ក្រុមអ្នកវិទ្យាសាស្ត្រ រកឃើញត្រីកម្រដែលជិតផុតពូជនៅទន្លេមេគង្គ
2022.09.27
ត្រីកម្រប្រភេទ សាលម៉ុង (Salmon) ដែលជិតផុតពូជ នៅទន្លេមេគង្គ ទំងន់ជាង ១៣ផោន ឬស្មើជិត ៦គីឡូក្រាម ត្រូវបានក្រុមអ្នកវិទ្យាសាស្ត្ររកឃើញ កាលពីពេលថ្មីៗ នេះ។
រូប៖ ហ្វេសប៊ុក Wonders of the Mekong
ក្រុមអ្នកវិទ្យាសាស្ត្ររកឃើញត្រីកម្រប្រភេទ សាលម៉ុង (Salmon) ដែលជិតផុតពូជ ទំងន់ជាង ១៣ផោន ឬស្មើជិត ៦គីឡូក្រាម ដែលគេបានដាក់លក់នៅទីផ្សារ នៅតាមដងទន្លេមេគង្គ កាលពីពេលថ្មីៗ នេះ។
សាស្ត្រចារ្យស្រាជ្រាវនិងជីវវិទូត្រី នៅ រឺណូ (Reno) នៃសាកលវិទ្យាល័យ នេវ៉ាដា (Nevada) លោក ហ្សេប អូហ្គិន (Zeb Hogan) ដែលបានសិក្សាប្រភេទត្រីនៅទន្លេមេគង្គ ដែលជាគម្រោងអច្ឆរិយភាពមេគង្គ (Wonders of the Mekong) របស់ទីភ្នាក់ងារសហរដ្ឋអាមេរិក ដើម្បីអភិវឌ្ឍន៍ (USAID) ឲ្យដឹងនៅថ្ងៃទី២៦ ខែកញ្ញាថា នេះជាលើកទី១ ហើយ ក្នុងរយៈពេល ១៨ឆ្នាំកន្លងមកនេះ ដែលត្រីកម្រ សាលម៉ុង (Salmon) នេះ ត្រូវបានរកឃើញនៅទន្លេមេគង្គ។
លោកបន្តថា ត្រីកម្រនេះ ពុំមានឈ្មោះជាខ្មែរនោះទេ តែត្រូវបានគេដាក់ឈ្មោះឲ្យថា ត្រីខ្មោចមេគង្គ (Mekong Ghost) ដែលអាចធំលូតលាស់បានដល់ទៅ ៦៦ផោន ឬស្មើ ៣០គីឡូក្រាម។
ជីវវិទូត្រីនៃរដ្ឋបាលជលផលកម្ពុជា លោក ចាន់ សុខខេង ឲ្យដឹងដែរថា ក្រោយពីការស្រាវជ្រាវអស់រយៈពេលជាង ២០ឆ្នាំមកនោះ ក្រុមអ្នកវិទ្យាសាស្ត្រសង្ឃឹមថា ប្រភេទត្រីកម្រ សាលម៉ុង (Salmon) នេះ នឹងបន្តមាននៅក្នុងទន្លេមេគង្គ។
ការរកឃើញប្រភេទត្រីកម្រ សាលម៉ុង នេះ គឺជាការរកឃើញចុងក្រោយនៅក្នុងទន្លេមេគង្គ បន្ទាប់ពីអ្នកនេសាទនៅកម្ពុជាចាប់បានត្រីបបែលយក្សទឹកសាបធំជាងគេបំបែកកំណត់ត្រាពិភពលោក ដែលមានទម្ងន់ ៣០០គីឡូក្រាម ប្រវែងជិត ៤ម៉ែត្រ នៅជិតកោះដាច់ស្រយាលមួយ កាលពីថ្ងៃទី១៣ ខែមិថុនា។ ពួកគេដាក់ឈ្មោះត្រីបបែលយក្សនេះថា «បូណ៌មី» ដោយសារត្រីនេះ ត្រូវបានគេលែងចូលក្នុងទន្លេមេគង្គវិញ នៅចំថ្ងៃពេញបូណ៌មី។
ទន្លេមេគង្គមានត្រីប្រមាណជា ១ពាន់ប្រភេទ ដែលជាប្រភពផ្តល់ធនធានដ៏សំខាន់ និងទ្រទ្រង់ជីវភាពរស់នៅរបស់ប្រជាពលរដ្ឋ ប្រមាណ ៧០លាននាក់ ដែលរស់នៅតាមអាងទន្លេមេគង្គខាងក្រោម។ ប៉ុន្តែក្រោយពីការកសាងទំនប់វារីអគ្គិសនី ការប្រែប្រួលអាកាសធាតុ និងការនេសាទហួសហេតុ ដែលជាហេតុបណ្ដាលឲ្យមានហានិភ័យខ្ពស់ដល់ត្រីប្រភេទធំៗ និងការគំរាមកំហែងកាន់តែខ្លាំង ចំពោះសហគមន៍នៅតាមដងទន្លេមេគង្គ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- បេក្ខជនជាច្រើននាក់អវត្តមាន នៅថ្ងៃទី២ នៃការប្រឡងបាក់ឌុបឆ្នាំ២០២២
- ប្ដីស្ត្រីរងគ្រោះដោយគ្រូពេទ្យវះកាត់ដាច់ពោះវៀនសម្រេចប្ដឹងមន្ទីរសំរាកព្យាបាលបង្កបញ្ហានោះ
- លោក ហេង សួរ មន្ត្រីចិត្តឆៅដ៏មានឥទ្ធិពលក្បែរលោក ហ៊ុន ម៉ាណែត
- កម្ពុជាផលិតដុំមាសបានជិត ៥តោន ចាប់តាំងពីអាជីវកម្មរុករករ៉ែ កាលពីពាក់កណ្តាលឆ្នាំ២០២១
- មន្ត្រីសង្គមស៊ីវិលថា ការបង្ហាញភាពហ៊ឺហារបស់លោក ហ៊ុន សែន បង្ហាញពីភាពគ្មានឆន្ទៈគិតគូរដល់ពលរដ្ឋក្រីក្រ
រឿងដែលគេអានច្រើនបំផុត
បរិស្ថាន
- រឿងមន្ត្រីក្រសួងកសិកម្មពាក់ព័ន្ធការជួញដូរស្វាក្ដាមដោយខុសច្បាប់ ទូតកម្ពុជាធ្វើអន្តរាគមន៍សុំឱ្យនៅក្រៅឃុំបណ្ដោះអាសន្ន
- ក្រសួងបរិស្ថានរងការរិះគន់ដែលបង្កើតច្បាប់អនុញ្ញាតឲ្យបាញ់សត្វកម្សាន្តក្នុងតំបន់ព្រៃការពារ
- អាជ្ញាធរព្រះវិហារចាប់ខ្លួនអ្នកកាសែត៣នាក់ តែមិនអនុវត្តច្បាប់ចំពោះឈ្មួញទិញឈើខុសច្បាប់