RFA
ជំនន់ទឹកភ្លៀងនៅតែបន្តហក់ឡើង បណ្ដាលឲ្យខេត្តមួយត្រូវទឹកលិចផ្លូវ ផ្ទះ និងផលដំណាំរបស់ប្រជាពលរដ្ឋអស់ជាច្រើនកន្លែង។ ស្របគ្នានេះដំណាំស្រូវរបស់កសិករនៅស្រុកឯកភ្នំ ខេត្តបាត់ដំបង រាប់រយហិកតារ ត្រូវបានទឹកជំនន់ហូរពីស្ទឹងសង្កែលិចខូចខាត ហើយប្រជាពលរដ្ឋមួយចំនួនកំពុងខ្វល់ខ្វាយខ្លាចគ្មានប្រាប់សងធនាគារ ដែលពួកគាត់ខ្ចីយកធ្វើដើមទុកដាំដុះនាពេលកន្លងមក។
នាយកខុទ្ទកាល័យក្រសួងធនធានទឹក និងឧតុនិយម លោក ចាន់ យុត្ថា ឲ្យដឹងនៅរសៀលថ្ងៃទី១៩ កក្កដា ថា រហូតមកទល់ពេលនេះ នៅខេត្តខ្លះ ទឹកបានស្រកជាធម្មតាហើយ ចំណែកនៅខេត្តកំពត កំពង់ស្ពឺ និងខេត្តកោះកុង ទឹកជំនន់មិនទាន់បានធូរស្រាលនៅឡើយទេ។ លោក ចាន់ យុត្ថា អះអាងថា ដោយសារនៅខេត្តកោះកុងមានភ្លៀងធ្លាក់ជោកជាំជាប់ៗគ្នាប្រមាណ១០ថ្ងៃ បណ្ដាលឲ្យខូចខាតផ្លូវថ្នល់ និងផ្ទះរបស់ប្រជាពលរដ្ឋអស់ជាច្រើនខ្នង ប៉ុន្តែលោកមិនបានបញ្ជាក់ពីចំនួនតួលេខដែលរងការខូចខាតទាំងអស់ប៉ុន្មាននោះទេ៖ «នៅចំណុចតែ២ទេ ដោយនៅព្រឹកទឹកឈូ មួយ ហើយមួយទៀតនៅព្រែកស្រែអំបិលព្រឹកនេះទឹកបន្តឡើង ប៉ុន្តែនៅខាងក្បាលផ្នែកខាងលើទឹកចាប់ផ្ដើមនឹង ហើយវាអាចប្រហែលមួយយប់ទៀត។ ដោយឡែកនៅកំពង់ស្ពឺត្រង់ចំណុចពាមឃ្នៃ ដែលជាចំណុចប្រសប់របស់ស្ទឹងឃ្នាច ជាមួយស្ទឹងកណ្ដាលបង្កើតបានជាទឹកព្រែកត្នោត ដូច្នេះត្រង់ចំណុចពាមឃ្នៃ ចាប់ពីព្រឹកមកដល់ពេលនេះ ទឹកចាប់ផ្ដើមស្រកចុះប្រហែល១៥សង់ទីម៉ែត្រហើយ»។
ចំណែកនៅខេត្តបាត់ដំបងឯណោះវិញ ទឹកជំនន់នៅស្ទឹងសង្កែ បានហក់ឡើងសាជាថ្មី ហើយបណ្ដាលឲ្យដំណាំស្រូវរបស់ពលរដ្ឋប្រមាណ ៥០០ហិកតារ នៅក្នុងឃុំព្រែកនរិន្ទ ស្រុកឯកភ្នំ រងការខូចខាត។
ប្រជាពលរដ្ឋម្នាក់រស់នៅភូមិរាជដូនកែវ ឃុំព្រែកនរិន្ទ លោក រ៉េន សារ៉េត អះអាងថា ដំណាំស្រូវរបស់លោកប្រមាណ ២ហិកតារត្រូវបានទឹកជំនន់លិចខូចប្រមាណ៥ថ្ងៃហើយ។ កសិកររូបនេះ អះអាងទៀត នៅថ្ងៃទី១៩ កក្កដា ទឹកស្ទឹងសង្កែបានហក់ឡើងសាជាថ្មី ហើយទឹកបានហូរចូលលិចដំណាំស្រូវ របស់កសិករខូចខាតអស់ជាច្រើនរាប់រយហិកតារ។ លោកបន្ថែមទៀតថា សព្វថ្ងៃប្រជាពលរដ្ឋជាច្រើនគ្រួសារដែលរងការខូចខាតផលដំណាំកំពុងព្រួយបារម្ភខ្លាចមិនមានប្រាក់សងធនាគារដែលពួកគាត់បានខ្ចីយកមកធ្វើដើមទុនដាំដុះកាលពីដើមឆ្នាំ៖ «ពីប្រាំងមិញគឺខាតសណ្ដែកម្ដងហើយ ដោយសារសណ្ដែកថោក ហើយមកដល់ឥឡូវនេះស្រូវខាតទៀត គឺបំណុលជាន់លើបំណុលហើយ។ ខ្ញុំចង់ទៅធ្វើលិខិតឆ្លងដែនទៅថៃ ដោយសារតែអស់ជម្រើសគឺមានតែវិធីសាស្ត្រនឹងឯង ព្រោះបំណុលកាន់តែច្រើនហើយគ្មានការងារធ្វើ»។
នាយកខុទ្ទកាល័យក្រសួងធនធានទឹក និងឧតុនិយមលោក ចាន់ យុត្ថា អះអាងថា ទឹកស្ទឹងសង្កែនៅខេត្តបាត់ដំបង ឡើងហើយស្រកវិញឆាប់រហ័ស ដោយសារមានទ្វារទឹកសម្រាប់បើករំដោះទឹកជាច្រើនកន្លែង នៅប៉ែកខាងលើក្នុងស្រុកបាណន់ និងមានបឹងទន្លេសាបនៅប៉ែកខាងក្រោមសម្រាប់ទទួលទឹកជំនន់។ លោកបន្ថែមថា ទឹកជំនន់នៅក្នុងខេត្តនេះមិនទាន់ប៉ះពាល់ធ្ងន់ធ្ងរដល់ផលដំណាំរបស់ប្រជាកសិករនៅឡើយទេ។ ក្រៅពីនេះលោកថា ទឹកទន្លេមេគង្គ ទន្លេបាសាក់ និងទន្លេសាបជាដើម នឹងបន្តហក់ឡើងទៅមុខទៀត ប្រមាណពី ៣ទៅ ៧ថ្ងៃ ទើបទឹកចាប់ផ្ដើមស្រកទៅវិញ៖ «ទោះបីថាទឹកនេះនៅបន្តឡើង ប៉ុន្តែវាមិនទាន់ថា ឈានទៅកម្រិតប្រកាសឲ្យមានការប្រុងប្រយ័តទេ។ ប៉ុន្តែក៏អំពាវនាវដែរចំពោះប្រជាពលរដ្ឋរស់នៅតាមដងទន្លេ និងអ្នកធ្វើដំណើរតាមទន្លេនឹងសុំបង្កើនការប្រុងប្រយ័ត ព្រោះពេលនេះទឹកឡើងខ្ពស់គួរសម ហើយល្បឿនក៏ហូរលឿន ដូច្នេះត្រូវបង្កើនការប្រុងប្រយ័តដែរ»។
ដោយឡែកចំពោះការខូចខាតវិញលោក ចាន់ យុត្ថា ឲ្យដឹងថា ក្រសួងនឹងចុះវាយតម្លៃការខូចខាតផលដំណាំរបស់ប្រជាពលរដ្ឋ ដើម្បីដាក់ជូនទៅស្ថាប័នពាក់ព័ន្ធយកទៅពិចារណាក្នុងការជួយដល់កសិករនៅពេលដែលទឹកបានស្រកទៅវិញ៕
