ពលរដ្ឋ​នៅ​រតនគិរី​ចោទ​អភិបាល​ស្រុក​វ៉ឺនសៃ​ថា​ឃុបឃិត​ឲ្យ​ឈ្មួញ​ធ្វើ​អាជីវកម្ម​ខ្សាច់

ដោយ រដ្ឋា វិសាល
2015-01-21
Share

ពលរដ្ឋ​ខេត្ត​រតនគិរី ចោទ​អភិបាល​ស្រុក​វ៉ឺនសៃ ថា​បាន​ឃុបឃិត​ជាមួយ​ឈ្មួញ​ធ្វើ​អាជីវកម្ម​ខ្សាច់​ក្នុង​ទន្លេ​សេសាន​ខុស​ច្បាប់។ ការ​ចោទ​នេះ​ស្រប​ពេល​ដែល​សកម្មភាព​បូម​ខ្សាច់​បាន​បង្ក​ផល​ប៉ះពាល់​គុណភាព​ទឹក បាក់​ច្រាំង​ទន្លេ និង​បង្ក​សំឡេង​រំខាន​ដល់​ពលរដ្ឋ។

ពលរដ្ឋ​ស្រុក​វ៉ឺនសៃ អំពាវនាវ​ឲ្យ​ក្រសួង​រ៉ែ​និង​ថាមពល ត្រួត​ពិនិត្យ​អាជីវកម្ម​បូម​ខ្សាច់​ក្នុង​ទន្លេ​សេសាន ​ជា​បន្ទាន់ ពីព្រោះ​អាជីវកម្ម​នេះ​កំពុង​បង្ក​ផល​ប៉ះពាល់​ជីវភាព​រស់​នៅ​​របស់​ពលរដ្ឋ។

ពលរដ្ឋ​រស់​នៅ​ភូមិ​ហ្វាំង សុំ​មិន​បញ្ចេញ​ឈ្មោះ​រៀបរាប់​ថា សកម្មភាព​បូម​ខ្សាច់​មាន​ពីរ​កន្លែង​​ក្នុង​ភូមិ​ហ្វាំង ឃុំ​ប៉ុង កន្លែង​បូម​ខ្សាច់​នេះ​ជា​កម្មសិទ្ធិ​របស់​ឈ្មួញ​ឯកជន​ដែល​បាន​ធ្វើ​អាជីវកម្ម​នៅ​​ក្នុង​ទន្លេ​សេសាន ច្រើន​ឆ្នាំ​មក​ហើយ។ ប្រជាពលរដ្ឋ​ដដែល​បន្ត​ថា មន្ត្រី​អាជ្ញាធរ​មូលដ្ឋាន​មិន​​បាន​យក​ចិត្ត​ទុក​ដាក់​ទៅ​នឹង​ផល​លំបាក​ដែល​កំពុង​កើត​មាន​ចំពោះ​ពលរដ្ឋ​នោះ​ឡើយ៖ «ដល់​ពេល​បូម​ទៅ​ទឹក​វា​បុក​ពី​លើ​ចុះ​ក្រោម ទឹក​វា​ល្អក់ ប្រជាជន​ត្រូវ​ការ​ប្រើប្រាស់។ ថាមពល​រ៉ែ ឲ្យ​គាត់​ជួយ​ដាស់​តឿន​ទៅ​ឲ្យ​គាត់​ទៅ​កន្លែង​ណា​ទៅ ឲ្យ​វា​ស្អាត»

​ឆ្លើយ​តប​នឹង​ការ​ចោទ​ប្រកាន់​នេះ អភិបាល​ស្រុក​វ៉ឺនសៃ លោក ជុំ ងិល ទទួល​ស្គាល់​ថា ពិត​ជា​មាន​​​ការ​បូម​ខ្សាច់​ពិត​មែន។ អាជីវកម្ម​បូម​ខ្សាច់​នេះ​មាន​ការ​អនុញ្ញាត​ពី​អាជ្ញាធរ​ខេត្ត​រតនគិរី ក៏​ប៉ុន្តែ​​លោក​មិន​បាន​អធិប្បាយ​ទាក់ទិន​ផល​ប៉ះពាល់​ប្រជាពលរដ្ឋ​យ៉ាង​ណា​នោះ​ឡើយ។ លោក​បន្ត​ថា អាជីវកម្ម​នេះ​បាន​ដាក់​ពាក្យ​សុំ​អាជ្ញាប័ណ្ណ​ទៅ​ក្រសួង​រ៉ែ​និង​ថាមពល រួច​ហើយ បច្ចុប្បន្ន​ការ​បូម​ខ្សាច់​ធ្វើ​ឡើង​ដើម្បី​បំពេញ​តម្រូវ​ការ​ប្រើប្រាស់​ការ​សាងសង់​នៅ​ក្នុង​ខេត្ត​ជា​​បណ្ដោះអាសន្ន​រង់ចាំ​ក្រសួង​សម្រេច​ផ្ដល់​អាជ្ញាប័ណ្ណ៖ «សុំ​ត្រឹម​ខេត្ត​ទេ តែ​ភាគី​សុំ​ទៅ​ក្រសួង​អស់​ហើយ បូម​ពីរ​បី​ឆ្នាំ​មក​ហើយ»

ចំណែក​ប្រធាន​មន្ទីរ​រ៉ែ​និង​ថាមពល ខេត្ត​រតនគិរី លោក ហ៊ុន ប៊ុនថាន មិន​ព្រម​អធិប្បាយ​ជាក់លាក់​ពី​​​អាជីវកម្ម​បូម​ខ្សាច់​នោះ​ទេ។ លោក​ជំរុញ​ឲ្យ​ប្រជាពលរដ្ឋ​មក​មន្ទីរ​រ៉ែ​និង​ថាមពល ធ្វើការ​ដោះស្រាយ៖ «បញ្ជូន​ពួក​ហ្នឹង​ឲ្យ​ទៅ​មន្ទីរ​រ៉ែ​និង​ថាមពល ឲ្យ​គេ​ដោះស្រាយ​ទៅ ខ្ញុំ​នៅ​ប្រជុំ​ភ្នំពេញ»

កាល​ពី​សប្ដាហ៍​មុន រដ្ឋលេខាធិការ​ក្រសួង​រ៉ែ​និង​ថាមពល លោក ម៉េង ស័ក្ដធារ៉ា ថ្លែង​ក្នុង​សន្និសីទ​​​កាសែត​ស្តីពី​បញ្ហា​រ៉ែ​នៅ​សាលាខេត្ត​រតនគិរី ថា​ក្រសួង​មិន​ទាន់​បាន​ផ្ដល់​អាជ្ញាប័ណ្ណ​អាជីវកម្ម​​បូម​ខ្សាច់​ដល់​អាជីវក​រណា​ម្នាក់​នៅ​ក្នុង​ខេត្ត​នេះ​នៅ​ឡើយ ហេតុ​នេះ​កន្លែង​ធ្វើ​អាជីវកម្ម​បូម​​ខ្សាច់​នៅ​ក្នុង​ខេត្ត​នេះ គឺ​ធ្វើ​ឡើង​ដោយ​ខុស​ច្បាប់។ លោក​កត់សំគាល់​ថា កន្លង​ទៅ​ក្រសួង​ធ្លាប់​បាន​​ផ្ដល់​អាជ្ញាប័ណ្ណ​ឲ្យ​អាជីវករ​បូម​ខ្សាច់ ប៉ុន្តែ​បាន​បញ្ឈប់​វិញ​ដោយសារ​ខ្លាច​ប៉ះពាល់​បញ្ហា​ជលសាស្ត្រ​ ​និង​ច្រាំងទន្លេ៖ «អាជីវករ​គាត់​ត្រូវ​ផ្អាក​ស្រប​តាម​ច្បាប់ បើ​គាត់​នៅ​បន្ត​បូម គឺ​គាត់​អនុវត្ត​ខុស​ច្បាប់​ហើយ។ អ៊ីចឹង​យើង​ត្រូវ​មាន​វិធានការ​ច្បាប់»

ទោះ​ជា​យ៉ាង​នេះ​ក្តី មន្ត្រី​សម្រប​សម្រួល​អង្គការ​ទន្លេ​បី លោក មៀច មាន កត់សំគាល់​ថា អាជីវកម្ម​បូម​ខ្សាច់​ទាមទារ​ឲ្យ​មន្ត្រី​ជំនាញ​សិក្សា​វាយតម្លៃ​លម្អិត និង​ជាក់លាក់​ពី​ផល​ប៉ះពាល់ ព្រម​ទាំង​ការ​​​ចូល​រួម​ពិគ្រោះ​យល់​ពី​សហគមន៍​មូលដ្ឋាន។ លោក​អំពាវនាវ​ឲ្យ​មន្ត្រី​ជំនាញ​ពាក់ព័ន្ធ​យកចិត្ត​​ទុក​ដាក់​ផល​ប៉ះពាល់​ប្រជាពលរដ្ឋ និង​ធនធាន​ធម្មជាតិ​មុន​នឹង​ចេញ​អាជ្ញាប័ណ្ណ​ធ្វើ​អាជីវកម្ម​ក្នុង​ទន្លេ​​នេះ៖ «បើ​អត់​មាន​ការ​សិក្សា​ច្បាស់លាស់​ទេ ទំនាស់​វា​កើត​មាន​អ៊ីចឹង។ អាជ្ញាធរ​ខេត្ត ស្រុក អាជ្ញាធរ​មូលដ្ឋាន​ទាំង​អស់​ហ្នឹង​ប្រជុំ​ពិភាក្សា​ចែក​រំលែក​ផលប្រយោជន៍​គ្នា​ដើម្បី​ឲ្យ​សហគមន៍​គាត់​បាន​ស្ងប់​ចិត្ត​ព្រោះ​គាត់​ជា​ម្ចាស់​ធនធាន​ធម្មជាតិ»

នៅ​ខេត្ត​រតនគិរី មិន​មានតែ​ស្រុក​វ៉ឺនសៃ នោះ​ទេ នៅ​ស្រុក​លំផាត់ ក៏​មាន​អាជីវកម្ម​បូម​យក​ខ្សាច់​ពី​ក្នុង​​​ទន្លេ​ស្រែ​ពក ដូច​គ្នា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល