ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) នៅថ្ងៃទី២៧ ខែមិថុនា ចុះហត្ថលេខាលើកិច្ចព្រមព្រៀងផ្ដល់ជំនួយ ៥លានដុល្លារអាមេរិក ដល់គណៈកម្មការទន្លេមេគង្គ (MRC) ដើម្បីពង្រឹងការគ្រប់គ្រងអាងទន្លេមេគង្គ។
នាយកប្រតិបត្តិ នៃគណៈកម្មការទន្លេមេគង្គ បណ្ឌិត អានុឡាក់ គីទីឃួន (Anoulak Kittikhoun) បញ្ជាក់ក្នុងសេចក្ដីប្រកាសព័ត៌មានថា កិច្ចព្រមព្រៀងនេះ គឺបង្ហាញពីការវិលត្រឡប់របស់ USAID ក្នុងការគាំទ្រដោយផ្ទាល់ដល់ គណៈកម្មការទន្លេមេគង្គ ដើម្បីបំពេញតម្រូវការ និងអាទិភាព ដែលមាននៅក្នុងផែនការយុទ្ធសាស្ត្ររបស់ MRC ឱ្យកាន់តែប្រសើរជាងមុន។
កិច្ចព្រមព្រៀងនេះ ក្នុងគោលដៅពង្រឹងការគ្រប់គ្រងទឹក ពន្លឿនការអភិវឌ្ឍប្រកបដោយចិរភាព កសាងភាពធន់នឹងអាកាសធាតុ និងលើកកម្ពស់សេដ្ឋកិច្ច ដើម្បីសម្រេចបានយុទ្ធសាស្ត្រអភិវឌ្ឍន៍អាងទន្លេមេគង្គ។ យុទ្ធសាស្ត្រនេះ ក៏នឹងផ្ដល់ជំនួយបច្ចេកទេស ដល់ប្រទេសជាសមាជិករបស់គណៈកម្មការទន្លេមេគង្គ (MRC) រួមមាន កម្ពុជា ឡាវ ថៃ និងវៀតណាម ដោយកែលម្អបច្ចេកវិទ្យា និងឧបករណ៍សម្រាប់ការគ្រប់គ្រងអាងទន្លេ តាមរយៈប្រព័ន្ធចាប់សញ្ញាពីចម្ងាយ និងប្រព័ន្ធផ្កាយរណប។ បន្ថែមពីនេះ គណៈកម្មការទន្លេមេគង្គ នឹងប្រើប្រាស់ទិន្នន័យ ដែលប្រមូលបាន ដើម្បីពិនិត្យមើលពីផលប៉ះពាល់ នៃទឹកជំនន់ និងគ្រោះរាំងស្ងួត នាពេលបច្ចុប្បន្ន។
កិច្ចព្រមព្រៀងនេះ ក៏បានរួមបញ្ចូលភាគីពាក់ព័ន្ធនានា ដូចជា សហគមន៍មូលដ្ឋាន អង្គការសង្គមស៊ីវិល វិស័យឯកជន និងដៃគូអភិវឌ្ឍន៍នានា ដើម្បីចូលរួមក្នុងកិច្ចពិភាក្សា ដែលជាប្រយោជន៍របស់ទន្លេមេគង្គ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។