ក្រុម​​យុវជន​​រក​​ឃើញ​​ថា​​​​ព្រៃ​​ហ​គម​ន៍​​ភ្នំ​សេះ​​ក្នុង​​ខេត្ត​ក្រចេះ​​កំពុង​​ឈាន​​ទៅ​​រក​ការ​​បាត់បង់​​ទាំងស្រុង​

ដោយ ហេង រស្មី
2021-04-12
Share
ក្រុម​​យុវជន​​រក​​ឃើញ​​ថា​​​​ព្រៃ​​ហ​គម​ន៍​​ភ្នំ​សេះ​​ក្នុង​​ខេត្ត​ក្រចេះ​​កំពុង​​ឈាន​​ទៅ​​រក​ការ​​បាត់បង់​​ទាំងស្រុង​ សមាគម​បណ្តាញ​យុវជន​កម្ពុជា​ (C​Y​N) ​រក​ឃើញ​ថា​ ​ព្រៃ​សហគមន៍​ភ្នំ​សេះ​ ​ឋិត​នៅ​ស្រុក​សំបូរ​ ​ខេត្ត​ក្រចេះ​ កំពុង​ឈាន​ទៅ​រកការ​បាត់បង់​ទាំងស្រុង​ ។
រូប៖ គេ​ផ្ដល់​ឱ្យ

សមាគម​បណ្តាញ​យុវជន​កម្ពុជា​ (C​Y​N) ​រក​ឃើញ​ថា​ ​ព្រៃ​សហគមន៍​ភ្នំ​សេះ​ ​ឋិត​ក្នុង​ឃុំ​អូរ​គ្រៀ​ង​ ​ស្រុក​សំបូរ​ ​ខេត្ត​ក្រចេះ​ កំពុង​ឈាន​ទៅ​រកការ​បាត់បង់​ទាំងស្រុង​ ​ដោយ​សារ​ចលនា​ទន្ទ្រាន​កាន់កាប់​ដី​ព្រៃ​ធ្វើជា​កម្មសិទ្ធិ​បុគ្គល​ ​ហើយ​ករណី​នេះ​ប៉ះពាល់​ធ្ងន់ធ្ងរ​ដល់​និរន្តរភាព​ព្រៃ​សហគមន៍​ ​និង​បរិស្ថាន​។​ ​ពួកគេ​រក​ឃើញ​ថា​  ​ព្រៃ​សហគមន៍​នេះ​បាន​បាត់បង់​គម្រប​ព្រៃឈើ​ធម្មជាតិ​ជាង​ ​១​ពាន់​ ​៣​រយ​ហិកតារ​ ( ​១​.​៣​០​៣​) ​ហើយ​ទំហំ​ដែល​អាច​បាត់បង់​បន្ថែម​ទៀត​ជាង​ ​៤​រយ​ហិកតារ​ (​៤​.​៦​០​៨​)​។

របាយការណ៍​ក​ម្រាស់ ​៣​០​ ​ទំព័រ​ ​ដែល​មាន​ចំណងជើង​ថា​ ​«​ដំណើរ​ឆ្ពោះទៅ​រកការ​វិនាស​ទាំងស្រុង​ ​នៃ​ព្រៃ​សហគមន៍​ភ្នំ​សេះ​»​ ​បង្ហាញ​ថា​ ​សមាគម​បណ្តាញ​យុវជន​កម្ពុជា​ (C​Y​N)  ​បាន​ចុះ​ស៊ើប​អង្កេត​ ​និង​ស្រាវជ្រាវ​ដោយ​ប្រើ​ឧបករណ៍​ប្រមូល​ទិន្នន័យ​ ​ថតរូប​វីដេអូ​ ​ឧបករណ៍​តាមដាន​ ​ប្រព័ន្ធ​កំណត់​ទីតាំង​សកល​ ​ឬ​ ​G​P​S ​សម្ភាសន៍​ប្រជា​សហគមន៍​ ​និង​ចុះ​ត្រួតពិនិត្យ​ទីតាំង​កាប់​រានទន្ទ្រាន​ដី​ព្រៃ​ជាក់ស្តែង​។​ ​បេសកកម្ម​នេះ​ធ្វើឡើង​ចាប់ពី​ថ្ងៃ​ទី​៣​០​ ​ខែកញ្ញា​ ​ដល់​ថ្ងៃ​ទី​៥​ ​ខែ​តុលា​ ​ឆ្នាំ​២​០​២​០​។​

របាយការណ៍​បន្ថែម​ថា​  ​គម្រប​ព្រៃ​សហគមន៍​ភាគច្រើន​ទទួលរង​ការ​កាប់​រាន​ទ​ន្រ្ទា​ន​ ​និង​បំប្លែង​ទៅជា​ដី​ចម្ការ​រួចរាល់​ ​ដោយ​ជំនួស​មកវិញ​​នូវ​ដំណាំ​ស្វាយចន្ទី​ ​ដំឡូងមី​ ​និង​ដំណាំ​ ​មួយ​ចំនួន​ទៀត​។​ ​លើស​ពី​នេះ​ ​មាន​លំនៅ​ដ្ឋា​ន​ខុសច្បាប់​ ​ក្នុង​ចន្លោះ​ពី​ ​៨​០​ ​ទៅ ​៨​៥​ ខ្នង ​ក្នុង​ព្រៃ​សហគមន៍​នេះ​  ​ដែល​ភាគច្រើន​ក្រុម​ពលរដ្ឋ​ចំណូលស្រុក​បាន​សង់​ខ្ទម​ក្នុង​ទម្រង់​ជា​រោង​ចាំ​ចម្ការ​ ​និង​ផ្ទះ​បណ្ដោះអាសន្ន​នៅ​លើ​ក្បាលដី​របស់​ខ្លួន​ ​ពុំសូវ​មាន​មនុស្ស​រស់នៅ​អ​ចិន្ត្រៃយ៍​ឡើយ​។​

ម​ន្រ្តី​ចងក្រង​សហគមន៍​របស់​សមាគម​បណ្តាញ​យុវជន​កម្ពុជា​លោក​ ​អូត​ ឡា​ទី​ន​ ​ថ្លែង​ថា​ ​គោលបំណង​នៃ​ការ​ធ្វើ​របាយការណ៍​នេះ​ ​ដើម្បី​ស្នើ​ឱ្យ​អាជ្ញាធរ​ខេត្ត​ក្រចេះ​ ​និង​រដ្ឋាភិបាល​ចុះ​បង្ក្រាប​បទល្មើស​ព្រៃឈើ​ ​ក្នុង​ព្រៃ​សហគមន៍​ជាបន្ទាន់​ ​និង​ដកហូត​ដី​ព្រៃ​កាប់​រាន​ខុសច្បាប់​ ​ប្រគល់​ជូន​សហគមន៍​វិញ​ ​ហើយ​ត្រូវ​ដាំ​ដើមឈើ​ស្តារ​ព្រៃ​ឡើងវិញ​។​ ​លោក​ថា​ ​សមាគម​បណ្តាញ​យុវជន​កម្ពុជា​នឹង​បន្ត​តាមដាន​រឿង​នេះ​យ៉ាង​យកចិត្តទុកដាក់ដោយ​សហការ​ជាមួយ​សហគមន៍​មូលដ្ឋានរក​មធ្យោបាយ​​​ជំរុញ​​ឱ្យ​​មាន​ដំណោះស្រាយ​​ក​ណី​នេះ​​ប្រ​កប​ដោយ​ប្រសិទ្ធ​ភាព​ខ្ពស់​៖​ ​«​យើង​បាន​ធ្វើដំណើរ​ព័ទ្ធជុំវិញ​តំបន់​ដែល​ស្រឡះ​ ​ដែល​ត្រូវ​បាន​កាប់​រាន​រួចហើយ​។​ ​យើង​រក​ឃើញ​ថា​ ​មានការ​បាត់បង់​ព្រៃឈើ​ស្ទើរតែ​ទាំងស្រុង​នៃ​ព្រៃ​សហគមន៍​ហ្នឹង​ ​មូលហេតុ​ការ​ចូ​លកាប់​ទន្ទ្រាន​ដី​ព្រៃ​សហគមន៍​ពីសំណាក់​ពលរដ្ឋ​ចំណូលស្រុក​ ​ហើយ​មាន​មនុស្ស​មួយ​ចំនួន​តូច​ក្នុង​ឃុំ​ហ្នឹង​ក៏​គាត់​ចូលរួម​កាប់​ដូច​គេ​ដែរ​។​ ​មិន​មាន​ចំណាត់​ការ​ឱ្យ​តឹងរឹង​ពី​អាជ្ញាធរ​ពាក់ព័ន្ធ​ ​ជាពិសេស​គឺ​សង្កាត់​រដ្ឋបាល​ព្រៃឈើ​ ​»។

CYN_forest_in_Phnom_Ses_12_04_2021_01.jpg
ព្រៃ​សហគមន៍​ភ្នំ​សេះ​ ​ឋិត​ក្នុង​ឃុំ​អូរ​គ្រៀ​ង​ ​ស្រុក​សំបូរ​ ​ខេត្ត​ក្រចេះ​កំពុង​ឈាន​ទៅ​រកការ​បាត់បង់​ទាំងស្រុង​ ​ដោយសារ​ចលនា​ទន្ទ្រាន​កាន់កាប់​ដី​ព្រៃ​ធ្វើជា​កម្មសិទ្ធិ​បុគ្គល​ ។ (រូប៖ CYN)

ព្រៃ​សហគមន៍​ភ្នំ​សេះ​ ​មានផ្ទៃ​ដី​ជាង​ ​៣​ពាន់​ហិកតារ​ ( ​៣​,​០​៨​១​ ) ​ដែល​ពលរដ្ឋ​មូលដ្ឋាន​រួមគ្នា​ថែរក្សា​តាំងពី​ឆ្នាំ​ ​២​០​០​៩​  ​រហូតដល់​ឆ្នាំ​ ​២​០​១​៨​ ​ទើប​ក្រសួង​កសិកម្ម​ចុះបញ្ជី​ជា​ព្រៃ​សហគមន៍​ការពារ​ធម្មជាតិ​ស្រប​ច្បាប់​។​ ​ប្រជា​សហគមន៍​ថា​ ​ព្រៃ​សហគមន៍​ភ្នំ​សេះ​ ​សំបូរ​ដើមឈើ​មាន​តម្លៃ​ធំ​ៗ​  ​ដូចជា​ ​បេង​ ​ធ្នង់​ ​នាងនួន​ ​សុក្រំ​ ​និង​ឈើទាល​ ​ជាដើម​ ​តែ​នៅ​រយៈពេល​ប៉ុន្មាន​ឆ្នាំ​ចុងក្រោយ​នេះ​ ​ឈើ​ក​ម្រ​ទាំងនេះ​ ​ត្រូវ​គេ​កាប់​អស់​ស្ទើរ​ទាំងស្រុង​។​ ​បច្ចុប្បន្ន​នៅសល់​តែ​ដើមឈើ​ផលិត​ជ័រទឹក​ច្រើនជាង​គេ​ ​ប្រមាណ​ជាង​ ​១​ពាន់​ដើម​ ​ដែល​អ្នកស្រុក​កំពុង​អាស្រ័យផល​។​ ​ព្រៃ​នេះ​មាន​សត្វព្រៃ​ក​ម្រ​ជាច្រើន​ប្រភេទ​ ​កំពុង​រស់នៅ​រួម​មាន​ ​ស្វា​ ​ក្ងោក​ ​ជ្រូកព្រៃ​ ​មាន់​ ​និង​ ​ឈ្លូស​ជាដើម​។​

អនុប្រធាន​សហគមន៍​ព្រៃឈើ​ភ្នំ​សេះ​លោក​ ​ហ៊ា​ ​សំអឿន​ ​ថ្លែង​ថា​ ​ការ​ទន្ទ្រាន​ ​និង​កាប់​ឈើ​មាន​តម្លៃ​ក្នុង​ព្រៃ​សហគមន៍​នេះ​ ​បង្ក​ឱ្យ​ប៉ះពាល់​កន្លែង​អាស្រ័យផល​ ​របស់​ជនជាតិ​ដើម​ភាគតិច​ព្នង​ជាច្រើន​គ្រួសារ​។​ ​លោក​ថា​ ​សហគមន៍​មាន​គ្នា​តិច​ ​មិន​អាច​ការពារ​ព្រៃ​សហគមន៍​នេះ​បាន​គ្រប់ជ្រុងជ្រោយ​ឡើយ​ ​ព្រោះ​ពលរដ្ឋ​ចំណាកស្រុក​មកពី​តំបន់​ផ្សេងៗ​រាប់​សិប​នាក់​ ​កំពុង​សម្រុក​កាប់​ទន្ទ្រានព្រៃ​ទាំងយប់​ថ្ងៃ​។​ ​លោក​បារម្ភ​ថា​ ​ប្រសិនបើ​អាជ្ញាធរ​មិន​ពន្លឿន​ដោះស្រាយបញ្ហា​នេះ​ទេ​ ​កន្លែង​អាស្រ័យផល​ព្រៃឈើ​ដ៏​សំខាន់​របស់​អ្នកភូមិ​នឹង​បាត់បង់​ទាំងស្រុង​ ​ប៉ះពាល់​ជីវភាព​ ​និង​ប្រភព​ចំណូល​៖​ ​«​និយាយរួម​ទៅ​កាប់ព្រៃ​ហើយ​ដាំ​ ​កាប់​ហើយ​ដាំ​ ​ហើយ​ចន្ទី​រលឿ​ន​ណាស់​ ​តែ​២​ឆ្នាំ​លិច​ក្បាល​ហើយ​ ​ដី​ព្រៃ​ចាស់​ហ្នឹង​។​ ​ឥលូវ​ព័ទ្ធជុំវិញ​ភ្នំ​។​ ​ព្រួយបារម្ភ​ខ្លាច​បាត់បង់​ព្រៃ​ជំនឿ​ ​និង​កន្លែង​អាស្រ័យផល​ ​របស់យើង​ ​ជាពិសេស​ព្រៃ​សហគមន៍​ទាំងមូល​។​ ​វា​មាន​ឯកសារ​ពាក់ព័ន្ធ​គ្រប់គ្រង​ ​តាំងពី​ចំណុច​សូន្យ​ដល់​ប្រកាស​»​

អាស៊ី​សេរី​មិនទាន់​អាច​សុំ​ការ​បំភ្លឺ​រឿង​នេះ​ ​ពី​អភិបាលស្រុក​សំបូរ​ ​លោក​ ​សូម​ ​សា​រិ​ត​ ​និង​ ​អភិបាល​ខេត្ត​ក្រចេះ​ ​លោក​ ​វ៉ា​ ​ថន​ ​បាន​នៅឡើយ​ទេ​ ​នៅ​ថ្ងៃ​ទី​១​២​ ខែ​មេសា​។​ ​ចំណែក​នាយ​ខណ្ឌ​រដ្ឋបាល​ព្រៃឈើ​ខេត្ត​ក្រចេះ​ ​លោក​ ​ទ្រី​ ​សុភ័ក្រ​ ​វិញ​ ​ក៏​អាស៊ី​សេរី​មិន​អាច​ទាក់ទង​បាន​ដែរ​ ​ព្រោះ​លោក​ ​មិន​លើក​ទូរសព្ទ​។​

ក៏ប៉ុន្តែ​ ​មេឃុំ​អូរ​គ្រឿង​លោក​ ​កែវ​ ​បុប្ផា​  ​មានប្រសាសន៍ថា​  ​ការ​កាប់​ទន្ទ្រាន​ដី​ព្រៃ​សហគមន៍​ភ្នំ​សេះ​នេះ​ ​អាជ្ញាធរ​ពាក់ព័ន្ធ​កំពុង​ប្រឹងប្រែង​ដោះស្រាយ​ ​និង​ចាត់វិធានការ​បង្ក្រាប​ជា​ញឹកញាប់​។​ ​លោក​ថា​ ​អាជ្ញាធរ​ឃុំ​បាន​ស្រង់​ឈ្មោះ​អ្នក​ដែ​លកាប់​ទន្ទ្រាន​ដី​ព្រៃ​សហគមន៍​នេះ​រួចហើយ​ ​និង​បង្គាប់​ឱ្យ​ចុះ​កិច្ចសន្យា​បញ្ឈប់​ ​ក៏ប៉ុន្តែ​ដោយសារ​ជំងឺ​កូ​វី​ដ​១​៩​ ​ធ្វើ​ឱ្យ​រាំង​ស្ទះ​ ​ការដោះស្រាយបញ្ហា​នេះ​។​ ​លោក​សង្កត់ធ្ងន់​ថា​  ​បើ​ទោះបីជា​មានការ​កាប់​ទន្ទ្រាន​ក្តី​ ​ក៏​អាជ្ញាធរ​នៅតែ​រក្សា​ដី​នៅ​តំបន់​នោះ​ ​ជា​របស់​សហគមន៍​ដដែល​៖​ ​«ទាំង​អាជ្ញាធរ​ស្រុក​ ​អាជ្ញាធរ​ឃុំ​ ​និង​កងកម្លាំង​ ​ដែល​យើង​រួម​សហការ​គ្នា​ការពារ​ ​ប៉ុន្តែ​អ្វី​ដែល​ជា​ការលំបាក​គឺ​ ​ពួកគាត់​តែងតែ​ធ្វើការងារ​កាប់​ទន្ទ្រាន​ពេលយប់​។​ ​វិធានការ​យើង​ចាត់វិធានការ​រហូត​ ​ដី​ហ្នឹង​ជា​ដី​របស់​រដ្ឋ​ ​ដី​ហ្នឹង​ជា​ដី​សហគមន៍​។​ ​យើង​នៅតែ​រក្សា​ថា​ ​ដី​ហ្នឹង​ជា​ដី​សហគមន៍​ភ្នំ​សេះ​ដដែល​។​ ​យើង​អត់មាន​ប​ន្ធូ​ដៃ​ ​តែ​ដោយសារ​ជំងឺ​កូ​វី​ដ​១​៩​ ​ការ​ចួប​ជុំ​ពុំអាច​ទៅរួច​ ​»​។

CYN_forest_in_Phnom_Ses_12_04_2021_02.jpg
ផ្ទាំងប៉ាណូផ្សព្វផ្សាយពីតំបន់ព្រៃ​សហគមន៍​ភ្នំ​សេះ​  នៅសល់តែរូបភាពតែព្រៃឈើត្រូវបាត់បង់អស់រលីង។ (រូប៖ CYN)

របាយការណ៍​របស់​សមាគម​បណ្តាញ​យុវជន​កម្ពុជា​ ​បន្ថែម​ថា​  ​ការ​កាប់​រានទន្ទ្រាន​កាន់កាប់​បាន​គំរាមកំហែង​ដល់​ជីវភាពរស់នៅ​របស់​ប្រជា​សហគមន៍​មូលដ្ឋាន​ ​ជនជាតិ​ដើម​ភាគតិច​ព្នង​ ​ដែល​មាន​ទម្លាប់​ដកហូត​អនុផល​ព្រៃឈើ​  ​បម្រើ​ជីវភាព​ជាច្រើន​ទសវត្សរ៍​មក​ហើយ​។​ ​អ្នកភូមិ​ប្រឈម​បាត់បង់​ទីកន្លែង​ជំនឿ​របស់​ជនជាតិ​ដើម​ភាគតិច​ព្នង​ ​ដែល​ហៅថា​ “​ទី​ជំនឿ​ភ្នំ​សេះ​”​។​

លើស​ពី​នេះ​ទៀត​ ​ពលរដ្ឋ​ចំណូលស្រុក​ថ្មី​បាន​មក​ទិញ​ដី​ ​និង​កាប់​ទ​ន្រ្ទា​ន​ដី​ព្រៃ​កាន់កាប់​ជា​កម្មសិទ្ធិ​ ​សម្រាប់​ដាំដំណាំ​ក​សិ​ឧស្សាហកម្ម​  ​ហើយក៏​មាន​អ្នកភូមិ​ខ្លះ​កាប់​រាន​ទ​ន្រ្ទា​ន​ដី​ព្រៃ​ ​ដើម្បី​ពង្រីក​ដី​ចម្ការ​របស់​ខ្លួន​កាន់កាប់​ជា​កម្មសិទ្ធិ​ដោយ​ខុសច្បាប់​ ​ក្នុង​បំណង​ដាំដំណាំ​ផ្សេងៗ​ដូចជា​ ​ស្វាយចន្ទី​ ​និង​ដំឡូងមី​ជាដើម​។​  ​សកម្មភាព​កាប់​រានទន្ទ្រាន​នេះ​ ​ជា​ទង្វើ​ខុសច្បាប់​ភូមិបាល​ ​និង​ ​ច្បាប់​ស្តីពី​ព្រៃឈើ​។​

​សមាគម​បណ្តាញ​យុវជន​កម្ពុជា​រក​ឃើញ​ថា​ ​ការ​អនុវត្ត​ច្បាប់​ ​និង​ការ​បំ​ពេញមុខ​ងារ​របស់​អាជ្ញាធរ​ពាក់ព័ន្ធ​ ​និង​ម​ន្រ្តី​រដ្ឋបាល​ព្រៃឈើ​ ​នៅ​មាន​ក​ម្រិ​ត​នៅឡើយ​។

កាលពី​ឆ្នាំ​ ​២​០​១​៩​ ​រដ្ឋបាល​ខេត្ត​ក្រចេះ​បាន​ចេញ​លិខិត​ចំនួន​ពីរ​លើក​ ដោយ​ស្នើ​ឱ្យ​បញ្ឈប់​ការ​ចូល​ទន្ទ្រាន​កាន់កាប់​ដី​ព្រៃ​សហគមន៍​ភ្នំ​សេះ​។​ ​បើ​ទោះបីជា​សេចក្ដីជូនដំណឹង​នេះ​មាន​ការព្រមាន​ធ្ងន់ធ្ងរ​ក្តី​ ​តែ​សកម្មភាព​កាប់​រាន​ទ​ន្រ្ទា​ន​ដី​ព្រៃ​ខុសច្បាប់​នៅតែ​បន្ត​កើតមាន​ ​និង​មាន​សភាព​កាន់តែ​ធ្ងន់​ដែល​អាច​ធ្វើ​ឱ្យ​ព្រៃ​សហគមន៍​ភ្នំ​សេះ​ ​ប្រឈម​បាត់បង់​ទាំងស្រុង​នៅពេលអនាគត​៕​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល