សហគមន៍ស្រុកកែវសីមាអះអាងថា ក្រុមឈ្មួញកាប់ឈើកម្រក្នុងតំបន់ការពារភ្នំព្រេចដោយសេរី
រូបភាពម៉ូតូដឹកឈើ និងដើមឈើសុក្រមអារជ្រៀច ស្ថិតនៅភូមិពូទុង ឃុំចុងផ្លាស់ ស្រុកកែវសីមា ខេត្តមណ្ឌលគីរី ថតនៅថ្ងៃទី២០ខែកញ្ញា ឆ្នាំ២០២៣។
រូបភាព៖សហគមន៍ផ្ដល់ឲ្យ
សហគមន៍ជនជាតិដើមភាគតិចព្នង អះអាងថា ក្រុមឈ្មួញកំពុងបន្តចូលកាប់និងដឹកជញ្ជូនឈើកម្រនៅក្នុងដែនជម្រកសត្វព្រៃភ្នំព្រេច យកទៅចែកចាយតាមសិប្បកម្មក្នុងស្រុក និងយកទៅលក់នៅក្រៅប្រទេសដោយសេរី។ ពួកគាត់ចោទថា មន្ត្រីជំនាញនៅតំបន់នោះហាក់មិនអើពើទប់ស្កាត់បទល្មើសនោះទេ។
ប្រជាសហគមន៍ជនជាតិដើមភាគតិចព្នង ដែលរស់នៅជាប់ដែនជម្រកសត្វព្រៃភ្នំព្រេច ស្រុកកែវសីមា អះអាងថា ជារៀងរាល់ថ្ងៃក្រុមជនល្មើសចូលទៅកាប់ និងដឹកជញ្ជូនឈើកម្រ ជាច្រើនប្រភេទ មានដូចជាសុក្រំ កកោះ ផ្ចឹក ដែលស្ថិតនៅភូមិពូទុង ឃុំចុងផ្លាស់ ស្រុកកែវសីមា ខេត្តមណ្ឌលគីរី ។ សហគមន៍បន្ថែមថា ក្រុមឈ្មួញទាំងនោះ ចូលទៅកាប់ឈើនៅក្នុងតំបន់ការពារនៅពេលយប់ និងមានឡាន កែច្នៃ ចាំដឹកបន្តយកទៅលក់នៅប្រទេសវៀតណាម និងចែកចាយតាមសិប្បកម្មក្នុងស្រុក។ ពួកគេសង្ស័យថា មន្ត្រីពាក់ព័ន្ធទាំងនោះបានគប់គិតគ្នាជាប្រព័ន្ធជាមួយក្រុមឈ្មួញទាំងអស់នោះ ទើបមិនមានការទប់ស្កាត់ និងចាត់វិធានការច្បាប់ទៅលើក្រុមជនល្មើសទាំងអស់នោះ។
តំណាងសហគមន៍ជនជាតិដើមភាគតិចព្នង រស់នៅឃុំចុងផ្លាស់ លោក ទ្រៀវ យ៉េង អះអាងប្រាប់វិទ្យុអាស៊ីសេរី នៅថ្ងៃទី២៣ ខែកញ្ញា ថា ក្រុមឈ្មួញដែលរកស៊ីឈើដុះស្លែ កំពុងសម្រុកកាប់និងដឹកជញ្ជូនឈើយកទៅលក់ឲ្យសិប្បកម្មក្នុងស្រុកខ្លះ និងយកទៅលក់នៅខាងក្រៅប្រទេសជារៀងរាល់ថ្ងៃ ដោយពុំឃើញមានអាជ្ញាធរពាក់ព័ន្ធចុះទប់ស្កាត់នោះទេ បើទោះបីជាសហគមន៍បានរាយការណ៍ទៅមន្ត្រីពាក់ព័ន្ធរួចហើយក្ដី។
លោក ទ្រៀវ យ៉េង៖ «ដូចជាសមត្ថកិច្ចគេយកតែលុយ និយាយរួមទៅគេយកតែលុយ យើងថា គេបង្ក្រាប បង្ក្រាបបានតែបន្តិចបន្តួចអ្នកដឹកម៉ូតូចាប់បង់ផាកពិន័យគ្នា ដល់គេដឹកឡានអត់ឃើញបង្ក្រាបអីផង ខ្ញុំគិតថា បើយោបល់ខ្ញុំថា បើគេកាប់អ៊ីចឹងមានការសោកស្ដាយដែរ និយាយរួមទៅ តែមិនដឹងធ្វើយ៉ាងម៉េច យើងធ្វើអ្វីវាមិនកើត»។
ជុំវិញរឿងនេះវិទ្យុអាស៊ីសេរីមិនអាចទាក់ទង អភិបាលខេត្តមណ្ឌលគីរី លោក ថង សាវុន និង ប្រធានមន្ត្រីបរិស្ថានខេត្តមណ្ឌលគីរី លោក ឆៅ ប៊ុនធឿន ដើម្បីសុំការអត្ថាធិប្បាយបានទេ នៅថ្ងៃទី២៣ ខែកញ្ញានេះ ដោយទូរស័ព្ទចូលបានចុចផ្ដាច់វិញ។
ទាក់ទងនឹងបញ្ហានេះមន្ត្រីសម្របសម្រួលសមាគមអាដហុក (Adhoc) ប្រចាំខេត្តមណ្ឌលគីរី លោក ប៊ី វ៉ាន់នី យល់ឃើញថា ប្រសិនបើមន្ត្រីពាក់ព័ន្ធមិនបានអនុវត្តច្បាប់ទៅលើជនល្មើសដែលប្រព្រឹត្តខុសច្បាប់នោះទេ អាជ្ញាធរពាក់ព័ន្ធ នឹងរងការរិះគន់ពីប្រជាពលរដ្ឋ ថា ជាប់ពាក់ព័ន្ធនឹងការប្រព្រឹត្តអំពើពុករលួយរវាងក្រុមឈ្មួញ និងអាជ្ញាធរ។ លើសពីនោះ ប្រជាពលរដ្ឋនៅតាមមូលដ្ឋានលែងមានជំនឿទៅលើមន្ត្រីរបស់រដ្ឋាភិបាលថ្មីទៀតផង ដោយសារតែការបណ្ដែតបណ្ដោយឲ្យមានបទល្មើសរកស៊ីឈើដោយសេរីបែបនេះ។
លោក ប៊ី វ៉ាន់នី៖ «យើងសំណូមពរឲ្យមានវិធានការផ្លូវច្បាប់ ប្រសិនបើធ្វើឲ្យបទល្មើសព្រៃឈើនៅតែបន្តកើតមាន ការកាប់ព្រៃឈើបន្តទៀត អ៊ីចឹងធនធានធម្មជាតិ និងដីព្រៃធនធានធម្មជាតិនឹងបាត់បង់ ប្រសិនបើ យើងមិនចាត់វិធានការ ទីពីរប្រសិនជាមន្ត្រីអនុវត្តច្បាប់ប្រព្រឹត្តអំពើពុករលួយ ហើយមន្ត្រីរាជការប្រព្រឹត្តអំពើពុករលួយអនុញ្ញាតគប់គិតគ្នាជាមួយបទល្មើសបែបនេះ ហើយសង្ឃឹមថារដ្ឋាភិបាលថ្មី មានគោលនយោបាយថ្មី ទៅលើមន្ត្រីមូលដ្ឋានដែលមិនព្រមអនុវត្តតួនាទីរបស់ខ្លួនឯងឬអនុវត្តច្បាប់ឲ្យបានតឹងរ៉ឹងហ្នឹង»។
កាលពីខែកក្កដា រដ្ឋាភិបាលចាស់បានពង្រីកផ្ទៃដីដែនជម្រកសត្វព្រៃភ្នំព្រេច ពី២២ម៉ឺនហិកតារ ទៅ២៦ម៉ឺនហិកតារ ពោលគឺដែនជម្រកមួយនេះមានផ្ទៃដីកើនឡើងជាង៤ម៉ឺនហិកតារ។ ប៉ុន្តែបច្ចុប្បន្នគម្របព្រៃនៃតំបន់ការពារមួយនេះត្រូវបានអតីតនាយករដ្ឋមន្ត្រី លោក ហ៊ុន សែន ធ្វើសម្បទានសង្គមកិច្ចចែកជូនឲ្យប្រជាពលរដ្ឋក្រីក្រ អស់ជាង៧ពាន់ហិកតារ ស្ថិតនៅស្រុកកោះញែក ខេត្តមណ្ឌលគីរី។ សហគមន៍នៅតំបន់នោះអះអាងថា ពួកគេមិនទាន់ទទួលបានដីសម្បទានទាំងអស់នេះនោះទេ ភាគច្រើនដីសម្បទានសង្គមកិច្ចបានតែពលរដ្ឋចំណាកស្រុកតែប៉ុណ្ណោះ។
ដែនជម្រកសត្វព្រៃភ្នំព្រេច ឋិតនៅស្រុកកោះញែក ស្រុកកែវសីមា ខេត្តមណ្ឌលគីរី និងស្រុកស្នួល ខេត្តក្រចេះ ត្រូវបានអតីតព្រះមហាក្សត្រ សម្ដេចព្រះនរោត្ដម សីហនុ កំណត់ជាតំបន់អភិរក្សតាមព្រះរាជក្រឹត្យ កាលពីខែវិច្ឆិកា ឆ្នាំ១៩៩៣ មានផ្ទៃដីជាង ២២ម៉ឺនហិកតារ (២២២.៥០០) រហូតដល់ថ្ងៃទី១៧ ខែកក្កដា ឆ្នាំ២០២៣។ រដ្ឋាភិបាល បានដាក់បញ្ចូលផ្ទៃដីជាង ៤ម៉ឺន(៤០,១៤២)ហិកតារ បន្ថែមទៀត។ ប៉ុន្តែផ្ទុយទៅវិញ ព្រៃអភិរក្សមួយនេះ តែងតែរងការកាប់យកឈើមានតម្លៃឥតឈប់ឈរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- សមត្ថកិច្ចថៃចាប់បញ្ជូនជនភៀសខ្លួនខ្មែរជិត១០នាក់ទៅកម្ពុជា
- UNHCR អំពាវនាវដល់កម្ពុជា និងថៃ ឱ្យគោរពតាមច្បាប់ស្ដីពីការមិនចាប់បញ្ជូនជនភៀសខ្លួនត្រឡប់ទៅឱ្យរងទុក្ខបុកម្នេញនៅប្រទេសកំណើត
- បទសម្ភាសន៍លោក សុខ ឥសាន ស្ដីពីគម្រោងរដ្ឋាភិបាលបង្កើតច្បាប់ប្រឆាំងភេរវកម្ម ដើម្បីទប់ទល់លោក សម រង្ស៊ី
- ជនភៀសខ្លួនខ្មែរ ៦នាក់ ដែលបញ្ជូនពីថៃ ត្រូវបានឃុំខ្លួននៅពន្ធនាគារផ្សេងគ្នា អំពីបទក្បត់ជាតិ