ពលរដ្ឋ​រងគ្រោះ​នៅ​សេសាន​ក្រោម​ពីរ​ខកចិត្ត​នឹង​អាជ្ញាធរ​មិន​សាងសង់​ភូមិ​ថ្មី​តាម​ការសន្យា

ដោយ ម៉ៅ សុធានី
2018-10-31
អ៊ីម៉ែល
មតិ
Share
បោះពុម្ព
ទិដ្ឋភាព​ភូមិ​ស្រែគរ​ និង​ភូមិ​ក្បាល​រមាស​ចាស់ បន្ទាប់​ពី​ក្រុមហ៊ុន​វាវី​អគ្គិសនី​សេសាន​ក្រោម​ពីរ​បិទ​ទ្វារ​ទឹក​ជា​ស្ថាពរ នៅ​​ថ្ងៃ​ទី​២០​ខែ​តុលា​ឆ្នាំ២០១៧។
ទិដ្ឋភាព​ភូមិ​ស្រែគរ​ និង​ភូមិ​ក្បាល​រមាស​ចាស់ បន្ទាប់​ពី​ក្រុមហ៊ុន​វាវី​អគ្គិសនី​សេសាន​ក្រោម​ពីរ​បិទ​ទ្វារ​ទឹក​ជា​ស្ថាពរ នៅ​​ថ្ងៃ​ទី​២០​ខែ​តុលា​ឆ្នាំ២០១៧។
Photo Provided

ពលរដ្ឋ​ក្រាញននៀល មិន​ទទួល​សំណង ពី​ក្រុមហ៊ុន​ទំនប់​វារីអគ្គិសនី​សេសាន​ក្រោម​ពីរ​រស់នៅ ស្រុក​សេសាន ខែត្រ​ស្ទឹងត្រែង​ត្អូញត្អែរ ពី​ការ​មិន​យកចិត្តទុកដាក់​ដោះស្រាយ​ក្តី​កង្វល់ និង​បញ្ហា​ប្រឈម​ច្រើន ដែល​អ្នកភូមិ​ជួបប្រទះ​ច្រើន​ខែ​មក​ហើយ ក្រោយពី​ក្រុមហ៊ុន​នេះ​បិទទ្វារ​ទឹក​ពន្លិច​ភូមិ​កំណើត​ពួកគាត់​ជិត​មួយ​ឆ្នាំ​មក​ហើយ។

ពលរដ្ឋ​មួយ​ចំនួន​ដែល​រងគ្រោះ​ដោយ​ទឹកជំនន់​ដោយសារ​ទំនប់​វារីអគ្គិសនី​សេសាន​ក្រោមពីរ នៅ​ភូមិ​ស្រែគរ និង​ភូមិ​ក្បាលរមាស​ចាស់ ជិត ១០០​គ្រួសារ ឲ្យ​ដឹង​នៅ​ថ្ងៃ​ទី៣០ តុលា ថា អាជ្ញាធរ​ខេត្ត​ស្ទឹងត្រែង​នៅតែ​ពន្យារពេល មិន​ដោះស្រាយ បញ្ហា​ប្រឈម​ច្រើន​ដូច​ការសន្យា​មុន​ពេល​ព្រឹត្តិការណ៍​ថ្ងៃ​ទី​២៩ កក្កដា ធ្វើ​ឲ្យ​ពលរដ្ឋ​ខកចិត្ត លើ​ប្រសិទ្ធភាព​ការងារ​របស់​រដ្ឋបាល​ខេត្ត​នេះ។

កាលពី​ខែ​កក្កដា អភិបាលរង​ខេត្ត​ស្ទឹងត្រែង លោក ជា ថាវរិទ្ធិ បាន​ថ្លែង​នៅ​ចំពោះ​មុខ​ពលរដ្ឋ ដែល​ជំទាស់​មិន​ទទួល​សំណង​ពី​ក្រុមហ៊ុន​ទំនប់​វា​រី​អគ្គិសនី​សេសាន​ក្រោម២ ថា អាជ្ញាធរ​ខេត្ត​នឹង​ពន្លឿន​ដំណោះស្រាយ ជួសជុល​ផ្លូវ​ពីរ​ខ្សែ សាងសង់​សាលារៀន បណ្ដុះបណ្ដាល​គ្រូបង្រៀន​សហគមន៍ សាងសង់​មណ្ឌល​សុខភាព ជីក​ស្រះ​ទឹក និង​ចុះបញ្ជី​ដី​សមូហភាព​ជូន​សហគមន៍​ជនជាតិ​ដើម​ភាគតិច ប៉ុន្តែ​ការសន្យា​ទាំងនោះ​មិនទាន់​ក្លាយ​ជា​ការពិត​នៅឡើយ​ទេ។ កាលពី​ចុង​ឆ្នាំ​២០១៧ លោក ហ៊ុន សែន ក៏​ធ្លាប់​បាន​សន្យា​ថា នឹង​កសាង​ភូមិ​ថ្មី​ជូន​ពលរដ្ឋ ដែល​បដិសេធ​មិន​ទទួល​សំណង និង​ផ្ដល់​សេវា​សាធារណៈ​ជាដើម។

ជនជាតិដើម​ភាគតិច​ព្នង រស់នៅ​ឃុំ​ក្បាលរមាស លោក គឹម ឌឿង ឲ្យ​ដឹង​នៅ​ថ្ងៃ​ទី៣០ តុលា​ថា ថ្មីៗ​នេះ​អាជ្ញាធរ​ខេត្ត និង​ក្រុមហ៊ុន​បាន​ព្យាយាម​ផ្សព្វផ្សាយ​ពី​គោលនយោបាយ​សំណង​ជា​ថ្មី​ទៀត ដែល​ពួកគេ​មិន​ពេញចិត្ត ខណៈ​ដែល​ពួកគាត់​បាន​ទន្ទឹង​រង់ចាំ អាជ្ញាធរ​ស្ថាបនា​ភូមិ​ថ្មី​តាម​ការសន្យា​ជាច្រើន​ខែ​មក​ហើយ។ លោក​បញ្ជាក់​ថា អាជ្ញាធរ​ខេត្ត​សន្យា​ថា នឹង​អភិវឌ្ឍ​ហេដ្ឋារចនាសម្ព័ន្ធ និង ចុះ​បញ្ជី​ដី​សមូហភាព​ជូន​សហគមន៍​ជនជាតិ​ដើម​ភាគតិច តែ​មក​ទល់​ពេលនេះ​គ្មាន​លទ្ធផល៖ «អាជ្ញាធរ​មិន​គោរព​កិច្ចសន្យា​របស់​គាត់ គឺ​ក្បត់​ឧត្ដមគតិ​របស់​គាត់។ អាជ្ញាធរ​សន្យា​ហើយ​មិន​ធ្វើ មាន​ន័យថា​គាត់​នឹង គាត់​ក្បត់​ពាក្យ​សច្ចៈ​របស់​គាត់ ធ្វើ​ឲ្យ​ពលរដ្ឋ​គ្មាន​ក្តី​ទុកចិត្ត​លើ​អាជ្ញាធរ​ខេត្ត»

ជនជាតិ​ដើម​ភាគតិច​ព្នង ម្នាក់ទៀត លោកស្រី ស្រាង ឡាញ់ ត្អូញ​ថា ការ​មិន​ដោះស្រាយ​បញ្ហា​ប្រឈម​របស់​ពួកគាត់​ហាក់​ដូច​ជា​សម្លាប់​ពលរដ្ឋ​ទាំង​រស់​ដូច្នេះ​ដែរ ត្បិត​លំនៅឋាន និង​ភូមិកំណើត​ពួកគាត់​ត្រូវ​បាន​ក្រុមហ៊ុន​បិទទ្វារ​ទឹក ពន្លិច​ភូមិ​ជិត ១​ឆ្នាំ​មក​ហើយ បង្ក​ឲ្យ​ពួកគាត់​លំបាក​វេទនា ខូចខាត​ទ្រព្យសម្បត្តិ ផ្ទះសម្បែង ផ្លូវ​លំបាក​ធ្វើដំណើរ កុមារ​ជាច្រើន​បោះបង់​ការសិក្សា ខ្វះខាត​ទឹក​ស្អាត និង​ខ្វះ​មណ្ឌល​សុខភាព​ជាដើម។ លោក​ថា មក​ទល់​ពេល​នេះ​មាន​អ្នកភូមិ ៥​នាក់​ស្លាប់ ដោយសារ​បញ្ជូន​ទៅ​សង្គ្រោះ​នៅ​មន្ទីរពេទ្យ​មិនទាន់ ព្រោះ​ផ្លូវ​មិន​លំបាក​ធ្វើដំណើរ៖ «ព្រួយបារម្ភ​ខ្លាំង​រៀបចំ​លំនៅឋាន​អត់​ទាន់​មាន​គ្រប់គ្រាន់ និង​មិនទាន់​រៀបចំ​ភូមិឋាន​ស្រួល រស់នៅ​តាម​ខ្ទម​ស្រែ។ មកដល់​ខែ​១១ ផ្តើម​ទឹកភ្លៀង​ស្បើយ ខ្វះ​ទឹក​ប្រើ ផ្លូវ​ដើរ និង​ខ្វះ​សាលារៀន»

អភិបាលស្រុក​សេសាន​ស្តីទី លោក សុវណ្ណ ពិសិដ្ឋ បដិសេធ​​ផ្ដល់​បទសម្ភាសន៍​ដល់​អាស៊ីសេរី​ទេ នៅ​ថ្ងៃទី​៣០ តុលា លោក​ថា ភារកិច្ច​ដោះស្រាយ​បញ្ហា​នេះ​ជា​សមត្ថកិច្ច​របស់​គណៈកម្មការ​ដោះស្រាយ​ផល​ប៉ះពាល់​ខេត្ត៖ «ខ្ញុំ​អត់​ទាន់​បាន​ទទួល​ព័ត៌មាន​ថា ម៉េច​ទេ។ ខ្ញុំ​ហួស​ព្រំដែន​សមត្ថកិច្ច​ហើយ មានតែ​ការងារ​ថ្នាក់​ខេត្ត ចុះ​ធ្វើការ​រឿង​ហ្នឹង»

ប្រធាន​ផ្នែក​ស៊ើបអង្កេត សិទ្ធិមនុស្ស ដីធ្លី និង​ការពារ​ធនធានធម្មជាតិ នៃ​សមាគម​អាដហុក លោក នី សុខា យល់ថា អាជ្ញាធរ​មិន​គួរ​អូស​បន្លាយពេល​ដោះស្រាយ​បញ្ហា​នេះ​ទេ នាំ​ឲ្យ​ពលរដ្ឋ​រង​ទុក្ខវេទនា ទាំង​ជីវភាព និង​សេដ្ឋកិច្ច​ធ្លាក់​ចុះ​ជាដើម។ លោក​ជំរុញ​ឲ្យ​អាជ្ញាធរ​ខេត្ត ពន្លឿន​ដោះស្រាយ​បញ្ហា​នេះ ស្របតាម​ប្រសាសន៍​ប្រមុខ​ដឹកនាំ​រដ្ឋ។ ចំណែក​អាជ្ញាធរ​ជាតិ​ត្រូវ​តាមដាន ពី​ប្រសិទ្ធភាព​ការងារ​អាជ្ញាធរ​មូលដ្ឋាន​ជាក់ស្ដែង៖ «ថ្នាក់ដឹកនាំ​រដ្ឋាភិបាល គួរតែ​ពិនិត្យមើល​មែនទែន។ តើ​អនុសាសន៍​គាត់​ត្រូវ​បាន​ថ្នាក់ក្រោម​យកចិត្តទុកដាក់​ដោះស្រាយ​កម្រិត​ប៉ុណ្ណា?»

ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ និង​សន្តិភាព លោក យង់ គិមអេង មាន​មតិ​ថា ទុក្ខ​កង្វល់​របស់​ពលរដ្ឋ គឺជា​ភារកិច្ច​ដោះស្រាយ​របស់​អាជ្ញាធរ​ពាក់ព័ន្ធ ស្រប​ពេល​ដែល​លំនៅឋាន​របស់​ពលរដ្ឋ​ត្រូវ​បាន​ក្រុមហ៊ុន​បិទទ្វារ​ទឹក​ពន្លិច​ច្រើន​ខែ​មក​ហើយ ធ្វើ​ឲ្យ​ពលរដ្ឋ​ខាត​ប្រយោជន៍​សព្វបែប​យ៉ាង។ លោក​យល់ថា ការ​អូស​បន្លាយ​ពេល​មិន​ដោះស្រាយ​បញ្ហា​ប្រឈម នឹង​នាំ​ឲ្យ​ពលរដ្ឋ​កាន់តែ​បាត់បង់​ទំនុក​ចិត្ត​លើ​ប្រព័ន្ធ​រដ្ឋបាល​អាជ្ញាធរ​ខេត្ត និង​អាជ្ញាធរ​ជាតិ៖ «រដ្ឋាភិបាល និង​អាជ្ញាធរ​គួរ​ពន្លឿន​ដោះស្រាយ​ជូន​ពលរដ្ឋ កុំ​ឲ្យ​ពលរដ្ឋ​រង់ចាំ​យូរ ព្រោះ​វា​ប៉ះពាល់​ច្រើន​ណាស់ បើ​យឺត​ក្នុង​ការ​ដោះស្រាយ»

មក​ទល់​ពេល​នេះ ពលរដ្ឋ​រស់នៅ​ឃុំ​ក្បាល​រមាស ៤៧​គ្រួសារ និង​ឃុំ​ស្រែគរ ៥០​គ្រួសារ រាប់បញ្ចូល​ពលរដ្ឋ​បំបែក​គ្រួសារ នៅ​មិនទាន់​យល់ព្រម​ទទួលយក​គោលនយោបាយ​សំណង​ពី​ក្រុមហ៊ុន​នៅ​ឡើយ ហើយ​មក​ទល់​ពេល​នេះ ពួកគេ​នៅ​បន្ត​រស់​នៅ​លើ​ទី​ទួល​ខ្ពស់ នៅ​គ្រា​ដែល​ទឹក​លិចលង់​លំនៅឋាន​ពួកគេ​ទាំងស្រុង តាំងពី​ទំនប់​វារីអគ្គិសនី​សេសាន​ក្រោម​ពីរ​បិទទ្វារ​ទឹកជា​ស្ថាប័ន​កាលពី​ចុង​ឆ្នាំ២០១៧៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល