឬអត់ទេ ព្រោះសំរាមនៅសល់តាមផ្លូវតូចៗច្រើនទៀត៖ «យកតែផ្លូវសំខាន់ៗតាមមេគេបញ្ជាមក។ ផ្លូវសំខាន់ខ្ញុំអត់ទាន់ដឹងដែរ»។
ពាក់ព័ន្ធសំរាមនេះ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងថា មន្ត្រីរាជការចេញកើបសំរាមតាមផ្លូវនេះ ដើម្បីដោះស្រាយបន្ទាន់បណ្ដោះអាសន្ន និងរង់ចាំមើលការដោះស្រាយរវាងក្រុមហ៊ុនស៊ីនទ្រី និងកម្មករ ដែលទាមទារសុំដំឡើងប្រាក់ខែដល់ ២០០ដុល្លារ និង ៣០០ដុល្លារក្នុង១ខែនោះ៖ «ហើយស៊ីនទ្រីគាត់ត្រូវតែដោះស្រាយបន្ថែមលើរថយន្ត និងអ្នកបើកបរ មកជួយយើងមួយចំនួនថែមទៀតហ្នឹង គឺថាយើងគិតយ៉ាងហោចណាស់មួយខណ្ឌបាន ២គ្រឿងដែរឡាន។ តែខ្ញុំគិតថា អាចច្រើនជាងនេះ»។
នៅគ្រាដែលមន្ត្រីរាជការកំពុងជួយសម្អាតសំរាមក្នុងទីក្រុង មានក្រុមកម្មករក្រុមហ៊ុនស៊ីនទ្រីខ្លះបានកើបយកសំរាមនៅក្នុងសង្កាត់បឹងសាឡាង ដែរ ដោយប្រើត្រាក់ទ័រចូកគំនរសំរាមដាក់រថយន្ត។
កម្មករមួយរូប កំពុងបញ្ជារថយន្តកើបសំរាមអះអាងថា ពួកគាត់ជួយប្រមូលសំរាមចេញ និងរង់ចាំការដោះស្រាយនៅក្រុមហ៊ុនដែរ។ លោកថា ការតវ៉ារបស់កម្មករនេះ គឺចាប់ពីថ្ងៃអាទិត្យ ទី១៤ ខែធ្នូ ក្រោយពីក្រុមហ៊ុនបន្ថយសាំងពីអ្នកបើកបររថយន្តដឹកសំរាម ទើបពួកគាត់ស្នើសុំទៅក្រុមហ៊ុនឲ្យរក្សាទុកដូចដើមវិញ ប៉ុន្តែបើដកសាំង ត្រូវបន្ថែមប្រាក់ខែឲ្យកម្មករក្នុងម្នាក់ ៦០ដុល្លារទៀតក្នុង១ខែ ពីលើប្រាក់ខែគោល ១៤០ដុល្លារ និងកំណត់រយៈពេល ៨ម៉ោងជាម៉ោងធ្វើការធម្មតាក្នុងមួយថ្ងៃ ទើបកម្មករព្រមចូលធ្វើការវិញ៖ «ខ្ញុំអត់ទាន់ដឹងដែរ គេកំពុងដោះស្រាយនៅក្រុមហ៊ុន។ គេឲ្យចេញយកសំរាមកន្លែងសំខាន់ៗសិន។ ឥឡូវគិតថ្ងៃ គឺវា ៤ថ្ងៃហើយ»។
ស្ត្រីឈ្មោះ ជុំ ពេញ អ្នកបោសថ្នល់ក្រុមហ៊ុនស៊ីនទ្រី ឲ្យដឹងថា អ្នកតវ៉ាភាគច្រើនជាអ្នកបើកបររថយន្ត ចំពោះអ្នកបោសថ្នល់មិនបានចូលរួមតវ៉ាទេ ព្រោះមិនចង់ឲ្យផ្លូវជាតិមានសំរាម។ តែគាត់ក៏រង់ចាំប្រាក់ដំឡើងឲ្យដែរ ព្រោះប្រាក់ខែ ១៤០ដុល្លារចាយមិនគ្រាន់ទេ៖ «ធ្វើរាល់តែថ្ងៃអ៊ីចឹង ឲ្យតែស្អាតផ្លូវទៅ គេតវ៉ាម៉េចតវ៉ាទៅ គេថាអឺអើថ្ងៃណាយើងចេះតែតទៅទៀតទៅ។ គេធ្វើខ្លះទៅ អ្នកខ្លះទៅតវ៉ាជាមួយនឹងគេអ៊ីចឹងទៅ»។
វិទ្យុអាស៊ីសេរី បានព្យាយាមទាក់ទងតំណាងក្រុមហ៊ុនស៊ីនទ្រី ជម្រាបសួរបញ្ហាកើតឡើងនោះ ប៉ុន្តែមិនអាចទាក់ទងបាននៅថ្ងៃទី១៧ ខែធ្នូ។
មន្ត្រីរាជការដែលបានជួយសម្អាតទីក្រុង នៅថ្ងៃទី១៧ ខែធ្នូ ឲ្យដឹងថា ពួកគាត់ទើបកើបសំរាមថ្ងៃនេះ ដោយទ្រាំនឹងក្លិនស្អុយស្ទើរមិនបាន៕
