ប្រជាសហគមន៍ខេត្តស្ទឹងត្រែងស្នើឱ្យអភិបាលខេត្តថ្មីសង្គ្រោះព្រៃសហគមន៍ភ្នំជម្រកសត្វ
2024.06.27
អភិបាលរងខេត្តកំពង់ស្ពឺ លោក សរ សុពុត្រា ដែលត្រៀមឡើងកាន់ដំណែងជាអភិបាលខេត្តស្ទឹងត្រែង។
រូប៖ ហ្វេសប៊ុក លោក សរ សុពុត្រា
ប្រជាសហគមន៍ការពារព្រៃឈើខេត្តស្ទឹងត្រែង ស្នើឱ្យអភិបាលខេត្តដែលត្រៀមឡើងកាន់ដំណែងថ្មី ជំនួសលោក ស្វាយ សំអ៊ាង ពន្លឿនជួយសង្គ្រោះព្រៃសហគមន៍ភ្នំជម្រកសត្វ ដែលជាតំបន់ទាក់ទាញភ្ញៀវទេសចរយ៉ាងសំខាន់របស់អ្នកស្រុក កំពុងប្រឈមការបាត់បង់ទាំងស្រុង។
រីឯវិបត្តិព្រៃឈើ និងការគំរាមកំហែងអ្នកការពារព្រៃឈើតាមប្រព័ន្ធតុលាការ ក៏ជាបញ្ហាប្រឈមខ្លាំង ដែលប្រជាសហគមន៍ទទូចឱ្យអភិបាលខេត្តថ្មីផ្តល់ដំណោះស្រាយជាវិជ្ជមាន។
សំណើនេះធ្វើឡើង ក្រោយពីព្រៃសហគមន៍យ៉ាងហោចណាស់ចំនួន៥ តំបន់ផ្សេងៗគ្នា ឋិតក្នុងស្រុកថាឡាបរិវ៉ាត់ ខេត្តស្ទឹងត្រែង ដែលធ្លាប់សម្បូរព្រៃស្រោង សត្វព្រៃ និងអនុផលព្រៃឈើ កំពុងប្រឈមការបាត់បង់ទាំងស្រុង។
រីឯសកម្មភាពកាប់ឈើមានតម្លៃ និងការកាប់ទន្ទ្រានដែនជម្រកសត្វព្រៃឡង់ នៅតែកើតមានច្រើន ដែលអភិបាលខេត្តស្ទឹងត្រែង លោក ស្វាយ សំអ៊ាង អសមត្ថភាពដោះស្រាយ។
ប្រការនេះប្រជាសហគមន៍ថា អភិបាលខេត្តរូបនេះ មិនត្រឹមតែ មិនអើពើដោះស្រាយវិបត្តិព្រៃឈើចាស់ៗឱ្យជ្រះស្រឡះនោះទេ បញ្ហាប្រឈមថ្មីៗទៀតបានកើតឡើង គឺមានឈ្មួញម្នាក់ ឈ្មោះ កែកុល សោភា រំលោភបំពានដីព្រៃសហគមន៍ភ្នំជម្រកសត្វទំហំជាង ៣ ពាន់ហិកតារ យកមកធ្វើជាសម្បត្តិផ្ទាល់ខ្លួន ដែលមានជាប់ពាក់ព័ន្ធ អភិបាលខេត្តស្ទឹងត្រែង លោក ស្វាយ សំអ៊ាង ផ្តល់ប័ណ្ណកម្មសិទ្ធិ។
ប្រជាសហគមន៍ការពារព្រៃឈើលោក ថាន់ វ៉ន ស្នើឱ្យអភិបាលខេត្តថ្មី លោក សរ សុពុត្រា ត្រូវដកហូតដីព្រៃអភិរក្សគ្រប់តំបន់ ដែលឈ្មួញ ឃុបឃិតជាមួយអាជ្ញាធរខិលខូចរំលោភបំពានខុសច្បាប់ មកជាសម្បត្តិរដ្ឋវិញ ហើយត្រូវដាំដើមឈើស្តារព្រៃឡើងវិញ ដើម្បីប៉ះប៉ូវផ្លូវចិត្តពលរដ្ឋ ដែលកំពុងខឹងគុំកួនអាជ្ញាធរមិនការពារធនធានធម្មជាតិ។
លោកបន្ថែមថា ប្រសិនបើវិបត្តិព្រៃឈើទាំងនេះ នៅតែជាប់គាំងអាជ្ញាធរមិនដោះស្រាយទេ ពលរដ្ឋនឹងប្រឈមការលំបាកកាន់តែច្រើន រួមមាន ជីវភាពធ្លាក់ចុះខ្លាំង ឈានដល់ធ្វើចំណាកស្រុកកាន់តែច្រើន កុមារបោះបង់ការសិក្សា និងការប្រែប្រួលធាតុ ជាដើម៖
លោក ថាន់ វ៉ន៖« កន្លែងណាដែលអភិបាលខេត្តចាស់ធ្វើខុសសុំសំណើថាដោះស្រាយឡើងវិញ របស់រដ្ឋត្រូវទុករដ្ឋវិញ នោះមានស្ថិរភាពពលរដ្ឋគាំទ្រ។ ខ្ញុំចាំមើល បើធ្វើបានល្អជោគជ័យ ខ្ញុំសរសើរ»។
កាលពីថ្ងៃទី២៤ ខែមិថុនា ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី បានចេញព្រះរាជក្រឹត្យផ្លាស់ប្តូរ និងតែងតាំង លោក សរ សុពុត្រា បច្ចុប្បន្នជាអភិបាលរងខេត្តកំពង់ស្ពឺ ឱ្យឡើងធ្វើជាអភិបាលខេត្តស្ទឹងត្រែង។
ប្រជាសហគមន៍ការពារព្រៃឈើម្នាក់ទៀត គឺលោក អ៊ុក ម៉ៅ ដែលកំពុងជាប់បណ្តឹងនៅតុលាការ ចំនួន ៤សំណុំរឿង ដោយសារតែចេញមុខការពារព្រៃឈើ ក៏ស្នើឱ្យអភិបាលខេត្តថ្មី ផ្តល់សិទ្ធិពេញលេញឱ្យពលរដ្ឋការពារព្រៃឈើ ដោយគ្មានការគំរាមកំហែង និងចាប់ចង។
លោកថា កន្លងទៅអាជ្ញាធរខេត្តស្ទឹងត្រែង មិនត្រឹមតែមិនលើកទឹកចិត្តពលរដ្ឋ ឱ្យចូលរួមការពារធនធានធម្មជាតិនោះទេ ថែមទាំងគំរាមកំហែង និងប្តឹងពលរដ្ឋទៅតុលាការ ដែលជាឧបសគ្គបង្អាក់ដំណើរ ប្រជាសហគមន៍ចូលរួមការពារព្រៃឈើ។
លោក អ៊ុក ម៉ៅ៖ «ខ្ញុំចង់សំណូមពរឱ្យអភិបាលខេត្តថ្មី ជួយឱ្យសហគមន៍ពួកខ្ញុំ ចុះល្បាតព្រៃ ដើម្បីជួយការពារព្រៃគង់វង្សយូរអង្វែង។ ខ្ញុំសូមឱ្យលោក ជួយបង្ក្រាបមន្ត្រីមួយចំនួន ដែលបំផ្លាញព្រៃឈើ សូមលោកមានចំណាត់ការ ផ្លូវច្បាប់ផង»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺ ពីអភិបាលខេត្តស្ទឹងត្រែង ដែលត្រៀមនឹងឡើងកាន់ដំណែង គឺលោក សរ សុពុត្រា បាននៅឡើយទេនៅថ្ងៃទី២៦ មិថុនា។ រីឯអភិបាលខេត្តស្ទឹងត្រែង លោក ស្វាយ សំអ៊ាង ក៏មិនទាន់អាចទាក់ទងសុំការបំភ្លឺបានដែរ នៅថ្ងៃដដែលនេះ។
លោក សរ សុពុត្រា ដែលត្រៀមនឹងឡើងកាន់ដំណែងជាអភិបាលខេត្តស្ទឹងត្រែង គឺជា អភិបាលរងនៃគណៈអភិបាលខេត្តកំពង់ស្ពឺ ទទួលបន្ទុកដោះស្រាយវិបត្តិដីធ្លីក្រៅប្រព័ន្ធតុលាការ និង ជាប្រធានក្រុមការងារគណនេយ្យភាពសង្គមថ្នាក់ខេត្ត។ ជាមួយគ្នានេះ លោកមានតួនាទីជាប្រធានសហភាពសហព័ន្ធយុវជនកម្ពុជា ខេត្តកំពង់ស្ពឺ ហើយលោកក៏ធ្លាប់ធ្វើជាអនុរដ្ឋលេខាធិការក្រសួងសង្គមកិច្ច កាលពីជិត១០ឆ្នាំមុន។
ជុំវិញរឿងនេះ ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) លោក ជា ហ៊ាន មានប្រសាសន៍ថា បញ្ហាព្រៃឈើ ដែលអាជ្ញាធរខេត្តស្ទឹងត្រែងអនុញ្ញាតឱ្យលោកស្រី កែកុល សោភា ឈូសឆាយដីព្រៃសហគមន៍ភ្នំជម្រកសត្វទំហំជាង ៣ ពាន់ហិកតារ (៣.០៦៤) ដើម្បីធ្វើជាកម្មសិទ្ធិផ្ទាល់ខ្លួន បង្កប់ភាពមិនប្រក្រតីច្រើន ដោយមិនទាន់ឃើញអនុក្រឹត្យអនុបយោគ ពីប្រមុខរដ្ឋាភិបាលនៅឡើយទេ។
លោកបញ្ជាក់ថា អង្គការរបស់លោកនឹងសរសេរលិខិតស្នើឱ្យអភិបាលខេត្តថ្មី ស្រាវជ្រាវ និងផ្ទៀងផ្ទាត់ករណីនេះឡើងវិញ ដើម្បីផ្តល់យុត្តិធម៌ជូនសហគមន៍ និងការពារភោគទ្រព្យជាតិ។
លោក ជា ហ៊ាន៖ «ខ្ញុំនឹងត្រៀមឯកសារហ្នឹងហើយ ដើម្បីផ្ទៀងផ្ទាត់ឡើងវិញ បើសិនជា អភិបាលខេត្តមិនចាត់វិធានការស៊ើបអង្កេត និងដកហូតទេ។ ខ្ញុំនឹងបន្តទៅថ្នាក់ជាតិ ដូចនៅខេត្តកំពង់ស្ពឺអ៊ីចឹង»។
ប្រជាសហគមន៍រំពឹងថា អភិបាលខេត្តថ្មីនឹងមានយុទ្ធសាស្ត្រដឹកនាំថ្មី និងមានរបៀបធ្វើការងារមួយថ្មី ធ្វើយ៉ាងណាដោះស្រាយវិបត្តិព្រៃឈើជូនពលរដ្ឋ ដែលជាប្រភពសេដ្ឋកិច្ចសហគមន៍ ដើម្បីឲ្យពលរដ្ឋមានជីវភាពប្រសើរ ទប់ស្កាត់ការធ្វើចំណាកស្រុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- អ្នកឃ្លាំមើល ស្នើអាជ្ញាធរឱ្យបង្ហាញការស៊ើបអង្កេតលើទីប្រឹក្សាលោក ហ៊ុន សែន ពាក់ព័ន្ធករណីទទួលលុយរត់ការឡើងតំណែង
- តុលាការចោទប្រកាន់ជំនួយការផ្ទាល់លោក ហ៊ុន សែន គឺលោក ដួង តារា ពីបទ «ឆបោក»
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»