ក្រសួង​រ៉ែ​និង​កំពង់ផែ​ស្វយ័ត​ភ្នំពេញ​ពន្យល់​ពី​ការ​បូម​ខ្សាច់​ត្រឹមត្រូវ​ដល់​ពលរដ្ឋ​ពីរ​ខេត្ត

ដោយ អ៊ុក សាវបូរី
2015-04-25
Share
ហ៊ឺ ប៉ាវី ៦២០ អគ្គនាយក​កំពង់ផែ​ស្វយ័ត​ភ្នំពេញ លោក ហ៊ឺ ប៉ាវី បង្ហាញ​ពី​ទីតាំង​បូម​ខ្សាច់​នៅ​ទន្លេ​មេគង្គ​លើ​ក្នុង​ឃុំ​ស្ដៅ និង​រកាកោង ក្នុង​ខេត្ត​កំពង់ចាម កាល​ពី​ថ្ងៃ​ទី​២៤ ខែ​មេសា ឆ្នាំ​២០១៥។
RFA/Ouk Savborey

បន្ទាប់​ពី​ទទួល​បាន​អាជ្ញាប័ណ្ណ​ខ្សាច់​ស្រប​ច្បាប់​ពី​ក្រសួង​រ៉ែ និង​ថាមពល កាល​ពី​ថ្ងៃ​ទី​១០ ខែ​មេសា មក​នោះ នាយកដ្ឋាន​កំពង់ផែ​ស្វយ័ត​ភ្នំពេញ និង​ក្រសួង​រ៉ែ និង​ថាមពល បាន​ធ្វើ​វេទិកា​សាធារណៈ​នៅ​ខេត្ត​កណ្ដាល និង​ខេត្ត​កំពង់ចាម ដើម្បី​ពន្យល់​ប្រាប់​ប្រជាពលរដ្ឋ​រស់នៅ​តាម​ទន្លេ​មេគង្គ​លើ និង​មេគង្គ​ក្រោម ពី​សិទ្ធិ​នៃ​ការ​បូម​ខ្សាច់។ មន្ត្រី​ក្រសួង​រ៉ែ និង​ថាមពល និង​អគ្គនាយកដ្ឋាន​កំពង់ផែ​ស្វយ័ត​ភ្នំពេញ អះអាង​ថា បូម​ខ្សាច់​ជា​ការ​ស្ដារ​ទន្លេ បង្កើន​ជម្រៅ​ទឹក​ឲ្យ​ជ្រៅ និង​សម្រួល​ផ្លូវ​នាវាចរណ៍​ផង។ មិន​តែ​ប៉ុណ្ណោះ ការ​បូម​ខ្សាច់​ពី​ទន្លេ​មេគង្គ​នោះ រដ្ឋាភិបាល​នឹង​បាន​ចំណូល​ក្រាស់ក្រែល​ពី​ការ​លក់​ខ្សាច់​សំណង់ ដែល​អគ្គនាយកដ្ឋាន​កំពង់ផែ​ស្វយ័ត​ភ្នំពេញ​នេះ​បាន​ធ្វើ។

ខ្សាច់​ជា​សេចក្តី​ត្រូវ​ការ​ចាំបាច់​ក្នុង​ពេល​បច្ចុប្បន្ន​ក្នុង​វិស័យ​សំណង់។ ខ្សាច់​ក៏​បាន​ឡើង​ថ្លៃ​ចាប់​តាំង​ពី​ខែ​មីនា មក​ដល់​សព្វថ្ងៃ ពី​តម្លៃ ៦​ពាន់​រៀល ទៅ​ជាង ១០​ដុល្លារ​ក្នុង​មួយ​ម៉ែត្រ​គូប។ នេះ​ជា​ការ​លើក​ឡើង​របស់​អ្នក​ចូលរួម​ក្នុង​វេទិកា​សាធារណៈ ដែល​រៀបចំ​ដោយ​ក្រសួង​រ៉ែ និង​ថាមពល និង​អគ្គនាយកដ្ឋាន​កំពង់ផែ​ស្វយ័ត​ភ្នំពេញ នៅ​ខេត្ត​កណ្ដាល និង​ខេត្ត​កំពង់ចាម កាល​ពី​ថ្ងៃ​ទី​២៤ ខែ​មេសា ឆ្នាំ​២០១៥។

ជួស​មុខ​ឲ្យ​ពលរដ្ឋ​ក្នុង​ខេត្ត​កណ្ដាល លោក ម៉ៅ ភារុណ អភិបាល​ខេត្ត​កណ្ដាល ថ្លែង​ថា ខ្សាច់​ពិត​ជា​មិន​អាច​ខ្វះ​បាន​ក្នុង​ការ​កសាង​តំបន់​អភិវឌ្ឍន៍។ ខ្សាច់​ក៏​បាន​ឡើង​ថ្លៃ នៅ​ពេល​មាន​តម្រូវ​ការ​ច្រើន។ លោក​សំណូមពរ​ឲ្យ​កំពង់ផែ​ស្វយ័ត​ភ្នំពេញ ដែល​បាន​ទទួល​អាជ្ញាប័ណ្ណ​ស្រប​ច្បាប់ មិន​ត្រូវ​បូម​ខ្សាច់​លើស​ម៉ោង​កំណត់​ពី​ព្រហាម​ម៉ោង ៥​ទៀប​ភ្លឺ ទៅ​ដល់​ម៉ោង ៧​យប់​ទេ និង​មិន​ត្រូវ​ដំឡើង​ថ្លៃ​ខ្សាច់​ស្រេច​ចិត្ត​ដែរ៖ «ព្រោះ​គាត់​រំកិល​ទៅ​លិច រំកិល​ទៅ​កើត​អី​ទៅ។ ដល់​អ៊ីចឹង​ធ្វើ​ឲ្យ​វា​ខុស​ទៅ​គោលដៅ​ដែល​ក្រសួង​គាត់​អត់​មាន​ឲ្យ​បូម​ខុស​ទេ​តាម​ការ​សិក្សា​បច្ចេកទេស វា​ឃើញ​អ៊ីចឹង​ហើយ។ ប៉ិន​ដល់​អ្នក​ទៅ​ប្រតិបត្តិ​វា​អត់​បាន​អ៊ីចឹង​ទេ វា​ខុស​ពី​បញ្ហា​ដែល​បាន​គូស​វាស​នេះ អា​ហ្នឹង​ដែល​វា​បង្កើត​បញ្ហា។ អ៊ីចឹង​បាន​នៅ​កន្លែង​នេះ អ្នក​ណា​ជា​អ្នក​មើល? ធម្មតា​អ្នក​បូម​មិន​ខ្វល់​ទេ ពីព្រោះ​អ្នក​បូម​គិត​ថា​តែ​ភ្លេច អញ​បូម​យក​អា​កន្លែង​ខ្សាច់​ល្អ​ហើយ ព្រោះ​គាត់​បូម​លក់ គាត់​មិន​មែន​បូម​ទុក​ឯណា។ អ៊ីចឹង​គាត់​រើស​យក​តែ​ខ្សាច់​ល្អ។ ដល់​អ៊ីចឹង គាត់​ទៅ​រក​តែ​កន្លែង​ល្អ ដល់​អត់​មាន​នៅ​កន្លែង​ហ្នឹង គាត់​ទៅ​យក​កន្លែង​អត់​គូស​ឲ្យ អ៊ីចឹង​វា​មាន​បញ្ហា អ៊ីចឹង​ប្រជាជន​ត្រូវ​តែ​មើល​ថា ការ​បូម​ហ្នឹង​អត់​ត្រឹមត្រូវ​តាម​បច្ចេកទេស តាម​គំនូស​បង្ហាញ​នេះ​ទេ។ អ៊ីចឹង​គាត់​មាន​សិទ្ធិ​បញ្ចេញ​មតិ គាត់​ប្ដឹង​តវ៉ា ថា​ឥឡូវ​វា​មាន​បញ្ហា​កើត​ឡើង​ហើយ វា​បាក់​ច្រាំង​ត្រង់​នេះ បាក់​ច្រាំង​ត្រង់​នោះ ធម្មតា​ទន្លេ​មេគង្គ ជួន​កាល​វា​បាក់​ដោយ​ធម្មជាតិ ជួន​កាល​វា​បាក់​ដោយ​ការ​បូម ប៉ុន្តែ​ការ​សិក្សា​ពី​ផល​ប៉ះពាល់​បរិស្ថាន EIA យើង​គិត​ថា វា​មិន​អី​ទេ ប៉ុន្តែ​នៅ​ពេល​វា​បូម​ទៅ វា​ទៅ​ជា​អី​ទៅ​វិញ ពីព្រោះ​ជួន​កាល​បច្ចេកទេស​យើង​វា​មិន​ដល់ នេះ​ជា​រឿង​មួយ»

មេ​ភូមិ​កោះកែវក្រោម អ្នកស្រី ជា ស៊ីណា ថ្លែង​ថា ពលរដ្ឋ​មក​ស្នើសុំ​ក្នុង​វេទិកា​នេះ កុំ​ឲ្យ​បូម​ខ្សាច់​ប៉ះពាល់​ដី​កោះកែវ ដែល​អ្នក​ភូមិ​ជាង ៣០០​គ្រួសារ កំពុង​ដាំ​ដំណាំ​អាស្រ័យ​ផល​លើ​ដី​កោះ​នោះ។ អ្នកស្រី​ថា ដី​កោះកែវ​បាន​ដុះ​កណ្ដាល​ទន្លេ​មេគង្គ​ច្រើន​ឆ្នាំ​មក​ហើយ។ ប៉ុន្តែ​បើ​បូម​ខ្សាច់​នៅ​ដី​កោះ ទើប​ដុះ​ថ្មី​ក្បែរ​កោះកែវ​នេះ ពួក​គាត់​យល់​ព្រម​ឲ្យ​បូម ព្រោះ​តំបន់​នោះ​មិន​ទាន់​មាន​មនុស្ស​ដាំ​ដុះ​យក​ផល​ដំណាំ​ទេ ប៉ុន្តែ​មាន​ទូក​ជន​បរទេស​តាំង​លំនៅ​លើ​ទឹក​នៃ​កោះ​ថ្មី​ទើប​ដុះ​នោះ៖ «បើ​បូម​យក​តែ​កោះ​ថ្មី​ទៅ ទុក​កោះ​ចាស់ ដើម្បី​គាត់​ប្រកប​មុខ​របរ​ដូច​ឆ្នាំង​បាយ​គាត់​អ៊ីចឹង ចិញ្ចឹម​គោ និង​បង្កបង្កើនផល​លើ​កោះ​ហ្នឹង»

បុរស​វ័យ ៧៨​ឆ្នាំ ឈ្មោះ អ៊ុន សុផល នៅ​ភូមិ​កោះកែវក្រោម ឲ្យ​ដឹង​ថា ដោយសារ​តែ​មាន​ការ​បូម​ខ្សាច់​អនាធិបតេយ្យ​ក្នុង​ទន្លេ​មេគង្គ​កន្លង​មក ទើប​អ្នក​ភូមិ​បង្កើត​ប្រជា​ការពារ ដើម្បី​បណ្ដេញ​សាឡង់​បូម​ខ្សាច់​ដែល​លួច​បូម​ញឹកញាប់​នៅ​ពេល​យប់ ធ្វើ​ឲ្យ​បាក់​ដី និង​ផ្ទះ​ចូល​ទឹក៖ «ពួក​អា​កាណូត​ធំៗ​វា​ចូល​ទៅ​បូម បូម​យក​ខ្សាច់​មក​លក់ ចូល​ទៅ​បូម​ពួក​ប្រជាជន​បាតុកម្ម​ផ្អើល ដេញ​រត់​អស់»

ដើម្បី​បញ្ចៀស​ចម្ងល់ និង​មន្ទិល​ទាំង​ឡាយ​របស់​អាជ្ញាធរ និង​ប្រជាពលរដ្ឋ​ក្នុង​មូលដ្ឋាន​ខេត្ត​កណ្ដាល អគ្គនាយក​កំពង់ផែ​ស្វយ័ត​ភ្នំពេញ លោក ហ៊ឺ ប៉ាវី ពន្យល់​ថា ទីតាំង​ដែល​ត្រូវ​បូម​ខ្សាច់​ដើម្បី​ស្ដារ​ទន្លេ​មេគង្គ និង​ដើម្បី​បង្កើន​ជម្រៅ​ទឹក​ឲ្យ​បាន​ជ្រៅ​ជំនួយ​ចរាចរណ៍​របស់​នាវា អាច​ឲ្យ​ដឹក​ទំនិញ​បាន​រាប់​រយ​តោន​ឆ្លង​កាត់​ភ្នំពេញ គឺ​បូម​ខ្សាច់​ពី​កោះ​ទើប​ដុះ​ថ្មី​ដែល​នៅ​ក្បែរ​កោះ​កែវ និង​កោះ​ក្នុង​ឃុំ​ខ្សុំ ដែល​សុរិយោដី​មិន​ទាន់​ចុះ​បញ្ជី។ ការ​បូម​ខ្សាច់​នោះ ដើម្បី​ស្ដារ​ជម្រៅ​ទឹក៖ «បូម​ដូច​ដែល​កំពង់ផែ បាន​បូម​ជា​រៀង​រាល់​ឆ្នាំ​មក​ទេ។ អា​នេះ គឺ​ពី​កំពង់ចាម មក ឯ​កន្លែង​នេះ គឺ​ប្រឡាយ​ដែល​កំពុង​បូម​សព្វថ្ងៃ គឺ​បូម​ចប់​ហើយ ទឹក​ចាប់​ផ្ដើម​ស្រក គឺ​ខ្សាច់​ចាក់​បំពេញ​វិញ ព្រោះ​កន្លែង​នេះ រកាកោង ដែល​វា​បាក់​ខ្លាំង អ៊ីចឹង គឺ​ការ​បូម​ហ្នឹង គឺ​ពី​ហ្នឹង​មក ហើយ​យើង​មាន​កាច់​មួយ​ដើម្បី​កុំ​ឲ្យ​ប៉ះពាល់​ផ្លូវ​ទឹក។ ប៉ុន្តែ​នេះ​ជា​ប្រឡាយ​បណ្ដោះអាសន្ន​ទេ ដែល​នឹង​បូម​តែ​ឆ្នាំ​នេះ និង​ឆ្នាំ​ក្រោយ​ទេ បន្ទាប់​ពី​ឆ្នាំ​ក្រោយ​ទៅ យើង​នឹង​មាន​គម្រោង ៤ គឺ ៤​គម្រោង​នឹង​ដាក់​ឲ្យ​ដេញ​ថ្លៃ​នៅ​ចុង​ខែ​ឧសភា នេះ។ ហើយ​ការ​ដេញ​ថ្លៃ​នេះ កំពង់ផែ​ក៏​ដូច​ក្រសួង​សាធារណការ និង​ដឹក​ជញ្ជូន បាន​សុំ​ទៅ​ក្រសួង​រ៉ែ និង​ថាមពល ហើយ ថា​កំពង់ផែ នឹង​សុំ​ទៅ​ដេញ​ថ្លៃ​ដែរ»

បន្ថែម​លើ​នោះ តំណាង​ក្រសួង​រ៉ែ និង​ថាមពល លោក ឌិត ទីណា បាន​ប្រាប់​ប្រជាពលរដ្ឋ និង​អាជ្ញាធរ​ខេត្ត​កណ្ដាល ថា បើ​មាន​ករណី​បូម​ខ្សាច់​ខុស​គោលដៅ និង​ខុស​ម៉ោង​បូម​ខ្សាច់ មិន​ចន្លោះ​ពី​ម៉ោង ៥​ទៀប​ភ្លឺ​ទៅ​ដល់​ម៉ោង ៧​យប់​ទេ អ្នក​ភូមិ​អាច​ទូរស័ព្ទ​ប្ដឹង​ទៅ​លេខ ៧២៧ និង​លេខ ០៩៥ ៧២៧ ៧២៧ នោះ​ក្រុម​អធិការកិច្ច​នឹង​ចុះ​ចាប់​បទល្មើស​ភ្លាមៗ៖ «ពេល​ដែល​យើង​ផ្តល់​អាជ្ញាប័ណ្ណ​ឲ្យ​គាត់​នៅ​កន្លែង​លើ​គោក​ហ្នឹង គឺ​គាត់​មាន​កាតព្វកិច្ច​បាញ់​ទឹក​លើ​ផ្លូវ ថែ​រក្សា​ផ្លូវ គ្រប​ឲ្យ​បាន​ជិត​ការ​ដឹក​ជញ្ជូន​ខ្សាច់។ ក៏ប៉ុន្តែ​នៅ​ក្នុង​ករណី​នេះ ដោយសារ​យើង​ផ្តល់​អាជ្ញាប័ណ្ណ​ឲ្យ​កំពង់ផែ​គាត់​អត់​ធ្វើ​ការងារ​រហូត​ដល់​ដឹក​ជញ្ជូន​ទេ។ អ៊ីចឹង​ការ​ដឹក​ជញ្ជូន​នេះ វា​នៅ​លើ​ដេប៉ូ​ទៅ​វិញ អ៊ីចឹង​ហើយ​បាន​ជា​យើង​ត្រូវ​បែង​ចែក​សមត្ថកិច្ច​គ្នា​ក្នុង​ការ​ជួយ​រក្សា​កុំ​ឲ្យ​មាន​ការ​ប៉ះពាល់​ដល់​បងប្អូន​នេះ»

នៅ​ក្នុង​វេទិកា​សាធារណៈ​នៅ​ស្រុក​កងមាស ខេត្ត​កំពង់ចាម ប្រជាពលរដ្ឋ​នៅ​ក្នុង​ឃុំ​ស្ដៅ បាន​លើក​ឡើង​ថា មុន និង​ក្រោយ​ចូល​ឆ្នាំ មាន​សាឡង់​លួច​បូម​ខ្សាច់​ក្បែរ​ភូមិ​ខុស​ពី​កន្លែង​ដែល​បាន​បោះ​ពោង​កំណត់​ការ​បូម​ខ្សាច់ ដែល​មាន​ចម្ងាយ​ពី​ច្រាំង ១០០​ម៉ែត្រ៖ «ទើប​ខាន​បូម​ពី​ម្សិលមិញ​ទេ ខាន​បូម​ប្រហែល ២​ថ្ងៃ​ទេ បូម​ទាំង​យប់​ទៀត​នោះ បូម​ទាំង​យប់​ទាំង​ថ្ងៃ»

តំណាង​ក្រសួង​រ៉ែ និង​ថាមពល និង​កំពង់ផែ​ស្វយ័ត​ភ្នំពេញ បាន​ទទួល​យក​ការ​លើក​ឡើង​ក្នុង​វេទិកា​សាធារណៈ ហើយ​ឲ្យ​ប្រជាពលរដ្ឋ​តាម​ដាន​សាឡង់​បូម​ខ្សាច់។ បើ​ជា​សាឡង់​មាន​អាជ្ញាប័ណ្ណ​ត្រឹមត្រូវ គឺ​មាន​បិទ​លេខ និង​រូប​សញ្ញា​យុថ្កា និង​កប៉ាល់ ដែល​ជា​សញ្ញា​របស់​កំពង់ផែ​ស្វយ័ត​ភ្នំពេញ។ ក្នុង​វេទិកា​នោះ​ដែរ អាជ្ញាធរ​ខេត្ត​កណ្ដាល និង​ខេត្ត​កំពង់ចាម ព្រម​ទាំង​ក្រសួង​រ៉ែ និង​ថាមពល និង​កំពង់ផែ​ស្វយ័ត​ភ្នំពេញ ជំរុញ​ឲ្យ​ពលរដ្ឋ​ជួយ​តាម​ដាន​ម៉ោង​ដែល​សាឡង់​បូម​ខ្សាច់​ឲ្យ​បាន​ត្រឹមត្រូវ តាម​ការ​ពន្យល់​ប្រាប់​ក្នុង​វេទិកា​នេះ។

នៅ​ក្នុង​វេទិកា​សាធារណៈ​នៅ​ខេត្ត​កំពង់ចាម និង​ខេត្ត​កណ្ដាល ទាំង​មន្ត្រី​ក្រសួង និង​អាជ្ញាធរ​មូលដ្ឋាន សន្យា​រឹត​បន្តឹង​ការ​ដឹក​ជញ្ជូន​ខ្សាច់ ដែល​ធ្វើ​ឲ្យ​ខូច​ផ្លូវ​សហគមន៍ ដែល​ក្រសួង​រ៉ែ និង​ថាមពល សន្យា​បញ្ឈប់​ដេប៉ូ​លក់​ខ្សាច់ និង​ដក​អាជ្ញាប័ណ្ណ​ពី​កំពង់ផែ​ស្វយ័ត​ភ្នំពេញ​វិញ ប្រសិន​បើ​អនុវត្ត​អាជីវកម្ម​ខ្សាច់​រក​ឃើញ​ថា បាន​បំពាន​កិច្ចសន្យា​ជាមួយ​ក្រសួង​មួយ​នេះ។

តំណាង​អគ្គនាយកដ្ឋាន​កំពង់ផែ​ស្វយ័ត​ភ្នំពេញ អ្នកស្រី សេង គន្ធា ឲ្យ​ដឹង​ថា បច្ចុប្បន្ន កំពង់ផែ​ស្វយ័ត​ភ្នំពេញ បាន​ផ្គត់ផ្គង់​ខ្សាច់ ២​ម៉ឺន​ម៉ែត្រ​គូប​ក្នុង​១​ថ្ងៃ​ទៅ​ដេប៉ូ​ចំនួន​៨ ដើម្បី​ឲ្យ​លក់​ខ្សាច់​ក្នុង​តម្លៃ ១​ម៉ែត្រ​គូប​ចន្លោះ​ពី ៤,៥​ដុល្លារ ទៅ ៥​ដុល្លារ។ ដេប៉ូ​ខ្សាច់​ទាំង​នោះ​មាន​ដេប៉ូ​កោះ​ពេជ្រ​មួយ។ នៅ​ផ្លូវ​ជាតិ​លេខ​១ មាន​៣ គឺ​ដេប៉ូ ទន់ សម្បត្តិ ដេប៉ូ សុខ លី និង​ដេប៉ូ បឹង ស្នោ។ នៅ​ផ្លូវ​ជាតិ​លេខ​៥ មាន​២ គឺ​ដេប៉ូ ង៉ូវ ចិណា និង​ដេប៉ូ ព្រែក ព្នៅ នៅ​ផ្លូវ​ជាតិ​លេខ​៦ មាន​ដេប៉ូ​ព្រែក​តាសេក ជាដើម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល