[អានអត្ថបទជា ភាសាអង់គ្លេស៖ Hundreds block Cambodian highway to protest irrigation water shortage]
ពលរដ្ឋនៅខេត្តតាកែវរាប់រយនាក់នាំគ្នាតវ៉ាបិទផ្លូវជាតិលេខ២ ដើម្បីទាមទារឱ្យអាជ្ញាធរខេត្ត និងរដ្ឋាភិបាលលោក ហ៊ុន ម៉ាណែត ដោះស្រាយបញ្ហាខ្វះទឹកធ្វើកសិកម្មជូនពួកគាត់។ ពលរដ្ឋថា ការតវ៉ានេះ កើតឡើងក្រោយពីអាជ្ញាធរស្រុកបាទី បានគេចវេះមិនដោះស្រាយបញ្ហាខ្វះទឹកជូនកសិករ បើទោះជាពួកគាត់បានស្នើសុំកិច្ចអន្តរាគមន៍នេះជាច្រើនដងមកហើយក្ដី។
សន្ទុះនៃការតវ៉ារបស់ប្រជាកសិករពាក់ព័ន្ធបញ្ហាកសិកម្ម ហាក់បន្តកើតមានឡើងជាបន្ទប់បន្ទាប់ រយៈពេលប៉ុន្មានថ្ងៃចុងក្រោយនេះ។ ជាក់ស្ដែង នៅថ្ងៃទី២១ ខែមករា ប្រជាកសិកររាប់រយនាក់ នៅស្រុកបាទីខេត្តតាកែវ នាំគ្នាចេញតវ៉ា និងបិទផ្លូវជាតិ២ ដើម្បីជំរុញឱ្យអាជ្ញាធរពាក់ព័ន្ធ ដោះស្រាយបញ្ហាខ្វះទឹកជូនប្រជាកសិករឱ្យបានត្រឹមត្រូវ ខណៈស្រូវរបស់កសិកររាប់ពាន់ហិកតារ កំពុងប្រឈមការខូចខាត។
ក្នុងការតវ៉ានេះ ប្រជាពលរដ្ឋបាននាំគ្នាយកគោយន្ត ម៉ូតូ និងដើមស្រូវចងជាបាច់ដាក់ជារនាំងបិទផ្លូវជាតិ២ អស់រយៈពេលជិត ៣ម៉ោង។ ក្នុងពេលបិទផ្លូវនោះ ពួកគាត់ប្រើប្រាស់ឧបករណ៍បំពងសំឡេង ស្រែកអំពាវនាវស្នើឱ្យអាជ្ញាធរ និងនាយករដ្ឋមន្ត្រី ហ៊ុន ម៉ាណែត ជួយដោះស្រាយបញ្ហាខ្វះទឹកជូនកសិករឱ្យបានឆាប់។ ភ្លាមៗ គេឃើញមានអាជ្ញាធរពាក់ព័ន្ធបានចុះមកសម្របសម្រួល ជាមួយពលរដ្ឋ ហើយសន្យាថា នឹងដោះស្រាយបញ្ហាខ្វះទឹកនេះ។ ក្រោយមកពលរដ្ឋទាំងនោះ បានរំសាយការតវ៉ា។
ពលរដ្ឋ ដែលបានចូលរួមតវ៉ាបិទផ្លូវជាតិលេខ២ នៅព្រឹកថ្ងៃទី២១ ខែមករា គឺលោក អោ រតនា បានបង្ហោះវីដេអូផ្សាយផ្ទាល់លើបណ្ដាញសង្គម ហ្វេសប៊ុក (Facebook) របស់លោកថា ស្រូវរបស់កសិករជាច្រើនហិកតារនៅឃុំកណ្ដឹង ស្រុកបាទី កំពុងប្រឈមខូចខាតទាំងស្រុង ប្រសិនបើគ្មានទឹកសង្គ្រោះឱ្យបានទាន់ពេលវេលានោះទេ។
បន្ថែមពីនោះ លោកថាបញ្ហាខ្វះទឹកនេះ អាជ្ញាធរអាចដោះស្រាយបាន ដោយគ្រាន់តែបើកទំនប់ទឹកពី កំពង់ទួល ស្ថិតនៅឃុំកណ្ដឹង ស្រុកបាទីឱ្យចូលមកទឹកទន្លេបាទី ដើម្បីឱ្យកសិករ ដែលមានដីស្រែ នៅជាប់ទន្លេបាទី អាចប្រើប្រាស់បាន។ ប៉ុន្តែ ពលរដ្ឋថា អាជ្ញាធរពុំបានអើពើដោះស្រាយ តាមការស្នើសុំរបស់ពលរដ្ឋនោះទេ ហើយប្រាប់ឱ្យពលរដ្ឋទ្រាំលំបាកនៅឆ្នាំនេះសិន ចាំឆ្នាំក្រោយនឹងមានទឹកប្រើប្រាស់គ្រប់គ្រាន់វិញ។ ករណីនេះធ្វើឱ្យពលរដ្ឋខឹងសម្បារ ទើបឈានដល់ការតវ៉ាបិទផ្លូវជាតិ។
លោក អោ រតនា៖«ស្រែស្រូវងាប់ចង់អស់ហើយ ប្រសិនបើអត់ជួយដោះស្រាយឱ្យពលរដ្ឋដឹងតែចប់ហើយ។ បំណុលធានារឹតតែកើនឡើង ម្នាក់ៗ មានតែរត់ចោលស្រុក។ ខាងស្រុកខាងខេត្តអត់ជួយដោះស្រាយជូនប្រជាពលរដ្ឋទេ។ ធ្វើស្រែអត់បានផលទៀត មានអីទៀត ឱ្យសង្ឃឹមអីទៀត បើសេដ្ឋកិច្ចកំពុងវេទនាអ៊ីចឹង ហើយធ្វើស្រែអត់មានទឹកទៀត។ ទឹកនៅខាងកំពង់ទួលមាន តែអត់ទម្លាក់ឱ្យប្រជាពលរដ្ឋទេ ហើយថា ឱ្យប្រជាពលរដ្ឋនឹងលំបាកឆ្នាំនេះមួយឆ្នាំសិន។ ឱ្យលំបាកយ៉ាងម៉េច ចង់ឱ្យធានាមករឹបអូសផ្ទះ ប្រជាពលរដ្ឋឱ្យអស់ ឬ?បើថ្នាក់ដឹកនាំអត់ជួយប្រជាពលរដ្ឋឱ្យប្រជាពលរដ្ឋពឹងនរណាគេឥឡូវ»។
ទាក់ទិនរឿងនេះ អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ កញ្ញា អឹម រចនា ប្រាប់វិទ្យុ អាស៊ីសេរី នៅថ្ងៃទី២១ ខែមករា យ៉ាងខ្លីថា អំឡុងពេលដែលមានការតវ៉ាបិទផ្លូវជាតិលេខ២ របស់ប្រជាកសិករនេះ រដ្ឋមន្ត្រីទទួលបន្ទុកគ្រប់គ្រងគ្រោះមហន្តរាយ លោក គន់ គីម រដ្ឋមន្ត្រីក្រសួងកសិកម្ម លោក ឌិត ទីណា និងរដ្ឋមន្ត្រីក្រសួងធនធានទឹក លោក ថោ ជេដ្ឋា បានជួបចរចាជាមួយពលរដ្ឋ ដើម្បីដោះស្រាយករណីនេះ។
ទោះជាយ៉ាងណាក្ដី អ្នកនាំពាក្យក្រសួងកសិកររូបនេះ មិនបានឆ្លើយនោះទេថា តើក្រសួងដោះស្រាយបែបណា លើបញ្ហាខ្វះទឹកស្រោចស្រពដំណាំរបស់ប្រជាពលរដ្ឋនេះ។ ដោយឡែក នៅក្នុងវីដេអូ ដែលប្រជាកសិករបានបង្ហោះលើបណ្ដាញសង្គមហ្វេសប៊ុក ពួកគាត់ ព្រមានថា កសិករនឹងនាំគ្នាតវ៉ាជាថ្មីទៀត ប្រសិនបើអាជ្ញាធរពាក់ព័ន្ធ មិនដោះស្រាយបញ្ហាទឹកជូនកសិករឱ្យបានត្រឹមត្រូវ។
ក្រុមប្រឹក្សាភិបាលរបស់អង្គការសាមគ្គីភាពកសិករកម្ពុជា លោក ឌី គន្ធា ប្រាប់វិទ្យុអាស៊ីសេរីថា ការតវ៉ារបស់ប្រជាកសិករពីបញ្ហាខ្វះទឹកស្រោចស្រពដំណាំនេះ គឺជាការឆ្លុះបញ្ចាំង ពីការបរាជ័យធ្ងន់ធ្ងរ របស់អាជ្ញាធរពាក់ព័ន្ធ ក្នុងការជួយសង្គ្រោះដំណាំស្រូវរបស់កសិករពុំបានត្រឹមត្រូវ។ ទន្ទឹមនឹងនោះ លោកសង្កេតឃើញថា ជាច្រើនឆ្នាំមកនេះ អាជ្ញាធរពាក់ព័ន្ធហាក់គ្មានឆន្ទៈ និងគោលនយោបាយច្បាស់លាស់ជួយកសិករនោះទេ ខណៈដែលកសិករភាគច្រើនប្រឈមបញ្ហាខ្វះទឹក និងខ្វះទីផ្សារលក់ស្រូវស្ទើររាល់ឆ្នាំ ដែលធ្វើឱ្យកសិករមានជីវភាពកាន់តែលំបាក។
លោក ឌី គន្ធា៖«រាជរដ្ឋាភិបាលត្រូវតែអនុវត្ត បង្ហាញឆន្ទៈនយោបាយខ្ពស់បំផុត ជាពិសេសគឺមាន ផែនការប្ដេជ្ញាចិត្តខ្ពស់បំផុត ក្នុងការដាក់ចេញនូវ កម្មវិធីគោលនយោបាយ។សិទ្ធិ និងគោលនយោបាយស្រោចស្រព ដូចជា ការស្ដារប្រព័ន្ធស្រោចស្រពបែបធម្មជាតិ(បឹង)ប្រឡាយមានស្រាប់]ឡើងវិញ។ ទី២ ការស្ដារប្រព័ន្ធប្រឡាយមេ និងប្រព័ន្ធប្រឡាយរង ដែលមិនមែនជាប្រព័ន្ធស្រោចស្រពបែបធម្មជាតិហ្នឹង។ ទី៣ ត្រូវសាងសង់ប្រព័ន្ធស្រោចស្រពថ្មីៗ បន្ថែមទៀត ដូចជាប្រព័ន្ធប្រឡាយមេ និង ប្រឡាយរងជាដើម»។
យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយដែលបានចេញផ្សាយពេញមួយឆ្នាំ២០២៤ បង្ហាញថា យ៉ាងហោចណាស់ មានដំណាំស្រូវកសិករជាង ១១សែន (១១៩.៤៦៥)ហិកតារ រងផលប៉ះពាល់ និងជាង ៣ម៉ឺន (៣០.៥៣៥)ហិកតាររងការខូចខាត ដោយគ្រោះរាំងស្ងួតនៅរដូវប្រាំង។
ពលរដ្ឋ និងមន្ត្រីសង្គមស៊ីវិលលើកឡើងថា កម្ពុជា គឺជាប្រទេសកសិកម្ម និងមានប្រភពទឹកចេញពីទន្លេមេគង្គ និងអាងទន្លេសាបថែមទៀត រដ្ឋាភិបាលដឹកនាំដោយ បក្សប្រជាជនកម្ពុជា បណ្ដែតបណ្ដោយឱ្យបញ្ហាខ្វះទឹកធ្វើកសិកម្ម បន្តកើតឡើងជារៀងរាល់ឆ្នាំនោះទេ។ ពួកគាត់បារម្ភថា ប្រសិនបើករណីនេះ នៅតែបន្តកើតមាន នឹងធ្វើឱ្យកសិករជួបការលំបាក ដោយសារតែបញ្ហាខ្វះទឹកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។