បទ​ល្មើស​ព្រៃ​ឈើ​នៅ​តែ​បន្ត​កើត​មាន​នៅ​តំបន់​ជួរភ្នំ​ក្រវាញ​កណ្ដាល

ដោយ យន់ សាមៀន
2017-11-25
Share
កាប់​ឈើ កំពង់ស្ពឺ ៦២០ រូប​សកម្មភាព​កាប់​ឈើ​នៅ​ស្រុក​ឱរ៉ាល់ ខេត្ត​កំពង់ស្ពឺ ផ្ដល់​ឲ្យ​ដោយ​អង្គការ​ប្រឆាំង​អំពើ​ពុករលួយ ការពារ​ធនធាន​ធម្មជាតិ។
Provided photo

អង្គការ​មិនមែន​រដ្ឋាភិបាល ផ្នែក​អភិរក្ស​បរិស្ថាន​បញ្ជាក់​ថា បទល្មើស​ព្រៃឈើ​នៅ​តើ​បន្ត​កើត​ឡើង​យ៉ាង​ពេញ​បន្ទុក នៅ​តាម​ជួរ​ភ្នំ​ក្រវាញ​កណ្ដាល ចាប់​ពី​ខេត្ត​ពោធិ៍សាត់ កំពង់ស្ពឺ និង​ខេត្ត​កោះកុង។ប៉ុន្តែ មន្ត្រី​មន្ទីរ​បរិស្ថាន​ទាំង​ខេត្ត​កំពង់​ស្ពឺ និង​ខេត្ត​ពោធិ៍​ច្រាន​ចោល​ការ​ចោទ​ប្រកាន់​នេះ។

ក្រុម​អ្នក​ស្រលាញ់​បរិស្ថាន ផ្នែក​សង្គម​ស៊ីវិល ឲ្យ​ដឹង​ថា បច្ចុប្បន្ន​ឈ្មួយ​ឈើ​ធំៗ​ដែល​សុទ្ធសឹង​តែ​មន្ត្រី​កងរាជអាវុធហត្ថ និង​ឧកញ៉ា នៅ​តែ​បន្ត​សម្រុក​កាប់ និង​ដឹក​ចេញ​ពី​ជួរ​ភ្នំ​ក្រវាញ​កណ្ដាល​ទៅ​លក់​ប្រទេស​វៀតណាម តាម​ច្រក​ទាន់ហន់​ខេត្ត​កំពត យ៉ាង​គគ្រឹកគគ្រេង។

ប្រធាន​អង្គការ​ប្រឆាំង​អំពើ​ពុករលួយ ទប់ស្កាត់​បំផ្លាញ​ធនធាន​ធម្មជាតិ និង​ការពារ​សិទ្ធិ​ពលរដ្ឋ លោក ជា ហ៊ាន ត្អូញត្អែរ​ថា ពេល​នេះ​ឈ្មួញ​ហាក់​បាន​ដៃ​កាន់​តែ​ខ្លាំង ក្នុង​ការ​កាប់​បំផ្លាញ​ធនធាន​ធម្មជាតិ។ លោក​បន្ត​ថា ការ​ប្រឈម​របស់​អង្គការ​មិនមែន​រដ្ឋាភិបាល​ពេល​នេះ គឺ​ការ​ចេញ​សារាចរ​របស់​ក្រសួង​បរិស្ថាន​ដែល​បញ្ញត្តិ​មិន​ឲ្យ អ្នក​ល្បាត​ព្រៃឈើ​ចុះ​ទប់ស្កាត់​មុន ជូន​ដំណឹង​ដល់​មន្ត្រី​ជំនាញ​ព្រៃឈើ​របស់​រដ្ឋាភិបាល។ លោក ជា ហ៊ាន លើក​ឡើង​ថា មូលហេតុ​នេះ​ហើយ ដែល​កាន់​តែ​លើក​ទឹកចិត្ត​ឲ្យ​ឈ្មួយ បាន​ដៃ​បន្ថែម​ទៀត ក្នុង​ការ​កាប់​ព្រៃឈើ៖ «ដូច​ជា​មិន​មាន​វិធានការណ៍​ទប់​ស្កាត់ និង​បង្ក្រាប​ឲ្យ​មាន​ប្រសិទ្ធភាព​ស្រប​តាម​បទបញ្ជា និង​សារាចរ​របស់​រាជរដ្ឋាភិបាល​ទេ​ដោយ​សារ​មន្ត្រី​នៅ​ថ្នាក់​ក្រោម​មាន​ការ​លាក់បាំង។ ហើយ​ខ្ញុំ​ក៏​ជួប​ឧបសគ្គ​ជា​ច្រើន​នៅ​ពេល​ដែល​យើង​ចុះ​ល្បាត​តម្រូវ​ឲ្យ​យើង​ជូន​ដំណឹង​ទៅ​មន្ទីរ​បរិស្ថាន ហើយ​កំណត់​ទីតាំង និង​កំណត់​ពេលវេលា។ ដូច្នេះ​បើ​សិន​ជា​ធ្វើ​បែប​ហ្នឹង​គឺ​មិន​អាច​បង្ក្រាប​បទល្មើស​បាន​ទេ។ នៅ​ពេល​ដែល​យើង​ផ្ដល់​ព័ត៌មាន​ថា​ចុះ​ទៅ​ដល់​មន្ទីរ​អ៊ីចឹង​គេ​នឹង​ផ្ដល់​ព័ត៌មាន​ទៅ​ឲ្យ​ជន​ល្មើស​ហើយ អ៊ីចឹង​ទេ​យើង​មាន​ការ​លំបាក​ក្នុង​ការ​ចុះ​ល្បាត​ណាស់។ បទល្មើស​ព្រៃឈើ​មិន​ថយ​ចុះ​ទេ»

អង្គការ​ផ្នែក​បរិស្ថាន​រក​ឃើញ​ថា ក្នុង​មួយ​ថ្ងៃ​ៗ​ឈើ​ដឹក​ចេញ​ពី​ជួ​ភ្នំ​ក្រវាញ​កណ្ដាល​នេះ មិន​តិច​ជាង ១០០​ម៉ែត្រ​គីប​ទេ។

ដោយ​ឡែក អ្នក​ដែល​ស្ថិត​នៅ​ពី​ក្រោយ​នៃ​ការ​កាប​បំផ្លាញ​នេះ គឺ​ជា​មន្ត្រី​កងរាជអាវុធហត្ថ​នៅ​ក្នុង​ខេត្ត​កំពង់ស្ពឺ និង​មន្ត្រី​ឧទ្យានុរក្ស​នៃ​មន្ទីរ​បរិស្ថាន​ខេត្ត​ពោធិ៍សាត់​ជាដើម។ ប៉ុន្តែ កម្លាំង​ប្រដាប់​អាវុធ​ទាំង​នេះ មិន​មែន​ជា​អ្នក​ដែល​អនុវត្ត​ការ​កាប់​បំផ្លាញ​ដោយ​ផ្ទាល់​ទេ ពោល​ឈើ​ដែល​កាប់​បាន​ទាំង​នោះ គឺ​តាមរយៈ​ការ​ជួល​ឲ្យ​ពលរដ្ឋ​នៅ​ក្នុង​មូលដ្ឋាន​កាប់​បន្ត។ ក្រោយ​ពេល​កាប់​បាន​ហើយ អនុផល​ព្រៃឈើ​នេះ​ត្រូវ​ប្រមូល​ដឹក​ចេញ​ពី​តំបន់​ចំនួន ៣ រួម​មាន ច្រក​អូរត្រាវ និង​ច្រកជាំ ស្ថិត​ក្នុង​ខេត្ត​ពោធិ៍សាត់ និង​ខេត្ត​កោះកុង។

នៅ​មាន​ច្រក​សំខាន់​មួយ​ទៀត គឺ​ដឹក​ចេញ​ពី​ឃុំ​ចំបក់ ស្រុក​ភ្នំស្រួច ខេត្ត​កំពង់​ស្ពឺ។ ក្រោយ​កាប់​រួច អនុផល​ព្រៃឈើ​ទាំង​នេះ ត្រូវ​ដឹក​ចូល​ទៅ​ប្រទេស​វៀតណាម តាម​ច្រក​ទាន់ហន់ ខេត្ត​កំពត ដែល​មាន​ជនជាតិ​វៀតណាម​ឈ្មោះ សឺរ ស ត្រូវ​ជា​កូន​ប្រសា​របស់​មន្ត្រី​កងរាជអាវុធហត្ថ​ខេត្ត​កំពង់ស្ពឺ ជា​អ្នក​ឈរ​ជើង​ទិញ។

ឆ្លើយតប​នឹង​ការ​ចោទ​ប្រកាន់​នេះ ប្រធាន​មន្ទីរ​បរិស្ថាន​ខេត្ត​ពោធិ៍សាត់ លោក ប៉ាន់ មរកត ទទួល​ស្គាល់​ថា ពិត​ជា​មាន​បទល្មើស​កើត​ឡើង​មែន។ ប៉ុន្តែ​មន្ត្រី​ជំនាញ​រូប​នេះ អះអាង​ថា បទល្មើស​ព្រៃឈើ​ដែល​នៅ​តែ​កើត​ឡើង​នេះ ហើយ​មិន​អាច​ទប់​ស្កាត់​បាន​នោះ ពី​ព្រោះ​នេះ​ជា​តម្រូវការ​ចាំបាច់​របស់​ពលរដ្ឋ​នៅ​ក្នុង​មូលដ្ឋាន រក​គ្រាន់​តែ​ដើម្បី​ដោះស្រាយ​ជីវភាព​ប្រចាំ​ថ្ងៃ​ប៉ុណ្ណោះ៖ «ខ្ញុំ​ដឹង​ប៉ុន្តែ​បច្ចុប្បន្ន​យើង​ធ្វើ​ការងារ​បង្ក្រាប​បទល្មើស​ទាំង​រុករាន​ព្រៃ​អី​ហ្នឹង​ទាំងអស់​ហ្នឹង។ វា​មិនមែន​បាន​ន័យ​ថា​យើង​បង្ក្រាប​ទៅ​ឲ្យ​អស់​បាន​ទេ ករណី​ប្រជាពលរដ្ឋ​យើង​គាត់​នៅ​តែ​អាស្រ័យ​ផល​ហើយ​និង​ប្រើប្រាស់​ធនធានធម្មជាតិ​ពី​សហគមន៍។ អ៊ីចឹង​យើង​ទទួលស្គាល់​ថា​បទល្មើស​ពិត​ជា​មាន​ការ​កើតឡើង»

ផ្ទុយ​ពី​ការ​លើក​ឡើង​នេះ លោក អ៊ូច ឡេង ប្រធាន​អង្គការ​ផ្នែក​អភិរក្ស​បរិស្ថាន​យល់​ឃើញ​ថា នេះ​គឺ​ជា​ការ​ឆ្លើយ​ដោះសារ ដើម្បី​យក​រួច​ខ្លួន​ពី​បទ​ល្មើស ដែល​ខ្លួន​បាន​រួម​ចំណែក​ប្រព្រឹត្ត​ប៉ុណ្ណោះ។ប្រធាន​អង្គការ​កិច្ចការ​ពិសេស​សិទ្ធិមនុស្ស​កម្ពុជា លោក អ៊ូច ឡេង បញ្ជាក់​ថា បទល្មើស​ព្រៃឈើ​បច្ចុប្បន្ន​នេះ គឺ​មិនមែន​ជា​ពលរដ្ឋ​ទេ​អ្នក​ប្រព្រឹត្ត​នោះ ផ្ទុយ​ទៅ​វិញ សហគមន៍​គ្រាន់​តែ​ជា​ឈ្នាន់​សម្រាប់​មន្ត្រី​ដែល​ស្និត​នឹង​រដ្ឋាភិបាល ជា​អ្នក​ពាក់ព័ន្ធ​បំផ្លាញ​ព្រៃឈើ​ស្រុក​ខ្មែរ​ខ្លាំង​ជាង​គេ​បំផុត។ជាង​នេះ​ទៀត ឈ្មួយ​ឧក្រិដ្ឋ​ព្រៃឈើ​ទាំង​នោះ គឺ​ជា​ក្រុម​មនុស្ស​ថ្នាក់​កំពូល​ៗ​ថែម​ទៀត​ផង ហើយ​អ្នក​ខ្លះ​បាន​យក​ព្រៃឈើ​ប្រកប​​មុខ​របរ ធ្វើ​មាន​ធ្វើ​បាន រហូត​ក្លាយ​ជា​ឧកញ៉ា ក៏​មាន​ថែម​ទៀត«អត់​មាន​លក្ខណៈ​ប្រជាពលរដ្ឋ​ក្រីក្រ​ជា​អ្នក​រកស៊ី​ទេ វា​សុទ្ធតែ​មាន​លក្ខណៈ​ជា​ប្រព័ន្ធ​របស់​ឈ្មួយ​ឲ្យ​កម្មករ​គាត់​លួច​ដឹកជញ្ជូន​តាម​ឡាន​ធំ​ៗ ឬ​ក៏​តាម​ម៉ូតូ ដូច​ជា​ឧកញ៉ា ត្រឹង និង​ឈ្មួយ​តាម៉ៅ​នៅ​ក្រវាញ​ជាដើម។ និយាយ​ទៅ​ឈ្មួយ​ដដែល​ៗ​ទេ ស្ទើរ​តែ​ដុះ​ស្លែ​ទៅ​ហើយ។ អ្នក​ខ្លះ​ជាប់​គុក​ម្ដង​ពីរ​ដង​ចាប់​លែង​ៗ​ទៅ​ហើយ​នៅ​តែ​មុខ​ដដែល​ហ្នឹង អត់​មាន​ការ​បង្ក្រាប​ឲ្យ​បាន​ម៉ត់ចត់​ទេ»

ក្រុម​អង្គការ​មិនមែន​រដ្ឋាភិបាល​ផ្នែក​បរិស្ថាន និង​សហគមន៍​ព្រៃឈើ​រក​ឃើញ​ថា តំបន់​ស្នូល​ព្រៃឡង់ តំបន់​អភិរក្ស​កន្ទុយ​នាគ ឧទ្យានជាតិ​គិរី​ក្នុង​កំពង់​ស្ពឺ និង​ឧទ្យាន​ជាតិ​វរជ័យ​ក្នុង​ខេត្ត​ព្រះវិហារ​ជា​ដើម រួម​ទាំង​ជួរ​ភ្នំ​ក្រវាញ​កណ្ដាល​ផង ត្រូវ​បាន​មនុស្ស​ដែល​ស្និត​នឹង​គណបក្ស​ប្រជាជន​កម្ពុជា កាប់​បំផ្លាញ​ស្ទើរ​គ្មាន​សល់​ទៀត​នោះ​ទេ។ បើ​ទោះ​ជា​បែប​ណា ការ​វិនាសកម្ម​ព្រៃឈើ​នេះ សង្គម​ស៊ីវិល រក​ឃើញ​ថា មាន​ជាប់​ទាក់ទិន​ខ្លាំង​បំផុត គឺ​កង​កម្លាំង​រាជអាវុធហត្ថ ឧកញ៉ា មន្ត្រី​បរិស្ថាន​នៅ​តាម​គោលដៅ និង​អង្គការ​អភិរក្ស​សត្វព្រៃ ឬ​វ៉ាយអេត (Wild Aid) ប្រចាំ​នៅ​តំបន់​ជួរ​ភ្នំក្រវ៉ាញ ជាដើម​ដែល​រួម​ចំណែក​ក្នុង​ការ​ធ្វើ​ឲ្យ​មាន​បទល្មើស​ព្រៃឈើ​កើត​ឡើង​ខ្លាំង​ជាង​គេ តាមរយៈ​អំពើ​ពុករលួយ។

ប្រធាន​មន្ទីរ​បរិស្ថាន​ខេត្ត​កំពង់ស្ពឺ លោក ឈឺន សុធន បដិសេធ​ការ​ចោទ​ប្រកាន់​ថា មន្ត្រី​បរិស្ថាន​មាន​ជាប់​ពាក់ព័ន្ធ​នឹង​បទល្មើស​ព្រៃឈើ​ទាំង​នេះ។ លោក​បន្ត​ថា ក្រុម​មន្ត្រី​បរិស្ថាន ប្រឹង​ការពារ​សម្បើម​ណាស់ ក្នុង​ការ​បង្ក្រាប​បទល្មើស​ព្រៃឈើ​ទាំង​នោះ ប៉ុន្តែ​ដោយ​សារ​កម្លាំង​មិន​គ្រប់គ្រាន់ ក្នុង​ល្បាត​ទើប​ជំរុញ​ឲ្យ​មាន​ភាព​ចន្លោះ​ប្រហោង​ខ្លះ​កើត​ឡើង៖ «អូរ អត់​ទេ​បង​យើង​កំពុង​តែ​អនុវត្ត​ច្បាប់​ហើយ​នេះ។ មន្ត្រី​យើង​វា​តិច​ពេក​ដូច​ទឹក​ហូរ​អ៊ីចឹង វា​នៅ​ខ្វះ​ចន្លោះ​ឲ្យ​តែ​មាន​កន្លែង​វា​នឹង​ជ្រៀត​ចូល​ទៅ​ហ្នឹង។ ការពារ​តែ​ក្នុង​ដែន​របស់​យើង​ទេ ព្រោះ​តំបន់​អស់​ហ្នឹង​ដូច​អត់​មាន​អី​ត្រូវ​កាប់​ទៀត​ទេ។ វា​អាច​ហូរ​ចូល​មក​ពី​កោះកុង និង​ខេត្ត​ពោធិ៍សាត់​អី​ជាដើម។យើង​កំពុង​តែ​អនុវត្ត​ច្បាប់​ហើយ»

ផ្ទុយ​ពី​ការ​ឆ្លើយ​ការពារ​របស់​មន្ត្រី​ទទួល​បន្ទុក​បរិស្ថាន ពី​ខាង​រដ្ឋាភិបាល​នេះ គេ​សង្កេត​ឃើញ​ថា ក្នុង​មួយ​យប់ៗ រថយន្ត​ប្រភេទ​យីឌុប ជា​ច្រើន​គ្រឿង​បន្ត​ដឹក​ចេញ​តាម​ច្រក​នៅ​ក្នុង​ឃុំ​ចំបក់ស្រុក ខេត្ត​កំពង់​ស្ពឺ ឆ្លង​កាត់​ប៉ុស្តិ៍​ត្រួតពិនិត្យ របស់​មន្ត្រី​បរិស្ថាន​ដោយ​ពុំ​មាន​ឧបសគ្គ​អ្វី​ឡើយ។ អ្នក​ភូមិ​អះអាង​ថា រថយន្ត​ឈ្មួយ​ទាំង​ទាំង​នោះ ដែល​អាច​ដឹក​បាន​គឺ​ត្រូវ​ឆ្លងកាត់​ការ​បង់​លុយ​ជា​ប្រចាំ ឲ្យ​ស្នាក់​ការ​បរិស្ថាន និង​មេ​ព្រៃ ក្រោម​ហេតុផល​ថា ត្រួតពិនិត្យ​ព្រៃឈើ។ តួលេខ​នេះ នៅ​មិន​ទាន់​គិត​ដល់​ច្រក​ដែល​នាំ​ឈើ​ចេញ​ដទៃ​ទៀ​នៅ​ឡើយ​ផង ដូច​ជា​ច្រក​អូរត្រាវ នៅ​ខេត្ត​ពោធិ៍សាត់ និង​នៅ​ក្នុង​ខេត្ត​កោះកុង​នៅ​ឡើយ​ផង។ លោក ឆេង ឡុង ដែល​ជា​សេនាធិការ​រង​ កងរាជអាវុធហត្ថ​ខេត្ត​កំពង់ស្ពឺ និង​លោក ប្រាក់ ស៊ីឡេង ដែល​ជា​មន្ត្រី​ឧទ្យានុរក្ស​​ដែន​ជម្រក​សត្វព្រៃ​ភ្នំ​ឱរ៉ាល់ នៃ​មន្ទីរ​បរិស្ថាន​ខេត្ត​ពោធិ៍សាត់ ដែល​ស្ថិត​នៅ​ក្នុង​បញ្ជី​​រួម​ចំណែក​ប្រព្រឹត្ត​អំពើ​ពុករលួយ និង​ការ​កាប់​បំផ្លាញ​ព្រៃឈើ​ដោយ​ផ្ទាល់ បដិសេធ​ក្នុង​អត្ថាធិប្បាយ។ ប៉ុន្តែ ជំនួយការ ឬ​ជា​មេការ​របស់​លោក ឆេង ឡុង ជា​មន្ត្រី​កងរាជអាវុធហត្ថ​ខេត្ត​កំពង់ស្ពឺ ច្រានចោល​ការ​ចោទ​ប្រកាន់​នេះ។

លោក អ៊ូច ឡេង ប្រធាន​អង្គការ​កិច្ចការ​ពិសេស​សិទ្ធិមនុស្ស​កម្ពុជា មិន​មាន​ជំនឿ​ថា មន្ត្រី​ជំនាញ​បរិស្ថាន របស់​រដ្ឋាភិបាល​ទប់ស្កាត់​បាន​នោះ​ឡើយ។ លោក​បន្ត​ថា បទល្មើស​ព្រៃឈើ​នេះ ប្រសិន​បើ​មិន​បាន​បើក​ភ្លើង​ខៀវ​ពី​រដ្ឋាភិបាល​ទេ គឺ​មិន​អាច​ដំណើរការ​ទៅ​បាន​ដោយ​ស្រួល​ឡើយ។ លោក អ៊ូច ឡេង យល់​ឃើញ​ថា ថវិកា​ដែល​បាន​មក​ពី​អំពើ​ពុករលួយ​តាមរយៈ​អនុផល​ព្រៃឈើ​ទាំង​នេះ ទំនង​ត្រូវ​សែន​ព្រេន​ឲ្យ​រដ្ឋាភិបាល​ដែរ ទើប​អាច​ប្រកប​មុខ​របរ​បាន​ដោយ​រលូន​បែប​នេះ ព្រោះ​អ្នក​ប្រព្រឹត្ត​ភាគ​ច្រើន គឺ​ជា​មនុស្ស​ដែល​ស្និត​និង​រដ្ឋាភិបាល​ទាំង​អស់ គួប​ផ្សំ​និង​ប្រព័ន្ធ​តុលាការ​គ្មាន​ប្រសិទ្ធភាព​ផង«ការ​រឹត​បន្តឹង​ច្បាប់​របស់​រដ្ឋាភិបាល​ហ្នឹង​គឺ​វា​ធូររលុង​ហើយ​បណ្ដោយ​ឲ្យ​ឈ្មួយ​ឈើ​ហ្នឹង​ដែល​ឈ្មួយ​ទាំង​អស់​ហ្នឹង​មាន​និន្នាការ​ទៅ​ដល់​គណបក្ស​កាន់​អំណាច​ជាដើម ដែល​ពួក​គាត់​សុទ្ធ​តែ​មាន​អំណាច​នៅ​ក្នុង​ជួរ​រដ្ឋាភិបាល។ឈ្មួយ​ទាំង​អស់​ហ្នឹង​មិន​មាន​អ្នក​ណា​ហ៊ាន​ទៅ​ប៉ះពាល់ ឬក៏​មាន​ការ​ជួយ​សម្រួល​មាន​តុលាការ​អី​ហ្នឹង​ជាដើម​គឺ​មាន​ការ​ពន្យារពេល មិន​ត្រូវ​បាន​ចាប់​ឈ្មួញ-ឧកញ៉ា​ទាំង​អស់​នោះ​ដាក់​ទោស​ទណ្ឌ​ឲ្យ​បាន​តឹងរ៉ឹង ឬ​រឹបអូស​ទ្រព្យសម្បត្តិ​​មក​ជា​ទ្រព្យសម្បត្តិ​របស់​រដ្ឋ​នៅ​ឡើយ​ទេ»

លោក ហ៊ុន សែន ធ្លាប់​ព្រមាន​កាត់​ក្បាល​លោក​ចោល ប្រសិន​បើ​ទប់​ស្កាត់​បទល្មើស​ព្រៃឈើ​មិន​បាន​ទេ។ ក្នុង​ពេល​ព្រៃឈើ​កាន់​តែ​ជិត​អស់ ហើយ​ចាប់​អ្នក​បំផ្លាញ​ព្រៃឈើ​មិន​ទាន់​បាន​ទប់ស្កាត់ លោក​នាយករដ្ឋមន្ត្រី ហ៊ុន សែន ក៏​ធ្លាប់​ប្រកាស​ការពារ​ព្រៃឈើ​បន្ត​ទៀត។ ប៉ុន្តែ​យុទ្ធសាស្ត្រ រហូត​ធ្វើ​ឲ្យ​ប្រធាន​គណបក្ស​ប្រជាជន​កម្ពុជា គំរាម​បាញ់​រ៉ុកកែត​ផង​នោះ ហាក់​មិន​បាន​ធ្វើ​ឲ្យ​ឧក្រិដ្ឋ​ជន​ព្រៃឈើ ខ្លាច​រអា​នឹង​ការ​ព្រមាន​របស់​លោក ហ៊ុន សែន ​នេះ​ទេ។

ស្រប​ពេល​រដ្ឋាភិបាល ចាប់ផ្ដើម​ប្រើ​វិធីសាស្ត្រ​កម្ចាត់​បក្ស​ប្រឆាំង ចេញ​ពី​ឆាក​នយោបាយ​លោក អ៊ូច ឡេង ឲ្យ​ដឹង​ថា ឈ្មួយ​ក៏​សម្រុក​ដឹក​ឈើ​កាន់​តែ​ខ្លាំង​ឡើង​ណាស់​ដែរ។

អ្នក​ជំនាញ​ផ្នែក​បរិស្ថាន របស់​អង្គការ​មិនមែន​រដ្ឋាភិបាល បាន​ប៉ាន់​ប្រមាណ​ថា សព្វថ្ងៃ​នេះ​ព្រៃឈើ​ដែល​កំពុង​គ្របដណ្ដប់​នៅ​ក្នុង​ប្រទេស​កម្ពុជា​នៅ​សល់​ប្រហែល ១៥ភាគ​រយ​ទៀត​ប៉ុណ្ណោះ និង​ត្រូវ​បាត់បង់​ជា​ស្ថាពរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល