ក្រុមយុវជនចលនាមាតាធម្មជាតិប្ដេជ្ញាចិត្តបន្តការងារការពារបិរស្ថានទោះប្រឈមនឹងគុកច្រវាក់
2024.08.30
(រូបឯកសារ) ក្រុមយុវជនចលនាមាតាធម្មជាតិ តស៊ូមតិដើម្បីការពារធនធានធម្មជាតិ ដោយទាមទារក្រសួងបរិស្ថានឱ្យដាក់កោះកុងក្រៅជាឧទ្យានជាតិសមុទ្ររបស់ជាតិ។
រូបពីពលរដ្ឋ
ក្រុមយុវជនចលនាមាតាធម្មជាតិប្ដេជ្ញាចិត្តបន្តការងារការពារធនធានធម្មជាតិ និងទាមទារឱ្យតុលាការដោះលែងសកម្មជនបរិស្ថានចំនួន ៥នាក់ឱ្យមានសេរីភាពឡើងវិញ ទោះជាពួកគាត់កំពុងប្រឈមនឹងរដ្ឋាភិបាលចាប់ដាក់ពន្ធនាគារយ៉ាងណាក្ដី។ ពួកគាត់អះអាងថា ការចាប់សកម្មជនចលនាមាតាធម្មជាតិដាក់ពន្ធនាគារមិនបានធ្វើឱ្យពួកគាត់ភ័យតក់ស្លុតឡើយ ផ្ទុយវិញពួកគាត់កាន់តែមានទឹកចិត្តមោះមុតបន្ថែមទៀត។
បន្ទាប់ពីរដ្ឋាភិបាលចាប់ខ្លួនសកម្មជនចលនាមាតាធម្មជាតិចំនួន ៥នាក់ដាក់ពន្ធនាគារ ក្រុមយុវជនបរិស្ថាន និងយុវជនសង្គមមួយចំនួននៅតែមានគោលជំហររឹងមាំធ្វើការការពារបរិស្ថានបន្តទៀត ពីព្រោះពួកគាត់មើលឃើញថា ការការពារធនធានធម្មជាតិ គឺជាការពារផលប្រយោជន៍រួមសម្រាប់ប្រជាពលរដ្ឋខ្មែរ។
សកម្មជនចលនាមាតាធម្មជាតិ លោក ផៃ ផាន់យ៉ា ប្រាប់វិទ្យុអាស៊ីសេរីនៅថ្ងៃទី៣០ ខែសីហា ថា លោកបានត្រៀមខ្លួនរួចជាស្រេច ដើម្បីការពារធនធានធម្មជាតិ និងបង្ហាញការពិតពីបញ្ហាសង្គមដូច្នេះលោកមិនខ្លាចរដ្ឋាភិបាលចាប់លោកដាក់ពន្ធនាគារឡើយ។ លោកបន្តថា ការចាប់សកម្មជនបរិស្ថានដាក់ពន្ធនាគារគឺជាការជំរុញទឹកចិត្តឱ្យលោក និងយុវជនផ្សេងទៀតកាន់តែក្លាហានមោះមុតហ៊ាននិយាយការពិតពីវិនាសកម្មធនធានធម្មជាតិ។
លោក ផៃ ផាន់យ៉ា៖ «ខ្ញុំអត់ធ្លាប់គិតថា ខ្ញុំនឹងបោះបង់ការការពារធនធានធម្មជាតិទេបើទោះសព្វថ្ងៃខ្ញុំកំពុងរៀនជំនាញផ្សេងពីការថែរក្សាធនធានធម្មជាតិក៏ដោយ ប៉ុន្តែបើទោះខ្ញុំទៅដល់ទីណាក៏ខ្ញុំនឹងចូលរួមនៅក្នុងការទាមទារឱ្យមានដំណោះស្រាយសង្គម។បញ្ហាធនធានធម្មជាតិទាំងអស់ហ្នឹងមិនថា ខ្ញុំជាសកម្មជនបរិស្ថាន មិនថាខ្ញុំថាក្លាយទៅជាបុគ្គលក្រុមហ៊ុនណាមួយក៏ដោយ»។
រីឯយុវតីដែលតែងចូលរួមទាមទារយុត្តិធម៌សង្គម កញ្ញា ស៊ុយ មិនា យល់ឃើញថា ប្រសិនបើកញ្ញាមិនចូលរួមការងារការពារបរិស្ថាន និងសង្គមទេរដ្ឋាភិបាលនឹងបន្តរឹតត្បិតសិទ្ធិសេរីភាពយុវជនកាន់តែខ្លាំង ដូច្នេះកញ្ញាមិនបោះបង់ការងារដែលជួយដល់ប្រយោជន៍ពលរដ្ឋឡើយ។
កញ្ញា ស៊ុយ មិនា៖ «ខ្ញុំនៅចងចាំពាក្យលោកបណ្ឌិត កែម ឡី ដែលលោកបាននិយាយថា ប្រសិនបើមិនធ្វើអ្វីសោះមុន និងក្រោយនឹងដល់វេនយើងហើយខ្ញុំឃើញថា នៅក្នុងសង្គមរបស់យើងជាក់ស្ដែងវាពិតជាអ៊ីចឹងមែន ។ អ៊ីចឹងបានជាខ្ញុំខិតខំចូលរួមសង្គមផ្សេងៗពីព្រោះថា ខ្ញុំអត់ចង់ឱ្យប្រជាពលរដ្ឋខ្មែរយើងរងទុក្ខជាបន្តបន្ទាប់រងនូវការគំរាមកំហែងហ្នឹងកាន់តែខ្លាំងឡើងៗ ទៀតទេហើយមិនមែនតែអ្នកដទៃរួមទាំងខ្លួនខ្ញុំផងដែរ»។
ដោយឡែក យុវជនម្នាក់ទៀតដែលតែងចូលរួមការពារបរិស្ថានជាមួយក្រុមចលនាមាតាធម្មជាតិគឺ លោក គីម ជាលីន កត់សម្គាល់ថា នៅពេលរដ្ឋាភិបាលព្យាយាមបំបិទសំឡេងយុវជនមិនឱ្យនិយាយការពិតពីបញ្ហាសង្គមយុវជនកាន់តែមានឆន្ទៈក្នុងការធ្វើកិច្ចការងារសង្គម។ លោកបន្តថា រដ្ឋាភិបាលចាប់សកម្មជនបរិស្ថាន៥នាក់ដាក់ពន្ធនាគារ នឹងមានយុវជនជាច្រើននាក់ទៀតបន្តងើបឈរនិយាយពីបញ្ហាបរិស្ថាន និងបញ្ហាសង្គម។
លោក គីម ជាលីន៖ «បើទោះជាពេលនេះយើងកំពុងធ្វើកិច្ចការងារប្រឈមនឹងគុកច្រវាក់ ប្រឈមនឹងការស៊ីអត់ស៊ីឃ្លានមែនក្ដី ការឈឺចាប់រៀងកាយ ការឈឺចាប់ផ្លូវចិត្តមួយចំនួនក្ដីប៉ុន្តែយ៉ាងហោចណាស់វាឈឺចាប់ត្រឹមតែរយៈពេល១០ឆ្នាំ ឬក៏មួយជំនាន់របស់យើង។ ប៉ុន្តែអ្វីដែលយើងខំព្យាយាមនេះយើងនឹងសម្រេចសមិទ្ធផលមួយគឺសម្រាប់ជាតិសាសន៍បន្តទៅមុខរាប់ជំនាន់ទៀត។ ដូច្នេះខ្ញុំយល់ថា គួរតែរម្លឹកឡើងវិញនៅចំណុចចាប់ផ្ដើមរបស់ខ្លួនឯងហើយប្រកាន់ខ្ចប់នៅគោលជំហរ និងរឹងត្អឹងនូវគោលជំហររបស់ខ្លួនហ្នឹង»។
រយៈពេលជាងមួយខែហើយចាប់តាំងពីតុលាការក្រុងភ្នំពេញស្ថិតក្រោមឥទ្ធិពលរបស់បក្សកាន់អំណាចបានផ្ដន្ទាទោសសកម្មជនបរិស្ថានចំនួន៥នាក់រួម មាន លោក លី ចាន់ដារ៉ាវុត លោក យីម លាងហ៊ី លោក ថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី ឱ្យជាប់ពន្ធនាគារចន្លោះពី៦ឆ្នាំទៅ ៨ឆ្នាំ ពីបទ«រួមគំនិតក្បត់ និងប្រមាថព្រះមហាក្សត្រ»ដោយសារពួកគាត់ចេញមុខការពារបរិស្ថាន។
បើទោះជាពួកគាត់កំពុងជាប់ពន្ធនាគារក្ដី ក៏ពួកគាត់នៅតែមានគោលជំហររឹងមាំ និងតែងដាស់ស្មារតីឱ្យយុវជនគិតគូរពីបញ្ហាសង្គមជានិច្ច ហើយជារឿយៗនៅពេលក្រុមគ្រួសារទៅសួរសុខទុក្ខពួកគាត់នៅពន្ធនាគារពួកគាត់តែងតែផ្ដាំផ្ញើ និងលើកទឹកចិត្តឱ្យយុវជនក្លាហានហ៊ាននិយាយការពិតពីបញ្ហានៅក្នុងសង្គម។
ប្រពន្ធសកម្មជនមាតាធម្មជាតិលោក ថុន រដ្ឋា គឺលោកស្រី ប៉ាត់ រស្មី ថ្លែងថា នៅពេលលោកស្រីទៅសួរសុខទុក្ខប្ដីនៅពន្ធនាគារប្ដីលោកស្រីតែងតែផ្ដាំផ្ញើឱ្យយុវជនបន្តការងារសង្គម និងកុំបាក់ចិត្តទឹកនៅពេលគ្មានវត្តមានរបស់ពួកគាត់។
លោកស្រី ប៉ាត់ រស្មី៖ «ខ្ញុំស្នើសុំឱ្យរដ្ឋាភិបាលក៏ដូចជាតុលាការ ហើយមន្រ្តីដែលពាក់ព័ន្ធអីគួរតែពិចារណាឡើងវិញគួរតែដោះលែងពួកគាត់ឱ្យមានសេរីភាពឡើងវិញដើម្បីចូលរួមការពារបរិស្ថានឡើងវិញដើម្បីប្រយោជន៍រួមទាំងអស់គ្នា។ ហើយក៏ផ្ដាំផ្ញើទៅយុវជនជំនាន់ក្រោយកុំឱ្យបាក់ស្បាតនៅពេលគេចាប់ពួកគាត់។ ពួកគាត់មិនអីទេពួកគាត់នៅតែបន្តឆន្ទៈរបស់ពួកគាត់ដដែល»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងយុត្តិធម៌ ជិន ម៉ាលីន ដើម្បីសុំការបកស្រាយជុំវិញបញ្ហានេះបានទេនៅថ្ងៃទី៣០ ខែសីហា ។
ទាក់ទងបញ្ហានេះ នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត មានប្រសាសន៍ថា រដ្ឋាភិបាលគួរតែបញ្ឈប់ការធ្វើទុក្ខបុកម្នេញទៅលើសកម្មជនបរិស្ថាន ហើយងាកមកលើកទឹកចិត្តពួកគាត់វិញ។ លោកបន្តថា ការចាប់សកម្មជនបរិស្ថាន និងសង្គមដាក់ពន្ធនាគារមិនបានផ្ដល់ចំណេញដល់រដ្ឋាភិបាលឡើយ។
លោក អំ សំអាត៖ «ខ្ញុំគ្រាន់តែមើលឃើញថា ប្រជាពលរដ្ឋគ្រប់រូបក៏ដូចជាយុវជនដែលចូលរួមសកម្មក្នុងការការពារបរិស្ថាន និងធនធានធម្មជាតិហ្នឹងគួរតែផ្ដល់នូវកិច្ចការពារ និងលើកទឹកចិត្តសម្រាប់គាត់មិនត្រូវធ្វើទុក្ខបុកម្នេញឬក៏ធ្វើការចោទប្រកាន់ទៅគាត់ទេ»។
ក្រុមយុវជនលើកឡើងថា ដរាបណាធនធានធម្មជាតិនៅតែរងការបំផ្លាញពីជនអ្នកមានលុយមានអំណាច និងគ្មានការស្ដារឡើងវិញនូវគម្រប់ព្រៃឈើទេ ពួកគាត់នៅតែបន្តការធ្វើការងារសង្គមបន្តទៅមុខទៀត ទោះជារងការធ្វើទុក្ខបុកម្នេញ ការយាយី និងប្រឈមការជាប់ពន្ធនាគារបែបណាក្ដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ