លោក ហ៊ុន សែន កាត់​ដី​ដែន​គម្រប​ព្រៃឈើ​ខេត្ត​កំពត​ជិត​១០០​ហិកតារ​ឱ្យ​លោក ហេង សួរ ដែល​ស្និទ្ធ​នឹង​ត្រកូល​ហ៊ុន

ដោយ ខាន់ លក្ខិណា
2023.12.11
លោក ហ៊ុន សែន កាត់​ដី​ដែន​គម្រប​ព្រៃឈើ​ខេត្ត​កំពត​ជិត​១០០​ហិកតារ​ឱ្យ​លោក ហេង សួរ ដែល​ស្និទ្ធ​នឹង​ត្រកូល​ហ៊ុន (ពីឆ្វេង) ប្រធានកិត្តិយសគណបក្សប្រជាជនកម្ពុជា លោក ហេង សំរិន និងលោក ហ៊ុន សែន ប្រធានគណបក្សប្រជាជនកម្ពុជា​ ក្នុងមហាសន្និបាទ​គណបក្សប្រជាជនកម្ពុជា កាលពីថ្ងៃទី៩ ធ្នូ ២០២៣។
រូប៖ ហ្វេសប៊ុកលោក ហ៊ុន សែន

មុន​ពេល​ផ្ទេរ​ឱ្យ​លោក ហ៊ុន ម៉ាណែត ដឹកនាំ​បន្ត​នោះ​អតីត​នាយករដ្ឋមន្ត្រី លោក ហ៊ុន សែន បាន​កាត់​ដី​គម្រប​ព្រៃឈើ​ឆ្នាំ​២០០២ នៅ​ខេត្តកំពត​ជាង ៩១ ហិកតារ​ដើម្បី​ប្រគល់​ឱ្យ​រដ្ឋមន្ត្រីក្រសួង​ការងារ គឺ​លោក ហេង សួរ ធ្វើ​ជា​កម្ម​សិទ្ធ។

សកម្មជន​បរិស្ថាន និង​សង្គម​ស៊ីវិល បង្ហាញ​ការ​សោកស្ដាយ និង​ស្នើ​ឱ្យ​រដ្ឋាភិបាល​ដឹកនាំ​ដោយ​លោក ហ៊ុន ម៉ាណែត បញ្ឈប់​សកម្មភាព ទាំងឡាយ ពាក់ព័ន្ធ​នឹង​កាត់​ដីព្រៃ ឬ នៅ​តំបន់​ការពារ ដែល​ជា​ទ្រព្យ សម្បត្តិ​ជាតិ​បន្ត​ទៀត។

ក្នុង​អនុក្រឹត្យ​ចុះ​ថ្ងៃទី​៩ ខែសីហា ឆ្នាំ​២០២៣ ដែល​ចុះហត្ថលេខា ដោយ​លោក ហ៊ុន សែន បាន​កាត់​ដី​ដែន​គម្រប​ព្រៃឈើ​ឆ្នាំ​២០០២ ចំនួន ៩១​ហិកតារ ៥៥ អារ ស្ថិតនៅ​ភូមិ​ចង្ហោន សង្កាត់​ព្រែក​ត្នោត​ក្រុង​បូកគោ ខេត្ត​កំពត​ប្រគល់​ឱ្យ​លោក ហេង សួរ ធ្វើជា​កម្មសិទ្ធិ ដោយ​អនុក្រឹត្យ​អនុវត្ត​ចាប់ពី​ថ្ងៃ​ចុះ​ហត្ថលេខា​តទៅ។

និស្សិត​នៅ​សាកលវិទ្យាល័យ​ភូមិន្ទ​ភ្នំពេញ និង​ជា​សកម្មជន​ការពារ​បរិស្ថាន កញ្ញា រស់ ស្រីរ័ត្ន ប្រាប់​វិទ្យុ​អាស៊ីសេរី​នៅ​ថ្ងៃទី​១០ ធ្នូ ថា លោក ហ៊ុន សែន ជា​អ្នក​កាត់​ដី​ដែន គម្រប​ព្រៃឈើ​ក៏ដោយ ប៉ុន្តែ​កញ្ញា​ចង់ឱ្យ​រដ្ឋាភិបាល​ថ្មី​ដឹកនាំ​ដោយ​លោក ហ៊ុន ម៉ាណែត បញ្ឈប់​សកម្មភាព​កាត់​ដី​ព្រៃ និង​នៅ​តំបន់​ការពារ​កន្លង​មក និង​ថ្ងៃ​ខាងមុខ។

កញ្ញា​ថា បើប្រសិន​លោក ហ៊ុន ម៉ាណែត មិន​បញ្ឈប់​ទេ​នោះ គឺ​បង្ហាញ​ឱ្យ​ប្រជាពលរដ្ឋ​ឃើញ​ថា រដ្ឋាភិបាល​បាន​ចូលរួម​ចំណែក​ក្នុង​ការ​បំផ្លាញ​ធនធាន ធម្មជាតិ​នៅក្នុង​ប្រទេស​កម្ពុជា​។​

កញ្ញា រស់ ស្រីរ័ត្ន៖ «ការដែល​គាត់​[​រដ្ឋាភិបាល​]​ធ្វើ​អ៊ីចឹង គឺ​ដូច​គាត់​ចូលរួម​បំផ្លាញ​ព្រៃឈើ​ក៏​រួម​ចំណែក​ឱ្យ​ប្រជាពលរដ្ឋ​គាត់​មាន​ការ​ក្ដៅក្រហាយ​ទាក់ទង​នឹង​បញ្ហា​ទាំង​អស់ហ្នឹង​ដែរ​។ ណាមួយ​ការ​ធ្វើ​អ៊ីចឹង ធ្វើ​ឱ្យ​ប្រជាពលរដ្ឋ​ភាគ ច្រើន​គាត់​ខាត ប្រយោជន៍​រួម ទាក់ទង​នឹង​ធនធានធម្មជាតិ ដូចជា សត្វព្រៃ ជាពិសេស តំបន់​ព្រៃ​ដែល ត្រូវ​បាន​អភិរក្ស ត្រូវ​បាន​កាត់​បន្តបន្ទាប់​ទៀត​។ អ៊ីចឹង​សូម​ឱ្យ រដ្ឋាភិបាល​ថ្មី ការ​ពិចារណា​ឡើងវិញ បញ្ឈប់​រាល់​សកម្មភាព ទាំងឡាយ​ណា​ដែល​គ្មាន​ការយល់ និង​អនុញ្ញាត ពី​ប្រជាពលរដ្ឋ លើ​គម្រោង​ដែល បាន​កាត់ ដី​ព្រៃ​ក្នុង​តំបន់​ការពារ»

វិទ្យុ​អាស៊ីសេរី មិន​អាច​ទាក់ទង​សុំ​ការ​អត្ថាធិប្បាយ​បញ្ហា​នេះ​ពី​រដ្ឋមន្ត្រី​ក្រសួង​ការងារ និង​បណ្ដុះបណ្ដាល​វិជ្ជាជីវៈ​លោក ហេង សួរ និង​អ្នកនាំពាក្យ​ក្រសួង​បរិស្ថាន លោក ផៃ ប៊ុនឈឿន បាន​ទេ​នៅ​ថ្ងៃទី​១០ ធ្នូ ដោយ​ទូរស័ព្ទ ចូល​គ្មាន​អ្នក​ទទួល។

ក្រៅពី​កាត់​ដី​គម្រប​ព្រៃឈើ​នៅ​ខេត្តកំពត​នោះ កាល​នៅ​ខែ​ឧសភា លោក ហ៊ុន សែន បាន​កាត់​ដី​ដែន​គម្រប​ព្រៃឈើ​ឆ្នាំ​២០០២ ក្នុងស្រុក​ព្រៃនប់ ខេត្ត​ព្រះសីហនុ ជាង ៧០​ហិកតារ​ប្រគល់​ឱ្យ ឧកញ៉ា រតនៈ សម្បត្តិ ខណៈ​ខែកក្កដា ឆ្នាំ​២០២៣ លោក ហ៊ុន សែន បាន​កាត់​ដី​ជិត​៣០​ហិកតារ​ពី​ដែន​គម្រប​ព្រៃឈើ​នៅ​ខេត្ត​ព្រះសីហនុ ប្រគល់​ឱ្យ​ប្រពន្ធ​លោក នេត សាវឿន គឺ លោកស្រី ហ៊ុន គឹមឡេង ដើម្បី​ធ្វើជា​កម្មសិទ្ធិ ហើយ​ខែ​កក្កដា ដដែល ផ្ទៃដី​គម្រប​ព្រៃឈើ​ទំហំ​ជិត ៥​រយ​ហិកតារ​(៤៨៦.៨៦​ហិកតា​) ទៀត ស្ថិតនៅ​ឃុំ​អូរត្រេះ ស្រុក​ស្ទឹងហាវ ខេត្ត​ព្រះសីហនុ បាន​កាត់​ឱ្យ​ក្រុមហ៊ុន ប៊ូយ៉ុង​ខ្មែរ​Ii​ខូអិលធីឌី។

លើស​ពី​នេះ កាល​ពី​អំឡុង​ខែ​កក្កដា ឆ្នាំ​២០២០ លោក ហ៊ុន សែន ក៏​ធ្លាប់​បាន​ចេញ​អនុក្រឹត្យ​កាត់​ដី​ជាង ៤០​ហិកតារ​ចេញពី​ដែន​គម្រប​ព្រៃឈើ​ឆ្នាំ​២០០២ នៅ​ភូមិ​ចំណោតរាម ឃុំ​បិត​ត្រាំ​ង ស្រុក​ព្រៃនប់ ខេត្ត​ព្រះសីហនុ ប្រគល់​ឱ្យ​ទៅ​អ្នកស្រី ហ៊ុន ម៉ាណា និង​អ្នកស្រី ហ៊ុន ម៉ាលី ដែល​ត្រូវ​ជា​កូនស្រី​បង្កើត​របស់​គាត់​ផង​ដែរ។

ជុំវិញ​រឿង​នេះ អ្នកសម្របសម្រួល​គម្រោង​ធុរកិច្ច និង​សិទ្ធិមនុស្ស​របស់​មជ្ឈមណ្ឌល សិទ្ធិមនុស្ស​កម្ពុជា លោក វណ្ណ សុផាត កត់សម្គាល់​ថា លោក ហ៊ុន សែន បាន​កាត់​ដី​ព្រៃ​នៅ​ក្នុង​តំបន់​ការពារ​ច្រើន ប្រគល់​ឱ្យ​ក្រុមហ៊ុន​ឯកជន និង​ក្រុម​គ្រួសារ​សាច់ញាតិ​របស់​អ្នក​មាន​អំណាច ដោយ​គ្មាន​តម្លាភាព និង​មិន​បង្ហាញ​ជា​សាធារណៈ​ឱ្យ​ប្រជាពលរដ្ឋ​ដឹង​ជា​មុន​ឡើយ។

លោក វណ្ណ សុផាត៖ «យើង​មានការ​បារម្ភ​ថា ថ្ងៃក្រោយ ប្រជាពលរដ្ឋ​កាត់​នឹង​អស់​ដី ដើម្បី​អាស្រ័យ​ផល ទី​១ ហើយ​ទី​២​ទៀត ដី​សាធារណៈ​របស់​រដ្ឋ ដី​រដ្ឋ​របស់​យើង​ហ្នឹង គឺថា ក្លាយជា​ដី​ឯកជន​អស់ វា​ក្លាយ​ទៅជា​ប្រទេស​ដែល​ពុះ​ដី​លក់​អ៊ីចឹង​។ អាហ្នឹង​ជា​បញ្ហា​មួយ ដែល​ចោទឡើង​បច្ចុប្បន្ន​នេះ ហើយ​បញ្ហា​ដីធ្លី​បច្ចុប្បន្ន​ក​ក្រើន សឹងតែ​ទូទាំង​ប្រទេស​តែម្ដង ។ អ៊ីចឹង​ខ្ញុំ​សង្ឈឹម​ថា នាយករដ្ឋមន្ត្រី​ថ្មី លោក​នឹង​មាន​វិធានការ​ដើម្បី​ទប់ស្កាត់​ខ្លះៗ បើសិន​មិន​អ៊ីចឹង​ទេ ទំនាស់​ដីធ្លី​កាន់តែ​កើត​មាន​ឡើង ហើយ​ប្រជាពលរដ្ឋ​ជា​អ្នក​រងគ្រោះ​ផ្ទាល់​តែម្ដង»

ក្រៅពី​ដី​គម្រប​ព្រៃឈើ​ឆ្នាំ​២០០២​នោះ​កាលពី​ថ្ងៃទី​៣១ ខែ​មីនា ឆ្នាំ​២០២៣ លោក ហ៊ុន សែន កាត់​ដី​ឧទ្យាន​ជាតិ​សមុទ្រ​កោះរ៉ុង ជាង ៧០០​ហិកតារ (៧៣១​ហិកតារ​) ឱ្យ​ទៅ​ក្រុមហ៊ុន​កូនប្រុស​ពៅ​របស់​លោក យឹម ឆៃលី គឺ​លោក យឹម លក្ខណ៍ និង ឧទ្យានជាតិ​គិរីរម្យ ក៏​ត្រូវ​បាន​លោក ហ៊ុន សែន កាត់​ប្រគល់​ឱ្យ​ក្រុមហ៊ុន របស់​អ្នកស្រី ជឹង សុគន្ធាវី ដែល​ស្និទ្ធ​នឹង​ត្រកូល​ហ៊ុន​កាល​ពី​ពេល​ថ្មីៗ​នេះ។

លើស​ពី​នេះ ដី​ព្រៃ​ឬ​តំបន់​ការពារ ដែល​ជា ទ្រព្យសម្បត្តិ​សាធារណៈ​របស់​រដ្ឋ នៅ​តាម​ខេត្ត​ផ្សេងៗ​ទៀត ដូចជា ខេត្តកំពត កែប កំពង់ស្ពឺ កោះកុង ពោធិ៍សាត់ និង​ខេត្ត​មណ្ឌលគិរី​ជាដើម ត្រូវ​បាន​លោក ហ៊ុន សែន កាត់ និង​បែងចែក ដើម្បី​ប្រគល់​ឱ្យទៅ​សែស្រឡាយ​របស់​លោក និង​ក្រុមហ៊ុន​ឯកជន ព្រមទាំង​បក្ខពួក​នៅក្នុង​ជួរ​គណបក្ស​ប្រជាជន​កម្ពុជា​បន្តបន្ទាប់ មុន​ពេល​ផ្ទេរ​តំណែង​នាយករដ្ឋមន្ត្រី ឱ្យ​លោក ហ៊ុន ម៉ាណែត បន្ត​វេន​បច្ចុប្បន្ន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។