សមត្ថកិច្ច​បញ្ជូន​លោក អាឡិក សកម្មជន​ការពារ​ធនធាន​ធម្មជាតិ​ចេញ​ពី​កម្ពុជា

ដោយ តាំង សារ៉ាដា
2015-02-23
Share
អាឡិក ៦២០ ស្ថាបនិកចលនា​​មាតា​ធម្មជាតិ លោក លោក អាឡិកហាន់ដ្រូ ហ្គន់ហ្សាឡេស ដេវិតសឹន (Alejandro Gonzalez Davidson) ត្រូវ​បាន​សមត្ថកិច្ច​ចាប់​ខ្លួន​នៅ​ភោជនីយដ្ឋាន​មួយ​ជិត​ផ្សារ​រាត្រី រាជធានី​ភ្នំពេញ នៅ​រសៀល​ថ្ងៃ​២៣ កុម្ភៈ ២០១៥។
IDEA Photo/Sok Seiha

សមត្ថកិច្ចកម្ពុជា បាន​បញ្ជូន​លោក អាឡិកហ្សង់ដ្រូ ហ្គន់ហ្សាឡេស ដេវិតសឹន (Alejandro Gonzalez Davidson) ចេញ​ពី​កម្ពុជា កាល​ពី​វេលា​ម៉ោង​ប្រមាណ ៩​យប់ ថ្ងៃ​ច័ន្ទ ទី​២៣ កុម្ភៈ។

អ្នក​នាំ​ពាក្យ​ក្រសួង​មហាផ្ទៃ លោក​ឧត្ដមសេនីយ៍ ខៀវ សុភ័គ បញ្ជាក់​ប្រាប់​វិទ្យុ​អាស៊ីសេរី តាម​ទូរស័ព្ទ​ថា ការ​បញ្ជូន​លោក អាឡិក ចេញ​ពី​ក្រុង​ភ្នំពេញ គឺ​តាម​ជើង​យន្តហោះ​ថៃ អ៊ែរវេស៍ (Thai Airways) ធី.ជី.៥៨៥ (TG585) ទៅ​កាន់​ទីក្រុង​បាងកក ប្រទេស​ថៃ។

លោក ខៀវ សុភ័គ អះអាង​ថា លោក អាឡិក នឹង​មិន​អាច​អនុញ្ញាត​ឲ្យ​ចូល​កម្ពុជា បាន​ទៀត​ទេ ដោយសារ​សកម្មជន​ការពារ​បរិស្ថាន​រូប​នេះ​មាន​ឈ្មោះ​រំលោភ​ច្បាប់​អន្ដោប្រវេសន៍​របស់​កម្ពុជា ដោយ​មិន​ព្រម​ចាកចេញ​តាម​ការ​ស្នើ​របស់​សមត្ថកិច្ច​កម្ពុជា កន្លង​មក។

ការ​ចាប់​បញ្ជូន​លោក អាឡិក ចេញ​ពី​ស្រុក​ខ្មែរ​ទាំង​យប់​នេះ គឺ​ផ្ទុយ​ពី​ព័ត៌មាន​ផ្តល់​ដោយ​អនុ​ប្រធាន​អគ្គនាយកដ្ឋាន​អន្តោប្រវេសន៍ លោក នៅ លក្ខណា ក្នុង​សន្និសីទ​កាសែត​កាល​ពី​ព្រលប់​ថ្ងៃ​ទី​២៣ កុម្ភៈ ដែល​បញ្ជាក់​ថា លោក អាឡិក នឹង​មិន​ត្រូវ​បញ្ជូន​ចេញ​ពី​កម្ពុជា នៅ​យប់​ថ្ងៃ​ច័ន្ទ ទេ ដោយ​ប្រកាស​របស់​ក្រសួង​មហាផ្ទៃ គឺ​ទុក​ពេល ៧​ថ្ងៃ ឱ្យ​លោក អាឡិក ចាក​ចេញ​ពី​កម្ពុជា បន្ទាប់​ពី​ទិដ្ឋាការ​របស់​លោក​ផុត​កំណត់​នៅ​ថ្ងៃ​ទី​២០ កុម្ភៈ។

សមត្ថកិច្ច​បាន​ចាប់​ខ្លួន​សកម្មជន​ការពារ​ព្រៃឈើ​ជនជាតិ​អេស្ប៉ាញ រូប​នេះ កាល​ពី​រសៀល​ថ្ងៃ​ទី​២៣ កុម្ភៈ ក្នុង​ទីក្រុង​ភ្នំពេញ ក្រោម​ហេតុ​ផល​ផុត​កំណត់​ទិដ្ឋាការ​បន្ត​រស់​នៅ​ក្នុង​ប្រទេស​កម្ពុជា។

មុន​ការ​ចាប់​ខ្លួន លោក អាឡិក ប្រមាណ ២​ម៉ោង នៅ​ថ្ងៃ​ដដែល​នេះ លោក​នាយករដ្ឋមន្ត្រី ហ៊ុន សែន បាន​ថ្លែង​ជា​សាធារណៈ​ក្នុង​ពេល​ចែក​សញ្ញាបត្រ​ដល់​និស្សិត ដោយ​ព្រមាន​អ្នក​នយោបាយ និង​អង្គការ​សង្គម​ស៊ីវិល មិន​ឲ្យ​លូកដៃ​ក្នុង​ករណី​លោក អាឡិក នេះ​ទៀត។

ការ​ព្រមាន​របស់​លោក​នាយករដ្ឋមន្ត្រី គឺ​សំដៅ​លើ​មន្ត្រី​បក្ស​ប្រឆាំង​ដែល​ស្នើ​ឲ្យ​ព្រះមហាក្សត្រ​ប្រទាន​កិច្ច​អន្តរាគមន៍​ឲ្យ​លោក អាឡិក បាន​ទិដ្ឋាការ​បន្ត​រស់​នៅ​ក្នុង​ប្រទេស​កម្ពុជា៖ «អ៊ីចឹង​ទេ បើ​គ្រាន់​តែ​ធ្វើ​រដ្ឋ​អធិបតេយ្យ​មួយ គ្រាន់​តែ​គេ​បំពាន​ដែរ ចាំ​បាច់​ទៅ​ធ្វើ​រដ្ឋ​ធ្វើ​អី? មិន​ថា ជន​បរទេស​បំពាន​ទេ ជនជាតិ​ខ្មែរ​បំពាន​ក៏​ត្រូវ​តែ​មាន​ទោស​ដែរ។ អំណាច​រដ្ឋ​សង្ឃឹម​ថា រឿង​អស់​ទាំង​នេះ​ត្រឹម​តែ​រដ្ឋមន្ត្រី​មហាផ្ទៃ ដោះស្រាយ​បាន​ហើយ។ គេ​ទៅ​រំខាន​ដល់​ព្រះមហាក្សត្រ​ហ្ន៎! ព្រះមហាក្សត្រ​ទ្រង់​ចេញ​លិខិត​មក​ខ្ញុំ​ព្រះ​ករុណា​ខ្ញុំ ប្រាប់​ឯកឧត្ដម ស ខេង ថា សរសេរ​ព្រាង​ឲ្យ​ខ្ញុំ​ផង ប៉ុន្តែ​មិន​សម​ទៅ​រំខាន​ព្រះមហាក្សត្រ។ សមត្ថកិច្ច​គេ​ទុក​ឲ្យ​អ្នក​បញ្ហា​អន្តោប្រវេសន៍​នេះ គឺ​រដ្ឋមន្ត្រី​មហាផ្ទៃ ចាត់​ចែង​ទៅ​វា​ចប់​ហើយ»

លោក អាឡិកហ្សង់ដ្រូ ហ្គន់ហ្សាឡេស ដេវិតសឹន ជា​អ្នក​ការពារ​បរិស្ថាន​តំបន់​អារ៉ែង ខេត្ត​កោះកុង ដ៏​ឈាន​មុខ​ម្នាក់​ក្នុង​ការ​ទប់​ស្កាត់​គម្រោង​សាងសង់​ទំនប់​វារីអគ្គិសនី​របស់​ក្រុមហ៊ុន​ចិន ស៊ីណូ ហាយដ្រូ (Sino Hydro)។

ទាក់ទង​នឹង​ការ​ចាប់​បញ្ជូន​លោក អាឡិក ចេញ​ពី​កម្ពុជា នេះ ប្រធាន​អង្គការ​ក្រុម​កិច្ចការ​ពិសេស​សិទ្ធិ​មនុស្ស​កម្ពុជា លោក អ៊ូច ឡេង អះអាង​ថា ទង្វើ​របស់​រដ្ឋាភិបាល​កម្ពុជា គឺ​ជា​ការ​បំបាក់​ស្មារតី​ដល់​ក្រុម​អ្នក​ហ៊ាន​ចេញ​មុខ​ការពារ​បរិស្ថាន​ក្នុង​ប្រទេស​កម្ពុជា ពី​ការ​បំផ្លាញ​ធនធាន​ធម្មជាតិ​ដោយ​ក្រុម​ឈ្មួញ​មាន​អំណាច។

នេះ​មិន​មែន​ជា​លើក​ទី​មួយ​ទេ​ដែល​រដ្ឋាភិបាល​ទីក្រុង​ភ្នំពេញ បណ្ដេញ​ក្រុម​អ្នក​ការពារ​បរិស្ថាន​ឯករាជ្យ​ចេញ​ពី​កម្ពុជា។ កាល​ពី​ថ្ងៃ​ទី​២២ ខែ​មេសា ឆ្នាំ​២០០៣ រដ្ឋាភិបាល​កម្ពុជា ក៏​ធ្លាប់​បាន​បណ្ដេញ​អង្គការ​ឃ្លាំមើល​ពិភពលោក គ្លបល វីនេស (Global Witness) ចេញ​ពី​កម្ពុជា ដែរ ក្រោយ​ពី​អង្គការ​នេះ​បាន​តាមដាន​យ៉ាង​យក​ចិត្ត​ទុក​ដាក់​អំពី​សកម្មភាព​ធ្វើ​អាជីវកម្ម​ឈើ​ប្រណីត​នៅ​កម្ពុជា ដែល​មាន​ជាប់​ពាក់ព័ន្ធ​ជាមួយ​មន្រ្តី​មាន​អំណាច​កំពូលៗ​ក្នុង​ជួរ​រដ្ឋាភិបាល។ លើស​ពី​នេះ​ទៅ​ទៀត ឃាតកម្ម​លើ​រូប​លោក ឈុត វុទ្ធី ប្រធាន​អង្គការ​ការពារ​ធនធាន​ធម្មជាតិ​ក្នុង​ខេត្ត​កោះកុង កាល​ពី​ឆ្នាំ​២០១២ ដោយសារ​សកម្មភាព​ការពារ​ព្រៃ​ឈើ​ដ៏​ឈាន​មុខ​របស់​លោក​នោះ ក៏​ឋិត​ក្នុង​ភាព​អាថ៌កំបាំង ហើយ​ជន​ដៃដល់​មិន​ទាន់​ត្រូវ​បាន​នាំ​ខ្លួន​មក​ផ្តន្ទាទោស​តាម​ផ្លូវ​ច្បាប់​នោះ​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល