ផ្ទះ​ពលរដ្ឋ ៩​ខ្នង​នៅ​ភូមិ​កោះគ ខេត្ត​កណ្ដាល បាក់​ធ្លាក់​ចូល​ទន្លេ​ដោយសារ​ការ​បូម​ខ្សាច់

ដោយ មួង ណារ៉េត
2020-02-22
អ៊ីម៉ែល
មតិ
Share
បោះពុម្ព
អ្នក​ភូមិ​កោះគ ឃុំ​រកាខ្ពស់ ស្រុក​ស្អាង ខេត្ត​កណ្ដាល លើក​បដា​តវ៉ា​រក​អន្តរាគមន៍​ពី​អាជ្ញាធរ ឲ្យ​បញ្ឈប់​ការ​បូម​ខ្សាច់​ពី​បាត​ទន្លេ​ក្នុង​តំបន់​ពួក​គាត់​រស់នៅ នៅ​ព្រឹក​ថ្ងៃ​ទី​១១ ខែ​មិថុនា ឆ្នាំ​២០១៧។
អ្នក​ភូមិ​កោះគ ឃុំ​រកាខ្ពស់ ស្រុក​ស្អាង ខេត្ត​កណ្ដាល លើក​បដា​តវ៉ា​រក​អន្តរាគមន៍​ពី​អាជ្ញាធរ ឲ្យ​បញ្ឈប់​ការ​បូម​ខ្សាច់​ពី​បាត​ទន្លេ​ក្នុង​តំបន់​ពួក​គាត់​រស់នៅ នៅ​ព្រឹក​ថ្ងៃ​ទី​១១ ខែ​មិថុនា ឆ្នាំ​២០១៧។
RFA

ផ្ទះ​ប្រជាពលរដ្ឋ​ចំនួន ៩​ខ្នង​នៅ​ភូមិ​កោះគ ស្ថិត​ក្នុង​ក្រុង​តាខ្មៅ ខេត្ត​កណ្តាល បាន​បាក់​ធ្លាក់ ចូល​ទន្លេ ដែល​ពលរដ្ឋ​អះអាង​ថា បណ្ដាល​មក​ពី​ការ​បូម​ខ្សាច់​អនាធិបតេយ្យ​ក្នុង​តំបន់​នោះ​។ ពលរដ្ឋ​ទាមទារ​អាជ្ញាធរ និង​ក្រុមហ៊ុន​បូម​ខ្សាច់ ឱ្យ​ផ្ដល់​សំណង់​ដល់​ពួកគាត់​។

ហេតុការណ៍​បាក់​ដី​ច្រាំង និង​ផ្ទះ​ចូល​ទន្លេ​នេះ កើតឡើង​នៅ​វេលា​ម៉ោង ៤​ព្រឹក​ថ្ងៃទី​២២ ខែ​កុម្ភៈ ស្ថិត​ក្នុង​ភូមិ​កោះគ សង្កាត់​រកា​ខ្ពស់ ក្រុង​តាខ្មៅ ខេត្ត​​កណ្តាល​។

ពលរដ្ឋ​រងគ្រោះ​ម្នាក់ លោកស្រី យ៉ុម សុខា ប្រាប់​អាស៊ីសេរី​ថា ផ្ទះ​របស់​លោកស្រី បាន​បាក់​ចូល ទន្លេ​អស់​ពាក់​កណ្ដាល នៅ​សល់​តែ​ខាងមុខ​បន្តិច​ប៉ុណ្ណោះ ប៉ុន្តែ​ពុំ​មាន​គ្រោះថ្នាក់​ដល់​មនុស្ស និង​សត្វ​នោះ​ទេ។ លោកស្រី​បញ្ជាក់​ថា ផ្ទះ​ដែល​រងគ្រោះ​ធ្ងន់ធ្ងរ​ជាងគេ គឺ​មាន​ចំនួន ៩​គ្រួសារ ចំណែក​ផ្ទះ​ពលរដ្ឋ​ផ្សេងៗ ទៀត ក៏​កំពុង​ទទួលរង​ការ​គំរាមកំហែង​នៃ​គ្រោះ​បាក់​ដី​ច្រាំងទន្លេ​នេះ​ដែរ​។ ផ្ទះ​ដែល​បាក់​ធ្លាក់​ចូល​ទន្លេ​នោះ ភាគច្រើន​ធ្វើ​អំពី​ឈើ ចំណែក​ជញ្ជាំង និង​ដំបូល​ស័ង្កសី​។ ពលរដ្ឋ​រូប​នេះ អះអាង​ថា មូលហេតុ​ដែល​បាក់​ដី​ច្រាំង និង​ផ្ទះ​អ្នកភូមិ​ចូល​ទន្លេ​ជា​បន្តបន្ទាប់​នេះ ដោយសារតែ​នៅ​តំបន់​នោះ មាន​សកម្មភាព​បូម​ខ្សាច់​ទាំង​យប់​ទាំង​ថ្ងៃ​រញ្ជួយ​ដី​ខ្លាំង ពោល​គឺ មិនមែន​បណ្ដាល​មក​ពី​គ្រោះធម្មជាតិ​ទ៖ «ទើបតែ​យប់មិញ រាង​ខ្លាំង​ដូច​ហែក​ជា​ពីរ យក​អី​គ្មាន​ទាន់​ផង ចាន​ឆ្នាំ​អី​នៅ​ក្រោយ បាក់​ទៅ​មួយ​កំណាត់​តែម្ដង​។ ផ្ទះ​ធំ​ដែរ គ្រាន់តែ​ផ្ទះបាយ​នៅ​ខាង​ក្រោយ​នោះ អស់​១​ពាន់ ៨​រយ​ដុល្លារ។ ទើបតែ​បូម​ខ្សាច់​នេះ​ទេ ដែល​បាក់​ដី​អញ្ចឹង​ហ្មង ។​អ្នក​បូម​ខ្សាច់​នេះ​បូម​នៅ​ខាងក្រោយ​ផ្ទះ​ខ្ញុំ​ហ្មង​។ ខ្ញុំ​នៅ​តាំងពី​ឆ្នាំ​១៩៩២​មក មិនដែល​មាន​បាក់​ដី​អ៊ីចឹង​ទេ»

នៅ​ពេល​បាក់​ដី និង​បាក់​ផ្ទះ​ចូល​ទន្លេ​បែបនេះ ពលរដ្ឋ​ទាំងនោះ​ពុំ​ទាន់​ដឹង​ថា ទៅ​ស្នាក់​នៅ​ទីណា ឡើយ ហើយ​ពួកគាត់​កំពុង​រុះរើ​ផ្ទះ និង​របស់របរ ដែល​នៅ​សេសសល់​ទុក​មួយ​កន្លែង​សិន។

លោកស្រី យ៉ុម សុខា ទាមទារ​ឱ្យ​អាជ្ញាធរ និង​ក្រុមហ៊ុន​បូម​ខ្សាច់​នៅ​តំបន់ ផ្ដល់​សំណង់​សមរម្យ ជូន​ពួកគាត់ ដើម្បី​មានលទ្ធភាព​ទិញ​ដី និង​សង់​លំនៅឋាន​ឡើងវិញ៖ «ខ្ញុំ​សូម​សំណូមពរ​គាត់​សុំ​ទីកន្លែង​នៅ ព្រោះ​អី​ខ្ញុំ​អត់​មានអី​ទេ ខំ​ខ្ចី​លុយ​អង្គការ មក​ធ្វើ​ផ្ទះ ហើយ​ឥឡូវ​ត្រូវ​បាក់​ទៅ​អស់រលីង»

អភិបាលខេត្ត​កណ្ដាល លោក គង់ សោភ័ណ្ឌ មានប្រសាសន៍ថា លោក​មិនទាន់​ដឹង​ចំនួន​ខ្នង​ផ្ទះ​ពលរដ្ឋ​ដែល​រង​ផល​ប៉ះពាល់​នៅឡើយ​ទេ ហើយ​លោក​អះអាង​ថា ការ​បាក់​ច្រាំង​ដី និង​ផ្ទះ ពលរដ្ឋ​នេះ មិនមែន​បណ្តាល​មក​ពី​ការ​បូម​ខ្សាច់​ឡើយ ប៉ុន្តែ​បណ្ដាល​មក​ពី​លំហូរ​ខ្សែទឹក​បុក​ខ្លាំង ទើប​បណ្ដាល​ឱ្យ​ដី​បែក​ប្រេះ​បាក់​ស្រុត​តែម្ដង ខណៈ​ផ្ទះ​តូចៗ ទាំងនោះ សាងសង់​នៅ​ជាប់​មាត់ទន្លេ​ស្រាប់​ផង​។ លោក​បន្ត​ថា អាជ្ញាធរ​កំពុង​ចុះ​ពិនិត្យ ដើម្បី​ដោះស្រាយ​ជូន​ប្រជាពលរដ្ឋ ប៉ុន្តែ​ពុំ​ទាន់​បញ្ជាក់​លម្អិត​អំពី​ការ​ផ្តល់​ដំណោះ​ស្រាយ​បែប​ណា​នោះ​ទេ៖ «ប្រជាជន​យើង រស់នៅ​មាត់ច្រាំង ទី​១ លោក​យល់​ហើយ​ស្ថានភាព​នៃ​ការ​បាក់​នោះ​ទី​២ ពេល​បាក់ គឺ​គាត់​មាន​អារម្មណ៍​លំបាក គាត់​ភ័យ គាត់​ខ្វះ​ទ្រនំ​រស់នៅ ដូច្នេះ​គាត់​ពិតជា​មានប្រសាសន៍​ក្នុង​កិច្ចការ​នេះ ដើម្បី​ឱ្យ​យើង​បាន​ជួយ​គាត់ ហើយ​ខេត្ត​កំពុង​ខិតខំ​ជួ​យក​យក​អាសា​គាត់ ។​ការ​បូម​នេះ យើង​យក​ច្បាប់​ជាធំ យក​បច្ចេកទេស ការសិក្សា​របស់ ក្រសួង​រ៉ែ និង​ថាមពល និង​មាន​អាជ្ញាប័ណ្ណ​អី​ជាធំ ។​យើង​មិនមែន​ចេះតែ​នាំគ្នា​មកដល់​បូម​កន្លែង​នេះ បូម​កន្លែង​នោះ​ស្រេច​តែ​ចិត្ត​ទេ»

អាស៊ីសេរី​បាន​ព្យាយាម​ទាក់ទង​អ្នកនាំពាក្យ​ក្រសួង​រ៉ែ និង​ថាមពល លោក យស មុនីរ៉ាត់ និង​លោក វិចទ័រ ហ្សូនា ជាច្រើន​ដង​តែ​ពុំ​មាន​អ្នក​ទទួល។

សកម្មជន​ចលនា​មាតា​ធម្មជាតិ លោក ថុ​ន រដ្ឋា ដែល​ធ្លាប់​ចុះទៅ​សិក្សា​ស្រាវជ្រាវ​អំពី​រឿង​បូម​ខ្សាច់ នៅ​តំបន់​នោះ មានប្រសាសន៍ថា ចាប់​តាំង​ពី​មាន​សកម្មភាព​បូម​ខ្សាច់​នេះ គឺ​ចាប់ផ្ដើម​មាន​ហេតុ​ការណ៍​បាក់​ច្រាំងទន្លេ និង​ផ្ទះ​ពលរដ្ឋ​ជា​បន្តបន្ទាប់​។ ម្យ៉ាងវិញទៀត លោក​រក​ឃើញ​ថា ការ​បូម​ខ្សាច់​ទាំង នោះ​ទៀតសោត គឺ​ធ្វើ​ឡើយ​ដោយ​គ្មាន​តម្លាភាព​នោះ​ទេ គឺ​អាជ្ញាធរ និង​ក្រុមហ៊ុន មិនបាន​ពិគ្រោះ យោបល់​ជាមួយ​ប្រជាពលរដ្ឋ និង​មិន​បង្ហាញ​អាជ្ញាប័ណ្ណ​ជាដើម ជាពិសេស សកម្មភាព​បូម​ខ្សាច់​នោះ ធ្វើឡើង​រយៈពេល​វែង និង​នៅតែ​តំបន់​ដដែល​។ សកម្មជន​បរិស្ថាន​រូប​នេះ យល់ថា ការ​ប្រកែក ទម្លាក់កំហុស​ទៅលើ​ធម្មជាតិ គឺ​មិន​សម​ហេតុផល​នោះ​ទេ ព្រោះ​ទន្លេបាសាក់ គឺជា​ទន្លេតូច​មួយ ដូច្នេះ គ្មាន​កម្លាំង​ខ្សែទឹក​ហូរ​ខ្លាំង ដែល​បណ្ដាល​ឱ្យ​បាក់​ដី​បាក់ និង​បាក់​ផ្ទះ​ពលរដ្ឋ​នោះ​ទេ៖ «អ្នក​ដែល​ទទួលខុសត្រូវ​គឺ​មាន​តាំងពី​ក្រសួង​រ៉ែ និង​ថាមពល​ដែល​ចេញ​អាជ្ញាប័ណ្ណ ចេញពី​ក្រុមហ៊ុន​បូម​ខ្សាច់ និង​ពី​អាជ្ញាធរ មូលដ្ឋាន​មួយ​ចំនួន​ដែល​មិនបាន ពី​គ្រោះ​យោបល់​ជាមួយ​ប្រជាពលរដ្ឋ បាន​ន័យ​ថា ត្រូវ​ទទួលខុសត្រូវ​ផ្ដល់​សំណង ព្រោះ​ពលរដ្ឋ​រងគ្រោះ អស់ទាំង​ដី​អស់ទាំង​ផ្ទះ ហើយ​បាត់បង់​មុខរបរ គឺ​ខាត​បង់​ធំ​មែនទែន ខណៈ​ដែល​ការ បូម​ខ្សាច់​នេះ​គឺ​មិន​មាន​ផល​ចំណេញ​អី​ដល់​ពួកគាត់​នោះ​ទេ»​

កន្លងមក អ្នកភូមិ​កោះគ តែងតែ​ប្រមូល​ផ្តុំ​គ្នា​តវ៉ា​ឱ្យ​អាជ្ញាធរ​បញ្ឈប់​សា​ឡង់​បូម​ខ្សាច់​ពី​បាតទន្លេ​ក្នុង​តំបន់​ពួកគាត់​រស់នៅ ដោយសារតែ​ពួកគាត់​ព្រួយបារម្ភ​អំពី​ការ​បាក់​ច្រាំងទន្លេ ប៉ុន្តែ​អាជ្ញាធរ​រដ្ឋាភិបាល តែងតែ​បកស្រាយ​ថា ការ​បូម​ខ្សាច់​នេះ​មានការ​វាយតម្លៃ​ត្រឹមត្រូវ និង​មិន​បង្ក​ផល​ប៉ះពាល់​ទេ ថែមទាំង​ជួយ​ស្តា​ទន្លេ​ទៀត​ផង។

តាម​លទ្ធផល​នៃ​ការសិក្សា​ស្រាវជ្រាវ​មួយ​របស់​សកល​វិទ្យាល័យ សៅសែមថុន (University of Southampton) នៃ​ប្រទេស​អង់គ្លេស ដែល​ចេញផ្សាយ​កាលពី​ថ្ងៃ​ទី​១៣ ខែ​មករា បាន​រក​ឃើញ​អំពី​គ្រោះថ្នាក់​នៃ​អាជីវកម្ម​បូម​ខ្សាច់​នៅ​កម្ពុជា ដែល​កំពុង​គំរាមកំហែង​ដល់​ការរស់នៅ​របស់​ប្រជាពលរដ្ឋ តាម​ដង​ទន្លេ​មេគង្គ​។ ការ​បូម​ខ្សាច់​ទាំងនោះ ធ្វើ​ឱ្យ​បាតទន្លេ​ខូង​ជ្រៅ ដែល​នាំ​ឱ្យ​បាក់​ច្រាំង ទន្លេ រំលំ​ផ្ទះ​ប្រជាពលរដ្ឋ និង​ហេដ្ឋារចនាសម្ព័ន្ធ​ផ្លូវ​តាម​បណ្ដោយ​មាត់ទន្លេ​។ ក្រុម​អ្នកស្រាវជ្រាវ រក​ឃើញ​បាតទន្លេ​នៅ​តំបន់​ខ្លះ ត្រូវ​គេ​បូម​ខ្សាច់​ខូង​ជម្រៅ ៨ ម៉ែត្រ និង​ប្រវែង ៤២ ម៉ែត្រ ក្នុង​មួយ​កន្លែង។

លោក​បណ្ឌិត ជូលៀន ឡេលិន (Julian Leyland) ប្រើ​ឧបករណ៍​ស្កែន​ដោយ​ប្រើ​ឡាហ្ស៊ែ (Terrestrial Laser Scanner) រក​ឃើញ​ថា ការ​បូម​ខ្សាច់​ចេញពី​បាតទន្លេ​ត្រឹមតែ​ជម្រៅ ២ ម៉ែត្រ គឺ​ល្មម​គ្រប់គ្រាន់ ធ្វើ​ឱ្យ​បាក់​ដី​មាត់ច្រាំង​ទន្លេ​ទៅ​ហើយ ចុះ​ទម្រាំ​បូម​ដល់​ជម្រៅ ៨ ម៉ែត្រ ឬ​ជ្រៅ​ជាង​នេះ នោះ​ការ​បាក់​ច្រាំងទន្លេ រឹតតែ​ធំធេង​ជាង​នេះ​។ លោក​បណ្ឌិត ជូ​លៀន ឡេលិន បន្ថែម​ថា ការសិក្សា​ស្រាវជ្រាវ​នេះ បង្ហាញ​យ៉ាង​ច្បាស់​ថា ការ​បាក់​ដី​ច្រាំងទន្លេ​កាន់តែ​រីក​រាលដាល ដែល​ប្រជាពលរដ្ឋ​រាយការណ៍​ក្នុង​ប៉ុន្មាន​ឆ្នាំ​ចុងក្រោយ​នេះ គឺ​បណ្ដាលមកពី​ការ​បូម​ខ្សាច់​យ៉ាង​សម្បើម​នេះឯង។

ការសិក្សា​នេះ រក​ឃើញ​ទៀត​ថា ការ​បូម​យក​ខ្សាច់​ចេញពី​បាតទន្លេ​មេគង្គ ដោយ​អាជីវកម្ម​បូម​ខ្សាច់​នេះ មាន​បរិមាណ​ធំ​ជាង​ធំ​ហំ​បរិមាណ​ខ្សាច់​ដែល​ហូរ​ចាក់​បំពេញ​បាតទន្លេ​តាម​បែប​ធម្មជាតិ ពី ៥ ទៅ ៩ ដង​ឯណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល