ប្រជាសហគមន៍ព្រៃឡង់ថា ក្រសួងបរិស្ថានបើកដៃឲ្យក្រុមហ៊ុនវៀតណាមកាប់ឈើក្នុងព្រៃឡង់
2022.05.09
គំនរចម្រៀកឈើ ដែលក្រុមសហគមន៍ព្រៃឈើឃើញនៅក្នុងតំបន់ព្រៃឡង់ ពេលចុះល្បាត កាលពីថ្ងៃទី៤ ខែកុម្ភៈ ឆ្នាំ២០២២។
រូប៖ ពលរដ្ឋ
ប្រជាសហគមន៍ការពារព្រៃឡង់អះអាងថា ក្រសួងបរិស្ថានមានចេតនា បើកដៃឲ្យមានសកម្មភាពកាប់ឈើទ្រង់ទ្រាយធំ ក្នុងដែនជម្រកសត្វព្រៃឡង់ ក្នុងខេត្តព្រះវិហារ និងខេត្តស្ទឹងត្រែង ដោយគ្មានការទប់ស្កាត់ជាច្រើនខែមកហើយ បើទោះពួកគាត់បានផ្តល់ព័ត៌មាន និងបង្ហោះរូបភាពតាមបណ្ដាញសង្គមបង្ហាញពីសកម្មភាពកាប់ឈើជាច្រើនក្តី។
ចំណែកសកម្មភាពកាប់ឈើមូលធំៗ ដែលប្រព្រឹត្តឡើងដោយក្រុមហ៊ុនវៀតណាមភីអ៊ិនធី (PNT Co., Ltd.) នៅតែបន្តកើតមានដដែលៗ ពុំមានអាជ្ញាធរណាចុះបង្ក្រាបនៅឡើយទេជិតកន្លះឆ្នាំមកហើយ។
អ្នកសម្របសម្រួលសហគមន៍ព្រៃឡង់ខេត្តព្រះវិហារ លោក ស្រី ថី ប្រាប់វិទ្យុអាស៊ីសេរីនៅថ្ងៃទី៩ ខែឧសភាថា ក្រសួងបរិស្ថាន កំពុងជិះសេះលែងដៃ ដោយមិនខ្វល់ ពីការរិះគន់ទាំងឡាយ ចំពោះករណីកាប់ឈើទ្រង់ទ្រាយធំពីសំណាក់ ក្រុមហ៊ុនវៀតណាមមួយនេះ។
លោកថា បើទោះបីជា ពួកលោកបានផ្តល់ព័ត៌មាន និងបង្ហោះសារ បង្ហាញពីឧក្រិដ្ឋកម្មបំផ្លាញព្រៃឡង់ជាច្រើនក្តី ក៏ក្រសួងបរិស្ថានមិនអើពើដែរ។ លោកបន្តថា បច្ចុប្បន្ន ក្រុមហ៊ុនភីអ៊ិនធី នៅតែបន្តបញ្ជូនកម្លាំងកម្មកររាប់សិបនាក់ប្រើប្រាស់គោយន្ត និងរណាយន្ត សម្រុកកាប់បំផ្លាញព្រៃឈើក្នុងដែនជម្រកសត្វព្រៃដោយគ្មានការទប់ស្កាត់៖ «ក្រុមហ៊ុនវៀតណាម ភីអ៊ិនធី បន្តកាប់ឈើ អត់មានទប់ស្កាត់ទេ ជិះសេះលែងដៃដដែលៗ។ រដូវការនេះ គេកំពុងរកសំឡេងគាំទ្របោះឆ្នោត ឥលូវមន្ត្រីទៅធ្វើអាហ្នឹងវិញទេ»។
វិទ្យុអាស៊ីសេរីមិនអាចទាក់ទងសុំការបំភ្លឺរឿងនេះ ពីក្រុមហ៊ុនវៀតណាម ភីអ៊ិនធី បានទេនៅថ្ងៃទី០៩ ខែឧសភា ដោយទូរស័ព្ទចូលជាច្រើនដងតែគ្មានអ្នកលើក។
ចំណែកអភិបាលខេត្តព្រះវិហារ លោក ប្រាក់ សុវណ្ណ និងអ្នកនាំពាក្យក្រសួងបរិស្ថាន លោក នេត្រ ភក្ត្រា ក៏មិនអាចទាក់ទងបានដែរ។
រីឯនៅខេត្តស្ទឹងត្រែងឯណោះវិញ សកម្មភាពដឹកឈើតាមគោយន្ត និងម៉ូតូ ចេញពីដែនជម្រកសត្វព្រៃឡង់ ឆ្លងកាត់ឃុំកាំងចាម ស្រុកថាឡាបរិវ៉ាត់ នៅតែបន្តកើតមានច្រើន។
សមាជិកសហគមន៍ការពារព្រៃឡង់ លោក គង់ រី ថ្លែងថា បច្ចុប្បន្នអាជ្ញាធរខេត្តស្ទឹងត្រែងរវល់តែរឿងឃោសនាអូសទាញប្រជាពលរដ្ឋឱ្យបោះឆ្នោតឱ្យគណបក្សកាន់អំណាចដោយបណ្តែតបណ្តោយឱ្យមានសកម្មភាពកាប់ឈើ ក្នុងព្រៃឡង់កើនឡើងជាងសព្វមួយដង។ លោកថា ស្ទើរជាងរៀងរាល់ថ្ងៃ មានម៉ូតូ យ៉ាងហោចណាស់ ៥០គ្រឿង និងគោយន្តដឹកឈើ ៣០គ្រឿង ចេញពីដែនជម្រកសត្វព្រៃឡង់ ដោយគ្មានការអនុវត្តច្បាប់។
ក្រុមហ៊ុន ភីអ៊ិនធី(PNT Co., Ltd.) ទទួលបានដីសម្បទានសេដ្ឋកិច្ចពីរដ្ឋាភិបាលទំហំ ៧.៩០០ហិកតារ នៅស្រុករវៀង ខេត្តព្រះវិហារ កាលពីឆ្នាំ២០១០ ក្រោមកិច្ចសន្យារយៈពេល ៧០ឆ្នាំ។
ក្នុងកិច្ចសន្យាក្រុមហ៊ុននេះវិនិយោគដំណាំខ្លឹមច័ន្ទ និងដំណាំរួមផ្សំផ្សេងៗ ទៀត ប៉ុន្តែប្រជាសហគមន៍អះអាងថា ក្រុមហ៊ុនមិនបានដាំដុះតាមកិច្ចសន្យានោះទេ ដោយផ្ដោតលើការកាប់ឈើទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- តំណាងសហគមន៍ខ្មែរ ជំរុញឲ្យអាជ្ញាធរអូស្ត្រាលី ស៊ើបអង្កេតប្រភពលុយរបស់លោក ហ៊ុន តូ
- កម្ពុជាគួររក្សាភាពស្ងៀមស្ងាត់ និងបង្ហាញជំហរអព្យាក្រឹត្យក្នុងរឿងដំណើរទស្សនកិច្ចរបស់ប្រធានរដ្ឋសភាអាមេរិកទៅកោះតៃវ៉ាន់
- លោក ហ៊ុន សែន ប្រកាសគោលជំហរឱ្យកូនចៅលោកបន្តតំណែងនាយករដ្ឋមន្ត្រីតជំនាន់
- ប្រជាពលរដ្ឋ និងសង្គមស៊ីវិលបារម្ភពីការឈូសឆាយព្រៃឈើនៅតំបន់ភ្នំតាម៉ៅ
- លោក ហ៊ុន សែន លុបចោលគម្រោងអភិវឌ្ឍនៅភ្នំតាម៉ៅទាំងអស់ ហើយឱ្យក្រុមហ៊ុនដាំដើមឈើឡើងវិញ
