សកម្មជន​បរិស្ថាន​ស្នើ​ឱ្យ​អាជ្ញាធរ​អនុវត្ត​ច្បាប់​ឱ្យ​មាន​តម្លាភាព​ចំពោះ​អ្នក​ចាក់​ថ្ម​ចូល​ទន្លេ

ដោយ យ៉ង ចាន់តារា
2024.02.23
សកម្មជន​បរិស្ថាន​ស្នើ​ឱ្យ​អាជ្ញាធរ​អនុវត្ត​ច្បាប់​ឱ្យ​មាន​តម្លាភាព​ចំពោះ​អ្នក​ចាក់​ថ្ម​ចូល​ទន្លេ រូបភាពបង្ហាញពីការចាក់ថ្ម​លុបទន្លេរបស់ឧកញ៉ា ទន់ ឆៃអ៊ាង ចូលក្នុង​ទន្លេ​មេគង្គ នៅ​ភូមិ​ព្រៃទទឹង ឃុំ​ឬស្សីស្រុក ស្រុក​ស្រីសន្ធរ​។
រូប៖ ហ្វេសប៊ុករដ្ឋបាលខេត្ត​កំពង់ចាម

សកម្មជន​បរិស្ថាន និង​សង្គម​ស៊ីវិល ជំរុញ​ឱ្យ​អាជ្ញាធរ​ខេត្ត​កំពង់ចាម គួរ​កសាង​សំណុំរឿង​បញ្ជូន​អ្នក​ពាក់ព័ន្ធ ដែល​នៅ​ពីក្រោយ​ការ​ចាក់​ថ្ម​ចូល​ទន្លេ​មេគង្គ ទៅ​តុលាការ​ផ្ដន្ទាទោស​តាមច្បាប់ ដើម្បី​បង្ហាញ​ពី​ការ​ការពារ​ធនធានធម្មជាតិ និង​ការអនុវត្ត​ច្បាប់​ស្នើ​ភាព និង​តម្លាភាព ចំពោះ​ពលរដ្ឋ​គ្រប់រូប។ ពួកគាត់​ថា ប្រសិនបើ​មានការ​លើកលែង​លើ​ករណីនេះ នឹង​ធ្វើ​ឱ្យ​ជនខិលខូច​នៅតែ​បំពាន​ច្បាប់។

សកម្មជន​បរិស្ថាន លើកឡើង​ថា អាជ្ញាធរ​ខេត្ត​កំពង់ចាម គួរតែ​អនុវត្ត​ច្បាប់ ចំពោះ​បុគ្គល​ដែល​ចាក់​ថ្ម រំលោភ​លើ​ច្រាំង​ទន្លេមេគង្គ នៅ​ស្រុក​ស្រី​សន្ធរ ខេត្តកំពង់ចាម ឱ្យ​មាន​ភាពសុក្រឹត្យ និង​ស្វែងរក​អ្នក​ពាក់ព័ន្ធ​ឱ្យមក​ទទួល​ខុល​ត្រូវ ព្រោះ​ករណី​នេះ កើតឡើង​ជាង​មួយ​ខែ​ទៅ​ហើយ ទើប​អាជ្ញាធរ​ចាត់​វិធានការ។

មន្ត្រីជាន់ខ្ពស់​ផ្នែក​ប្រព័ន្ធ​ផ្សព្វផ្សាយ​នៃ​សមាគម​បណ្ដាញ​យុវជន​កម្ពុជា លោក ម៉ា ចិត្រា ប្រាប់​វិទ្យុ​អាស៊ីសេរី​នៅ​ថ្ងៃទី​២៣ ខែកុម្ភៈ ថា ករណីនេះ​ប្រសិនបើ​គ្មាន​ការ​បែកធ្លាយ​ពី​សំណាក់​ពលរដ្ឋ​នោះ​ទេ អាជ្ញាធរ​ប្រហែល​មិន​ចាត់​វិធានការ​ក្នុង​រឿង​នេះ​ឡើយ​។ តែ​យ៉ាងណា លោក​ថា អាជ្ញាធរ​ក៏​គួរតែ​អនុវត្ត​វិធានការ​តាមផ្លូវ​ច្បាប់ ទៅលើ​បុគ្គល​ដែល​បញ្ជា​ឱ្យ​ចាក់​ថ្ម​ចូល​ទន្លេ​នេះ ដើម្បី​បង្ហាញ​ពី​ការ​អនុវត្ត​ច្បាប់​ដោយ​គ្មាន​ការលើកលែង។

លោក ម៉ា ចិត្រា៖ «ខ្ញុំ​សំណូមពរ​ឱ្យ​រដ្ឋាភិបាល ត្រូវតែ​ដាក់ទោស​ទណ្ឌ​ឱ្យ​បាន​ធ្ងន់ធ្ងរ ចំពោះ​បុគ្គល​ទាំងឡាយ​ណា មិន​ថា​តែ​បុគ្គល​ដែល​ជា​ម្ចាស់​ដី​ហ្នឹង​ទេ អ្នក​ផ្សេងទៀត​ក៏ដោយ ឱ្យ​តែ​បំពាន​ទៅលើ​សម្បត្តិ​សាធារណៈ ឬ​ឆ្នេរ ដែល​ប៉ះពាល់​ទៅលើ​ច្បាប់ សូម​ឱ្យ​ចាត់វិធានការ​ឱ្យ​បាន​ម៉ឺងម៉ាត់​។ បើ​មិន​អ៊ីចឹង​ទេ អ្នក​មាន​លុយ គាត់​អាង​គាត់​មាន​លុយ គាត់​ធ្វើ​អី​តាមតែ​ចិត្ត ហើយ​នៅ​ពេល​ដែល​គាត់​មាន​លុយ គាត់​ធ្វើ​អ៊ីចឹង​បាន ឧបមា​អត់​មាន​អ្នកណា​ដឹង (​នោះ​)​អ្នក​ផ្សេង​ទៀត​ធ្វើ​ដែរ​។ អ៊ីចឹង​ហើយ​អាហ្នឹង​វា​ជា​គំរូ​អាក្រក់​សម្រាប់​អ្នកមាន​លុយ​ផ្សេងទៀត»

រដ្ឋបាល​ខេត្ត​កំពង់ចាម នៅ​ថ្ងៃទី​២៣ ខែកុម្ភៈ បាន​ប្រកាស​កំណត់​ឱ្យ​ភាគី​ម្ចាស់​ដី​នៅ​ទីតាំង​ដែល​ចាក់​ថ្ម​ចូល​ទន្លេមេគង្គ នៅ​ភូមិសាស្ត្រ​ស្រុក​ស្រី​សន្ធរ បញ្ឈប់​សកម្មភាព​ជា​បន្ទាន់ និង​ត្រូវ​កាយ​យក​ថ្ម​ចេញ​វិញ​ឱ្យ​អស់ ក្នុង​រយៈពេល​យ៉ាង​យូរ​៧០​ថ្ងៃ ហើយ​មិន​ត្រូវ​កាយ​ពង្រាយ​ថ្ម​នោះ ទម្លាក់​ចូលក្នុង​ទឹកទន្លេ​ឡើយ ដើម្បី​បញ្ចៀស​ផល​ប៉ះពាល់​ទៅ​ថ្ងៃក្រោយ​សម្រាប់​ការ​ធ្វើ​ចរាចរណ៍ តាម​ផ្លូវ​ទឹក។

ការ​ចេញ​លិខិត​នេះ គឺ​បន្ទាប់ពី​មានការ​ប្រតិកម្ម​ព្រោងព្រាត​នៅ​លើ​បណ្ដាញ​សង្គម អំពី​ការ​ចាក់​ថ្ម ចូលក្នុង​ទន្លេ​មេគង្គ នៅ​ភូមិ​ព្រៃទទឹង ឃុំ​ឬស្សីស្រុក ស្រុក​ស្រីសន្ធរ​។ អាជ្ញាធរ​រក​ឃើញ​ថា នៅ​ទីតាំង​នោះ ពិត​ជា​មាន​សកម្មភាព​ចាក់​ថ្ម​ចូល​ផ្ទៃ​ទន្លេ​ពិតប្រាកដ​មែន ដោយ​ដំណើរការ​តាំងពី​ថ្ងៃ​ទី​២ ខែ​មករា មក​ម្ល៉េះ ហើយ​ម្ចាស់​សំណង់​ចាក់​ថ្ម​ចូល​ក្នុង​ទន្លេ ដោយ​ខុសច្បាប់ ឈ្មោះ ទន់ ឆៃអ៊ាង។ ថ្ម​ទាំងនោះ គឺ​ចាក់​ចូល​ទៅ​ក្នុង​ផ្ទៃ​ទន្លេមេគង្គ ប្រវែង ៥៥​ម៉ែត្រ និង​គ្រោង​ចាក់​បណ្តោយ​ទន្លេ​ប្រវែង​ជិត ៣​រយ​ម៉ែត្រ​(២៩៤.) ខណៈ​បច្ចុប្បន្ន​ចាក់​បាន​ប្រវែង​ជា ១​រយ (១៣០)​ទៅ​ហើយ​។ អាជ្ញាធរ​បញ្ជាក់​ថា សកម្មភាព​នៃ​ការ​ចាក់​ថ្ម​ចូល​ផ្ទៃ​ទន្លេ​នេះ គឺ​ពុំ​មាន​ច្បាប់​អនុញ្ញាត​នោះ​ទេ។

ទោះជា​បែបនេះ​ក្ដី នៅក្នុង​សេចក្ដីប្រកាស​ព័ត៌មាន​របស់​អាជ្ញាធរ​ខេត្តកំពង់ចាម មិន​បាន​បញ្ជាក់​ពី​ការ​ចាត់​វិធានការ​តាមផ្លូវ​ច្បាប់ ចំពោះ​ម្ចាស់​សំណង់​ឈ្មោះ ទន់ ឆៃអ៊ាង ឡើយ ហើយ​បុគ្គល​រូប​នេះ ក៏​មិន​បាន​ចេញមុខ​ដោះស្រាយ​ដែរ។

វិទ្យុ​អាស៊ីសេរី មិនអាច​ទាក់ទង​អភិបាលស្រុក​ស្រីសន្ធរ លោក ស៊ីម គង់ និង​អភិបាល​ខេត្ត​កំពង់ចាម លោក អ៊ុន ចាន់ដា ដើម្បី​បកស្រាយ​រឿង​នេះ​បាន​ទេ នៅ​ថ្ងៃ​ទី២៣ ខែ​កុម្ភៈ ដោយ​ទូរស័ព្ទ​ហៅ​ចូល តែ​ត្រូវ​ចុច​បិទ។

ម្ចាស់​សំណង់​ចាក់​ថ្ម​ចូល​ក្នុង​ទន្លេ គឺ​លោក ទន់ ឆៃអ៊ាង មាន​គោរមងារ​ជា​ឧកញ៉ា គឺ​ជា​អគ្គនាយក​ក្រុមហ៊ុន​ព្រីមៀរ៍ ផាក (Premier Park) ដែល​រកស៊ី​លើ​វិស័យ​អចលនទ្រព្យ មាន​ដូចជា​ផ្ទះល្វែង បុរី និង​ដីឡូតិ៍ ជាដើម ក្រៅ​ពី​នេះ លោក​ក៏​ជា​ឈ្មួញ​រកស៊ី​កាប់​ឈើ ដែល​ស្និទ្ធ​នឹង​ឈ្មួញ​រកស៊ី​កាប់​ឈើ​លក់​ទៅ​ក្រៅប្រទេស ដ៏​ល្បីឈ្មោះ គឺ​លោក ទ្រី ភាព ថែម​ទៀត​ផង។ ក្រៅ​ពី​នេះ ឈ្មោះ ទន់ ឆៃអ៊ាង ហាក់​មាន​ទំនាក់ទំនង​ជិតស្និទ្ធ​ជាមួយ​អាជ្ញាធរ​ខេត្ត​កំពង់ចាម​ផង​ដែរ។ ក្នុង​នោះ កាលពី​ឆ្នាំ​២០២១ លោក​បាន​ជួយ​សាងសង់​អគារ​ថ្មី​មួយ​កន្លែង ឱ្យ​ប៉ុស្តិ៍​នគរបាល​រដ្ឋបាល​ឃុំ​កោះអណ្ដែត ស្រុក​ស្រីសន្ធរ ដែល​ចំណាយ​ទឹកប្រាក់​ចំនួន​ជាង ១​ម៉ឺន ដុល្លារ​(១៤.០០០)

ជុំវិញ​រឿង​នេះ​មន្ត្រី​ពង្រឹង​សិទ្ធិអំណាច​សហគមន៍​មូលដ្ឋាន​នៃ​សមាគម​អាដហុក (Adhoc) លោក ប៉ែន ប៉ុណ្ណារ៍ យល់ឃើញ​ថា ការ​ចាត់វិធានការ​ច្បាប់​របស់​អាជ្ញាធរ​ខេត្ត​កំពង់ចាម ចំពោះ​បុគ្គល​ដែល​បាន​ចាក់​ថ្ម​លុប​ទន្លេមេគង្គ ដោយ​ខុសច្បាប់​នេះ ហាក់​គ្មាន​ទម្ងន់ និង​គ្មាន​តម្លាភាព​ឡើយ​។ លោក​បន្ត​ថា អាជ្ញាធរ​គួរ​បញ្ជូន​សំណុំ​រឿង​នេះ ទៅ​តុលាការ ដោយ​អនុវត្ត​តាម​ច្បាប់​ភូមិបាល ស្ដីពី​ការ​ប៉ះពាល់​កម្មសិទ្ធិ​នៃ​ទ្រព្យសម្បត្តិ​សាធារណៈ​របស់​រដ្ឋ និង​ស្រាវជ្រាវ​រក​អ្នក​ដែល​ពាក់ព័ន្ធ។

លោក ប៉ែន ប៉ុណ្ណារ៍៖ «អ៊ីចឹង​ដើម្បី​ឱ្យ​ការជំរុញ​យុត្តិធម៌​ហ្នឹង ឱ្យ​មាន​ប្រសិទ្ធភាព អាជ្ញាធរ​គួរតែ​ចាត់​វិធានការ​តាម​ផ្លូវ​ច្បាប់ ឱ្យ​បាន​ម៉ឺងម៉ាត់ មិន​គួរ​ធ្វើ​តែ​ចំពោះ​ប្រជាពលរដ្ឋ​ទន់ខ្សោយ​នោះ​ទេ មិន​ថា​មន្ត្រី​ថ្នាក់​ណា​ក៏​ដោយ ឧកញ៉ា​ណាក៏ដោយ ត្រូវតែ​ទទួលខុសត្រូវ​ចំពោះមុខ​ច្បាប់»

ច្បាប់​ភូមិបាល​ឆ្នាំ​២០០១ មាត្រា ២៥៩ ចែងថា ការ​ប៉ះពាល់​កម្មសិទ្ធិ​នៃ​ទ្រព្យសម្បត្តិ​សាធារណៈ​របស់​រដ្ឋ ត្រូវ​ផ្ដន្ទា​ទោសពិន័យ​ជា​ប្រាក់ ៥​លាន​រៀល (.០០០.០០០) ដល់ ៥០​លាន​រៀល (៥០.០០០.០០០) និង​ផ្ដន្ទាទោស​ពី ១​ឆ្នាំ ដល់ ៥​ឆ្នាំ។

ទោះ​យ៉ាង​ណា ករណី​រំលោភ​ដី​ច្រាំង​ទន្លេ ស្ទឹង​នេះ មិនមែន​ទើប​កើត​មាន​នោះ​ឡើយ ដោយ​កាល​ពី​ខែ​មិថុនា ឆ្នាំ​២០២៣ ក្រុមហ៊ុន​ឧកញ៉ា ទុយ គី ធ្លាប់​បាន​ចាក់​ដី ចាក់​លុប​ដល់​កណ្ដាលស្ទឹង​សង្កែ ខេត្ត​បាត់ដំបង និង​សង់​របង​ថ្ម វេរ៉ង់ដា ដែល​លយ​ចូល​មាត់​ស្ទឹង​សង្កែ គ្រោង​ធ្វើ​រីស៊ត។ តែ​ក្រោយ​មក ត្រូវ​បាន​រដ្ឋបាល​ខេត្ត​បញ្ជា​ឱ្យ​វាយចោល និង​ស្ដារ​ឡើង​វិញ តែ​ករណី​នេះ​ពុំ​បាន​និយាយ​ពី​ការ​ផ្ដន្ទាទោស​នោះ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។