"អាជ្ញាធរ​ខ្វះ​ចន្លោះ​ច្រើន​ចំពោះ​ការ​អភិរក្ស​ផ្សោត និង​ត្រី​ក្នុង​ទន្លេ​មេគង្គ​ខេត្ត​ក្រចេះ និង​ស្ទឹងត្រែង"

ដោយ ថន ថារ៉ូ
2018-10-24
អ៊ីម៉ែល
មតិ
Share
បោះពុម្ព
សមាជិក​ឧត្តម​ក្រុមប្រឹក្សា​ពិគ្រោះ​យោបល់ មក​ពី​គណបក្ស​ឆន្ទៈ​ខ្មែរ និង​សកម្មជន​បរិស្ថាន ចុះ​ស្រាវជ្រាវ​រួម​គ្នា​ពី​ស្ថានភាព​ទន្លេ​មេគង្គ​ខេត្ត​ក្រចេះ និង​ខេត្ត​ស្ទឹងត្រែង កាល​ពី​ថ្ងៃ​ទី២៣ តុលា។
សមាជិក​ឧត្តម​ក្រុមប្រឹក្សា​ពិគ្រោះ​យោបល់ មក​ពី​គណបក្ស​ឆន្ទៈ​ខ្មែរ និង​សកម្មជន​បរិស្ថាន ចុះ​ស្រាវជ្រាវ​រួម​គ្នា​ពី​ស្ថានភាព​ទន្លេ​មេគង្គ​ខេត្ត​ក្រចេះ និង​ខេត្ត​ស្ទឹងត្រែង កាល​ពី​ថ្ងៃ​ទី២៣ តុលា។
រូប៖ សកម្មជន​បរិស្ថាន

សកម្មជន​បរិស្ថាន និង​សមាជិក​ឧត្ដមក្រុមប្រឹក្សា​ពិគ្រោះ​យោបល់​មក​ពី​គណបក្ស​ឆន្ទៈ​ខ្មែរ រក​ឃើញ​បញ្ហា​ប្រឈម​ច្រើន ក្នុង​ទន្លេ​មេគង្គ ខេត្ត​ក្រចេះ និង​ខេត្ត​ស្ទឹងត្រែង។ បញ្ហា​ទាំងនោះ រួមមាន សមត្ថកិច្ច​ជំនាញ​មាន​ភាព​ខ្វះ​ចន្លោះ​ច្រើន​ក្នុង​កិច្ច​គាំពារ​បរិស្ថាន និង​ទប់ស្កាត់​បទល្មើស​នេសាទ ក្នុង​តំបន់​អភិរក្ស​ផ្សោត និង​ត្រី​មេ​ពូជ ដែល​ការពារ​ដោយ​ច្បាប់​។ ពួកគេ​អង្កេត​ឃើញ​ថា សមត្ថកិច្ច​​មាន​​ភាព​​ខ្វះ​​ចន្លោះ​ច្រើន ក្នុង​ការ​ទប់ស្កាត់​បទ​ល្មើស​នេសាទ ក្នុង​ដែន​សមត្ថកិច្ច​របស់​ខ្លួន ហើយ​ក្រុម​ជន​ល្មើស​​ខ្លះ​​មាន​​ខ្នង​បង្អែក​​ផង។

សកម្មជន​បរិស្ថាន និង​សមាជិក​ឧត្តម​ក្រុមប្រឹក្សា​ពិគ្រោះ​យោបល់ មកពី​គណបក្ស​ឆន្ទៈ​ខ្មែរ​បាន​ស្រាវជ្រាវ​រួមគ្នា​មួយ ពី​ស្ថានភាព​ទន្លេ​មេគង្គ​ខេត្ត​ស្ទឹងត្រែង និង​ខេត្ត​ក្រចេះ ចាប់​ពី​ថ្ងៃទី១៩ ដល់​ថ្ងៃ​ទី២៣ តុលា។ បេសកកម្ម​នេះ​ផ្ដោត​សំខាន់ តាម​ដាន​ការ​អនុវត្ត​​គោលនយោបាយ និង​ច្បាប់​នានា របស់​អាជ្ញាធរ​​ពាក់ព័ន្ធ​​ថ្នាក់​ក្រោម​​ជាតិ មាន​​តួនាទី​​អភិរក្ស​​ជីវ​ចម្រុះ និង​​សត្វ​​ផ្សោត​​ក្នុង​​ទន្លេ​ុមេគង្គ ឲ្យ​មាន​ប្រសិទ្ធភាព។

សមាជិក​ឧត្តមក្រុមប្រឹក្សា​ពិគ្រោះ យោបល់​មកពី​គណបក្ស​ឆន្ទៈ​ខ្មែរ លោក គង់ មុនីកា ប្រាប់​អាស៊ីសេរី​នៅ​ថ្ងៃទី២៤ តុលា​ថា ក្រុម​ការងារ​​លោក​រក​ឃើញ​ភាព​ខ្វះ​ចន្លោះ​ច្រើន របស់​អាជ្ញាធរ​ពាក់ព័ន្ធ​ថ្នាក់ក្រោម​ជាតិ ក្នុង​កិច្ច​គាំពារ​ជីវចម្រុះ និង​សត្វ​ផ្សោត​តាម​ដង​ទន្លេ​មេគង្គ ដែល​ជា​មូលហេតុ ធ្វើ​ឲ្យ​ប៉ះពាល់​ជីវភាព​រស់នៅ​របស់​ពលរដ្ឋ។ លោក​ថា អាជ្ញាធរ​ពាក់ព័ន្ធ មិន​បាន​សហការ​ល្អជា​មួយ​សហគមន៍​មូលដ្ឋាន រួមគ្នា​ទប់ទល់​សកម្ម​ភាព​នេសាទ​ខុសច្បាប់ ឲ្យ​គ្រប់​ជ្រុងជ្រោយ​នោះ​ទេ ខណៈ​ដែរ​បទល្មើស​នេសាទ​នៅតែ​កើតមាន​ច្រើន​នៅ​តំបន់​ហាមឃាត់។ លោក​សង្កត់ធ្ងន់​ថា ការ​ប្រើ​ឧបករណ៍​ខុសច្បាប់ ចាប់​ត្រី​ក្នុង​ទន្លេ​មេគង្គ បង្ក​ប៉ះពាល់​សត្វ​ផ្សោត និង​មច្ឆា​ជាតិ​ធ្ងន់ធ្ងរ ដែល​ទាមទារ​ឲ្យ​មានការ​យកចិត្តទុកដាក់​បន្ថែម​ទៀត ពី​អាជ្ញាធរ​ពាក់ព័ន្ធ និង អាជ្ញាធរ​ជាតិ៖ «នៅ​តំបន់​ហាមឃាត់​ពាក់ព័ន្ធ​នៅ​ផ្សោត​ទន្លេ មានការ​កំណត់​ព្រំប្រទល់​នេសាទ នៅតែ​តែ​មាន​ជនល្មើស​នេសាទ​នៅ​តំបន់​ហាមឃាត់។ ប្រើ​ឧបករណ៍​ឆក់ និង​ថ្នាំពុល មិន​ត្រឹម​ប៉ះពាល់​ផ្សោត​ទេ គឺ​ប៉ះពាល់​មច្ឆា​ជាតិ​ទូទៅ ដូច្នេះ​​ហើយ​គួរតែ​មាន​ការ​យកចិត្ត​ទុកដាក់​បន្ថែម​ទៀត ពី​អាជ្ញាធរ និង​រាជរដ្ឋាភិបាល»

លោក គង់ មុនីកា បន្ថែម​ថា បេសកកម្ម​ស្រាវជ្រាវ​នេះ អាជ្ញាធរ​ពាក់ព័ន្ធ​នៅ​មូលដ្ឋាន​ក្នុង​ខេត្ត​ក្រចេះ និង​ខេត្ត​ស្ទឹងត្រែង មិន​បាន​សហការ​ល្អ ជាមួយ​ក្រុមការងារ​លោក​នោះ​ទេ នៅ​គ្រា​លោក​ផ្ដល់​ដំណឹង​ទៅ​អាជ្ញាធរ​ឃុំ និង​សមត្ថកិច្ច តែង​ជាប់រវល់ និង​រុញច្រាន​ដាក់គ្នា​ទៅវិញ​មក។ លោក​បន្ថែម​ថា ការ​តាមដាន​ការអនុវត្ត​ការងារ​ជាក់ស្ដែង របស់​អាជ្ញាធរ​មូលដ្ឋាន និង​មន្ត្រី​ជំនាញ គឺជា​ហេតុផល​សំខាន់ ដើម្បី​រៀបចំ​របាយការណ៍ ចំណុច​ខ្វះខាត​នានា យក​ទៅ​ពិភាក្សា​ជាមួយ​ស្ថាប័ន​ថ្នាក់​ជាតិ និង​ឧត្ដម​ក្រុម​ប្រឹក្សា​ពិគ្រោះ​យោបល់ ក្នុង​បំណង រក​វិធីសាស្ត្រ​កែតម្រូវ​ឲ្យ​ប្រសើរ​ឡើងវិញ ក្នុង​បំណង​ពង្រឹង​ប្រព័ន្ធ​អភិរក្ស​ជីវចម្រុះ​ទន្លេ​មេគង្គ​ឲ្យ​មាន​ប្រសិទ្ធភាព៖ «សំខាន់​គឺ​ចុះទៅ តាមដាន​ការអនុវត្ត​គោលនយោបាយ និង​ច្បាប់​នានា​របស់​សមត្ថកិច្ច​ថ្នាក់​ក្រោម​​ជាតិ ដើម្បី​ជួយ​ដល់​រាជរដ្ឋាភិបាល រក​ឲ្យ​ឃើញ​ចំណុច​ខ្វះខាត​ផ្សេង​ហ្នឹង​។ ខ្ញុំ​នឹង​រាយការណ៍​ជួន​ឧ​ត្ត​ម​ក្រុមប្រឹក្សា​ពិគ្រោះ​យោបល់ ដើម្បី​ពិនិត្យ​ពិចារណា ដើម្បី​ប្រើប្រាស់​រូបភាព​ដាក់​ជូន​រដ្ឋាភិបាល​រួមគ្នា បើ​ឧត្ដមក្រុមប្រឹក្សា​មិន​ឯកភាព​ទេ នោះ ប្រតិភូ​គណបក្ស​ឆន្ទៈ​ខ្មែរ​នឹង​ធ្វើ​របាយការណ៍​មួយ​ផ្ទាល់​ផ្ញើ​ជូន​នាយករដ្ឋមន្ត្រី​ផ្ទាល់​តែម្ដង»

អ្នកនាំពាក្យ​ក្រសួងបរិស្ថាន លោក នេត ភក្រ្តា បដិសេធ​ផ្តល់​បទសម្ភាសន៍​ដល់​អាស៊ីសេរី នៅ​ថ្ងៃ​ទី ២៤ តុលា ដោយ​លោក​លើក​ឡើង​ថា រឿង​នេះ​ពុំ​មែន​ជា​សមត្ថកិច្ច​របស់​ក្រសួងបរិស្ថាន​នោះ​ទេ គឺជា​ភារកិច្ច​របស់​ក្រសួង​កសិកម្ម។ អាស៊ីសេរី​នៅ​មិនទាន់​រក​ប្រភព​ទាក់ទង អ្នកនាំពាក្យ​ក្រសួងកសិកម្ម ដើម្បី​សុំ​ការ​បំភ្លឺ​រឿងនេះ​បានទេ នៅ​ថ្ងៃ​ដដែល​នេះ។

ប្រធាន​ក្រុម​យុវជន​ការពារ​សង្គម និង​បរិស្ថាន លោក ជុំ ហួត ដែល​ចុះ​បេសកកម្ម​រួមគ្នា​នេះ​ដែរ ថ្លែង​ថា ការវិវត្តន៍ នៃ​​ការ​សាងសង់​​ទំនប់​​វារី​អគ្គិសនី​​ដនសាហុង របស់​ឡាវ​ឆ្ងាយ​ពី​ព្រំដែន​ខេត្ត​ស្ទឹងត្រែង​ជាង​មួយ​គីឡូម៉ែត្រ នៃ​ឃុំ​ព្រះ​រំកិល កំពុង​ធ្វើ​ឲ្យ​ពលរដ្ឋ​​ខ្មែរ​​រស់​នៅ​​ក្បែរ​​នោះ ដេក​ភ័យ​ពី​អាយុជីវិត និង​សុខុមាលភាព​ពី​ផល​ប៉ះពាល់​សង្គម និង​បរិស្ថាន​ជាក់ស្ដែង​។ លោក​ថា ឥទ្ធិពល​នៃ​ទំនប់​នេះ​ធ្វើ​ឲ្យ​ប៉ះពាល់​មច្ឆា​ជាតិ​ក្នុង​ទន្លេ​មេគង្គ​ធំ​សម្បើម និង​ការប្រែប្រួល​ចរន្តទឹក ធ្វើ​ឲ្យ​បាក់​ច្រាំងទន្លេ ៥០ ម៉ែត្រ នៅ​ក្បាលកោះ​ល្ង ដែល​ជា​កន្លែង​កម្សាន្ត​របស់​ភ្ញៀវ​ទេសចរ។ លោក​បន្ថែម​ថា សត្វ​ផ្សោត​ជា​ប្រភព​ប្រាក់ចំណូល​របស់​សហគមន៍​ព្រះ​រំកិល បាន​ផ្អើល​ទៅ​រស់នៅ​ខ្សែទឹក​ខាងលើ ធ្វើ​ឲ្យ​ប៉ះពាល់​ប្រាក់ចំណូល​សហគមន៍​ទាំងមូល ដោយសារ​ឥទ្ធិពល​ទំនប់​វា​រី​អគ្គិសនី​ដនសាហុង​កំពុង​សាងសង់ ជាប់​អន្លង់​អភិរក្ស​ផ្សោត​នោះ។ លោក​អង្កេត​ឃើញ​ថា ទោះបីជា សហគមន៍ និង​ពលរដ្ឋ​ព្រួយបារម្ភ​ខ្លាំង​បញ្ហា​នេះ ក្តី គេ​មិន​ឃើញ​អាជ្ញាធរ​ពាក់ព័ន្ធ​ណាមួយ យកចិត្តទុកដាក់​ដោះស្រាយ នោះ​ទេ សូម្បីតែ​ក្រុមការងារ​លោក អាជ្ញាធរ​តែង​គេចវេះ​មិន​សហការ​ផ្ដល់​ព័ត៌មាន​រឿង​នេះ​ដែរ៖ «គឺ​ខ្ញុំ​សម្រេច​ចុះទៅ​អង្កេត​ជាប្រចាំ ទាក់ទិន​ការវិវត្តន៍​ទំនប់​វារីអគ្គិសនី​ដនសាហុង ប្រទេស​ឡាវ ដែល​នៅ​ជាប់​ព្រំដែន​ខ្មែរ​យើង។ បន្ទាប់មក ពួក​ខ្ញុំ​សរសេរ​ញត្តិ​មួយ​ដាក់​ទៅ​ក្រសួងបរិស្ថាន ដើម្បី​ឲ្យ​ដោះស្រាយ​បញ្ចៀស​ផល​ប៉ះពាល់​បន្ថែម​ទៀត»

ពលរដ្ឋ​រស់នៅ​ឃុំ​ព្រះ​រំកិល លោក ផយ វណ្ណា និយាយ​ថា អាជ្ញាធរ​ជំនាញ​នៅ​មិនទាន់​ទប់ស្កាត់​បទល្មើស​គ្រប់​ជ្រុងជ្រោយ​នោះ​ទេ។ លោក​ថា មន្ត្រី​ជំនាញ​ឃាត់ខ្លួន​បានតែ​ជនសង្ស័យ​អ្នក​ទន់ខ្សោយ រីឯ​ក្រុម​ជនល្មើស​មាន​ខ្នងបង្អែក តែងតែ​រួចខ្លួន។ លោក​បារម្ភ​ថា ពលរដ្ឋ​ខ្លះ​ប្រកប​មុខរបរ​នេសាទ​ខុសច្បាប់​ជា​អាជីព​ចិញ្ចឹមជីវិត តែ​នេសាទ​នៅ​តំបន់​ហាមឃាត់ អាជ្ញាធរ​ជំនាញ​នៅ​មិន​អនុវត្ត​ច្បាប់​បាន​នៅឡើយ​ទេ៖ «ចាប់​បានតែ​អ្នក​ទន់ខ្សោយ បើ​អ្នកមាន​ខ្នងបង្អែក​នៅតែ​រួចខ្លួន។ អាជ្ញាធរ​ទប់ទល់​ច្រើន​ណាស់​ដែរ តែ​នៅតែ​មិន​ឈ្នះ​បទល្មើស ក្នុង​មួយ​បទល្មើស​ជាង ២០​ដង​គាត់​អន្តរាគមន៍​បានតែ ៣ ទៅ ៥​ដង​ទេ»

សកម្មជន​ការពារ​សង្គម និង​បរិស្ថាន បន្ថែម​ថា ប្រជាជន​រស់នៅ​កៀក​ទំនប់​វា​រី​អគ្គិសនី​ដនសាហុង ក្នុង​ឃុំ​ព្រះ​រំកិល ស្រុក​ថា​ឡាបរិវ៉ាត់ ខេត្ត​ស្ទឹងត្រែង ភ័យ​ព្រួយ​ពី​អាយុជីវិត​អាច​កើតមាន​ថ្ងៃ​ខាងមុខ នៅ​ពេល​ដែល​មានការ​បាក់​ទំនប់​វារីអគ្គិសនី​សេពាន​សេណាម​ណយ នៅ​ប្រទេស​ឡាវ​កន្លងទៅ ខណៈ​ដែរ​ទំនប់​វា​រី​អគ្គិសនី​ដនសាហុង មាន​ភូមិសាស្ត្រ នៅ​ក្បែរ​ភូមិកំណើត​របស់​ពួកគេ​មិន​ដល់ ២គីឡូម៉ែត្រ។ លើស​ពី​នេះ ក្តី​កង្វល់​ជាច្រើន ដែល​សហគមន៍​នៅ​តំបន់​នោះ​បាន​តវ៉ា និង​ដាក់​ញត្តិ ស្នើ​ឲ្យ​មានការ​ទទួលខុសត្រូវ​ពី​ផល​ប៉ះពាល់​បរិស្ថាន និង​សង្គម តែ​មក​ទល់​ពេល​នេះ​គ្មាន​ការ​បកស្រាយ​ជា​វិជ្ជមាន​ណាមួយ ពី​ភាគី​ឡាវ និង​អាជ្ញាធរ​កម្ពុជា​នៅឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល