សហគមន៍ស្នើឲ្យទប់ស្កាត់សកម្មភាពកាប់រានព្រៃក្នុងតំបន់អភិរក្សនៅមណ្ឌលគិរី
៣០-តុលា-២០១៣៖ សកម្មភាពដឹកឈើ និងកាប់ឈើរបស់ក្រុមហ៊ុន ខេ ភីស អ៊ិនវេសមែន (K Peace Investment) នៅតំបន់អភិរក្សភ្នំណាំលា ក្នុងឃុំប៊ូស្រា ស្រុកពេជ្រាដា ខេត្តមណ្ឌលគិរី។
ប្រជាពលរដ្ឋជនជាតិដើមភាគតិចព្នង នៅសហគមន៍ចំនួនបី ក្នុងខេត្តមណ្ឌលគិរី កំពុងរៀបចំពាក្យប្ដឹងតាមផ្លូវតុលាការ ដើម្បីបញ្ឈប់សកម្មភាពកាប់រានព្រៃមានតម្លៃពីសំណាក់ក្រុមហ៊ុនឈ្មោះ ខេ ភីស អ៊ិនវេសមែន (K Peace Investment)។
តំណាងសហគមន៍ភូមិឡាមេះ ក្នុងឃុំប៊ូស្រា ស្រុកពេជ្រាដា លោក ក្រោស សុក មានប្រសាសន៍បញ្ជាក់ថា កាលពីសប្ដាហ៍មុននេះ អ្នកភូមិបានប្រទះឃើញក្រុមកម្មកររាប់សិបនាក់ បានអាររំលំឈើហ៊ុបមូល នៅចំណុចភ្នំកុងកាល់ និងភ្នំណាំលា ក្នុងព្រៃដែនអភិរក្សសត្វព្រៃភ្នំណាំលា ហើយដឹកជញ្ជូនចូលការដ្ឋានមួយ មានទីតាំងនៅចំណុចពាមអូរអន្ត្រត់ និងអូរពោត ដែលជាទីតាំងមានម៉ាស៊ីនរ៉ៃអារច្រៀកឈើ និងមានគំនរឈើហ៊ុបរាប់រយកំណត់នៅទីនោះ។
លោកបន្តថា ក្រុមអ្នកកាប់ឈើបានអះអាងថា រោងអារឈើនេះជារបស់ក្រុមហ៊ុនឈ្មោះ ខេ ភីស អ៊ិនវេសមែន ឬក្រុមហ៊ុន ៥០០ហិកតារ៖ «គាត់ទៅបណ្ដើរឆ្កែ ហើយគាត់បានជួបខាងអ្នកធ្វើហ្នឹង គឺថាកូនលោកខេត្ត។ ខាងសហគមន៍បានចុះទៅ គាត់បានឃើញមានផ្ទះធំមួយប្រហែល ១០ម៉ែត្រ ឃើញមានម៉ាស៊ីនរ៉ៃពីរនៅក្នុងហ្នឹង។ ក្រុមហ៊ុនហ្នឹង ដំបូងគាត់ថាគាត់ធ្វើឈើ ហើយក្រោយពីធ្វើឈើអស់ គាត់មានគោលការណ៍ថាដាំម្រេច»។
ដូចគ្នានេះដែរ តំណាងសហគមន៍ភូមិពូស្យា លោក ប្រប់ ពេជ្រ មានប្រសាសន៍បញ្ជាក់ដែរថា ព្រៃឈើនៅតំបន់នោះ គឺជាតំបន់ព្រៃស្រោង ដែលអ្នកភូមិអភិរក្សជាព្រៃធម្មជាតិច្រើនជំនាន់មកហើយ សម្រាប់គោរពបូជា និងជាព្រៃធម្មជាតិជម្រកសត្វ និងជាព្រៃផលិតជ័រទឹក មុខរបរប្រពៃណីអ្នកភូមិ។ ហេតុនេះ សកម្មភាពកាប់ព្រៃឈើនៅតំបន់នោះ បានធ្វើឲ្យប៉ះពាល់ដល់ជំនឿប្រពៃណី និងជីវភាពរស់នៅជនជាតិដើមភាគតិចនៅតំបន់នោះ៖ «គេអារឈើគេយកឡានអារ៉េវ គេដឹកគគីរដើមជ័រ។ ខ្ញុំរាយការណ៍ឲ្យមេឃុំ ឃុំគាត់ថារាយការណ៍ឲ្យស្រុកដែរ តែគេធ្វើដូចមិនដឹងអ៊ីចឹងណា! បានថ្ងៃនេះ ខ្ញុំមកជួបអាដហុក (Adhoc)»។
ទាក់ទិនករណីនេះដែរ ប្រធានមន្ទីរបរិស្ថានខេត្តមណ្ឌលគិរី លោក ឈិត សុផល មានប្រសាសន៍បញ្ជាក់ថា រាជរដ្ឋាភិបាលបានផ្តល់ដីនៅតំបន់ភ្នំឡាំលា ៥០០ហិកតារ ទៅឲ្យក្រុមហ៊ុនសម្បទានសេដ្ឋកិច្ចឈ្មោះ ខេ ភីស អ៊ិនវេសមែន និងអនុញ្ញាតឲ្យក្រុមហ៊ុនដាក់ម៉ាស៊ីនកែច្នៃឈើ ដែលបានប្រមូលពីការកាប់រានក្នុងដីសម្បទាន ដើម្បីបង់ពន្ធចូលថវិកាជាតិ។ ប៉ុន្តែ លោកមិនប្រាកដថា ចំណុចដែលអ្នកភូមិអះអាងថា មានការកាប់ឈើនោះស្ថិតក្នុងតំបន់សម្បទាន ឬយ៉ាងណានោះឡើយ៖ «ខ្ញុំនិយាយជារួមថា នៅហ្នឹងមានក្រុមហ៊ុនដីសម្បទានក្រុមហ៊ុន ខេ ភីស អាហ្នឹងគេមានច្បាប់អនុញ្ញាតឲ្យដាក់រ៉ៃនៅមួយច្រកហ្នឹង។ ដែនជម្រកហ្នឹង វាដីសម្បទានសេដ្ឋកិច្ចតើ! យើងកាត់ឲ្យគេច្រៀកឈើដែលគេដេញថ្លៃបង់ពន្ធជូនរដ្ឋហ្នឹងណា!»។
កាលពីថ្ងៃទី៣០ ខែតុលា តំណាងសហគមន៍ពូលុពូស្យា និងសហគមន៍ឡាមេះ មានគ្នា ៦នាក់ បាននាំគ្នាមកការិយាល័យសមាគមការពារសិទ្ធិមនុស្សអាដហុក សុំឲ្យមន្ត្រីសមាគមនេះជួយរៀបចំពាក្យប្ដឹងទៅស្ថាប័នអយ្យកា ដើម្បីទប់ស្កាត់ការកាប់រានទន្ទ្រានព្រៃឈើធនធានធម្មជាតិនេះ។
មន្ត្រីសម្របសម្រួលសមាគមអាដហុក ខេត្តមណ្ឌលគិរី លោក សុខ រដ្ឋា មានប្រសាសន៍បញ្ជាក់ថា លោកបានចុះអង្កេតដល់ទីតាំងដែលអ្នកភូមិរាយការណ៍ថា មានការកាប់រានព្រៃនោះ សង្កេតឃើញឈើមានតម្លៃកំពុងត្រូវបានក្រុមហ៊ុនកាប់រាន និងដឹកជញ្ជូនចូលការដ្ឋានអារឈើ។ លោកបន្តថា អ្នកភូមិមិនបានដឹងពីការផ្តល់ដីសម្បទាននៅតំបន់នោះទៅឲ្យក្រុមហ៊ុនទេ ហើយអ្នកភូមិក៏មិនយល់ស្របឲ្យផ្តល់ដីសម្បទានក្នុងតំបន់ព្រៃឈើមានតម្លៃនេះដែរ៖ «ទោះបីជាមានអាជ្ញាប័ណ្ណក៏ដោយ ខាងសហគមន៍ផ្ទាល់គាត់មិនអស់ចិត្តទេ។ គាត់នៅតែធ្វើការដាក់ពាក្យប្ដឹង ដើម្បីទប់ស្កាត់បទល្មើសព្រៃឈើនេះ ដែលកើតមានជាបន្តបន្ទាប់»។
ទោះជាយ៉ាងនេះក៏ដោយ អ្នកភូមិសំណូមពរឲ្យប្រមុខរាជរដ្ឋាភិបាល ជាពិសេសក្រសួងបរិស្ថាន ចុះសិក្សាឡើងវិញពីទីតាំងកាប់ឈើ និងទីតាំងផ្តល់ដីសម្បទាននោះ ពីព្រោះក្រុមហ៊ុនកំពុងតែកាប់រានព្រៃស្រោងយកឈើមានតម្លៃ មិនមែនឈូសឆាយដីព្រៃរិចរិលនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
- ស្ដាប់ផ្ទាល់ (ព្រឹក ៥:៣០-៦:៣០ ល្ងាច ៧:៣០-៨:៣០)
- សំឡេង
- សង្គមស៊ីវិលរិះគន់ប៉ូលិសដេញវាយពលរដ្ឋក្នុងពេលផ្ទុះកូវីដ១៩ នៅភ្នំពេញថា ជាការប្រើហិង្សាខុសច្បាប់
- ជំនួយការនាយករដ្ឋមន្ត្រីត្អួញថា ខ្លួនលំបាកជាងពលរដ្ឋរស់នៅតំបន់បិទខ្ទប់
- ពលរដ្ឋមួយចំនួនស្នើលោក ហ៊ុន សែន ឱ្យចុះចេញពីតំណែងដោយសារគ្មានសមត្ថភាពជួយពលរដ្ឋក្នុងគ្រាអាសន្ន
- អ្នកជំងឺកូវីដម្នាក់ស្លាប់ ក្រោយមន្ទីរពេទ្យមួយចំនួនបដិសេធព្យាបាល និងទារសេវាថ្លៃ
- អ្នកវិភាគថាលោក ហ៊ុន សែន កំពុងព្យាយាមពឹងវៀតណាមឱ្យគាំទ្រលោក ហ៊ុន ម៉ាណែត ស្នងតំណែងជំនួសលោក
