អាជ្ញាធរ​ស្រុក​ថាឡាបរិវ៉ាត់​ឈរ​ជើង​ការពារ​ព្រៃ​សហគមន៍​អេកូ​ទេសចរណ៍​ភ្នំ​ជម្រក​សត្វ ដោយសារ​ក្រុមហ៊ុន លីម វត្តី បន្ត​លួច​កាប់​និង​ឈូស​ឆាយ​សាជាថ្មី

ដោយ ជីវិតា
2024.06.08
អាជ្ញាធរ​ស្រុក​ថាឡាបរិវ៉ាត់​ឈរ​ជើង​ការពារ​ព្រៃ​សហគមន៍​អេកូ​ទេសចរណ៍​ភ្នំ​ជម្រក​សត្វ ដោយសារ​ក្រុមហ៊ុន លីម វត្តី បន្ត​លួច​កាប់​និង​ឈូស​ឆាយ​សាជាថ្មី ដើមឈើ​ឈ្លីក ដែល​ក្រុម​ឈ្មួញ​អា​ជា​៤​ជ្រុង ព្រៃ​សហគមន៍​ព្រៃ​ជម្រក​សត្វ មាន​ទីតាំង​ស្ថិតនៅ​ភូមិ​ឈ្វាំង ឃុំ​សំអាង ស្រុក​ថាឡាបរិវ៉ាត់ ខេត្ត​ស្ទឹងត្រែង ថត​នៅ​ថ្ងៃ​ទី​៧ ខែ​ឧសភា ឆ្នាំ​២០២៤។
រូប៖ ពលរដ្ឋផ្ដល់ឱ្យ

សហគមន៍​អេកូ​ទេសចរណ៍​ភ្នំ​ជម្រក​សត្វ​អះអាង​ថា អាជ្ញាធរ​ស្រុក​ថាឡាបរិវ៉ាត់ ខេត្ត​ស្ទឹងត្រែង បាន​ដាក់​សមត្ថកិច្ច​ចម្រុះ​ឈរជើង​ការពារ​ព្រៃ​សហគមន៍ ដោយសារ​ក្រុមហ៊ុន លីម វត្តី បន្ត​លួច​កាប់ និង​ឈូស​ឆាយ​ដី​ព្រៃ​សហគមន៍​សាជាថ្មី ។ សហគមន៍​ស្នើ​ឲ្យ​អាជ្ញាធរ​ពាក់ព័ន្ធ​ពន្លឿន​រក​ដំណោះស្រាយ និង​ត្រូវ​រឹបអូស​ដី​ព្រៃ​ដែល​បាន​ឈូស​ឆាយ មក​ឲ្យ​សហគមន៍​គ្រប់គ្រង​វិញ​។ មន្ត្រី​សង្គម​ស៊ីវិល ចង់​ឃើញ​អាជ្ញាធរ​យក​ច្បាប់​មក​អនុវត្ត​ទៅលើ​ជន​ប្រព្រឹត្ត​ទាំងអស់​នោះ។

ប្រធាន​សហគមន៍​ព្រៃឈើ​អេកូ​ទេសចរណ៍​ភ្នំ​ជម្រក​សត្វ លោក ម៉ឹង រដ្ឋា ប្រាប់​វិទ្យុ​អាស៊ីសេរី នៅ​ថ្ងៃទី​០២ ខែមិថុនា​ថា ក្រុមហ៊ុន លីម វត្តី បាន​ផ្អាក​ការ​ឈូស​ឆាយ​រយៈពេល​២​ថ្ងៃ​មក​ហើយ ក្រោយ​សមត្ថកិច្ច​ចម្រុះ​ស្រុក​ថាឡាបរិវ៉ាត់ ចុះ​អន្តរាគមន៍​និង​ឈរជើង​យាមកាម​២៤​ម៉ោង។ លោក​ថា អាជ្ញាធរ​ពាក់ព័ន្ធ​ទាំងអស់​ត្រូវតែ​រក​ដំណោះស្រាយ​ឲ្យ​បាន​ឆាប់ និង​ដកហូត​ដីព្រៃ​ទាំងអស់​នោះ ឲ្យ​មក​សហគមន៍​គ្រប់គ្រង​វិញ ពីព្រោះ​ដី​ព្រៃ​ទាំងនោះ​ប្រជា​សហគមន៍​ខិតខំ​ការពារ​តាំងពី​យូរណាស់​មក​ហើយ។ លោក​បន្ថែម​ថា សហគមន៍​បាន​រាយការណ៍ និង​ស្នើសុំ​កិច្ច​អន្តរាគមន៍​ពី​អាជ្ញាធរ​ថ្នាក់​ជាតិ​រួចរាល់​ហើយ ប៉ុន្តែ​នៅ​មិន​ទាន់​ឃើញ​មាន​ចំណាត់ការ​នៅឡើយ​ទេ។

លោក ម៉ឹង រដ្ឋា៖ «យើង​ខំប្រឹង​ការពារ​តាំងពី​ឆ្នាំ​២០១៤​មក ដល់ពេល​គេ​យក​មានការ​ឈឺចាប់​តែ​ប៉ុណ្ណឹង ការ​សំណូមពរ​របស់​សហគមន៍​ដូចជា​ពលរដ្ឋ​មូលដ្ឋាន​សុំ​ដី​​ព្រៃ​ទាំង​នោះ​មក​គ្រប់គ្រង​ឲ្យ​ប្រជាពលរដ្ឋ​អាស្រ័យ​ផល​វិញ កុំ​កាយ​ក្រវាត់​ចោល​។ សុំ​ឲ្យ​ខាង​អាជ្ញាធរ​ដែនដី ខាង​ជំនាញ ក្រសួង និង​រដ្ឋាភិបាល​ធ្វើ​យ៉ាងម៉េច​ប្រគល់​មក​ឲ្យ​សហគមន៍ និង​ប្រជាពលរដ្ឋ​គ្រប់គ្រង​វិញ»

លោក ម៉ឹង រដ្ឋា លើកឡើង​ទៀត​ថា ព្រៃ​សហគមន៍​អេកូ​ទេសចរណ៍​ភ្នំ​ជម្រក​សត្វ គឺជា​ឃ្លាំងប្រាក់​សម្រាប់​ពលរដ្ឋ​ក្នុង​មូលដ្ឋាន ដើម្បី​ប្រកប​របរ​ផ្គត់ផ្គង់​ជីវភាព​គ្រួសារ​ជាប្រចាំ ដោយ​ពលរដ្ឋ​នាំគ្នា​ចូល​ទៅ​រក​អនុផល​ព្រៃឈើ មាន​ដូច ដក​ផ្សិត​ប៉ក រក​វល្លិ​ស បេះ​បន្លែ និង​រក​ថ្នាំបុរាណ​ជាដើម។ លោក​ថា ប្រសិនបើ​ព្រៃ​សហគមន៍​មួយ​នេះ ធ្លាក់​ក្នុង​កណ្ដាប់ដៃ​ក្រុមហ៊ុន​ឯកជន​មែន​នោះ ពលរដ្ឋ​នៅ​តំបន់​នោះ​នឹង​បាត់បង់​មុខរបរ និង​ប្រាក់​ចំណូល។

ជុំវិញ​រឿង​នេះ វិទ្យុ​អាស៊ីសេរី មិន​អាច​ទាក់ទង​ប្រធាន​មន្ទីរ​បរិស្ថាន​ខេត្តស្ទឹងត្រែង លោក ស្រេង ជាហេង និង​អ្នកនាំពាក្យ​សាលាខេត្ត​ស្ទឹងត្រែង លោក ម៉ែន គង់ បាន​ទេ នៅ​ថ្ងៃទី២ ខែ​មិថុនា ដោយសារ​ទូរស័ព្ទ​ចូល​តែ​គ្មាន​អ្នកទទួល​។ ចំណែក នាយ​ផ្នែក​ខណ្ឌ​រដ្ឋបាល​ព្រៃឈើ​ស្រុក​ថាឡាបរិវ៉ាត់ លោក ហ៊ុន សំអឿន ក៏​វិទ្យុ​អាស៊ីសេរី មិន​អាច​ទាក់ទង​ដែរ។

វិទ្យុ​អាស៊ីសេរី មិន​ទាន់​អាច​រក​ប្រភព​ទាក់ទង​ភាគី​ក្រុមហ៊ុន​ថ្មម៉ាប លីម វត្តី ដែល​សហគមន៍​ចោទ​ប្រកាន់​ថា មាន​ពាក់ព័ន្ធ​នឹង​ការ​ឈូស​ឆាយ​ព្រៃ​នេះ​បាន​នៅឡើយ​ទេ នៅ​ថ្ងៃទី២ ខែ​មិថុនា ចំណែក​សហគមន៍​ក៏​មិន​ទាន​ដឹង​ច្បាស់​ថា ក្រុមហ៊ុន​នេះ​ជា​កម្មសិទ្ធិ​របស់​នរណា​នោះ​នៅឡើយ​ដែរ។

ទាក់ទិន​នឹង​បញ្ហា​នេះ មន្ត្រី​សម្របសម្រួល​គម្រោង​នៃ​សមាគម​បណ្ដាញ​យុវជន​កម្ពុជា (CYN) លោក អូត ឡាទីន មាន​ប្រសាសន៍​ថា លោក​សាទរ​ចំពោះ​វិធានការ​របស់​អាជ្ញាធរ​ស្រុក ប៉ុន្តែ​ចង់​ឃើញ​អាជ្ញាធរ​ពាក់ព័ន្ធ ស្វែងរក​ដំណោះស្រាយ​ឲ្យ​បាន​ឆាប់រហ័ស និង​ត្រូវ​អនុវត្ត​ច្បាប់​ឲ្យ​បាន​តឹងរ៉ឹង ទៅលើ​អ្នក​ប្រព្រឹត្ត និង​អ្នក​ដែល​ជាប់​ពាក់ព័ន្ធ ដើម្បី​បង្ហាញ​ឆន្ទៈ​ក្នុង​ការ​យកចិត្តទុកដាក់​ការពារ​ធនធាន​ធម្មជាតិ​របស់​អាជ្ញាធរ។

លោក អូត ឡាទីន៖ «ដរាបណា​នៅតែ​ពន្យារពេល កម្រ​ក្នុង​ការ​ធ្វើ​កិច្ច​អន្តរាគមន៍​បញ្ហា​នឹង​វា​នៅតែ​បន្ត​កើតមាន ហើយ​វា​ជះឥទ្ធិពល​កាន់តែ​អាក្រក់​ដល់​ព្រៃ​សហគមន៍​ភ្នំ​ជម្រក​សត្វ​កាន់តែ​ធំ​កាន់តែ​ខ្លាំង ហើយ​សុំ​ឲ្យ​មាន​វប្បធម៌​ថ្មី​ដោយ​ចុះ​អន្តរាគមន៍​ឲ្យ​បាន​ទាន់​ពេល​វេលា ហើយ​ឆ្លើយតប​ដែល​បញ្ហា​ប្រឈម​ដែល​ពលរដ្ឋ​និង​សហគមន៍​កំពុង​ជួបប្រទះ ជាជាង​បន្ត​បណ្ដែតបណ្ដោយ​ឲ្យ​មាន​បញ្ហា​ប្រឈម​កាន់តែ​ធំ»

ចំណែក អ្នកស្រាវជ្រាវ និង​ឃ្លាំមើល​ធនធានធម្មជាតិ​នៅ​កម្ពុជា លោក សេង សុខហេង យល់​ឃើញ​ថា ដើម្បី​ទប់ស្កាត់​កុំ​ឲ្យ​មាន​បទល្មើស​ព្រៃឈើ អាជ្ញាធរ​ពាក់ព័ន្ធ​ត្រូវតែ​អនុវត្ត​ច្បាប់​ទៅលើ​អ្នក​ប្រព្រឹត្ត​ទង្វើ​ខុសច្បាប់ បើ​មិន​ដូច្នេះ​ទេ ការ​ទប់ស្កាត់​បទល្មើស​របស់​អាជ្ញាធរ​មិន​មាន​ប្រសិទ្ធភាព​ឡើយ។

លោក សេង សុខហេង៖ «សំខាន់​អនុវត្ត​ច្បាប់​ឲ្យ​បាន​តឹងរ៉ឹង បើសិន​អាជ្ញាធរ​នៅ​តំបន់​ការពារ​ណា​បណ្ដោយ​ឲ្យ​ការ​កាប់​បំផ្លាញ​ព្រៃឈើ ត្រូវតែ​ទទួលទោស​តាមច្បាប់ ដែល​គាត់​មិនបាន​បំពេញការងារ​ក្នុង​មាន​ជា​អាជ្ញាធរ​មិន​អនុវត្ត​ទៅតាម​ច្បាប់ បណ្ដោយ​ឲ្យ​មាន​បទល្មើស​កើតឡើង អ៊ីចឹង​ហើយ​គាត់​ជា​អ្នក​ទទួលទោស​មុនគេ ដូចជា​ដកចេញ​ពី​តំណែង ដាក់ទោស​ទណ្ឌ​ទៅតាម​ច្បាប់​ទើប​អាច​ពង្រឹង​ប្រសិទ្ធភាព​ក្នុង​ការ​គ្រប់គ្រង​ព្រៃឈើ»

ព្រៃ​សហគមន៍​អេកូ​ទេសចរណ៍​ភ្នំ​ជម្រក​សត្វ មាន​ទីតាំង​ស្ថិតនៅ​ភូមិ​ឈ្វាំង ឃុំ​សំអាង ស្រុក​ថាឡាបរិវ៉ាត់ ខេត្ត​ស្ទឹងត្រែង ស្ថិត​ក្រោម​ការគ្រប់គ្រង​របស់​រដ្ឋបាល​ព្រៃឈើ​។ ព្រៃ​សហគមន៍​មួយ​នេះ មាន​ផ្ទៃដី​ជាង​៤​ពាន់ (.១៥៣) ហិកតារ​សម្បូរ​ទៅ​ដោយ​ជីវចម្រុះ និង​ដើមឈើ​គ្រប់​ប្រភេទ មាន​ដូចជា ដួងចែម កកោះ ផ្ចឹក ផ្ដៀក ស្រឡៅ ឈ្លីក និង​ដើម​ឈើទាល​ឬ​ហៅ​ដើម​ជ័រ​ច្បោះ​ជាដើម។សហគមន៍​អះអាង​ទៀត​ថា ក្រុមហ៊ុន លីម វត្តី បាន​ឈូស​ឆាយ និង​ហ៊ុមព័ទ្ធ​រំលោភ​យក​ដី​ព្រៃ​សហគមន៍​អេកូ​ទេសចរណ៍​ភ្នំ​ជម្រក​សត្វ​ជាង ៣​ពាន់​ហិកតារ ដើម្បី​ធ្វើ​អាជីវកម្ម​ថ្ម​ម៉ាប​របស់​ពួកគេ ខណៈ​ក្រុមហ៊ុន​នេះ ទទួល​បាន​សិទ្ធិ​អនុញ្ញាត​ធ្វើ​អាជីវកម្ម​ថ្ម​ម៉ាប​នៅ​លើ​ផ្ទៃដី ៧​ហិកតារ​តែប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
RFA
ព្រះចៅ​អធិការ​វត្ត​ដំរីស ខេត្ត​បាត់ដំបង បណ្ដេញ​ព្រះសង្ឃ​មួយ​អង្គ​ចេញ​ពី​វត្ត​បន្ទាប់​ពី​ចូលរួម​បុណ្យ​ខួប​បាញ់សម្លាប់​បណ្ឌិត កែម ឡី
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។