ប្រជាពលរដ្ឋមួយចំនួនរស់នៅក្នុងស្រុកឯកភ្នំខេត្តបាត់ដំបងត្អូញត្អែរពីបញ្ហាគ្មានទឹកប្រើប្រាស់គ្រប់គ្រាន់នៅរដូវវស្សា ធ្វើឱ្យប៉ះពាល់ជីវភាពគ្រួសារ និងរំខានដល់ការរស់នៅប្រចាំថ្ងៃ។ ប៉ុន្តែអាជ្ញាធរខេត្តនេះអះអាងថា មន្ត្រីជំនាញផ្នែកធនធានទឹកបានបើកទំនប់បង្ហូរទឹកឱ្យពលរដ្ឋរួចហើយ។
ប្រជាពលរដ្ឋរស់នៅខេត្តបាត់ដំបងប៉ែកខាងក្រោមខ្សែទឹកស្ទឹងសង្កែ ជំរុញឱ្យអាជ្ញាធរពាក់ព័ន្ធគិតគូរពីបញ្ហាខ្វះទឹកប្រើប្រាស់ដែលធ្វើឱ្យពួកគាត់បាត់បង់ប្រាក់ចំណូលពីការនេសាទ និងការដាំដំណាំ។ ការត្អូញត្អែរនេះគឺបន្ទាប់ពីទឹកនៅក្នុងស្ទឹងសង្កែរីងស្ងួតអស់ ដែលធ្វើឱ្យពួកគាត់មិនអាចនេសាទ និងស្រោចស្រពដំណាំ ក្រោយអាជ្ញាធរស្រុកនេះបើកច្រកទ្វារបង្ហូរទឹកតិចតួចនៅឡើយ។
ពលរដ្ឋនៅភូមិបាក់ព្រា ស្រុកឯកភ្នំ លោកស្រី សេង ថឹក ប្រាប់វិទ្យុអាស៊ីសេរីនៅថ្ងៃទី៧ កក្កដា ថា លោកស្រីមិនទាន់ឃើញទឹកហូរមកដល់កន្លែងលោកស្រីរស់នៅនោះទេ ដោយសារអាជ្ញាធរបើកទ្វារទឹកសាលាតាអនតូចពេក ដូច្នេះមិនអាចផ្គត់ផ្គង់ពលរដ្ឋដែលរស់នៅខាងក្រោមខ្សែទឹកស្ទឹងសង្កែបានទេ។ លោកស្រីបន្តថា សព្វថ្ងៃនេះជីវភាពលោកស្រីគឺពឹងលើប្រភពទឹកស្ទឹងសង្កែទាំងស្រុងដោយសារតែ ប្ដីលោកស្រីជាអ្នកនេសាទ ដូច្នេះបើគ្មានទឹកទេគ្រួសារលោកស្រីក៏បាត់បង់ប្រាក់ចំណូលដែរ។
លោកស្រី សេង ថឹក៖ «លែងទឹកមកផង ពីព្រោះនៅនេះដាច់ទឹកអស់ហើយចង់ឡើងទៅបាត់ដំបងក៏ឡើងទៅមិនរួច ជិះតែម៉ូតូក៏ទៅមិនរួច ភ្លៀងមកបែកភក់វល់ហ្នឹងឯងហើយ ទៅស្មាច់ក៏ទៅមិនកើត គោកស្ទឹងអស់រលីងប្រលែងទឹកមកឱ្យអ្នកនៅនេះរស់ផង អត់ទឹកយ៉ាប់ហើយ»។
លោកស្រី សេង ថឹក បញ្ជាក់ថា ពលរដ្ឋរស់នៅភូមិបាក់ព្រាស្ទើរតែ៨០ភាគរយហើយដែលចំណាកស្រុកដើម្បីរកប្រាក់ចំណូលផ្គត់ផ្គង់ជីវភាពគ្រួសារ និងសងបំណុលធនាគារ។ លោកស្រីបន្តថា ពលរដ្ឋភាគច្រើននៅភូមិបាក់ព្រានេះគឺរំពឹងលើការនេសាទតាមដងស្ទឹងសង្កែ ដើម្បីចិញ្ចឹមជីវិត ហើយរយៈពេលជាង២ឆ្នាំមកនេះពលរដ្ឋបោះបង់មុខរបរនេសាទដោយសារតែនៅតាមស្ទឹងលែងសូវសម្បូរត្រីដូចពីមុន។
ដោយឡែកអាជីវករលក់នំចំណីតាមទូក លោកស្រី ជា ដា ថ្លែងថា ជិត២សប្តាហ៍មកនេះលោកស្រីមិនបានលក់ដូរនំចំណីនៅតាមទូកដូចលើកមុននោះទេ ដោយសារតែគ្មានទឹកដើម្បីធ្វើដំណើរ ដែលធ្វើឱ្យរំខានដល់ការរកប្រាក់ចំណូលរបស់លោកស្រី។ លោកស្រីបន្តថា បើទោះបីអាជ្ញាធរបើកបង្ហូរទឹកក៏ដោយក៏ស្ទឹងសង្កែនៅតែគ្មានទឹក ពីព្រោះទំនប់ទឹករណបធំ គឺទំនប់ទឹកកង្ហតនៅប៉ែកខាងលើខ្សែទឹកស្ទឹងសង្កែ ប៉ុន្តែអាជ្ញាធរមិនព្រមបើកបង្ហូរទំនប់ ទឹកមួយនេះនោះទេ។
លោកស្រី ជា ដា៖ «វេទនាខ្លាំងណាស់អ្នកនៅខាងក្រោមណាមួយអត់ទឹកយើងប្រើប្រាស់ប្រចាំថ្ងៃទឹកដាំបាយហូប ទឹកមុជទឹកអីអ៊ីចឹងខ្វះខាតច្រើនណាស់ទាល់តែគាត់បើកគោយន្តមកខាងលើណេះឆ្ងាយដើម្បីបូមទឹកយកទៅប្រើប្រាស់»។
លោកស្រី ជា ដា បញ្ជាក់ថា មូលហេតុដែលអាជ្ញាធរនៅស្រុកបាណន់មិនព្រមបើបង្ហូរទឹកដោយសារតែទុកទឹកនោះឱ្យប្រជាពលរដ្ឋនៅខាងលើស្ទឹងប្រើប្រាស់សម្រាប់ធ្វើស្រែចម្ការ។
រីឯពលរដ្ឋ ឃុំព្រៃចាស់ លោក អម គឹមឈិត ព្រួយបារម្ភចំពោះស្ត្រីមានផ្ទៃពោះ និងមនុស្សចាស់ជរាដែលត្រូវទៅមន្ទីរពេទ្យ ដោយសារតែស្ទឹងគ្មានទឹកមិនអាចធ្វើដំណើរតាមផ្លូវទឹកបាន ហើយជាពិសេសគឺផ្លូវគោកមានគ្រលុកធំៗ និងរអិលខ្លាំងពិបាកធ្វើដំណើរ។ លោកបន្តថា លោកនឹងចំណាកស្រុកដើម្បីរកការងារធ្វើ ពីព្រោះលោកមិនអាចនេសាទរកប្រាក់ចំណូលបានទេ។
លោក អម គឹមឈិត៖ «អត់ទឹកនៅខាងក្រោមប៉ះពាល់ដល់ជីវភាពអ្នកនៅក្នុងភូមិច្រើន ណាមួយធ្វើដំណើរទៅណាទៅណីវាយ៉ាប់ យ៉ាប់អាអ្នកឈឺអ្នកជាអ្នកថ្កាត់ឯណេះជិះម៉ូតូក៏ជិះវាមិនស្រួល យើងបើកកាណូតទឹកវាគោកអស់ពីស្ទឹង អ៊ីចឹងមក វាមិនរួចយ៉ាប់អ្នកពោះធំ ទឹកវាអត់មកយ៉ាប់អ្នកមកមណ្ឌលសុខភាពអីហ្នឹងឯង»។
វិទ្យុអាស៊ីសេរីមិនអាចទាក់ទង ប្រធានមន្ទីរធនធានទឹក និងឧតុនិយម ខេត្តបាត់ដំបង លោក ឡុង ផលគុណ ដើម្បីសុំអត្ថាធិប្បាយបានទេនៅថ្ងៃទី៧ កក្កដា ។ ក៏ប៉ុន្តែ អភិបាលស្រុកឯកភ្នំ លោក ម៉ិល សុផល អះអាងថា លោក និងមន្ត្រីធនធានទឹកសហការគ្នាបើកបង្ហូរទឹកឱ្យពលរដ្ឋប្រើប្រាស់ហើយប៉ុន្តែអាចមិនទាន់ដល់ដោយសារតែមិនអាចបើកទ្វារធំពេកទេ។ លោកបន្តថា ដោយសារឆ្នាំនេះជួបគ្រោះរាំងស្ងួតបានជាមិនអាចផ្គត់ផ្គង់ទឹកឱ្យពលរដ្ឋបានប្រើប្រាស់គ្រប់គ្រាន់។
លោក ឡុង ផលគុណ៖ «រឿងទឹកនៅលើអ្នកជំនាញគាត់អ្នកកាន់ទ្វារទឹក អ៊ីចឹងណាស់ហើយបច្ចេកទេសបើកទឹកមិនអាចបើកភ្លាមគំហុកភ្លាមបានទេ តាមខ្ញុំពិនិត្យទៅទាល់តែបើកសន្សឹមៗអ៊ីចឹងទឹកកាលណាយើងបើកគំហុកទៅវាមានបញ្ហាអីខ្លះទី១ ទី២ទឹកយើងនៅខាងលើក៏វានៅតិចដែរ យើងបើកសន្សំសំចៃការបើកឱ្យប្រើប្រាស់ហ្នឹងមិនមែនបើកវឹបទៅបើគាត់ប្រើមិនអស់វាហូរបុកទៅទន្លេចាក់ចោលអាដែល»។
ទោះបីជាអភិបាលស្រុកឯកភ្នំ លោក ម៉ិល សុផល លើកឡើងបែបនេះក្ដីក៏ប្រជាពលរដ្ឋអះអាងចាប់តាំងពីមានទំនប់ទឹកសាលាតាអននេះពលរដ្ឋជួបផលវិបាកខ្វះខាតទឹកនេសាទពីព្រោះរាល់ឆ្នាំទំនប់ទឹកនៅខាងលើតែងបើកមួយឆ្នាំយ៉ាងហោចក៏២ដងដែរ ដើម្បីឱ្យពលរដ្ឋមានទឹកប្រើប្រាស់។
ជុំវិញបញ្ហានេះមន្ត្រីអ្នកសម្របសម្រួលអង្គការសិទ្ធិមនុស្សលីកាដូ (LICADHO) ប្រចាំខេត្តបាត់ដំបង លោក អ៊ិន គង់ជិត មានប្រសាសន៍ថា អាជ្ញាធរពាក់ព័ន្ធគួរតែចុះទៅត្រួតពិនិត្យបញ្ហានេះ នៅទីតាំងដែលពលរដ្ឋកំពុងជួបបញ្ហាខ្វះខាតទឹក ដើម្បីធ្វើការវាយតម្លៃពីផលប៉ះពាល់ និងរកដំណោះស្រាយជូនពលរដ្ឋ។ លោកបន្តថា នៅខេត្តបាត់ដំបងមានទំនប់ទឹកច្រើនដូច្នេះមិនគួរណាខ្វះខាតទឹកប្រើប្រាស់នៅរដូវវស្សានោះទេ ។ លោកថា អាជ្ញាធរពាក់ព័ន្ធជាពិសេសមន្ត្រីធនធានទឹកគួរតែបើកបង្ហូរទឹកពីខាងលើមកចៀសវាងធ្វើឱ្យពលរដ្ឋបាត់បង់ចំណូល។
លោក អ៊ិន គង់ជិត៖ «ត្រូវតែបើកទ្វារទឹកផ្នែកខាងលើដូចទំនប់ទឹកពហុបំណងសេកសក នៅទំនប់ទឹកនៅកង្ហត និងទំនប់ទឹកនៅសាលាតាអន ករណីហ្នឹងខាងមន្ទីរធនធានទឹកអត់ត្រូវស្តុកទឹកនៅផ្នែកខាងលើទេ យើងមើលខាងក្រោមក៏ត្រូវការទឹកប្រើប្រាស់ដែរ ហើយនៅផ្នែកខាងលើបច្ចុប្បន្នក៏ទទួលទឹកភ្លៀងមកដែរ នៅអាងទឹកទំនប់ពហុបំណងសេកសកហ្នឹងគឺមានប្រភព២ស្ទឹងមកពីខាងលើ»។
ប្រជាពលរដ្ឋ និងសង្គមស៊ីវិលយល់ឃើញស្រដៀងគ្នាថា កត្តាដែលនាំឱ្យមានការខ្វះខាតទឹកនៅក្នុងស្ទឹងសង្កែ គឺបណ្ដាលមកពីការគ្រប់គ្រងបរិស្ថាន និងធនធានទឹករបស់អាជ្ញាធរមិនបានល្អបង្កឱ្យខ្វះខាតទឹកប្រើប្រាស់ទាំងរដូវប្រាំង និងរដូវវស្សា ។ ពួកគាត់ស្នើឱ្យអាជ្ញាធរ ពង្រឹងការធ្វើការងាររបស់ខ្លួននៅតាមថ្នាក់មូលដ្ឋានដើម្បីអាចឱ្យពលរដ្ឋមានលទ្ធភាពរកប្រាក់ចំណូលចិញ្ចឹមជីវិតដោយមិនចាំបាច់ចំណាកស្រុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។