ប្រជាសហគមន៍ព្រៃឡង់នៅខេត្តកំពង់ធំ អះអាងថា សកម្មភាពកាប់បំផ្លាញព្រៃឈើក្នុងតំបន់ព្រៃឡង់ មិនមានការថយចុះឡើយ គឺរឹតតែកើនឡើង បើទោះបីជាឋិតនៅក្នុងរដូវភ្លៀងក៏ដោយ។
ការកាប់បំផ្លាញកាន់តែកើនឡើងទាំងនោះ គឺដោយសារកង្វះការបង្ក្រាបដែលមានប្រសិទ្ធភាពពីសំណាក់អាជ្ញាធរ។ ប៉ុន្តែអាជ្ញាធរស្រុកបញ្ជាក់ថា មិនមានករណីកាប់ឈើទៀតនោះទេ ពីព្រោះភ្លៀងធ្លាក់ច្រើន ឈ្មួញមិនអាចចូលកាប់បានទៀតឡើយ។
បណ្ដាញស្នូលព្រៃឡង់ នៅខេត្តកំពង់ធំ នៅតែលើកឡើងថា បទល្មើសព្រៃឈើនៅស្រុកសណ្ដាន់ គ្មានការថយចុះឡើយ ជនល្មើសនៅតែនាំគ្នាទៅសម្រាកតាមភូមិអ្នកស្រុកដើម្បីចូលកាប់ឈើនៅក្នុងព្រៃឡង់មួយយប់ៗ ឮតែសំឡេងម៉ាស៊ីនរោទ៍ស្ទើរពេញព្រៃ។ មួយយប់ៗរទេះជាច្រើនដឹកឈើចេញ ហើយពេលបណ្ដាញព្រៃឡង់ចុះល្បាត គឺជនល្មើសទាំងនោះតែងដឹងខ្លួនជានិច្ច។
អ្នកសម្របសម្រួលសហគមន៍ព្រៃឡង់បួនខេត្ត គឺខេត្តកំពង់ធំ ព្រះវិហារ ក្រចេះ និងខេត្តស្ទឹងត្រែង លោក ស៊ិន ស៊ាន មានប្រសាសន៍ថា សកម្មភាពកាប់បំផ្លាញព្រៃឈើក្នុងតំបន់ព្រៃឡង់ នៅតែកក្រើកដដែល។ លោកបន្តថា ភាគច្រើនឈ្មួញទាំងនោះមកពីតំបន់ផ្សេងៗ មកស៊ីឈ្នួលកាប់ និងដឹកឈើឱ្យឈ្មួញធំៗ នៅឃុំមានរិទ្ធ ស្រុកសណ្ដាន់។ ជាងនេះទៅទៀតនោះ កម្រឃើញអាជ្ញាធរ ឬមន្ត្រីរដ្ឋបាលព្រៃឈើចេញបង្ក្រាបឈ្មួញឈើទាំងនោះឱ្យមានប្រសិទ្ធភាពឡើយ ដែលធ្វើឱ្យបណ្ដាញសហគមន៍សង្ស័យថា គឺមានមន្ត្រីមួយចំនួនបានឃុបឃិតជាមួយឈ្មួញឈើទាំងនោះ។
លោក ស៊ិន ស៊ាន៖ «តាមការពិតទៅតាមតួនាទីរដ្ឋបាលព្រៃឈើជាអ្នកមើលការខុសត្រូវ បើបណ្ដោយឱ្យម៉ាស៊ីនអារតាមចិត្ត បណ្ដោយឱ្យរទេះដឹងមួយយប់ៗ គ្មានឈប់ឈរអ៊ីចឹង។ ខ្ញុំមិនដឹងគិតថាខាងរដ្ឋបាលព្រៃឈើ ឬគិតថាខាងរដ្ឋាភិបាលគាត់គិតយ៉ាងម៉េច?សហគមន៍កំពុងតែរកវិធីសាស្ត្រ»។
ប្រភពដដែលបញ្ជាក់ថា ឈើជាច្រើនគឺកាប់ក្នុងតំបន់ព្រៃឡង់ គឺនៅចំណុចអូរច្រោក អូរសម្បតិ្ត និងតំបន់សន្លង់តៃ ហើយជនល្មើសដឹកជញ្ជូនចេញមកស្តុកនៅក្នុងឃុំមានរិទ្ធ ចំណុច ៩៩ នៅភូមិអូរពក ភូមិសំអោង ដែលជាកន្លែងលាក់ទុកឈើនៅតាមផ្ទះ រង់ចាំរថយន្តទៅដឹកយកមកទុកនៅដេប៉ូលមួយចំនួននៅខេត្តកំពង់ចាម និងទៅវៀតណាម ជាដើម។ ក្រៅពីនេះ ក្រុមហ៊ុនដែលទទួលសិទ្ធិកាប់ឈើនៅក្នុងក្រុមហ៊ុន ស៊ី.អ.ស៊ី.ខេ (CRCK) លើដីសម្បទានដែលរដ្ឋផ្ដល់ឱ្យនោះ ឥឡូវមិនត្រឹមតែសំអាតឈើលើដីខ្លួនប៉ុណ្ណោះទេ ប៉ុន្តែថែមទាំងកាប់ឈើចេញពីដែនដីរបស់ខ្លួនរហូតស្ទើរតែដល់ព្រំប្រទល់ខេត្តស្ទឹងត្រែង ទៅហើយ។
ការបាត់បង់ព្រៃឡង់បន្តិចម្តងៗ ដែលនឹងឈានទៅដល់ការវិនាសក្នុងពេលឆាប់ៗនោះ ធ្វើឱ្យប្រជាពលរដ្ឋនិងបណ្ដាញព្រៃឡង់មានការព្រួយបារម្ភថា វានឹងផ្ដល់ផលប៉ះពាល់យ៉ាងខ្លាំងដល់ពួកគាត់មិនខានឡើយ។
អភិបាលស្រុកសណ្ដាន់ លោក អ៊ុន បុត្រ មានប្រសាសន៍បដិសេធកាលពីថ្ងៃ២៤ កក្កដា ថា មិនមានការកាប់បំផ្លាញព្រៃឡង់ទៀតទេ ពីព្រោះរដូវនេះជារដូវភ្លៀង ជនល្មើសមិនអាចចូលកាប់និងដឹកឈើបានទៀតឡើយ។ លោកបន្តថា អាជ្ញាធរតែងតែចុះបង្ក្រាបដោយសហការជាមួយមន្ត្រីជំនាញនិងប្រជាសហគមន៍ជាប្រចាំចំពោះបញ្ហានេះនាពេលកន្លងមក។
លោក អ៊ុន បុត្រ៖ «ចង់និយាយថា ផ្លូវវាពិបាក ភ្លៀងអ៊ីចឹងទៅ ដាច់ផ្លូវអ៊ីចឹងទៅ ឱកាសរបស់ជនល្មើសវាអត់មានអំណោយផលឱ្យទេ។ អ៊ីចឹងបទល្មើសក៏វាអត់សូវមានដែរ តំបន់ហ្នុង»។
យ៉ាងណាក៏ដោយ លោកអះអាងថា អាជ្ញាធរស្រុកនិងខេត្តមានផែនការដើម្បីចូលរួមបង្ក្រាបបទល្មើសព្រៃឈើជាប្រចាំនៅពេលខាងមុខបន្តទៀត។
នាយកអង្គការការពារធនធានធម្មជាតិ លោក ឈឹម សាវុធ មានប្រសាសន៍ថា នៅរដូវភ្លៀងនេះឈ្មួញអាចមានការរាំងស្ទះខ្លះក្នុងការដឹកជញ្ជូនឈើចេញមកក្រៅ ក៏ប៉ុន្តែការកាប់បំផ្លាញព្រៃឈើ គឺមិនអាចថយចុះនោះឡើយ គឺរឹតតែកើនឡើងជាងមុនទៅទៀត។
លោក ឈឹម សាវុធ៖ «អ៊ីចឹងដូចខ្ញុំបញ្ជាក់អ៊ីចឹង សកម្មភាពកាប់បំផ្លាញព្រៃឈើស្រុកខ្មែរគ្មានការថយចុះទេ។ ព្រោះវាអត់មានការអនុវត្តច្បាប់ ហើយមន្ត្រីជំនាញសហការជាមួយឈ្មួញរកស៊ីជាប់ជាប្រចាំ ជាលក្ខណៈប្រព័ន្ធ ដូចដែលខ្ញុំនិយាយពីមុនមកអ៊ីចឹង។ អ៊ីចឹងការកាប់បំផ្លាញព្រៃឈើកុំសូម្បីតែខេត្តកំពង់ធំ ខេត្តណាក៏អត់មានការថយចុះដែរ។ សកម្មភាពនៅតែកើតឡើងបន្ត ដូចជាខេត្តព្រះវិហារ ជាដើមកំពុងតែកាប់បន្ថែមជិតអស់ហើយ។ ធ្នង់ឥឡូវគេកាប់ដល់ទៅផ្ទឹក ដល់ទៅសុក្រំ បន្តទៀតហើយ។ អ៊ីចឹងវាឈានទៅរកការរលាយដូចខ្ញុំនិយាយអ៊ីចឹង»។
លោកបញ្ជាក់ថា ឈើប្រណីតនិងឈើមិនមែនប្រណីត នឹងអាចវិនាសក្នុងពេលឆាប់ៗនេះ ពីព្រោះព្រៃឈើនៅក្នុងស្រុកខ្មែរគឺឈានដល់ដំណាក់កាលចុងក្រោយទៅហើយ ប្រសិនបើរាជរដ្ឋាភិបាលនៅតែគ្មានឆន្ទៈការពារ ឬទប់ស្កាត់ទៀតនោះ ព្រៃឈើក្នុងស្រុកខ្មែរគឺអាចនឹងផុតពូជតែម្ដង៕
ខ្មែរអើយ មិនមែនតែព្រៃឡង់ទេ កន្លែងណាក៏ដូចកន្លែងណាដែរ ការកាប់ឈើនិងថយចុះឯងនៅពេលដែលឈើជិតអស់ ហើយមុខអ្នកដោះស្រាយក៏និងចេញមកដោះស្រាយដែរ បន្ទាប់ពីសួរថាកាប់ជិតអស់ហើយនៅ បើគេថាកុំទាន់គឺរួញចូលក្នុងស្នូកវិញសិន បើថាអស់ហើយនោះគេនិងអើតក្បាលមកបង្ហាញថាណែ អញទៅត្រង់ណាបញ្ហាគឺស្រាយរួចត្រង់ហ្នឹង ដល់រាស្រ្តមិនយល់គិតថាមែនគាត់អស្ចារ្យមែន តែតាមពិតគឺអណ្តើកសុទ្ធ សូមរាស្រ្តខ្មែរជឿចុះ។
Jul 28, 2014 10:13 PM
