ក្រុមអ្នកអភិរក្សសត្វរកឃើញសម្បុកពងកូនរបស់ កន្ធាយក្បាលកង្កែបជាលើដំបូងនៅដើមរដូវពងកូន
2020.12.31
ក្រុមអ្នកអភិរក្សសត្វវាស់ទំហំពងកូនកន្ធាយក្បាលកង្កែប នៅក្នុងស្រុកសំបូរ ខេត្តក្រចេះកាលពីថ្ងៃទី ៣០ ខែធ្នូ ឆ្នាំ២០២០។
រូបថត៖ WCS
ក្រុមអ្នកអភិរក្សសត្វ នៃអង្គការសមាគមអភិរក្សសត្វព្រៃ និងរដ្ឋបាលជលផល បានរកឃើញសម្បុករបស់សត្វល្មិច ឬហៅថា កន្ធាយក្បាលកង្កែបជាលើកដំបូង ក្នុងរដូវពងកូន ក្នុងឆ្នាំ ២០២០នេះ នៅក្នុងស្រុកសំបូរ ខេត្តក្រចេះ។
អង្គការសមាគមអភិរក្សសត្វព្រៃបានរៀបរាប់នៅលើទំព័រហ្វេសប៊ុក នៅថ្ងៃទី ៣០ ខែធ្នូ បញ្ជាក់ថាសម្បុកដំបូងដែលក្រុមអ្នកការពារសម្បុក របស់អង្គការសមាគមអភិរក្សសត្វព្រៃ និងរដ្ឋបាលជលផលបានរកឃើញនោះ មានពងកូនចំនួន សាមសិបពីរគ្រាប់ (៣២)។
កន្ធាយក្បាលកង្កែប ឬហៅថា ល្មិច នេះជាពូជសត្វកម្រ ដែលអ្នកអភិរក្សបានប្រទះឃើញនៅតំបន់មួយចំនួន តាមដងទន្លេមេគង្គ ក្នុងខេត្តក្រចេះ និងខេត្តស្ទឹងត្រែង។ អង្គការសហភាពអន្តរជាតិដើម្បីអភិរក្សធម្មជាតិ (IUCN) បានបញ្ចូលពូជកន្ធាយក្បាលកង្កែបនេះ ទៅក្នុងបញ្ជីក្រហមរបស់ខ្លួន ក្នុងប្រភេទសត្វជិតផុតពូជផងដែរ។
អង្គការសមាគមអភិរក្សសត្វព្រៃ ធ្លាប់បានចេញផ្សាយក្នុងថ្ងៃទិវាសត្វអណ្ដើក កាលពីខែឧសភាថា នៅឆ្នាំ២០២០ ក្រុមអ្នកការពារសម្បុក បានរកឃើញសម្បុកពងកូនរបស់ កន្ធាយក្បាលកង្កែបចំនួន ៤៩សម្បុក ដែលមានពងកូនសរុបជាង មួយពាន់ ប្រាំពីររយក្បាល (១,៧៥៦)។ ចំនួនសម្បុកពងកូន ដែលរកឃើញនៅឆ្នាំ២០២០ គឺច្រើនជាងឆ្នាំ ២០១៩ ចំនួនពីរសម្បុក។
អង្គការដដែលនេះ បានបង្ហាញបន្ថែមថា ពូជសត្វកម្រនេះ មានចំនួនតិចតួចប៉ុណ្ណោះនៅតាមបណ្តាប្រទេសដទៃទៀត ដោយឡែកនៅប្រទេសវៀតណាម និងប្រទេសថៃ គេរកឃើញថាចំនួនកន្ធាយក្បាលកង្កែបនេះ បានចុះថយចំនួនយ៉ាងច្រើន ដោយសារតែការនេសាទ ជួញដូរ និងការប្រមូលពងកូនរបស់វា ទៅធ្វើជាម្ហូបជាដើម។
ទោះយ៉ាងណា អ្នកការពារសម្បុក នៃអង្គការសមាគមអភិរក្សសត្វព្រៃ នៅកម្ពុជា អះអាងថានឹងព្យាយាមការពារសម្បុកពងកូនរបស់កន្ធាយក្បាលកង្កែប ពីដៃជនល្មើសដែលចង់លួច ឬបំផ្លាញ។ ម្យ៉ាងទៀតក្រុមអ្នកការពារសម្បុកសង្ឃឹមថា នឹងអាចរកឃើញសម្បុកពងកូនថ្មីៗបន្ថែមទៀត ក្នុងរដូវពងកូន ក្នុងអំឡុងពេលចុងឆ្នាំនេះ និងដើមឆ្នាំក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ