សហគមន៍ជនជាតិដើមភាគតិចព្នង រស់នៅភូមិពូរាំង ឃុំសែនមនោរម្យ ស្រុកអូររាំង ខេត្តមណ្ឌលគិរី ចោទអ្នកមានអំណាចម្នាក់ថា ហ៊ុមព័ទ្ធយកដីព្រៃសហគមន៍ ៤៧២ហិកតារ ជាសម្បត្តិបុគ្គល ដោយសារតែ អ្នកភូមិ ប្រទះឃើញដើមឈើជាច្រើនដើម ឋិតក្នុងព្រៃសហគមន៍ភូមិពូរាំង ត្រូវគេកាប់ឱ្យដួល និងបាញ់ថ្នាំហ៊ុមព័ទ្ធ។
សហគមន៍ជនជាតិដើមភាគតិចព្នង (ពូនង) ឱ្យដឹងនៅអាទិត្យ ថ្ងៃទី៣០ ខែមិថុនាថា ព្រៃសហគមន៍ភូមិពូរាំង មានផ្ទៃដីជាង ១ពាន់ហិកតារ កំពុងទទួលរងការ រំលោភបំពាន ពីបុគ្គលមានអំណាចម្នាក់។ អ្នកភូមិថា អ្នកមានឥទ្ធិពលដែលគេស្គាល់ឈ្មោះថា សេង សុវណ្ណារ៉ា បានតាំងខ្លួនថា ជាមន្ត្រីរាជការ ធ្វើការនៅក្រសួងយុត្តិធម៌ ហើយបានគំរាមកំហែងពលរដ្ឋណា ដែលចេញមុខរារាំង សកម្មភាពហ៊ុមព័ទ្ធយកដីព្រៃរបស់គេ។
ប្រធានសហគមន៍ភូមិពូរាំង លោក ញ៉ាន ស្រេវ រំឭកថា កាលពីសប្ដាហ៍មុន អ្នកភូមិមួយក្រុម ប្រទះឃើញដើមឈើធំៗ ជាច្រើនដើមក្នុងព្រៃសហគមន៍នៅចំណុចអូរហ៊ុជ ត្រូវគេកាប់រំលំ ហ៊ុមព័ទ្ធ យកដី ៤៧២ហិកតារ។ លោកថា ក្រុមពលរដ្ឋស៊ូស្លាប់ ការពារដីព្រៃសហគមន៍ឱ្យគង់វង្ស និងចង់ថែរក្សាជាសម្បត្តិសមូហភាព បន្សល់ចុងក្រោយដែលជនជាតិដើមភាគតិច ឃ្វាលគោក្របី អាស្រ័យផល និងជាទីតាំងជ្រកសត្វដំរីព្រៃរស់នៅ៖ «៤៧២ហិកតារហ្នឹងជាដីគាត់យកហ្មង ចង់យកទាំងអស់ហ្នឹង អត់ដឹងដីសហគមន៍ ហើយតាឯងអត់មានយកទេ សហគមន៍រលាយអស់ហើយ។ ដីហ្នឹងដីចម្ការវិលជុំ និងដីភ្នំ»។
បុរសដដែលបន្ថែមថា ឈ្មួញដែលរំលោភដីព្រៃសហគមន៍បានប្រាប់អ្នកភូមិថា ពួកគេមានប្លង់កម្មសិទ្ធិដីធ្លីដែលទទួលស្គាល់ដោយអាជ្ញាធរភូមិ ឃុំ និងស្រុក។ លោកសង្ស័យថា អាជ្ញាធរមូលដ្ឋានមានចេតនាឃុបឃិតជាមួយឈ្មួញ រំលោភដីសហគមន៍ជាង ៤រយហិកតារនេះ ៖«គាត់ថា ដីហ្នឹងកាន់កាប់អត់ឱ្យនរណាប្រើទេ សហគមន៍ហ្នឹងអញ ធ្វើម៉េចក៏បានដែរ អញត្រូវយកៗគាត់ថា អ៊ីចឹងហ្មង។ ឈ្មោះគាត់ហ្នឹង សេង វណ្ណារ៉ា ថ្នាក់គាត់ថា ឯកត្តនិយមនៅក្រសួងយុត្តិធម៌»។
ឆ្លើយតបការចោទប្រកាន់នេះ លោក សេង វណ្ណារ៉ា បានបដិសេធមិនបំភ្លឺរឿងនេះ៖ «ទម្លាប់ខ្ញុំ គឺខ្ញុំអត់សម្ភាសន៍តាមខ្យល់ទេ។ គឺមានការអី បងអញ្ជើញមកជួបខ្ញុំផ្ទាល់»។
អាស៊ីសេរីបានទាក់ទង មេឃុំសែនមនោរម្យ អ្នកស្រី ខ្វាន ត្រែល និងអភិបាលស្រុកអូររាំង លោក នង ទុណ្ណារី ដើម្បីសុំការបំភ្លឺបញ្ហានេះ តែទូរស័ព្ទហៅចូលគ្មានអ្នកទទួលនៅថ្ងៃទី៣០ មិថុនា។
រីឯអ្នកនាំពាក្យសាលាខេត្តមណ្ឌលគិរី លោក សុក សេរ៉ា មានប្រសាសន៍ថា រដ្ឋបាលខេត្តនៅមិនទាន់ទទួលពាក្យបណ្តឹងផ្លូវការណាមួយ ពីពលរដ្ឋនៅឡើយទេមកទល់ពេលនេះ។ លោកបញ្ជាក់ថា អាជ្ញាធរខេត្តទទួលពាក្យបណ្តឹងពីពលរដ្ឋគ្រប់បញ្ហាទាំងអស់ និងបានដាក់វេនគ្នាចាំទទួលពាក្យ
បណ្ដឹងពីពលរដ្ឋ ២៤ម៉ោង ដោយមិនគិតថ្ងៃសៅរ៍ និងអាទិត្យនោះទេ៖ «ប្រចាំការទាំងថ្ងៃសៅរ៍ និងថ្ងៃអាទិត្យគឺប្រចាំការ រាល់ពាក្យបណ្ដឹងរបស់ពលរដ្ឋ គឺយកចិត្តទុកដាក់ និងធ្វើការដោះស្រាយជូនគាត់។ រដ្ឋបាលខេត្តមិនព្រងើយកន្តើយទេ ដរាបណា ទទួលបានព័ត៌មានឬពាក្យបណ្ដឹង»។
ព្រៃសហគមន៍ភូមិពូរាំង គឺជាផ្នែកមួយក្នុងដែនជម្រកសត្វព្រៃកែវសីមា មានផ្ទៃដីជាង ១ពាន់ហិកតារ ឋិតក្នុងភូមិពូរាំង ឃុំសែនមនោរម្យ ស្រុកអូររាំង ខេត្តមណ្ឌលគិរី។ សហគមន៍បានដាក់ពាក្យស្នើសុំចុះបញ្ជីដីសមូហភាព ទៅក្រសួងដែនដី តែមិនទាន់ទទួលលទ្ធផល ខណៈដែលក្រសួងមហាផ្ទៃធ្លាប់ប្រកាសទទួលស្គាល់ជនជាតិដើមភាគតិចព្នង ដែលកំពុងអាស្រ័យព្រៃឈើក្នុងតំបន់អភិរក្សនេះ។
សមាជិកសហគមន៍ខេត្តមណ្ឌលគិរី លោក ក្រើង តុលា សង្កេតឃើញថា ឈ្មួញមានអំណាចមានមហិច្ឆតាកាប់ព្រៃ និងឈូសឆាយព្រៃសហគមន៍រាប់រយហិកតារ ក៏ប៉ុន្តែបានផ្អាកទៅវិញ ដោយសារក្រុមពលរដ្ឋទប់ស្កាត់។ លោកថា ឈ្មួញ និងអាជ្ញាធរមូលដ្ឋានបានឃុបឃិតគ្នា បាញ់ថ្នាំកំណត់ព្រំដី ដោយស្ងាត់ៗ និងលួចធ្វើប្លង់កម្មសិទ្ធិប៉ះចំដីព្រៃសហគមន៍។ លោកបារម្ភថា ការបំផ្លាញព្រៃសហគមន៍នេះ ហាក់បំផ្លាញជម្រកសត្វដំរីព្រៃ និងផ្ដាច់ ដង្ហើមសេដ្ឋកិច្ចជនជាតិដើមភាគតិចនៅតំបន់នោះទាំងមូល៖ «គេបាញ់ថ្នាំព្រៃខ្លួនគេ អត់មានសហការណ៍ជាមួយពលរដ្ឋទេ គេមានមេឃុំ មានមេស្រុក គេទៅជាមួយគ្នាគេហ្នឹងមានបរិស្ថាន។ អ៊ីចឹងបានខ្ញុំថា តំបន់ណាដែលមានបរិស្ថាន តំបន់ហ្នឹងព្រៃឈើរលាយតែម្ដងវា ឋិតក្នុងដែនជម្រកសត្វព្រៃកែវសីមា។ ឥឡូវខ្ញុំសំណូមពរឱ្យឯកឧត្តម សាយ សំអាល់ ចុះផ្ទាល់តែម្ដង។ រាល់ថ្ងៃហ្មងកាប់ព្រៃឈើ ទន្ទ្រានដាំនេះ ដាំនោះ »។
មន្ត្រីសម្របសម្រួលសមាគម អាដហុក (Adhoc) ខេត្តមកមណ្ឌលគិរី លោក អ៊ាង ម៉េងលី ចាត់ទុកការការទិញលក់ដីព្រៃសហគមន៍ និងការធ្វើពាក្យស្នើសុំកាន់កាប់ដីធ្លីរបស់អាជ្ញាធរមូលដ្ឋាន ជាទង្វើល្មើសច្បាប់។ លោកថា ទីផ្សារដីឡើងថ្លៃ ក្រុមឈ្មួញកំពុងរកយុទ្ធសាស្ត្រច្បាមយកដីព្រៃសហគមន៍ និងដីសាធារណរដ្ឋ ធ្វើជាសកម្មសិទ្ធិបុគ្គល ដែលទាមទារឱ្យក្រសួងពាក់ព័ន្ធចាត់វិធានច្បាប់ជាបន្ទាន់៖ «មន្ត្រីក៏ដូចជា អាជ្ញាធរស្រុក អាជ្ញាធរខេត្តមេត្តាចាត់វិធានការ ចំពោះសកម្មភាពការទិញលក់ដី នៅខេត្តមណ្ឌលគិរីនេះ ជាពិសេសរូបភាព ដែលប្រព្រឹត្តខុសច្បាប់លើដីរបស់រដ្ឋ ត្រូវចាត់វិធានការ ឱ្យបានតឹងរឹង។ ប្រសិនបើមិនចាត់វិធានការទេ បញ្ហាដីធ្លី កាន់តែរីកាន់តែធំឡើង សម្រាប់នៅខេត្តមណ្ឌលគិរីនេះហើយ»។
សហគមន៍ជនជាតិដើមភាគតិចបន្ថែមថា ពួកគេមានទិសដៅ អភិរក្សព្រៃអារក្ស ព្រៃចម្ការវិលជុំ ព្រៃចម្ការស្រល់ និងដីព្រៃតំបន់ភ្នំឱ្យគង់វង្ស ក៏ប៉ុន្តែមិនត្រូវបានអាជ្ញាធរពាក់ព័ន្ធ លើកទឹកចិត្ត និងជួយពន្លឿនចុះបញ្ជីដីសមូហភាពនោះទេ ដែលនេះជាឱកាសឱ្យឈ្មួញ និងអាជ្ញាធរខ្លះលួចកាប់ព្រៃ ឈូសឆាយ រំលោភយកដីព្រៃសហគមន៍ និងដីព្រៃសាធារណៈរបស់រដ្ឋអស់ជាបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
