គណៈកម្មការ​ទន្លេមេគង្គ​ជំរុញ​ឱ្យ​មាន​ការ​ដោះដូរ​ទិន្នន័យ​និង​ព័ត៌មាន​កម្រិត​ទន្លេ​មេគង្គ

ដោយ ខែ សុណង
2021-07-03
Share
គណៈកម្មការ​ទន្លេមេគង្គ​ជំរុញ​ឱ្យ​មាន​ការ​ដោះដូរ​ទិន្នន័យ​និង​ព័ត៌មាន​កម្រិត​ទន្លេ​មេគង្គ ទិដ្ឋភាព​ទន្លេមេគង្គនៅកម្ពុជា​ នារដូវប្រាំង។
Photo Courtesy of MRC

គណៈកម្មការ​ទន្លេមេគង្គ (ហៅ​កាត់​MRC) ជំរុញ​ឱ្យ​មាន​ការ​ដោះដូរ​ទិន្នន័យ និង​ព័ត៌មាន​កាន់តែ​ទូលាយ​ជាង​មុន​ដើម្បី​ឱ្យ​ប្រសើរ​ឡើង​នូវ​ការគ្រប់គ្រង​ធនធាន​ទឹក​ក្នុង​អាង​ទន្លេ​មេគង្គ។

មន្ត្រី​សង្គម​ស៊ីវិល​ធ្វើការ​ពាក់ព័ន្ធ​ទន្លេ​មេគង្គ​ថា សង្កេត​ឃើញ​ថា ការ​ដោះដូរ​ទិន្នន័យ​នៃ​ប្រទេស​សមាជិក​(MRC ) រួម​ទាំង​ប្រទេស​ចិន​ផង​នោះ​មិន​ទាន់​ទូលំទូលាយ​នៅឡើយ​ទេ ដែល​បញ្ហា​នេះ​អាច​បង្ក​ការ​គំរាមកំហែង​ដល់​ធនធាន​ទឹក​ទន្លេ​មេគង្គ និង​សហគមន៍​តាម​ដង​ទន្លេមេគង្គ។

គណៈកម្មការ​ទន្លេមេគង្គ​(​ហៅ​កាត់​MRC) លើកទឹកចិត្ត​ឱ្យ​ប្រទេស​ប្រទេស​ជា​សមាជិក និង​ដៃគូ​សន្ទនា​ចែករំលែក​ទិន្នន័យ​ប្រតិបត្តិការ និង​ស្វែងយល់​ឱ្យ​ស៊ីជម្រៅ​នៃ​ការប្រែប្រួល​ថ្មី​នៃ​រំហូរ​ទន្លេ​មេគង្គ និង​ដោះស្រាយ​ផល​ប៉ះពាល់​ដែល​អាច​កើតមាន​លើ​សហគមន៍​តាម​អាង​ទន្លេ​នេះ​។ នាយក​ប្រតិបត្តិ​នៃ​លេខាធិការដ្ឋាន​MRC លោក​បណ្ឌិត អាន ពេជ្រហត្ថដា លើកឡើង​ក្នុង​របាយការណ៍​ដែល​ចេញ​ផ្សាយ​កាល​ពី​ថ្ងៃ​ទី​៣០ ខែ​មិថុនា ថា ការគ្រប់គ្រង​អាង​ទន្លេមេគង្គ​ឱ្យ​កាន់តែ​ប្រសើរ និង​កិច្ច​សហប្រតិបត្តិការ​ល្អ ទាំង​ប្រទេស​សមាជិក និង​ប្រទេស​ចិន គួរតែ​ជូន​ដំណឹង​នៃ​ការប្រែប្រួល​សំខាន់ ប្រតិបត្តិការ​នៃ​គម្រោង​ទំនប់​វារីអគ្គិសនី និង​ចែករំលែក​ព័ត៌មាន​ទាំងនេះ​ជាមួយ​លេខាធិការដ្ឋាន​MRC​។ លោក​បន្ត​ថា ការ​ផ្ដល់​ព័ត៌មាន​ទាំងនេះ​មាន​សារៈសំខាន់ ខណៈ​ប្រតិបត្តិការ​នេះ​អាច​ឱ្យ​កម្រិត​ទឹក​កើនឡើង ឬ​ធ្លាក់ចុះ​ខុស​ប្រក្រតី។

របាយការណ៍​គណៈកម្មការ​ទន្លេមេគង្គ​ឱ្យ​ដឹង​ថា ក្នុង​អំឡុង​រដូវប្រាំង​ចាប់​ពី​ខែវិច្ឆិកា ឆ្នាំ​២០២០ ដល់​ខែ​ឧសភា ឆ្នាំ​២០២១ មានការ​ប្រែប្រួល​កម្រិត​ទឹក​នៅ​តំបន់​ផ្នែក​ខាងលើ​នៃ​ទន្លេមេគង្គ​ក្នុង​ប្រទេស​ឡាវ និង​ប្រទេស​ថៃ និង​កម្រិត​ទឹក​ទាប​ដែល​បាន​ស្តុក​ទុក​ក្នុង​បឹង​ទន្លេសាប​ផង​ដែរ​។ ប្រភព​ដដែល​បន្ត​ថា បរិមាណ​ភ្លៀង​ធ្លាក់​ក្នុង​មេសា និង​ខែ​ឧសភា មាន​កម្រិត​ខ្ពស់​ជាងគេ​បង្អស់​ក្នុង​កំណត់ត្រា​នៃ​រយៈពេល​១៨​ឆ្នាំ​ចុង​ក្រោយនេះ ប៉ុន្តែ​ទោះ​បែបនេះ​ក្ដី រំហូរ​ទឹកទន្លេ​មិនបាន​កើន​ឡើង​គួរ​ឱ្យ​កត់​សម្គាល់​ឡើយ។

របាយការណ៍​ដដែល​លើកឡើង​ទៀត​ថា ផល​ប៉ះពាល់​នៃ​ទំ​បន់​វារីអគ្គិសនី ធ្វើ​ឱ្យ​កម្រិត​ទឹក​ប្រែប្រួល​យ៉ាង​រហ័ស ដែល​បញ្ហា​នេះ នឹង​ធ្វើ​ឱ្យ​ប៉ះពាល់​ដល់​ប្រព័ន្ធ​អេកូឡូស៊ី​ទន្លេ ស្ថិរភាព​ច្រាំង​ទន្លេ និង​នាវាចរណ៍​ជាដើម។

ពលរដ្ឋ​អាស្រ័យ​ផល​លើទឹក​ទន្លេមេគង្គ​របស់​ខេត្តកំពង់ចាម លោក អ៊ាង ណាំ ប្រាប់​ថា រូបលោក និង​ពលរដ្ឋ​ជា​អ្នក​ចិញ្ចឹម​ត្រី​ក្នុង​តំបន់​នេះ​បាន​បោះបង់​របរ​ចិញ្ចឹម​ត្រី​ព្រោះ​ទឹកទន្លេ​មេគង្គ​ចុះរាក​ជាច្រើន​ឆ្នាំ និង​បញ្ហា​ត្រី​គ្មាន​ទីផ្សារ​។ ពលរដ្ឋ​រូប​នេះ​ឱ្យ​ដឹង​ថា ទោះ​នៅ​រយៈពេល​ចុងក្រោយ​នេះ​មាន​ភ្លៀង​ធ្លាក់​ញឹកញាប់​ក្ដី ប៉ុន្តែ​ខ្សែទឹក​ខាងលើ​មិន​ហូរ​ទម្លាក់​ទឹក​ចុះ​មក​ទេ​ដែល​ឱ្យ​តំបន់​លោក​នៅតែ​មាន​កម្រិត​ទឹក​ទាប​ដដែល។ កសិករ​រូប​នេះ​ឱ្យ​ដឹង​ទៀត​ថា កន្លង​មក​លោក​ធ្លាប់​ចូលរួម​ប្រជុំ​ជាមួយ​តំណាង គណៈកម្មការ​ទន្លេមេគង្គ​ប៉ុន្មាន​ដង​ដែរ ប៉ុន្តែ​លោក​សង្កេត​ឃើញ​ថា គណៈកម្មការ​ទន្លេមេគង្គ​មិនទាន់​អាច​បង្ហាញ​ដំណោះស្រាយ​រួម​ដើម្បី​ដោះស្រាយ​បញ្ហា​នេះ​នៅឡើយ​ទេ។ «»

ប៉ុន្មាន​ឆ្នាំ​ចុងក្រោយ​នេះ កម្ពុជា​បាន​ក្លាយ​ជា​ប្រទេស​មួយ​ដែល​រងគ្រោះ​ដោយ​ទឹកជំនន់​ធ្ងន់ធ្ងរ​ទាំង​ជំនន់​ទឹកភ្លៀង និង​ជំនន់​ទន្លេមេគង្គ ប៉ុន្តែ​អ្នកឃ្លាំមើល​កត់​សម្គាល់​ថា រដ្ឋាភិបាល​កម្ពុជា នៅតែ​មិន​ទាន់​បាន​ត្រៀមលក្ខណៈ​ឆ្លើយតប​គ្រប់គ្រាន់​នៅ​ឡើយ​ទេ ក្នុង​ករណី​មាន​ទឹកជំនន់​ដែល​អាច​កើត​ឡើង​ភ្លាមៗ។

អ្នកជំនាញ​អភិបាលកិច្ច​ទឹក លោក ហែម ឧត្តម សង្កេត​ឃើញ​ថា រយៈពេល​ពីរ​ឆ្នាំ​ចុងក្រោយ​មានការ​ជជែក​គ្នា​ច្រើន ក្រោយ​បណ្ដា​ប្រទេស​ជាប់​ដង​ទន្លេមេគង្គ​ជួប​គ្រោះ​មហន្តរាយ បញ្ហា​ខ្លះ​ទឹក និង​ទឹក​មក​មិន​ទៀង​ជាដើម​។ ទោះ​យ៉ាងណា​លោក​សង្កេត​ឃើញ​ថា ប្រទេស​ចិន​មិន​បាន​ផ្ដល់​ទិន្នន័យ​កម្រិត​ទឹក កម្ពស់ បរិមាណ​ទឹក បាន​ទូលំទូលាយ​នោះ​ឡើយ​។ លោក​បន្ត​ថា ចិន​ក៏​មិនបាន​ផ្ដល់​ព័ត៌មាន​នៃ​ដំណើរការ​នៃ​ទំនប់​វារីអគ្គិសនី​របស់​ខ្លួន​មក​គណៈកម្មការ​ទន្លេមេគង្គ​ដែរ​។ លោក​កត់សម្គាល់​ទៀត​ថា សូម្បី​ប្រទេស​ដែល​ជា​សមាជិក​នៃ​គណៈកម្មការ​ទន្លេមេគង្គ​ក៏​មិនសូវ​ចែករំលែក​ព័ត៌មាន​ទាំង​នោះ​បាន​ទូលំទូលាយ​នោះ​ដែរ។ «»

គណៈកម្មការ​ទន្លេមេគង្គ មាន​ប្រទេស​នៅ​តាម​ដង​ទន្លេមេគង្គ​ចំនួន ៤ ជា​សមាជិក ក្នុង​នោះ​មាន កម្ពុជា ឡាវ ថៃ និង​វៀតណាម ហើយ​ពុំ​មាន​សមាជិកភាព​របស់​ប្រទេស​ចិន និង​ប្រទេស​មីយ៉ាន់ម៉ា ឬ​ភូមា​ចូលរួម​នោះ​ទេ​។ នៅ​ឆ្នាំ​២០១៥ ប្រទេស​ចិន​បាន​ផ្ដួចផ្ដើម និង​បង្កើត​ឲ្យ​មាន​យន្តការ​ថ្មី​មួយ​ទៀត ដើម្បី​ដោះស្រាយ​បញ្ហា​របស់​ប្រទេស​ក្នុង​តំបន់​ទន្លេ​មេគង្គ ដែល​ចិន​ដាក់​ឈ្មោះ​ថា យន្តការ​កិច្ច​សហ​ប្រតិបត្តិការ​មេគង្គ​-​ឡាន​ឆាង ដោយ​មាន​ប្រទេស​៦​ជា​សមាជិក​។ យន្តការ​ថ្មី​របស់​ចិន​នេះ រង​ការ​រិះគន់​ថា អាច​ជា​ផ្នែក​មួយ​នៃ​យុទ្ធសាស្ត្រ​របស់​ចិន​ដើម្បី​គ្រប់គ្រង​ទន្លេមេគង្គ និង​ប្រើប្រាស់​ឥទ្ធិពល​របស់​ខ្លួន​ក្នុង​ការ​ដោះស្រាយ​វិវាទ​នានា​នៅ​ក្នុង​តំបន់​ទន្លេ​មេគង្គ ដែល​កើត​ចេញ​ពី​ការ​សាងសង់ ឬ​អភិវឌ្ឍ​ទំនប់​វារីអគ្គិសនី​នៅ​លើ​អាង​ទន្លេមេគង្គ។

ជុំវិញ​បញ្ហា​នេះ​អាស៊ីសេរី​បាន​ព្យាយាម​សុំ​ការ​អត្ថាធិប្បាយ​ពី​មន្ត្រី​ទំនាក់ទំនង​ផ្នែក​ព័ត៌មាន​នៃ​គណៈកម្មការ​ទន្លេមេគង្គ លោក មាស សុភ​ក្ត្រ តាម​ប្រព័ន្ធ​តេឡេក្រាម ប៉ុន្តែ​លោក​ទាន់​ឆ្លើយ​​តប​មក​នៅ​ឡើយ​ទេ គិត​ត្រឹម​ថ្ងៃទី​០២ ខែ​កក្កដា។

មន្ត្រីជាន់ខ្ពស់​ក្រសួង​ការបរទេស​អាមេរិក បាន​សហការ​ជាមួយ​ភាគី​កម្ពុជា រៀបចំ​កិច្ចប្រជុំ​ប្រចាំឆ្នាំ​លើកដំបូង​ថ្នាក់​ឧត្តម​មន្ត្រី​នៃ​កិច្ច​សហប្រតិបត្តិការ​ភាពជា​ដៃគូ​រវាង​សហរដ្ឋអាមេរិក និង​តំបន់​ទន្លេ​មេគង្គ (MUSP) កាល​ពី​ថ្ងៃទី២៩ មិថុនា។ ប្រទេស​ដៃគូ​ទាំង​៦ ក៏​បាន​ពិភាក្សា​អំពី​ការ​ចាត់ចែង​ធនធាន​ទឹក​ប្រកប​ដោយ​ចីរភាព ការ​គ្រប់គ្រង​ធនធាន​ធម្មជាតិ និង​កិច្ចការពារ​បរិស្ថាន ព្រមទាំង​ការ​ប្រយុទ្ធ​ប្រឆាំង​ទៅ​នឹង​ការ​គំរាមកំហែង​ផ្នែក​សន្តិសុខ​មិនមែន​ប្រពៃណី​ទាំងឡាយ រួម​ទាំង​ការ​ជួញដូរ​មនុស្ស សត្វព្រៃ ឈើប្រណិត គ្រឿងញៀន និង​ការ​ជួញដូរ​អាវុធ ជាដើម។

អ្នកជំនាញ​អភិបាលកិច្ច​ទឹក លោក ហែម ឧត្តម លោក​ចង់​ឃើញ​គណៈកម្មការ​ទន្លេមេគង្គ ហ៊ាន​បង្ហាញ​ជំហរ​របស់​ខ្លួន​ឲ្យ​បាន​ច្បាស់លាស់​បន្ថែម​ទៀត​ពាក់ព័ន្ធ​នឹង​ការស្រាវជ្រាវ​បែប​វិទ្យាសាស្ត្រ និង​បច្ចេកទេស​អំពី​បញ្ហា​វិបត្តិ​ទឹក​ក្នុង​តំបន់​ទន្លេមេគង្គ​នេះ តទល់​នឹង​ប្រទេស​ចិន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល