ពលរដ្ឋ​ខេត្ត​កោះកុង​ដាក់​ញត្តិ​ទៅ​រដ្ឋសភា​និង​ក្រសួង​រ៉ែ​ស្នើសុំ​បញ្ឈប់​សកម្មភាព​បូម​ខ្សាច់

ដោយ អ៊ុក សាវបូរី
2015-04-23
Share
ពលរដ្ឋ​កោះ​កាពិ កោះកុង ដាក់​ញត្តិ ៦២០ ពលរដ្ឋ​មក​ពី​ឃុំ​កោះកាពិ ស្រុក​កោះកុង ខេត្ត​កោះកុង ដាក់​ញត្តិ​នៅ​រដ្ឋសភា ស្នើសុំ​ឲ្យ​បញ្ឈប់​សកម្មភាព​បូម​ខ្សាច់​របស់​ក្រុមហ៊ុន អ៊ិនធឺណេសិនណល រេនបូ ខាំបូឌា (International Renbow Cambodia) នៅ​ថ្ងៃ​ទី​២៣ ខែ​មេសា ឆ្នាំ​២០១៥។
RFA/Ouk Savborey

តំណាង​ពលរដ្ឋ​ខេត្ត​កោះកុង នាំ​គ្នា​ដាក់​ញត្តិ​នៅ​រដ្ឋសភា និង​ក្រសួង​រ៉ែ និង​ថាមពល សុំ​ឲ្យ​បញ្ឈប់​សកម្មភាព​បូម​ខ្សាច់​របស់​ក្រុមហ៊ុន អ៊ិនធឺណេសិនណល រេនបូ ខាំបូឌា (International Renbow Cambodia) ដែល​បូម​ខ្សាច់​ខុស​ពី​ទីតាំង ដែល​បាន​កំណត់​នៅ​ក្នុង​អាជ្ញាប័ណ្ណ។

ក្រុម​ប្រជាពលរដ្ឋ​កំពុង​បារម្ភ និង​អះអាង​ថា សកម្មភាព​បូម​ខ្សាច់​នៅ​ទីនោះ បាន​ធ្វើ​ឲ្យ​ប៉ះពាល់​ការ​រស់នៅ និង​មុខ​របរ​នេសាទ​របស់​អ្នក​ភូមិ​នៅ​ឃុំ​កោះកាពិ ស្រុក​កោះកុង ខេត្ត​កោះកុង។

តំណាង​រាស្ត្រ​ក្នុង​គណៈកម្មការ​ទី​៣ នៃ​រដ្ឋសភា និង​មន្ត្រី​ក្រសួង​រ៉ែ និង​ថាមពល បាន​ទទួល​យក​ញត្តិ​របស់​អ្នក​ភូមិ​មក​ពី​ឃុំ​កោះកាពិ ស្រុក​កោះកុង ខេត្ត​កោះកុង រួច​ហើយ ដែល​ពួក​គាត់​សុំ​ឲ្យ​ជួយ​អន្តរាគមន៍​សកម្មភាព​បូម​ខ្សាច់​សមុទ្រ​នាំ​ចេញ​អនាធិបតេយ្យ​របស់​ក្រុមហ៊ុន អ៊ិនធឺណេសិនណល រេនបូ ខាំបូឌា។

ប្រធាន​រដ្ឋបាល និង​ព័ត៌មានវិទ្យា​នៃ​ក្រសួង​រ៉ែ និង​ថាមពល លោក កែវ ទួត ថ្លែង​ថា ញត្តិ​ដែល​ទទួល​នេះ នឹង​បញ្ជូន​ទៅ​ថ្នាក់​ដឹកនាំ​ក្រសួង​ពិនិត្យ៖ «ខ្ញុំ​នឹង​ទទួល​យក​ញត្តិ​នេះ ដើម្បី​ដាក់​ជូន​ថ្នាក់​ដឹក​នាំ​របស់​ខ្ញុំ ដើម្បី​ចាត់​ការ​បន្ថែម​ជូន​បងប្អូន»

លោក គង់ សភា និង​អ្នកស្រី ឡោក ខេង តំណាង​ឲ្យ​ប្រធាន​គណៈកម្មការ​ទី​៣ នៃ​រដ្ឋសភា ចេញ​មក​ទទួល​ញត្តិ​ពី​ពលរដ្ឋ​ឃុំ​កោះកាពិ នៅ​ថ្ងៃ​ទី​២៣ ខែ​មេសា ប៉ុន្តែ​មិន​ផ្តល់​ចម្លើយ​តប​ពេល​ណា​ទេ។

ក្រោយ​ពី​ដាក់​ញត្តិ​រួច តំណាង​ឲ្យ​ពលរដ្ឋ​មក​ពី​សហគមន៍​កោះ​ស្រឡៅ ឃុំ​កោះកាពិ លោក ហាក់ ពិទូ ឲ្យ​ដឹង​ថា អ្នក​ភូមិ ៣៤០​គ្រួសារ ពឹង​អាស្រ័យ​លើ​ធនធាន​សមុទ្រ ប៉ុន្តែ​អាជីវកម្ម​ខ្សាច់​របស់​ក្រុមហ៊ុន អ៊ិនធឺណេសិនណល រេនបូ ខាំបូឌា បូម​ខ្សាច់​ផង កាយ​ខ្សាច់​ផង ដឹក​ចេញ​ផង ធ្វើ​ឲ្យ​ប៉ះពាល់​ជីវចម្រុះ​ដោយ​ការ​បំពុល​ទឹក ខូចខាត​ព្រៃកោងកាង បាក់​ឆ្នេរ​សមុទ្រ និង​បំផ្លាញ​ឧបករណ៍​នេសាទ​របស់​អ្នក​ភូមិ។ លោក​ថា ក្រុមហ៊ុន អ៊ិនធឺណេសិនណល រេនបូ ខាំបូឌា មិន​បាន​បូម​ខ្សាច់​ឲ្យ​ចំ​គោលដៅ​នៃ​អាជ្ញាប័ណ្ណ​ផ្តល់​ឲ្យ​បូម នៅ​ឯ​ឃុំ​ត្រពាំងរូង និង​ឃុំ​អណ្ដូងទឹក នោះ​ទេ បែរ​ជា​មក​បូម​ខ្សាច់​នៅ​ភូមិ​កោះស្រឡៅ ឃុំ​កោះកាពិ វិញ។ លោក​ថា ក្រុមហ៊ុន​ប្រើ​គ្រឿងចក្រ ៨​គ្រឿង និង​សាឡង់ ១០​គ្រឿង​សម្រាប់​បូម និង​ដឹក​ជញ្ជូន​ខ្សាច់​ដែល​នាំ​ឲ្យ​ប៉ះពាល់​ដៃ​សមុទ្រ​ក្នុង​សហគមន៍​កោះ​ស្រឡៅ៖ «ដល់​ពេល​គាត់​មក​បូម​នៅ​ភូមិ​កោះស្រឡៅ ឃុំ​កោះកាពិ ដល់​អាជ្ញាប័ណ្ណ​របស់​គាត់​ពិត​ប្រាកដ​នៅ​ត្រពាំងរូង និង​អណ្ដូងទឹក ឯណោះ ហើយ​អាជ្ញាប័ណ្ណ​នោះ គឺ​ហួស​សុពលភាព​ពីរ​ខែ​មក​ហើយ»

ចំណែក លោកស្រី ឯក សុផល តំណាង​សហគមន៍​កោះ​ស្រឡៅ ឲ្យ​ដឹង​បន្ថែម​ថា តាំង​ពី​ឆ្នាំ​២០០០ មក ក្រុមហ៊ុន អ៊ិនធឺណេសិនណល រេនបូ ខាំបូឌា បាន​នាំ​ចេញ​ខ្សាច់​សមុទ្រ​ទៅ​ប្រទេស​សិង្ហបុរី (Singapore)។ នៅ​ថ្ងៃ​ទី​១១ ខែ​មេសា មុន​ចូល​ឆ្នាំ អ្នក​ភូមិ​ទប់ស្កាត់​សាឡង់​ក្រុមហ៊ុន ១២​គ្រឿង មិន​ឲ្យ​ដឹក​ជញ្ជូន និង​បូម​ខ្សាច់។ នៅ​ថ្ងៃ​ទី​១៥ ខែ​មេសា អ្នក​ភូមិ​រក​ឃើញ​ថា អាជ្ញាប័ណ្ណ​ក្រុមហ៊ុន រេនបូ ឲ្យ​ធ្វើ​អាជីវកម្ម​ខ្សាច់​នៅ​ឃុំ​ត្រពាំងរូង និង​ឃុំ​អណ្ដូងទឹក ឯណោះ​ទេ។ លោកស្រី​ថា អ្នក​ភូមិ​បាន​ចោទ​ក្រុមហ៊ុន រេនបូ បូម​ខ្សាច់​អនាធិបតេយ្យ ទើប​លើក​គ្នា​រារាំង​កាណូត និង​សាឡង់ មិន​ឲ្យ​ធ្វើ​អាជីវកម្ម​ខ្សាច់៖ «ទោះ​បី​មាន​អាជ្ញាប័ណ្ណ និង​គ្មាន​អាជ្ញាប័ណ្ណ ខ្ញុំ​ក្នុង​នាម​ប្រជាជន ខ្ញុំ​សុំ​បញ្ឈប់​ការ​បូម ព្រោះ​ប៉ះពាល់​យ៉ាង​ខ្លាំង​សម្រាប់​ឆ្នាំង​បាយ​ប្រជាជន។ ខ្ញុំ​នឹង​បន្ត​បញ្ឈប់​ការ​បូម​ខ្សាច់​បន្ត​ទៀត»

ក្រសួង​រ៉ែ និង​ថាមពល។ រូបថត​ថ្ងៃ​ទី​២៣ ខែ​មេសា ឆ្នាំ​២០១៥។
ក្រសួង​រ៉ែ និង​ថាមពល។ រូបថត​ថ្ងៃ​ទី​២៣ ខែ​មេសា ឆ្នាំ​២០១៥។

យុវជន​អង្គការ​មាតា​ធម្មជាតិ ប្រចាំ​ខេត្ត​កោះកុង លោក ឃឹម ចាន់សេរីវឌ្ឍន៍ ឲ្យ​ដឹង​ថា យុវជន​ចូលរួម​ជាមួយ​សហគមន៍​កោះ​ស្រឡៅ ដើម្បី​ការពារ​បរិស្ថាន និង​ការពារ​ធនធាន​ជីវចម្រុះ ព្រោះ​អាជ្ញាប័ណ្ណ​ក្រុមហ៊ុន​យក​មក​អះអាង​នោះ ខុស​ទីតាំង​ធ្វើ​អាជីវកម្ម​ជាក់ស្តែង៖ «អាជ្ញាប័ណ្ណ​គាត់ គឺ​ខុស​ទាំង​ស្រុង ដែល​ចែង​នៅ​ក្នុង​ហ្នឹង គឺ​បូម​នៅ​ក្នុង​ឃុំ​អណ្ដូងទឹក ហើយ​និង​ឃុំ​ត្រពាំងរូង ក្នុង​ស្រុក​បុទុមសាគរ និង​ស្រុក​កោះកុង ប៉ុន្តែ​កន្លែង​ដែល​គាត់​បូម​សព្វថ្ងៃ គឺ​នៅ​ក្នុង​ឃុំ​កោះកាពិ និង​ឃុំ​ជ្រោយប្រស់។ អ៊ីចឹង​វា​អត់​មាន​ត្រូវ​ទេ ហើយ​ម្យ៉ាង​ទៀត ប្រជាពលរដ្ឋ​បងប្អូន​ដែល​រស់នៅ​កោះ​ស្រឡៅ គាត់​អត់​ខ្វល់​រឿង​អាជ្ញាប័ណ្ណ​ទេ ព្រោះ​ការ​បូម​ខ្សាច់​ទាំងអស់ គឺ​ប៉ះពាល់។ អ៊ីចឹង​យើង​អត់​ត្រូវ​ការ​ក្រុមហ៊ុន​បូម​ខ្សាច់​មក​ទេ ទោះ​បី​មាន​អាជ្ញាប័ណ្ណ ក៏​យើង​អត់​យល់​ស្រប​ដែរ»

កាល​ពី​ថ្ងៃ​ទី​១១ ខែ​មេសា ប្រធាន​ក្រុមហ៊ុន អ៊ិនធឺណេសិនណល រេនបូ ខាំបូឌា សុំ​មិន​ប្រាប់​ឈ្មោះ​បាន​ប្រាប់​វិទ្យុ​អាស៊ីសេរី ថា នៅ​ក្នុង​ខេត្ត​កោះកុង មាន​តែ​ក្រុមហ៊ុន​ពីរ​ទេ​ដែល​អាជ្ញាប័ណ្ណ​បូម​ខ្សាច់​មាន​សុពលភាព​រហូត​ទៅ​ដល់​ចុង​ឆ្នាំ​២០១៥ ក្នុង​នោះ​មាន​ក្រុមហ៊ុន អ៊ិនធឺណេសិនណល រេនបូ ខាំបូឌា មួយ​ដែរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល