អន្តរក្រសួង និងអាជ្ញាធរខេត្តព្រះសីហនុរួមគ្នាដោះស្រាយបញ្ហាទឹកកខ្វក់ ដែលហូរចូលសមុទ្រ
2018.10.13
សង្គមស៊ីវិលខេត្តព្រះសីហនុយល់ថា បញ្ហាទឹកកខ្វក់ ដែលត្រូវគេបង្ហូរចូលសមុទ្រនេះ គឺជាជំងឺរ៉ាំរ៉ៃមួយ ដែលកើតលើខេត្តនេះជាយូរមកហើយ។ ពួកគេស្នើឲ្យអាជ្ញាធរដោះស្រាយបញ្ហានេះដោយបានត្រឹមត្រូវ ស្របពេលដែល អាជ្ញាធររបបលោក ហ៊ុន សែន កំពុងមានគម្រោងដោះស្រាយបញ្ហានេះ។
ក្រសួងបរិស្ថាន ក្រសួងទេសចរណ៍ ក្រសួងដែនដី និងរដ្ឋបាលខេត្តព្រះសីហនុ រួមគ្នាដោះស្រាយបញ្ហាទឹកកខ្វក់ដែលហូរចូលសមុទ្រ ក្នុងនោះអាជ្ញាធរមានគម្រោង ស្ដារស្ថានីយប្រព្រឹត្តកម្មទឹកកង្វក់ចំនួន ១៦ហិកតារនៅតំបន់ឆ្នេរអូរឈើទាល រៀបចំអាងស្ដុកស្ថានីយបូមទឹក កខ្វក់នៅចំណុចអូរចំណារ អូរឆ្នេរ៧ជាន់ និងស្ដារនៅតាមតំបន់មាត់សមុទ្របន្ថែមទៀត និងធ្វើអាងចម្រោះទឹកកខ្វក់តាមអូរដោយចាប់ផ្ដើមដំបូងពីអូរម៉ារីយូ។
ការអន្តរាគមន៍ពីអន្តរក្រសួង និងអាជ្ញាធរខេត្តព្រះសីហនុ ទៅលើបញ្ហាទឹកកខ្វក់ហូរចូលសមុទ្រនេះធ្វើឡើងក្រោយពេលមានការរិះគន់ និងការព្រួយបារម្ភពីអ្នកបរិស្ថានព្រមទាំងពលរដ្ឋ ខណៈដែលពួកគេតែងតែឃើញមានការបង្ហូរទឹកខ្វក់ចូលសមុទ្រ ជាពិសេសក្នុងរយៈពេលចុងក្រោយនេះ នៅពេលដែលជនជាតិចិនមករស់នៅ និងរកស៊ីនៅខេត្តនេះធ្វើឲ្យបញ្ហាការបង្ហូរទឹក កខ្វក់ចូលសមុទ្ររឹតតែកើនឡើង។
សកម្មជនបរិស្ថានលោក មួង សូនី ដែលបានចុះស្រាវជ្រាវបញ្ហាមួយចំនួននៅខេត្តព្រះសីហនុ យល់ថា ប្រសិនក្រសួងពាក់ព័ន្ធ និងអាជ្ញាធរខេត្តមានឆន្ទៈដោះស្រាយបញ្ហា គឺនឹងដោះស្រាយបានព្រោះក្រសួងដែលចុះទៅគឺសុទ្ធតែជាក្រសួងជំនាញ។ ប៉ុន្តែលោកព្រួយបារម្ភថា បើគ្រាន់តែដោះស្រាយឲ្យពលរដ្ឋបានឃើញ ក្រោយមានការរិះគន់គឺបញ្ហានេះមិនអាចដោះស្រាយបានទេ៖ «យើងឃើញថា ទាល់តែមានការរិះគន់ពីពលរដ្ឋទើបឃើញរដ្ឋមន្ត្រីទាំងអស់ហ្នឹងគាត់ចុះទៅដោះស្រាយ អ៊ីចឹងយើងមានតែចាំមើលថា គាត់ដោះស្រាយមានប្រសិទ្ធភាពកម្រិតណា»។
អាស៊ីសេរីមិនទាន់អាចសុំការបញ្ជាក់បន្ថែមពីអភិបាលខេត្តព្រះសីហនុ លោក យន្ត មីន បានទេនៅថ្ងៃទី១៣ ខែតុលា។
អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ អ្នកស្រី ជៀប សុធារី ឲ្យអាស៊ីសេរីដឹងថា សព្វថ្ងៃនេះបញ្ហាទឹកកខ្វក់ដែលហូរចូលសមុទ្រ បានបង្កឲ្យមានការបារម្ភជាខ្លាំង ព្រោះទឹកកខ្វក់នោះ គឺចេញសំណង់អគារនៅតំបន់ឆ្នេរ ខណៈសំណង់អគារនៅតំបន់នេះសព្វថ្ងៃកំពុងកើតឡើងយ៉ាងព្រោងព្រាត។ អ្នកស្រីសង្កេតឃើញទៀតថា សព្វថ្ងៃនេះលូបង្ហូរទឹកក៏កំពុង ចោទជាបញ្ហាដែរ ព្រោះលូទាំងនោះតូចៗ និងមិនសមាមាត្រទៅនឹងចំនួនមនុស្សរស់នៅក្នុងតំបន់ទេ៖ «សុំឲ្យមានត្រួតពិនិត្យលក្ខណៈបច្ចេកទេស បើថាធ្វើប្រព័ន្ធហ្នឹងអត់តុល្យភាពចំនួនមនុស្សក្នុងតំបន់នោះទេបរិមាណទឹកហ្នឹងហូរអត់ទាន់ទេ»។
អ្នកស្រី ជៀប សុធារី យល់ថា បញ្ហាទឹកកខ្វក់គឺទាមទារឲ្យមានការតាមដានជាលក្ខណៈបច្ចេកទេសនិងការសិក្សាច្បាស់លាស់ពីភូមិសាស្ត្រនៃខេត្តនេះ។ អ្នកស្រីបន្តទៀតថា បញ្ហាទឹកកខ្វក់ នេះគឺជាជំងឺរ៉ាំរ៉ៃមួយដែលកើតលើខេត្តនេះជាយូរមកហើយ ប៉ុន្តែមិនឃើញអាជ្ញាធរ និងអ្នកពាក់ព័ន្ធអាចដោះស្រាយបញ្ហានេះបាននៅឡើយទេ៖ «អ្នកដែលធ្វើអគារនៅតាមតំបន់នឹងត្រូវមានការសុំច្បាប់ និងត្រូវចុះទៅត្រួតពិនិត្យទៅលើការងារសាងសង់តាំងពីបច្ចេកទេសសំណង់ ប្រព័ន្ធបង្ហូរទឹកកាកសំណល់រឹងរាវ ព្រោះស្ថានភាពដីខុសពីតំបន់ផ្សេងទៀតព្រោះជាតំបន់ភ្នំ»។
សង្គមស៊ីវិលលើកឡើងថា កំណើនទេសចរបរទេសជាពិសេសជនជាតិចិនបាន ជះឥទ្ធិពលជាខ្លាំងទៅលើបញ្ហាធំៗមួយចំនួនរួមមានបញ្ហាបរិស្ថាន ចរាចរណ៍ និងសន្តិសុខសង្គម។ អ្នកសិក្សាការអភិវឌ្ឍសង្គមលោក បណ្ឌិត មាស នី សង្កេតឃើញថា អាជ្ញាធរខេត្តព្រះសីហនុមិនទាន់បានត្រៀមខ្លួនទាន់ពេលវេលានៅឡើយទេចំពោះការវិវឌ្ឍរបស់ខេត្តនេះ៕