តំបន់​បាត​អាង​ទំនប់​វារីអគ្គិសនី​សេសាន​ក្រោម​ពីរ ជា​ប្រភព​ឧក្រិដ្ឋកម្ម​ព្រៃ​ឈើ​ខ្នាត​ធំ​នៅ​ខេត្ត​ភាគឦសាន

ដោយ វ៉ែន សុមេធ
2019-01-07
អ៊ីម៉ែល
មតិ
Share
បោះពុម្ព
ទំនប់​វារីអគ្គិសនី​សេសាន​ក្រោម២ ស្ថិត​ក្នុង​ស្រុក​សេសាន ខេត្ត​ស្ទឹងត្រែង។ រូបថត​ថ្ងៃ​ទី​១៤ កក្កដា ឆ្នាំ​២០១៧។
ទំនប់​វារីអគ្គិសនី​សេសាន​ក្រោម២ ស្ថិត​ក្នុង​ស្រុក​សេសាន ខេត្ត​ស្ទឹងត្រែង។ រូបថត​ថ្ងៃ​ទី​១៤ កក្កដា ឆ្នាំ​២០១៧។
RFA/Rann Samnang

បទល្មើស​ព្រៃឈើ​នៅ​តំបន់​បាត​អាង​នៃ​ទំនប់​រាវី​អគ្គិសនី​សេសាន​ក្រោម​ពីរ​ ក្នុង​ស្រុក​សេសាន ​ខេត្ត​ស្ទឹងត្រែង នៅតែ​កើតមាន​ច្រើន ទោះបី​ជា​រដ្ឋមន្ត្រី​ក្រសួង​មហាផ្ទៃ​ ​លោក​ ស ​ខេង​ ​បាន​បញ្ជា​ឲ្យ​ទប់​ស្កាត់ និង​ស៊ើប​អង្កេត​រក​អ្នក​នៅ​ពី​ក្រោយ​នៃ​បទ​ល្មើស​នេះ​យ៉ាង​ណា​ក្តី។ កម្មករ​នៃ​ក្រុមហ៊ុន​ទំនប់​វារី​អគ្គិសនី​សេសាន​ក្រោម​ពីរ​ និង​ ពលរដ្ឋ​រាយការណ៍​ថា​ ឃ្លាំង​ស្តុក​រាប់​ពាន់​ម៉ែត្រ​ក្នុង​តំបន់​បាត​អាង​ ​កំពុង​ដឹកជញ្ជូន​ឈើ​ចេញ​ក្រៅ​តំបន់​ផ្ទៃ​បាត​អាង​ជា​បន្ត​បន្ទាប់ ហើយ​ភាគ​ច្រើន គឺ​គេ​ធ្វើ​ឡើង​នៅ​ពេល​យប់។

កម្មករ​ក្រុមហ៊ុន​ ​និង​​ពលរដ្ឋ​រស់​នៅ​ក្បែរ​ទំនប់​វារីអគ្គិសនី​សេសាន​ក្រោម​ពីរ​ ​អះអាង​ថា ថ្មីៗ នេះ​ មាន​រថយន្ត​យីឌុប​​នៅតែ​បន្ត​ដឹក​ជញ្ជូន​ឈើ​មូល​ពី​តំបន់​បាត​អាង​ទំនប់​វារីអគ្គិសនី​សេសាន​ក្រោម​ពីរ​។ ​

ពួកគេ​បារម្ភ​ថា ប្រសិនបើ​អាជីវកម្ម​ឈើ​ខ្នាត​ធំ​មួយ​នេះ​ កម្រើក​ឡើងវិញ​ ​ទំហំ​ព្រៃឈើ​ទាំងមូល​នៅ​ខេត្ត​ភាគ​ឦសាន នឹង​រលាយ​ហិនហោច ​រួម​ទាំង​ព្រៃឈើ​ ​ក្នុង​តំបន់​ឧទ្យាន​ជាតិ​វារៈ​ជ័យ​ដែល​ការពារ​ដោយ​ព្រះរាជក្រឹត្យ​ក្តី។

ក្រុម​កម្មករ​ក្រុមហ៊ុន​ទំនប់​វារី​អគ្គិសនី​សេសាន​ក្រោម​ពីរ​ ​បង្ហើប​ឲ្យ​ដឹង​ថា​ ​សកម្មភាព​កាប់​ឈើ ​អនាធិបតេយ្យ​ទ្រង់ទ្រាយ​ធំ​ ​នៅ​ខេត្ត​ភាគ​ឦសាន​នោះ​ ​បង្កឡើង​ដោយ​ក្រុម​អ្នក​មាន​អំណាច​ ​បាន​យក​តួនាទី​អែប​ជាប់​គម្រោង​​អភិវឌ្ឍន៍​វារី​អគ្គិសនី​ ​ប៉ុន្តែ​ធាតុ​ពិត ​កាប់​ព្រៃឈើ​ធ្វើ​អាជីវកម្ម​ ​និង​​ដឹកជញ្ជូន​ទៅ​ប្រទេស​វៀតណាម​ និង​ចែកចាយ​ទៅកាន់​ដេប៉ូ​នានា ​នៅ​ក្នុង​ប្រទេស​កម្ពុជា​ ​បាន​កើតមាន​តាំងពី​ឆ្នាំ​ ២០១២ រហូត​មក​ទល់​ពេលនេះ​។​

ទាក់ទងករណី​នេះ​ដែរ ពលរដ្ឋ​រស់នៅ​ឃុំ​ស្រែ​គរ​ថ្លែង​មិន​ហ៊ាន​បញ្ចេញ​ឈ្មោះ​ ​បង្ហើប​ថា​ ​ឃ្លាំង​ស្តុក​ឈើ​​​នៅ​តំបន់​​បាត​អាង​ប្រមាណ​ជាង​ ៣ពាន់​ម៉ែត្រ​គូប ​ត្រូវ​បាន​​ក្រុមហ៊ុន​​ដឹក​ជញ្ជូន​​ចេញ​​នៅ​​ពេល​​យប់​ ​ដោយ​មាន​មន្ត្រី​អាវុធហត្ថ​ការពារ​យ៉ាង​ប្រុងប្រយ័ត្ន​។ ​លោក​ថា ​ឈើ​ទាំងនោះ​ ទំនង​ជា​របស់​ឧកញ៉ា​ដឹក​ពី​តំបន់​ឆ្ងាយៗ មក​​ទុក​ ​ធ្វើ​​អាជីវកម្ម​ ដែល​គេ​​ប្រមូល​​បាន​​ពី​​តំបន់​​​ភ្នំ​​ក្រឡា​​ពស់​ និង​​តំបន់​​ឧទ្យាន​ជាតិ​វារៈជ័យ​ជា​ដើម​ ហើយ​មក​​ស្តុក​​ទុក​ក្នុង​​ឃ្លាំង​របស់​​ក្រុមហ៊ុន​​បាត​​អាង កាល​ពី​ឆ្នាំ២០១៧​៖​ ​«ឡាន​យីឌុប​ល្បាក់ ២០គ្រឿង​ធំៗ ប្រមូល​ឈើ​ដឹក​ចេញ​មក​ក្រៅ។ ឈើ​ក្នុង​បាត​អាង​ប្រភេទ​ឈើ​ក្តារ និង​សសរ​គ្រឿង​គ្រប់មុខ»

ពលរដ្ឋ​រស់នៅ​ភូមិ​ស្ដៅ​ស្រុក​សេសាន ​លោក​ តូន ​សែន​ កត់​សម្គាល់​​ថា​ ​ឧក្រិដ្ឋកម្ម​ព្រៃ​ឈើ​​នៅ​​តំបន់​​បាត​អាង​នៃ​ទំនប់​វារីអគ្គិសនី​ បាន​​បំផ្លាញ​​ទំហំ​​ព្រៃ​​ទាំង​មូល​ ​ស្ទើរ​​គ្រប់​​តំបន់​ ​ក្នុង​​ស្រុក​​សេសាន ​ធ្វើ​ឲ្យ​​បាត់បង់​​ទី​កន្លែង​ប្រមូល​​អនុផល​​ព្រៃ​ឈើ​​​របស់​​សហគមន៍​។ ​លោក​ថា​ ​ក្រោយពី​មាន​វត្តមាន​​​ក្រុមហ៊ុន​​បាត​​អាង​ វិនិយោគ​​តំបន់​នោះ​ ​ដើម​ឈើ​​ផលិត​​ជ័រ​​ទឹក​​របស់​​អ្នក​ស្រុក​​រាប់​​ម៉ឺន​ដើម​ ត្រូវ​បាន​​គេ​​កាប់​​បំផ្លាញ​​អស់​​ទាំង​ស្រុង​​ដែរ​ ​ហើយ​​​ព្រៃឈើ​​ក្នុង​​ឃុំ​​ស្ពៅ​​រាប់​​ម៉ឺន​​ហិកតារ​​ទៀត​ ក៏​​ត្រូវ​បាន​​ក្រុមហ៊ុន​​ជួល​​កម្មករ​​កាប់​​រំលំ​​អស់​​នៅ​​រយៈ​ពេល​​ប៉ុន្មាន​​ឆ្នាំ​​ចុងក្រោយ​​នេះ។

លោក​បន្ថែម​ថា​ ​អាជីវកម្ម​ព្រៃ​ឈើ​នៅ​តំបន់​នោះ​ ​ក្រុមហ៊ុន​​បាន​​យក​​គ្រឿងចក្រ​​ឈូស​ឆាយ​ធ្វើ​ផ្លូវ​​ខ្វាត់​ខ្វែង​ ​ដើម្បី​​ងាយ​ស្រួល​​ដឹក​ជញ្ជូន​​ឈើ​​ពី​​តំបន់​​ឆ្ងាយៗ ចូល​​ការដ្ឋាន​​ក្រុមហ៊ុន​នេះ និង​ដឹក​បន្ត​ចេញ​ទៅ​ក្រៅ​ប្រទេស។

លោក តូន សែន ​សង្កត់​ធ្ងន់​​ថា​ ​បទ​ល្មើស​​ព្រៃ​ឈើ​​កើត​មាន​​ខ្លាំងក្លា ​អំឡុង​ពេល​​ដែល​​របប​លោក​ ហ៊ុន ​សែន ​រំលាយ​​គណបក្ស​ សង្គ្រោះ​​ជាតិ​ ​និង​​​រឹតត្បិត​​ស្ថាប័ន​​សារព័ត៌មាន​​ឯករាជ្យ​។ ​រីឯ​​មន្ត្រី​ ​និង​​អាជ្ញាធរ​​ពាក់ព័ន្ធ​ ​សប្បាយ​​នឹង​​ប្រព្រឹត្ត​​អំពើ​ពុក​រលួយ៖ «ឆ្នាំ​ទៅ​នេះ បាន​អស់​មែនទែន។ ឆ្នាំមុន ២ ទៅ ៣ឆ្នាំ​មុន​គេ​កាប់​មុខ​ធំៗ ដូចជា សុក្រំ កកោះ និង​ផ្ចឹក​អី​ហ្នឹង គេ​កាប់​មុខ​ធំៗ ទេ ប្រវែង ៣ ទៅ ៤ម៉ែត្រ។ គេ​កាប់​ដាក់​ឡាន​ក្នុង​វារី​​អគ្គិសនី មាន​ឡាន​ធំៗ គេ​មក​ដឹក។ អស់​សង្ឃឹម​ហើយ រាប់​ម៉ឺន​ហិកតារ​អស់​រលីង តាំង​ពី​ព្រៃ​ញើន រហូត​ដល់​ឃុំ​ស្តៅ»​។​

កម្មករ​ក្រុមហ៊ុន​ទំនប់​វារី​អគ្គិសនី​សេសាន​ក្រោម​ពីរ​ ​ថ្លែង​សុំ​លាក់​ឈ្មោះ​ ​សោក​ស្ដាយ​​យ៉ាង​​ខ្លាំង​ ​ចំពោះ​​ការ​បាត់​បង់​​ធនធាន​​ធម្មជាតិ​​ដ៏​​ធំ​​សម្បើម​​នេះ​ ​ដែល​​ពួក​​គេ​​អះអាង​​ថា​ ​ក្រុម​​ឈ្មួញ​ និង​​ឧកញ៉ា​​យក​​លេស ​សំអាត​​​បាត​អាង ​ប្រមូល​​ឈើ​​ពី​​តំបន់​​ផ្សេង​​បន្លំ​​ជា​​ឈើ​​ស្រប​​ច្បាប់ ​ដែល​​មាន​​មន្ត្រី​​រដ្ឋបាល​​ព្រៃ​ឈើ​ ​និង​ស្ថាប័ន​​ពាក់ព័ន្ធ​ ​ឃុបឃិត​គ្នា៖ «លោក ស ខេង ដាក់​បទ​បញ្ជា​ឲ្យ​អាជ្ញាធរ​ខេត្ត​ណា ទប់​ស្កាត់​ខេត្ត​ហ្នឹង គឺ​គ្មាន។ តាម​ខ្ញុំ​ពិនិត្យ​មើល​ទៅ គឺ​អាជ្ញាធរ​ដែន​ដី និង​អាជ្ញាធរ​ខេត្ត​ស្ទឹងត្រែង​ហ្នឹង គ្មាន​វិធានការ​ទប់​ស្កាត់​ឲ្យ​បាន​ជា​ដុំ​កំភួន គឺ​គ្មាន។ នៅ​តែ​ធ្វើ​សកម្មភាព លួច​ដឹក​ចេញ​យប់​ជា​រឿយៗ»​។​

អ្នកនាំពាក្យ​ក្រសួង​បរិស្ថាន​ ​លោក​ នេត្រ ​ភត្ត្រា ​បដិសេធ​មិន​ផ្ដល់​បទសម្ភាសន៍​ដល់​អាស៊ី​សេរី ​ដោយ​លោក​បាន​​ចុច​​ផ្ដាច់​​ទូរស័ព្ទ​ ​នៅ​​ថ្ងៃ​​ទី​៧ ​ខែ​មករា​។

 

ទោះ​យ៉ាងណា​ក្ដី អ្នក​នាំ​ពាក្យ​​គណៈកម្មាធិការ​​ជាតិ​​ទប់​ស្កាត់ និង​​​បង្ក្រាប​​បទ​ល្មើស​​ព្រៃ​ឈើ​ លោក​ ​អេង​ ហ៊ី ​ធ្លាប់​​ប្រាប់​​អាស៊ី​​សេរី​​ថា ការ​ស៊ើប​អង្កេត​​បទ​ល្មើស​​ព្រៃ​ឈើ នៅ​​តំបន់​​បាត​អាង​ ពុំ​​មែន​​ជា​​ភារកិច្ច​​របស់​​​គណៈកម្មការ​​ទប់​ស្កាត់​ និង​​បង្ក្រាប​​បទ​ល្មើស​​ព្រៃ​ឈើ​​នោះ​​ទេ៖ «គណៈកម្មការ​ធ្វើ​តាម​ ​តួនាទី​ដែល​មាន​ចែង​ក្នុង​សេចក្ដីសម្រេចចិត្ត។ សេចក្តី​បាន​ផ្សព្វផ្សាយ​កន្លងទៅ​ហើយ​ សូម​ឆែក​មើល​ទៅ»

កន្លងទៅ​រដ្ឋមន្ត្រី​ក្រសួង​មហាផ្ទៃ​ ​លោក​ ស ​ខេង​ បាន​ថ្លែង​ជា​​សាធារណៈ​​ទាក់ទិន​ការ​​កាប់​​ឈើ​​ពី​​ខាង​ក្រៅ​ ​បន្លំ​ចូល​​បាត​​អាង​ នៃ​​ទំនប់​វារី​​អគ្គិសនី​​សេសាន​​ក្រោម​​ពីរ​ បន្ទាប់​ពី​​ក្រុមហ៊ុន​​បាន​​បិទ​​ទ្វារ​​ទឹក​​កម្ពស់​ ៧០ម៉ែត្រ​​ជា​យូរ​មក​​ហើយ​។ ​លោក​​​ស្នើ​ឲ្យ​​អាជ្ញាធរ​​ជំនាញ​​ពិនិត្យ​​អាជីវកម្ម​​នេះ​​ឡើង​វិញ​ ក្រោយ​ពី​​លោក​​ទទួល​បាន​​លិខិត​​មួយ​ច្បាប់​ ​ទាក់ទិន​​អាជីវកម្ម​​ឈើ​​នៅ​​តំបន់​​នោះ៖ «ខ្ញុំ​សួរ​ហាស ​សារ៉េត ​ទៅ​ប្រមូល​បាត​អាង​អី​ទៀត​ ​បើ​បាត​អាង​សល់​​ទឹក​ ៧០ម៉ែត្រ​។ ​វា​មិន​មែន​សម្អាត​បាត​អាង​ វា​ទៅ​កាប់​ឈើ​នៅ​អី​ណាណី ​ថា​​សំអាត​​បាត​​អាង​។ ​វារី​អគ្គិសនី​​ធ្វើ​​យូរ​​ហើយ​ ​នៅ​តែ​​សំអាត​​បាត​​អាង​​មិន​​ទាន់​​ចប់»​។​

បើ​ទោះបីជា​ ​លោក​ ស ​ខេង​ ​ថ្លែង​បែបនេះ​ក្តី ក៏​​គេ​​ពុំ​​ឃើញ​​មាន​​ស្ថាប័ន​​ណា​មួយ​ ​បង្ហាញ​​ជំហរ​​ស៊ើប​អង្កេត​​ឲ្យ​មាន​​អ្នក​ទទួល​ខុស​ត្រូវ​​វិនាសកម្ម​​ព្រៃ​ឈើ​​នៅ​​តំបន់​​បាត​​អាង​​ដែរ​។​

ផ្ទៃ​អាង​​ទំនប់​​វារី​​អគ្គិសនី​​សេសាន​​ក្រោម​​ពីរ​ មាន​​ផ្ទៃដី​ ៣៦.០០០ ​ហិកតារ​ ឋិត​​ក្នុង​​ស្រុក​​សេសាន ​ខែ​ត្រ​​ស្ទឹងត្រែង​ ​ដែល​​មាន​​ក្រុមហ៊ុន​​ឈ្មោះ​ ​អាំង ​អែន ​អាសូស៊ី​អែត ឡយ័រ ​(Ang​&Associates Lawyer Co., Ltd ) របស់​ឧកញ៉ា គិត ម៉េង ទទួល​​សិទ្ធិ​​សម្អាត​បាត​អាង​តាំង​ពី​​ឆ្នាំ២០១២។

មេឃុំ​ស្រែ​គរ​ជាប់​ឆ្នោត​មកពី​គណបក្ស​សង្គ្រោះ​ជាតិ​ ​ដែល​របប ហ៊ុន សែន រំលាយ​ចោល លោក​ ​សៀក ​មេគង្គ ​ប្រាប់​​ថា ការ​អភិវឌ្ឍន៍​ទំនប់​វារី​អគ្គិសនី​​សេសាន​​ក្រោម​​ពីរ​ បាន​​​ភ្ជាប់​​អាថ៌កំបាំង​​ច្រើន​​ពី​​ភាព​​មិន​​ប្រក្រតី​​នៃ​​អាជីវកម្ម​ឈើ ហាក់​​ជា​​ជំងឺ​​រ៉ាំរ៉ៃ​​ច្រើន​​ឆ្នាំ​​មក​ហើយ ​ពុំ​​មាន​​ស្ថាប័ន​​ណា​មួយ​ ​ដោះ​ស្រាយ​​នោះ​​ទេ​។ ​លោក​​បារម្ភ​​ថា​ ​បទល្មើស​​ព្រៃ​ឈើ​​នៅ​​តំបន់​​បាត​​អាង ​គួរ​តែ​​បញ្ឈប់​​ជា​យូរ​មក​ហើយ ​ព្រោះ​​ក្រុមហ៊ុន​​បាន​​សង់​​ទំនប់​​រួច​​ជា​ស្ថាពរ​៖​ «ខ្ញុំ​សូម​ជម្រាប​អ្នក​ស្ដាប់​វិទ្យុ​អាស៊ី​សេរី និង​អ្នក​ស្ដាប់​វិទ្យុ​អាស៊ី​សេរី គ្រាន់​តែ​ធ្វើ​បំផ្លាញ ៣ម៉ឺន ៦ពាន់​ហិកតារ មិន​តិច​ទេ​អស់​រលីង។ ចុះ​ទម្រាំ​យក​ឈើ​ត​ទៀត អ្វី​តែ​បំផ្លាញ​ហើយ វា​ចប់​ហើយ គួរ​តែ​រក្សា​ទុក ដើម្បី​កេរ​ដំណែល​ដូន​តា​យើង»

ជនជាតិ​ដើម​ភាគ​តិច លោក​ តូន ​សែន ​បារម្ភ​ថា អាជ្ញាធរ​ពាក់ព័ន្ធ និង​សមត្ថកិច្ច​ ដែល​មាន​តួនាទី​​អនុវត្ត​​ច្បាប់​ព្រៃ​ឈើ​តែងតែ​យក​លុយ ​ពី​​អ្នក​ដឹក​​ឈើ និង​លម្អៀង​ខាង​ក្រុមហ៊ុន កាប់​បំផ្លាញ​​ព្រៃ​ឈើ​​ក្នុង​​តំបន់ ដែល​​សហគមន៍​​អាស្រ័យ​​ផល​ច្រើន​​ជំនាន់​​មក​ហើយ។ លោក​ថា បើ​ទោះ​បី​​ព្រៃ​ឈើ​​បាត់​បង់​​ធំ​ធេង​​បែប​​ណា​ក្តី ក៏​​អាជ្ញាធរ​រដ្ឋ​​គ្រប់​​ស្ថាប័ន​ មិន​​អើពើ​​ដែរ។ លោក​​រំឭក​ថា កន្លង​ទៅ​ ពលរដ្ឋ​ ៦០នាក់​ ​បាន​​ឃាត់​​រថយន្ត​​កែច្នៃ​​ដឹក​​ឈើ​​ខុស​ច្បាប់​​របស់​​ក្រុមហ៊ុន​​បាត​អាង ៣គ្រឿង​ បំណង​​ឲ្យ​​អាជ្ញាធរ​​អនុវត្ត​​ច្បាប់​ តែ​​អាជ្ញាធរ​​បែរ​ជា​​ប្រគល់​​វត្ថុ​តាង​​ទាំងនោះ​​ឲ្យ​​ឈ្មួញ​​វិញ ថែម​ទាំង​​ចោទ​​ពលរដ្ឋ​​ថា ​ជា​​ក្រុម​​បដិវត្តន៍​​ពណ៌​ប្រឆាំង​​របប​​ក្រុង​​ភ្នំពេញ៖ «គ្មាន​ពី​ណា​ខ្វល់​រឿង​សង្គម​ជាតិ ពលរដ្ឋ​បាត់​បង់​យ៉ាង​ណា​ក៏​អត់​មាន​ពី​ណា​គិត​គូរ ហើយ​ពលរដ្ឋ​ចេះ​តែ​ទុក្ខ​ព្រួយ​ក្នុង​ចិត្ត ហើយ​ក៏​អស់​សង្ឃឹម​មិន​ដឹង​ទៅ​ពឹង​ពាក់​លើ​ពី​ណា​បាន បើ​អាជ្ញាធរ​ក៏​ទៅ​តែ​អាជ្ញាធរ។ តែ​បើ​អ្នក​គាំទ្រ​គណបក្ស​គេ មាន​សកម្មភាព​ជ្រោមជ្រែង​ខ្លះ»

មន្ត្រី​ជាន់ខ្ពស់​សមាគម​ អាដហុក ​(ADHOC) ​លោក​ ​ប៉ែន ​ប៊ុណ្ណារ៍​ ​សង្កេតឃើញ​ថា ក្តី​បារម្ភ​របស់​ពលរដ្ឋ រឿង​បទល្មើស​ព្រៃឈើ នៅ​តំបន់​បាត​អាង​កើតមាន​យូរ​មក​ហើយ ពុំ​មាន​ស្ថាប័ន​ណាមួយ​ ស៊ើបអង្កេត​នោះ​ទេ​។ ​លោក​ថា ការ​បណ្ដោយ​ឲ្យ​កើតមាន​ឧក្រិដ្ឋកម្ម​ព្រៃ​ឈើ នៅ​តំបន់​នោះ គឺជា​ការទទួលខុសត្រូវ​របស់​ក្រសួង​បរិស្ថាន និង​ប្រមុខ​ដឹក​នាំ​រដ្ឋ ចំពោះ​​មុខ​​ប្រវត្តិសាស្ត្រ និង​ពលរដ្ឋ​​ខ្មែរ៖ «បើសិនជា អស់​លោក​មិន​ប្រើ​នីតិរដ្ឋ និង​ច្បាប់​ជា​ធំ​ត្រូវ​អស់ ហើយ​កូន​ចៅ​ជំនាន់​ក្រោយ នឹង​ជេរ​ស្ដី​អ្នក​ដឹក​នាំ​រដ្ឋ​សម័យ​នេះ​ហើយ។ អ្វី​ដែល​នៅ​សេសសល់​ព្រៃ​ឈើ គឺ​ជា​ការ​ទទួល​ខុស​ត្រូវ​រដ្ឋមន្ត្រី​ក្រសួង​សាមី សូម​អស់​លោក​យក​គំរូ​តាម​រដ្ឋមន្ត្រី​ក្រសួង​សាធារណការ ដែល​គាត់​ដាក់​បណ្ដឹង​បរិហារ​មន្ត្រី​របស់​លោក ដែល​ប្រព្រឹត្ត​អំពើ​ពុក​រលួយ»

បើ​ទោះបី ​មាន​ការរិះគន់​ពី​សកម្មជន​ការពារ​បរិស្ថាន​ ប្រជា​សហគមន៍ និង​សង្គម​ស៊ីវិល​ពី​ភាព​អសមត្ថភាព​របស់​របប​ក្រុង​ភ្នំពេញ និង​ក្រសួង​បរិស្ថាន​ក្តី ក៏​ឧក្រិដ្ឋកម្ម​ព្រៃ​ឈើ​នៅ​តែ​កើត​មាន​ឡើង​គ្រប់​​តំបន់​ នៅ​ខេត្ត​​ភាគ​ឦសាន។

កន្លង​ទៅ​លោក​ ហ៊ុន ​សែន ​បាន​ផ្ដល់​ឧទ្ធម្ភាគចក្រ ៣គ្រឿង​សម្រាប់​សកម្មភាព​បង្ក្រាប​នេះ និង​បញ្ជា​ឲ្យ​លោក សៅ ​សុខា ​ប្រើ​​គ្រាប់​រ៉ុកកែត​បាញ់​កម្ទេច​ឈ្មួញ​កាប់​ព្រៃ​ឈើ បើ​មិន​បញ្ឈប់​សកម្មភាព​​បទ​ល្មើស​​ព្រៃ​ឈើ​។ ​លើស​ពី​នេះ​លោក​ ហ៊ុន ​សែន ​ក៏​បាន​បញ្ជា​ឲ្យ​បញ្ឈប់​ការ​ដឹក​ឈើ​​ទៅ​កាន់​ប្រទេស​​វៀតណាម​ទៀត​ផង ក៏​ប៉ុន្តែ​បទ​បញ្ជា​​នេះ​ ពុំ​មាន​ប្រសិទ្ធភាព ព្រោះ​មិន​ដែល​ឃើញ​មន្ត្រី​ក្រោម​ឱវាទ​របស់​លោក​អនុវត្ត​តាម ​ព្រោះ​សកម្មភាព​នាំ​​ឈើ​​ឆ្លង​ដែន​ចេញ​ទៅ​កាន់​ប្រទេស​វៀតណាម នៅ​តែ​កើត​មាន​ពេញ​ទំហឹង​ដដែល​រហូត​មក​ដល់ពេល​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល